Asse'amaa'n Baxo 15

Yerusaalee'm Dummichchi Bikkina

1 # Qes 12:3 Mat mat manni Yihuxxi uulliinsi Anxooke'e dillita'a amma'nnito'i keenina «Muse'i See'llisanne ballachchantakkobeelas#15:1 Gaassi doollenne Ayihuxxi minaadabiinsi bagaan mulli minaadab ballachchantam hee'llo'oyyo. gattakkeena xantakkamoyyo» yita'a losissam hee'llo'o. 2Phaawuloosii Baarnabaasii ee keeninne malaayyaamisa fitanto'o. Ee lasage Anxooke'enne hee'llo'i amma'nnaan Phaawuloosaa Baarnabaasaa ixxuwwi lambe'iinsi mat qax mannaa doo'llita'a oo keen Yerusaaleema fitta'a matta'a Yesuus asse'amaaninnee lommanninnee ka woshshi bikkina a'llantona qooddo'o. 3Amma'nnaanim ixxuwwa geegeesso'aare Fiinqe'innee Samaare'innee aa'lla'a higgu'uuyyi mulli minaadabiinsi Waa'i kollonne daba'llito'isa kutto'aare oo woshshi amma'nnaan hundam lobakata liiransukko. 4Yerusaaleema affo'i ammanenne Yesuus asse'amaan, lommannii amma'nnaanii hundim ixxuwwa aa'llo'o. Ixxuwwim Waa'i ixxuwwinne ihaa baxu bax hundam kutto'o. 5Ihukkaarem Farisaawe'uwwiinsi amma'nnito'i kee'nnek mat mat ki'lla'a «Mulli minaadabiinsi amma'nnito'i keeno ballachchimmii Muse'i Seera egettamisa issimmii hasisookko» yito'o.

6Yesuus asse'amaanii lommannii ee woshsha a'llanta'a mutteena dummito'o. 7#Ass 10:1 Ixxuwwim lobakata fitanta'a lasage Pheexiroos ki'aa «Iyyabbaayyuwwa, mulli minaadab iinniinsi mishiraachchi sagara macceessa'a amma'nnita'a gattamisina Waa'i gaassaatim ki'nnuwwi lambe'iinsi eese doo'llukkisa laqqakkamo. 8#Ass 10:44; 2:4 Mannika wodano la'oo Waa'i niina uwwu Keesammi Ayyaana ixxuwwinam uwwimminne ixxuwwam aa'ukkisa caakkisaa la'isaakko. 9Ixxim ixxuwwi Yesuusanne amma'nnito'i bikkina ixxuwwika wodano muccussukko bagaan ni lambe'ennee ixxuwwi lambe'ennee annannooma issukkoyyo. 10Ee bikkina niyyanno'ii neesee iyyineena xannumbee'i iyyo amma'nnaa'n gudumonne iyyiisimminne kaba Waa'a mahina keentakkamuulla? 11Ihona bagaan neesem ixxuwwisam Moollanni Yesuus eroommanne amma'nnimminne gantummisa amma'nninoommo» yukko.

12Ee ammanenne Baarnabaasii Phaawuloosii Waa'i ixxuwwinne ihaa mulli minaadaphphi lambe'enne issu maalalsiisoo dut mare'ee agannaa kuttu'uuyyi dummito'i manni hundim cawwita'a macceesso'o. 13Ixxuwwi kutta'a guullita'a lasage Yaaqoobim «Iyyabbaayyuwwa, anim wocoommi woshsha macceessehe. 14Waa'i gaassaatim mulli minaadabiinsi ixxi lombina ihoo manna doo'llimminne hinkido'i eroomminne ixxuwwa moo'uda'e Simi'oon kuraakko. 15Hiraagaan ka woshshinne kobi'lloo woshsha

16-18 # Amo 9:11-12 ‹Siriinsim ki'isaa ka hundam la'isu Waa'i

«Gatto'i minaadab hundim

oohim mulli minaadab hundim

i summinne weeshanto'i keen

i kollonne daba'llitamisina

an ka lasage daba'llaa waaraa

gindamu Daawiit mine baxoommo. #15:16-18 «Gindamu Daawiit mine baxoommo» yookkok Keesammi Minenne ikko'i amma'nnaano ki'isoo'isa kurimminatte.

Ee gindamukkokam baxaa uullisoommo» yaakko› yita'a kitaabbo'ookko.

19Ee bikkina i sawwit mulli minaadabiinsi Waa'i kollonne daba'llito'i keeno hawwinsoombee'isinatte. 20#Doy 34:15 Ihona bagaan qophpha'n waa'ina kitimamaa haashaaramu maara itimma, saa'immaa baytu diinaxxi maaraa xiigaa itimmaa uttamisina kitaambaa asse'nnona. 21Mashka'oomim Muse'i Seera Usheexxaxxi Ayyaamonne wixxixxi minneewwannee beero'uwwi hundannee gaassiinsim ki'issa'a qananaa'llu'uuyyii kuttu'uuyyii yo'o» yukko.

