อานาโฮม 3
3
1เฆ ดูอี แคง มืง นีนีเว มูห มี ดูอี ซีมา กาโลว บอ ง็อห ยัม อี เฮา. เฆ ดี ฌัม ดูก ตาง. แคง มืง ตี มึห โกรวกราม กืน กาเซา ปี พาด ตัห เฆ ดี รันซู เฆ.
2แตห เบ โทม ปี มัห เฆ อี ป็อะ ลักเลา ตา อึณเพียะ, โทม บอ ฮัม กาเลณ กาหลอย, ฮัม มังปร็อง กาแบลบ บอ ฮัม ลักเลา อี ฮาว แฮ แฮ โดบ อึณเตณ แคง มืง.
3แตห เบ ยอด ดา ซึก อี ป็อะ มังปร็อง อี แฮะ ดึห เลห มาปัวะ ลาง เฆ อี กาลัะ มาบรีว. เฆ มืร แฮะ ง็อห ยัม ดูอี กืน กาเซา. โดว ยัม เฆ ตี บอ กอย โดบ อึณเตณ. ดูอี อี เตา ฮาว บอ ตา ดูห ดี โดว ยัม เฆ ตี, วี ดีปลาด เกห. เฆ ปี วี ยีต, ปี วี เกห ปอ เฌณ.
4เฆ โลว คัม ฌึร ตี ดอน โมยว โกบ แฮะ กาลึบ เฆ, ตู โบง นา มูห นา หมาน. เฆ บอ นับ ดี ปีชีด อารึบ เฆ, แตห อึณ กาซูห น็อห อี เฮา. เฆ ดูอี แคง มืง นีนีเว แฮะ มาโนว ดอน อี แตห เฆ กรึบ เฌา ปี กรึบ เฆ อี ตู มูห เฌาพรา. แตห ดูอี ดอน นา ดอน โปละ โบง โดบ ปี โบง เฆ.
5เฌาพรา อี อึบ โตต ดอน โมยว ต็อห, “โกบ แฮะ โบง เบ ปาย ตี โอว แฮะ แบน รันซู เบ. โอว ดี วี ฆลัต ครึง ตา เบ, แตห อึณ ลึห ดี อี เฮา เบ แฮะ ฆลัะ, แตห ดูอี ดอน มาน ดอน มืง ยึร แคะ หมึอม ซาย เบ.
6โอว ดี ดึห อี หมึอม กาอีห ปัะ ดี เบ, โบง แตห เบ หมึอม กาดาต, ปี วี ดึห เบ, เบลห อูน เบ, แตห อี เฮา ยึร.
7แคะ กอย เฆ อี ตัห ยึร เบ ตี, เฆ ดี บอ กาจัว บอ ต็อห, “ดูอี แคง มืง นีนีเว แฮะ ฮอต ลึร ชึม โตต. อึณ ยี ตู มึห อาเซ ดี บอ กลึร บอ หงูน อาดา เฆ.” อึณ ยี ตู มึห อาเซ อี ดี ตัห เหลา น็อห เบ.”
8อึย เบ ดูอี แคง มืง นีนีเว, เบ ตู หมึอม หลึอม มืง เซบี. มืง ตี แฮะ กอย ดี กาแต แบลง อึม อี แฮะ ปี แรง มืง, อี แฮะ ฆ็อง แฮะ แร เฆ.
9แบลง อึม นีลา แฮะ ปี โดง ดี เครียง เฆ ดา ซึก เฆ อี แฮะ มัน ซีคยา. มืง ฆูซา บอ มืง แอฆึบ แฮะ แบน โปลม แบน แฮณ ปี มืง นีนีเว. โปลม เฆ แฮณ ตี แฮะ ปี อึณ ตู นับ ดี โตต ดอ เหมา. เฆ ดูอี แคง มืง พูด ฆาย มืง ลีบี แฮะ ดึอม แบน อี จอย อี ฆัม เฆ ดูอี แคง มืง นีนีเว ตี.
