อาซาคารา 12
12
ลอง เฌาพรา ดี วี คยอด ดูอี แคง มืง เยรูซาแลม
1เฌาพรา วี กาลาง โฆรห ลอง เฆ ดูอี อีซาเรลัะ. เฌาพรา อี แฮะ เบลห อูน เบลณ บอ ฆางหราว, อี แฮะ แตห อึณ มึห ดัง กาดาย, บอ แฮะ แตห ดูอี มึห น็อห พึอม, อัน แฮะ กาลาง อูน ปาย นี. 2“โอว ดี โบง แตห มืง เยรูซาแลม บอ มืง ยูดา ปี ซีลัยะ อึม มางูน อี แตห ดูอี อี กอย กาตัด เดียง กอ ยึต. เฆ บอกาเฆลียด โลว เดียง แคง ซีลัยะ ตี. เฆ รันซู บอ ตัห แวง โรบ อี เฮา ดี มืง เยรูซาแลม. 3ซีแง ตี, โอว ดี โบง แตห มืง เยรูซาแลม ปี มาว อี จัน กาเซา ดี เฆ ดูอี บอกาเฆลียด แดง กาดาย. เฆ อี กาโพรม ดี โจะ มาว ตี, เฆ ดี บอ กาดูห เซา ดอน อี.” 4เฌาพรา ต็อห, “ซีแง ตี โอว ดี โบง แตห มังปร็อง เฆ รึร กาฟัร กาเฟียน. เฆ อี ป็อะ มังปร็อง, เฆ ดี บอ แบน รึร แบน ฟึณ. โอว ดี บอ บัร ดี ยอด แมน เฆ ดูอี อายูดา บอ แตห งาย มังปร็อง เฆ วี อับ.” 5เฆ ดา ตาง อี แยต ดูอี อายูดา, เฆ ดี บอ กาพา แคง น็อห เฆ ต็อห, “ดูอี แคง มืง เยรูซาแลม, เฆ แฮะ วี มึห โปลม มึห แฮณ โคว, เฌาพรา ปี กรึบ เฆ มูห เฌาพรา อี อึบ โตต ดอน โมยว.”
6ปัน อัน ตี โอว ดี แตห เฆ ดูอี อี แยต เฆ ดูอี อายูดา ปี กาโละ เงา อี กอย แคง อึณปึม เฮ บอ เงา ราง อี กอย กาแต เหรียง. เฆ ดี บอ กาซึม ดูอี บอกาเฆลียด อี กอย โคบ เฆ บอ บลาก อาฆัะ บลาก อาอัห มืง เยรูซาแลม. เฆ ดูอี อี กอย แคง มืง เยรูซาแลม ยี ดี กอย ซีคยา.
7เฌาพรา ดี บอ แตห เฆ ดา ซึก ยูดา ออง อาต อี เฮา, แกวะ แตห อาพูง ดังโคว ครึร คูนดีคัม อาดาวีด บอ อาพูง ดังโคว ดูอี แคง มืง เยรูซาแลม ตาง หลึอม อาพูง ดังโคว เฆ ดูอี ดอน อี แคง มืง ยูดา. 8ซีแง ตี เฌาพรา ดี บอ บัร ฆ็อง แร ดูอี แคง มืง เยรูซาแลม. วี อี มึห แฮณ เปรต, อัน ดี บอ มึห โปลม ตาง ปี คูนดีคัม อาดาวีด. เฆ ครึร อาดาวีด ตี, เฆ ดี บอ แบน ปี เฌาพรา, ปี บอ อามู อามาด เฌาพรา อี แยต เฆ. 9โอว ดี บอ ปยาต เฆ ดูอี ดอน ฌึร ดอน โมยว อี แฮะ ตัห ต็อห ดี ปยาต มืง เยรูซาแลม.
10ดอ อัน ตี โอว ดี ดัว น็อห อี ดี เฆฌู บอ น็อห อี ซี ซาคึร แตห อึณ กอย โดบ หลูกหลาน อาดาวีด บอ เฆ ดูอี แคง มืง เยรูซาแลม. เฆ ดี บอ วี ยึร โอว วี แปะ แฮะ บลูห เฆ. เฆ ดี บอ วี ยาม วี หงูน, แตห อึณ ปี ฆูณ อี แฮะ หงูน แฮะ ยาม โกบ แฮะ ยัม ฆอน อีมาย อัน อี มูห แคะ อู วี. 11อึณ ดี บอ มึห อี หงูน ตาง, ยาม ตาง แคง มืง เยรูซาแลม ปี อี แฮะ ดึอม ยาม ตาง ดี มืง ฮาดัดรีโมน อี กอย โดบ ดีลัยะ มีกีตอ ตึอน. 12เฆ ดูอี แคง มืง บอ มืง ดี บอ หงูน บอ ยาม โกบ แฮะ กลึร กาเซา เฆ. ดอน อึณโฮม ดี กาย็อห พึง อีมาย บอ พึง อีบึณ. แคง อึณโฮม อาดาวีด เฆ ยาม โดบ อึณโฮม อานาทาน. 13อึณโฮม ดูอี อาเลวี บอ กลึร โดบ อึณโฮม อาซีมี. 14เฆ บีนอง อี ซี ฆีด ซี กอย แคง อึณโฮม เฆ ดูอี อายูดา, เฆ บอ กาย็อห ยาม แคง พึง อีบึณ บอ แคง พึง อีมาย.
Currently Selected:
อาซาคารา 12: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
