รม 16

1โอว ซี แตห เบ นับ ลอง นาง เพบี อี มูห วา เอ อี โบง ฆาน แคง พึง เฌา เยซู, อี กอย แคง มืง เกนเซ, อัน มูห ดูอี หมึอม. 2โกบ มูห อัน ดูอี ปี อึบ เฌาพรา, แตห เบ รวห อัน บอ โบง ปี กาอาบ โบง ดูอี อี หณึม เฌาพรา. เซ อัน บอ โลว มาเซ, แตห เบ จอย อัน. โคว, อัน มืร แฮะ จอย กืน อี เฮา. บอ โอว อัน แฮะ ดึอม จอย.

3บอ นาง พีคีลา ฆาย อีมาย อัน อี จืร อาคีลา, แตห เบ กาลาง ดี ฆาย ลอง แฮะ นัมโหลห โอว ดี ฆาย. ฆาย แฮะ โบง รึม ฆาน เฌา เยซู โดบ โอว. 4ฆาย แฮะ รีน ดี ยัม โกบ โอว. อาว วัน มี โอว อี แฮะ ดาง ฆูง เฆฌู ดี ฆาย. เฆ ดูอี อาโมยว เฮา อี กอย แคง พึง เฌา เยซู อี กอย ดอน นา ดอน โปละ, บอ เฆ แฮะ ดาง ฆูง เฆฌู ดี ฆาย.

5โอว นัมโหลห บอ เฆ ดูอี แคง พึง เฌา เยซู อี กอย รึม แคง กาง ฆาย ตี.

โอว นัมโหลห บอ อาเอเปนีก อี มูห ฆึก ปี ร็อก โอว. อัน บอ มูห อี หณึม เฌา เยซู ดี อาต อี เฮา แคง อืง อาซียา นี.

6โอว นัมโหลห บอ นาง มารี อี แฮะ โฆยวฆยา ดี โบง ฆาน กืน อาดา เบ.

7โอว นัมโหลห บอ อาอันดานีด บอ อายูนีอาด อี มูห วอแว โอว. ฆาย แฮะ คัม ดี โจห กาปึม โดบ โอว. แคง เฆ ดูอี ปี ร็อห ปี ตึย เฌา เยซู, แฮะ มูห ฆาย ตี, ปี มึห อี เฮา ดี กาลาง นา บอด นา หมึอม ลอง ฆาย. ฆาย มืร แฮะ หณึม เฌา เยซู อาต หณึม โอว.

8โอว นัมโหลห บอ อาอัมบาลี อี มูห ฆึก ปี ร็อก โอว โกบ หณึม โอว เฌาพรา.

9โอว นัมโหลห บอ อาอูราพัน อี แฮะ โบง รึม ฆาน เฌา เยซู โดบ เย, บอ อาซาตากู อี มูห ฆึก ปี ร็อก กาเซา โอว.

10โอว นัมโหลห บอ อาเบนลัะ, อี มูห ดูอี อี แฮะ คัม ดูก โกบ หณึม อัน เฌา เยซู. อัน ยี ตู แวน ปี หณึม อัน.

โอว นัมโหลห บอ ดูอี แคง อึณโฮม อารีตอปูลู.

11โอว นัมโหลห บอ อาเฮโรวตายาน อี มูห วอแว โอว.

โอว นัมโหลห บอ เฆ บีนอง อี หณึม เฌา เยซู อี กอย แคง กาง อานาซูน.

12โอว นัมโหลห บอ นาง ตารูโพวนี บอ นาง ตารูโพวซา อี แฮะ โฆยวฆยา ดี โบง ฆาน เฌาพรา.

โอว นัมโหลห บอ นาง เบรูซี อี มูห ฆึก ปี ร็อก โอว. บอ อัน แฮะ โฆยวฆยา ดี โบง กืน ฆาน เฌาพรา.

13โอว นัมโหลห บอ อารูพู อี มูห ดูอี ปี ร็อห เฌาพรา, บอ มา อัน อี แฮะ มาด โอว แฮะ ปี ฆอน อัน.

14โอว นัมโหลห บอ อาซูกรีด, บอ อาพาเลกูน, บอ อาเฮเรม, บอ อาบัดรอบา, บอ อาเฮรามัก, บอ เฆ บีนอง อี กอย รึม โดบ เฆ.

15โอว นัมโหลห บอ อาพีลอกูด บอ นาง ยูลี บอ อาเนรู ฆาย วา อัน อี มูห อีบึณ บอ อาโอวลีมบา บอ เฆ ดูอี อี หณึม เฌาพรา ดอน อี อี กอย รึม โดบ เฆ.

