พพ 4

1อึย เบ บีนอง, เบ มูห ดูอี ปี ร็อก โอว, ปี ดีเกน กาเซา โอว. เบ บอ มูห อี แตห น็อห โอว ดาคึย, แฮะ แบน รูห ฆาน ปี โบง โอว. โคว, แตห เบ บีนอง ปี ร็อก โอว หณึม บึง ซีคยา เฌาพรา, แตห อึณ ปี ปี กาลาง โอว ตี.

2โอว ยี กาซูห นาง เอโววดี บอ นาง ซูนโดก, แตห ฆาย วี ลาย โพรม รึม โกบ หณึม ฆาย ดี เฌา เยซู. 3บอ แม อี โบง คาคัร ฆาน รึม โดบ โอว, อี มูห บอ ฆึก โอว, โอว หมาณ, แตห แม จอย อีบึณ ฆาย อา วี ตี. โคว, ฆาย แฮะ โบง รึม ฆาน โดบ โอว, กาลาง ลอง เฌาพรา อี แตห น็อห ดูอี ดาคึย. ฆาย แฮะ โบง รึม ฆาน บอ โดบ อากาเลมีน บอ เฆ อี เฮา อี แฮะ กอย รึม โดบ โอว. จืร เฆ ดอน อี แฮะ ฮอต แดม อูน แคง บับ ฌาราง เฆ ดูอี อี ปึอน อาซาก กามาย.

4แตห เบ โคย ดาคึย โกบ หณึม เบ ดี เฌา เยซู. ปอ อู เฌณ โอว ต็อห, แตห เบ โคย ดาคึย. 5แตห ดูอี ดอน อี กอ ยึร, เบ แฮะ มึห น็อห อึณจูะ อึณจัม. เฌาพรา แฮะ กอย กาตัด เบ.

6แกวะ แตห เบ มึห น็อห กาฮัวะ คอ อู โมยว. แตห เบ ยี หมาณ ดี เฌาพรา แคะ ปี โลว เบ. ดอ ซาคึร หมาณ เบ ดอน โมยว, แตห เบ ยี กาลาง บอ ฆูง เฆฌู ดี อัน เฌา. 7เซ เบ โบง ปาย ตี, น็อห เฆียด ปี ดัว เฌาพรา ปี ตู ปึอน เฌณฌา อางยาน ดูอี, อึณ ดี บัร น็อห พึอม เบ, แตห อึณ กาดึก กาด็อะ ดี เฌา เยซู.

8อึย เบ บีนอง, โอว ซี กาลาง ปอ อู โมยว ดี เบ. แคะ มึห อี มูห อี หมาน อาคาคัร, แคะ มึห อี หมึอม, บอ อี ซืร ซืร หมาน หมาน, แคะ มึห อี ซีงา บอด บอ อี หมึอม ร็อก, อี กาอาบ โรวเซ, แคะ มึห อี บอด อี หมึอม, อี แฮะ กาอาบ อืบ มยูก, แตห เบ กาดัวะ กาพา ลอง อัน ตี แคง น็อห เบ. 9แตห เบ โบง โดบ แปะ แฮะ ดึอม เฮน เบ ดี โอว. อึณ บอ มูห โฆรห ปี กาลาง โอว ดี เบ, บอ มูห ปี ยึร เบ โอว โบง, แตห เบ โบง โดบ ฌึร ตี ดอน โมยว. ปาย ตี, เฌาพรา อี นับ ดี ดัว น็อห เฆียด, อัน ดี กอย รึม โดบ เบ.

10ดอ ตี นี, เฌาพรา แฮะ วี แตห น็อห โอว โคย กาเซา. โคว, เบ แฮะ วี มึห น็อห ซี นัมโหลห โอว. อาต นี, อาว มูห เบ ตู นัมโหลห โอว, เบ ยี ตู ปึอน จอย มาเซ ดี โอว.

