อท 2

1อี มูห แม, แตห แม มาโนว ดารา อี โดบ นา มูห นา หมาน. 2แตห แม มาโนว เฆ อีมาย อี แฮะ กัด แฮะ แฆ, แตห เฆ แป ดี อึบ โดว บรีม เฆ, แตห เฆ มึห ซาเร, บอ นับ ดี โบง โดบ อางยาน บอด. แตห เฆ บอ หณึม บอ ร็อก ซีคยา บอ มึห น็อห คัม ดี ยืน เหลณ.

3บอ เฆ ยา กัด มืร ปาย ตี, แตห เฆ โบง อี กาอาบ โบง, แตห เฆ โรวเซ เฌาพรา. แกวะ แตห เฆ แบน ดูอี อี แค อาฆยาง อี เฮา บอ ยึต ป็อห, แตห เฆ ยี นับ ดี มาโนว อี เฮา โบง นา บอด นา หมึอม. 4เซ อึณ ปาย ตี, เฆ ดี ปึอน ดี มาโนว เฆ ยา บาหนึม เตียะ, แตห เฆ ยา บาหนึม เตียะ ตี, วี นับ ดี ร็อก อีมาย เฆ บอ ฆอน เฆ. 5แตห เฆ แบน อีบึณ อี แป ดี อึบ โดว บรีม เฆ บอ มึห น็อห ลูย น็อห ซีงา. แตห เฆ บอ นับ ดี ยอด ลึมลา อึณโฮม เฆ, บอ มึห น็อห กาเว อี. แตห เฆ บอ คัม ดี โทม โฆรห อีมาย เฆ. เซ เฆ โบง ปาย ตี, อาว มึห อาเซ อี ปึอน ดี ลูกตาย โฆรห เฌาพรา.

6บอ เฆ อีมาย อี ซี หนึม มืร, แตห แม มาโนว ปาย ตี. แม โลว กาซูห เฆ, แตห เฆ แป ดี อึบ โดว บรีม เฆ. 7บอ แม, แคะ ปี โบง แม ดอน โมยว, แตห แม โบง นา บอด นา หมึอม, แตห เฆ บอ นับ ดี ณึง แม. แตห แม บอ มึห น็อห ซืร ดี มาโนว, อาว โลว ลังฆลึอน. 8แตห แม กาลาง นา มูห นา หมาน เซเซ. แกวะ แตห อี เฮา มึห ดี แน บอ กาลาง นา ตู หมึอม ลอง แม. แกวะ แตห เฆ อี โบง กาบัห ตึอน มึห ดี แนนัะ คอ อู โมยว, แตห เฆ วี ซาย อี.

9บอ เฆ อี มูห หมาย อี, แตห แม มาโนว เฆ, แตห เฆ คัม ดี โทม โฆรห ดา กาณา เฆ เซเซ, แตห เฆ บอ โบง ปี อึง ดา กาณา เฆ ดอน โมยว, แกวะ แตห เฆ วี แทณ ดา กาณา เฆ. 10แกวะ แตห เฆ ปรา ดี ดึห โกรว ดา กาณา เฆ, แตห ดา กาณา เฆ บอ ปึอน หณึม น็อห เฆ อาคาคัร. ปาย ตี อึณ ดี แตห ดา กาณา เฆ บอ นับ, โฆรห ปี มาโนว เอ ลอง เฌาพรา อี คยอด อี, อึณ มึห อาฆยึร.

11โคว, เฌาพรา แฮะ ฮอต บยัะ เฆฌู อัน ดี ดูอี ดอน อี, แตห อัน ปึอน ดี คยอด ดอน อี. 12ปี เฆฌู เฌาพรา ตี, อึณ แตห เอ นับ ดี วัห ปี ตู อึง เฌาพรา, บอ ตู โดบ ปี อึง ดูอี อี ตู หณึม เฌาพรา. ดอ กอย เอ ฌาด นี, อึณ บอ จอย แตห เอ นับ ดี อึบ โดว บรีม เอ, แตห เอ มึห ซาเร บอ นับ ดี โรวเซ เฌาพรา. 13เอ โลว โบง ฌึร ตี ดอน โมยว ดอ หน็อะ เอ เฌา เยซู อี มูห ปี หน็อะ อึณด็อะ เอ. ปัน ดี ตัห เฌา เยซู อี แฮะ คยอด เอ, อี มูห เฌาพรา อี บอด มยาด ปี กรึบ เอ, อัน ดี มึห อาพูง ดังโคว ตาง. 14เฌา เยซู แฮะ คัม ดี แวน อาซาก โดว บรีม อัน โกบ เอ, แตห อัน ปึอน ดี ทูด เลห เอ แคง อี ตู หมึอม ดอน โมยว, อัน แตห เอ วี มึห น็อห ลูย น็อห ซีงา, แตห เอ แบน อาโมยว อัน, แตห เอ บอ มึห น็อห ซี โบง นา บอด นา หมึอม เซเซ.

15ลอง อัน ตี ดอน โมยว แตห แม มาโนว เฆ อี หณึม เฌา เยซู แคง มืง เกรทา. แม มึห ปวน ดี กาซูห เฆ, แตห เฆ โบง นา หมึอม บอ ดัม ซาดีก ดี เฆ, แกวะ แตห เฆ กาลึบ. แกวะ แตห อาเซ ปึอน ดี ลูกตาย แม.

Currently Selected:

อท 2: pce

Highlight

Copy

Compare