16แตห เบ ลาย ม็องการา ดัว ดอน อี บอ ลาย อูห ปี บีนอง อี แฮะ ลาย ร็อก. เฆ ดูอี แคง พึง เฌา เยซู มืร, แฮะ นัมโหลห เบ บอ ดีหมอด ลอง เบ.

17อึย เบ บีนอง, โอว ดัม เบ, แตห เบ ซาดีก ดี เฆ ดูอี อี นับ ดี โบง แตห เบ ลาย กาย็อห กาเรห บอ โบง แตห อึณ หณาบ โดบ เฌา เยซู บอ มาโนว กาบัห ดี แปะ แฮะ ดึอม เฮน เบ. แกวะ แตห เบ โดบ ดูอี เฆ ตี. 18โคว, ดูอี เฆ ตี, เฆ โบง แล แตห วัต เฆ ฆึห. เฆ ตู โบง ฆาน เฌา เยซู อี มูห เฌาพรา ปี กรึบ เอ. เฆ บอ นับ ดี กาลาง โฆรห ดาคึย โฆรห งาม, บอ โหมว ดี กาโลว ดูอี อี ตู เฌณฌา, อี หงึย หณึม. 19ดูอี บอกาเฆลียด แฮะ นับ, เบ แฮะ หณึม แฮะ โทม โฆรห เฌาพรา. โคว, โอว มืร แฮะ โคย คาคัร. โอว บอ ซี แตห เบ มึห อางยาน อี บอด อี หมึอม, แตห เบ มึห บอ น็อห ซืร น็อห หมาน, แกวะ แตห เบ โบง นา ฮาย นา มืก.

20อาว บอ เหลณ เฌาพรา อี นับ ดี ดัว น็อห เฆียด ดี เบ, อัน ดี ทีบ โบว กานัม อี จืร ซาตาน, แตห อัน กอย ครึม เปลา เบ. แตห เฌา เยซู อี มูห เฌาพรา ปี กรึบ เอ เฆฌู เบ เซเซ.

21บอ อาทีโมวเท อี โบง รึม ฆาน โดบ โอว, บอ อัน นัมโหลห เบ. บอ อาลูซี บอ อายาโซน บอ อาซาซีดา อี มูห วอแว โอว, เฆ แฮะ นัมโหลห เบ.

22โอว อาเตราตี อี มูห ดา จาเร อี แดม แปะ นี, โอว นัมโหลห เบ โกบ หณึม เอ เฌาพรา.

23อาฆายู อี มูห ดา กาณา กาง โดง กอย โอว นี, อัน แฮะ แตห เฆ ดูอี แคง พึง เฌา เยซู ตัห กอย กาฌูะ ดี กาง อัน. บอ อัน แฮะ นัมโหลห เบ.

บอ อาราทู อี มูห ดา อี ปา รึอน แคง มืง, บอ อากาจู อี มูห บีนอง เอ อู วี, ฆาย แฮะ นัมโหลห เบ.

24แตห เฌา เยซู เฆฌู เบ ดอน อี. ซาตู.#16:24 บับ ดอ โฆว มัง โมยว ตู มึห กาบัก นี

25แตห เอ อืบ เฌาพรา อี มึห อาพูง ดังโคว ตาง. อัน เฌา บอ นับ ดี แตห เบ หณึม ซีคยา โกบ หณึม เบ โฆรห เฌาพรา อี แตห น็อห ดูอี ดาคึย, อี มูห ลอง เฌา เยซู. อึณ มูห โฆรห แปะ แฮะ กาลาง อี ดี เบ. อู ซีณ ดอ มึอน แฮะ เหลณ กาเซา เฌาพรา ตู ดึอม แตห อี นับ ลอง อัน ตี. 26อัน เฌา อี กอย เซเซ, อัน แฮะ ดึอม จัร เฆ ดูอี อี บยาน โฆรห อัน, แตห เฆ แดม อูน ลอง อัน ตี. ดอ ตี นี, อัน ยี แฮะ แตห อึณ ลึห ซีคยา ลอง ปี แดม อูน เฆ ตี. อัน เฌา แฮะ โบง ปาย ตี, แตห เฆ ดูอี ดอน โมยว อี กอย แดง กาดาย ปึอน ดี หณึม บอ โทม โดบ โฆรห อัน ตี. 27โคว, โกบ หณึม เอ เฌา เยซู, แตห เอ อืบ มยูก เฌาพรา อี มูห มี อู กาดัง อี แฮะ มึห อางยาน บอด. แตห เอ อืบ มยูก อัน เฌา เซเซ, แตห อาพูง ดังโคว อัน แว กืน เซเซ. ซาตู.

Currently Selected:

รม 16: pce

Highlight

Compare

Copy