11โอว กาลาง ปาย ตี, อาว มูห โกบ แฮะ ฌูด ลูด โอว, ตู มึห มาเซ. โอว แฮะ ฮอต ดึอม ครู ตัห, โอว มึห แคะ เหมา, น็อห โอว ดาคึย แคะ ตี. 12โอว แฮะ ดึอม คัม แบน โมยว แบน โมยว. โอว แฮะ ดึอม กาดูห ตู มึห มาเซ คอ อู โมยว, ปี วี มึห เฌะฌูง โตต ดอน โมยว. โอว แฮะ ดึอม เอต ปี ดี โฮม, ปี วี มึห ดี โฮม กอ แพ. โอว แฮะ ดึอม มึห โกรวกราม กืน, ปี วี แบน ดูอี ฆีน กาเซา. อึณ บอ แบน ฌึร เหมา ดี โอว มืร, อึณ แฮะ มาโนว โอว, แตห น็อห โอว ดาคึย ปาย ตี. 13โอว ปึอน โบง โตต ดอน โมยว. โคว, เฌา เยซู แตห แฮณ ดี โอว.

14มาแล, แปะ แฮะ จอย เบ ดี โอว ดอ แฮะ ดูก แฮะ หณาบ โอว, แฮะ มูห อี บอด อี หมึอม. 15เบ ดูอี อี กอย แคง มืง พีลีพี, เบ มืร แฮะ ฮอต นับ, ซีณ ดอ โฆว ดอ กาจูห โอว ดี กาลาง ลอง เฌาพรา อี แตห น็อห ดูอี ดาคึย ดอ เลห ตัห โอว แคง อืง มาเคโดน ตึอน, อาว มึห พึง เฌา เยซู ดี เหมา อี คัม ดี หลู ดี จอย โอว, อึณ มึห มี พึง เบ อู พึง อี จอย โอว ปาย ตี. 16ดอ กอย โอว แคง มืง เทซาโลน ตึอน, ดอ มึห โอว ปี ดี โลว แบน โมยว แบน โมยว, เบ มืร แฮะ ดึอม ตึย ตัห รึอน ดี โอว แบน เฌณ แบน เฌณ. 17โอว ตู กาลาง ปาย ตี โกบ ซี ปึอน โอว รึอน ปี หลู เบ. โอว ยี ซี แตห เบ ปึอน อาฆยึร ปอ อึณ ปัว. 18ดอ ตี นี โอว แฮะ ปึอน ดี ดึห โตต แคะ ปี ตึย ตัห เบ ดี โอว. อึณ กอ แฮะ วี กาหลึอม แคะ ปี โลว โอว. อาเอปาพอ แฮะ ดึห ตัห ดัว โตต ดี โอว แคะ ปี หลู เบ. อึณ แฮะ โฆรว แคะ ปี โลว โอว. ปี หลู เบ ตี, อึณ แฮะ แบน ปี หลู อี อูห หงูน ดี เฌาพรา. อึณ แฮะ ล็อะ กาเซา น็อห อัน.

19โกบ หณึม เบ เฌา เยซู, เฌาพรา ปี กรึบ โอว, อัน ดี ดัว โตต ดอน โมยว แคะ ปี โลว เบ. อัน มูห เฌาพรา อี มึห อาพูง ดังโคว บอ มึห ดี ดัว ดี อี เซเซ.

20เอ อืบ เฌาพรา อี มูห ฆูณ เอ, อี มึห อาพูง ดังโคว ตาง บอ กอย เซเซ ดอน โจว ดอน บาน. ซาตู.

21โอว นัมโหลห เบ ดูอี อี ซีงา บอด อี หณึม เฌา เยซู ดอน อี. บอ เฆ บีนอง อี กอย รึม โดบ โอว ดี นี, บอ เฆ แฮะ นัมโหลห เบ. 22บอ เฆ ดูอี อี ซีงา บอด บอกาเฆลียด แฮะ นัมโหลห เบ. อึณ ยี มูห เฆ อี โบง ฆาน แคง โฮว คูนดีคัม อาแกซา ตึอน, เฆ แฮะ นัมโหลห กาเซา เบ.

23แตห เฌาพรา บอ เฌา เยซู เฆฌู บอ น็อห บอ พึอม เบ ดอน อี. ซาตู.

Currently Selected:

พพ 4: pce

Highlight

Copy

Compare