10เฆ รันซู ยี แป มืง เซบี บอ เฆ ดูอี แคง มืง ตี กาดูห ดี เหมต ฮาว ปอ โปละ. ฆอน งัะ เฆ กาดูห ดี ง็อห ยัม ซัต แวน ดี อึณเตณ ดอน ณ็อง. เฆ ดูอี อี มึห ซาเร แคง มืง ตี, เฆ กาดูห ดี คัม แตห รันซู กาตาม อาเซ ดี โลว แบน หมาย เฆ. เฆ ดูอี ตาง อี มึห ซาเร กาดูห ดี คัม อี ปัก เฆ ตา วัน ฮีน.
11เบ ดูอี แคง มืง นีนีเว, เบ ดี ฮาว โฆะ แฆะ ปี ดูอี ยึต ป็อห. เบ ดี โยว บอ เครียง ดี อาต ดา ซึก. รันซู เบ ดี ตัห กาโฆห ดี เบ.
12โดง เครียง เฆ ดา ซึก เบ, เฆ ดี กาปยาต ลึร โตต. เฆ ดี หราย ปี เบล ดีปู แฮะ ซีน ดี อาต ดี โจห แคง โมต ดูอี อี ดียูห ดัง เฮ เบล ตี.
13ดา ซึก เบ ตู มึห โปลม ตู มึห แฮณ ปี อีบึณ. มาโลห มืง เบ ดี บอ วึห ตาง ตาง, แตห รันซู เบ ลึบ, แตห เฆ โดะ กาซึม มืง เบ.
14แตห เบ ต็อะ อูน อึม เบ อาดา อาคราว ปัน ดี ตัห แวง โรบ รันซู เบ ดี เบ. แตห โดง เครียง เฆ ดา ซึก เบ มัน ซีคยา. แตห เบ ดึห โณะ อาดา ดี แณต มาว มาอูด. แตห เบ บอ แรน อูน ปืง อัน.
15เงา ดี บอ กาซึม เบ. มาปัวะ ลาง ดี บอ แดบ แวน เบ. รันซู เบ ดี บอ ปยาต แวน เบ, แตห อึณ ปี มา อาโฌ็ง ดี โฮม โหงว. เบ ปี บอ มึห ดูอี กืน กาเซา, แตห อึณ กอ ปี มา อาโม็ง มืร, เบ ดี ชึม โตต.
16เฆ ดูอี อี กาจึห กาย็อง โกรวกราม แบน โมยว แบน โมยว, เฆ แฮะ แตห มืง ครัม กาเซา. มาแล, ครัม ตี ดี หราย โตต, ปี พึง มา อาโฌ็ง แฮะ ตัห โฮม โตต บอ วี บึณ ฮาว.
17บอ ดา กาณา เบ แฮะ ปี มา อาโฌ็ง อี กอย รึม แดง โล็ง เฮ ดอ ฌัม ซีแง ฆัด กาเซา. เซ ดาด ฮี วี ทอง, เฆ บอ นับ ดี วี บึณ ฮาว, วี หราย โตต.
18อึย แม คูนดีคัม อี อึบ มืง อาซูรียา, เฆ อามู อามาด แม แฮะ ฮอต ยัม โตต. เฆ ดูอี ปี อึบ แม มืร แฮะ กอย กาย็อห กาเรห แดง นอน ดอน นา ดอน โปละ. อาว ฮู มึห ดูอี อี ปี ดา อี เฮียง มาบู, อี แตห เฆ ตัห กอย กาฌูะ กาดึม.
19อึณ ปี แม แฮะ มึห เซา บอ ดีม อี ตู นับ ดี หราย. ดีม แปะ แฮะ ปึอน แม แฮะ ตาง แฮะ ลึก กาเซา, แตห แม ยัม. แคะ กอย เฆ อี ยึร ลอง แม ตี, เฆ ดี บอ ดาคึย บอ กาทัะ แด เฆ บอ แนนัะ แม. โคว, อึณ ตู มึห อาเซ อี ตู ดึอม คัม นา ฮาย นา มืก แปะ แฮะ โบง แม.
Currently Selected:
อานาโฮม 3: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