Dummichchi Woshsha Amma'nnaanina Asse'llo'isa

22Ee lasage Yesuus asse'amaan, lommannii Yerusaaleemanne hee'llo'i amma'nnaanii hundim mat ikka'a Phaawuloosinnee Baarnabaasinnee maqire mattamisina mat qax manna doo'llita'a Anxooke'e asse'immi eran ihukkisa sawwito'o. Ee bikkina amma'nnaa'n lambe'iinsi la'anto'oo keeno Baarsabaasa yakkam Yihudaa Sillaasaa doo'llita'a asse'llo'o. 23Asse'llo'i assim,

«Neese ki'nnuwwi abbaayyuwwi Yesuus asse'amaan, lommannii ka beyyonne yo'i amma'nnaanii hundim Anxooke'enne, Sooriyannee Kilqe'ennee hee'llakkam mulli minaadabiinsi Yesuusanne amma'nnitakko'i niyyabbaayyuwwina xummaato hincaa'nnoommuulla. 24Mat mat keen ni lambe'iinsi ki'nnuwwi beyyo matta'a asse'nnumbee'i luwwa kuttu'uuyyi ki'nnuwwa hawwisso'isaa tiiro bi'issoo'isaa neese macceensaammo. 25-26Ee bikkina neese dumminaa mat wodan inkaa iittammaa ni Moollanni Yesuus Kiristoos bikkina ixxuwwi gaga higissa'a uwwito'i neese iittinoommi Baarnabaasinnee Phaawuloosinnee maqirem ki'nnuwwi beyyo mattamisina mat qax manna doo'llinaa asse'nnaammo. 27Neese woshsha mullaa kitaambaa asse'nnummi asso suuminnem edda'a kuttamisina Yihudaa Sillaasaa endaa asse'nnaammo. 28Kanniinsi woroon yoo hasisoo ijaajiinsi bagaan mulli iyyo endaa iyyiinsoombee'isina neesee Keesammi Ayyaanii iittammaammo. 29Oo ijaajim qophpha'n waa'ina kitimakko'i luwwa itimmiinsi, xiigaa bayitaa itimmiinsii saa'immiinsii ki'nnuwwi gaga ege'llehe. Ee keeniinsimdu ki'nnuwwi gaga ege'llitakkolas hore'em danaamo. Xummanne hee'llehe» yita'atette.

30Oo asse'anto'i keenim geegeesanta'a lasage Anxooke'e dillita'a amma'nnaan hundam wixxaa'lla'a ee kitaabamu asso uwwito'o. 31Amma'nnaanim ee kitaabamu asso qananaa'lla'a lobakata liiranto'o. 32Odim Yihudii Sillaasii hiraagaan hee'llo'i bikkina amma'nnaano qoxxisoo dut luwwa soggo'o. 33-34Ixxuwwim lobakat balla afuutta'a lasage amma'nnaan ixxuwwa «Xumminne mallehe» yita'a geegeesso'aare Yesuus asse'amaa'n beyyo daba'llita'a matto'o.#15:33-34 Mat mat tiraxxi kitaabbuwwanne «Ihukkaarem Sillaas ee beyyonne gateena sawwite murukko» yamamaa kitaabamaakko. 35Ihukkaarem Phaawuloosii Baarnabaasii dut mulli keeninne maqirem ee Anxooke'enne Moollanni sagara losissamii kuttamii hee'llo'o.

Phaawuloosii Baarnabaasii Annanni Ikko'isa

36Hofqax ayyaamiinsi lasage Phaawuloos Baarnabaasina «Moollanni sagara kullummi beero'uwwanne hundannem yo'i amma'nnaan hinkid yoda'e moo'nneena daba'llinaa mallona» yukko. 37Baarnabaasim Maarqoosa yakkam Yohaannisa ixxuwwinne maqire maroo'isina hasukko. 38#Ass 13:13 Ihukkaarem Phaawuloos oo Maarqoos baxina ixxuwwinne maqire maroo'n sabaa Phimfiliya yakkam uullanne ixxuwwiinsi annanni ihaa gatu bikkina ixxuwwinne edamaa marona hasukkoyyo. 39Maarqoos mashka'inne ixxuwwi lambe'enne malaayyaam wocanchi firukkaare annanni ikka'a Baarnabaas Maarqoosa amadaa markabanne aagaa Qoophphiroosa yakkam uulla marukko. 40Phaawuloosim Sillaasa amadaa mareena doo'llukkaare amma'nnaan Waa'ik eroommi ixxenne maqire ihoo'isina Waa'ina yabo uwwita'a lasage 41Sooriyannee Kilqe'ennee do'ukkuuyyi amma'nnaano qoxxisam hee'ukko.

Currently Selected:

Asse'amaa'n Baxo 15: KeesKita

Highlight

Compare

Copy