มท 21

ลอง เฌา เยซู ลึบ แคง มืง เยรูซาแลม

1เฆ บอ ตัห ฌัม กาตัด มืง เยรูซาแลม. อึณ มึห เรา เบดพาเฆ, อี กอย ดี โคบ นอน เฮ นามัน. เฆ บอ ตัห ฌัม โดง ตี, เฌา เยซู วี จัร ดีแบ อัน อา วี, แตห ฆาย ฮาว แคง เรา ตึอน. 2อัน ต็อห, “แตห บาย ฮาว แคง เรา อี กอย กาตัด ดอย. บาย ฮี ลึบ แคง เรา, บาย ดี วี ยึร มาลา อู โดว อี มูห โดว อาหยาง แปะ แฮะ ปัก อูน เฆ. อัน บอ มึห ฆอน อี กอย รึม โดบ อัน. บาย ฮี ยึร มาลา ตี, แตห บาย วี ฆ็อห วัน ปี ปัก เฆ, วี ตึณ ตัห บอ อา โดว ดี นี. 3เซ อึณ มึห อี ต็อห ดี บาย, ‘เหมา อึณ ปาย ปี โบง บาย ปาย ตี,’ บาย โลว ต็อห, ‘อัน เฌา อี โลว มาลา นี. ฮี ฮอต, อัน ดี วี ดัว วีว อู เฌณ.’”

4ปาย ตี, อึณ บอ แบน ปี ดึอม กาลาง ดูอี อี บยาน โฆรห เฌาพรา ดอ มึอน. อัน แฮะ ดึอม ต็อห, 5“แตห แม กาลาง ดี เฆ ดูอี อี กอย แคง มืง ฌีโอน#21:5 มืง ฌีโอน ฆาย มืง เยรูซาแลม มูห อู โมยว. ‘แตห เบ ยอด, อึณ มูห คูนดีคัม เบ, อี แฮะ ตัห. อัน มึห น็อห อึณจูะ อึณจัม. อัน ป็อะ ฆอน มาลา, ตัห โดง กอย เบ.’”

6ดีแบ เฌา เยซู อา วี ตึอน, ฆาย วี ฮาว โบง แคะ ปี จัร เฌา เยซู ฆาย โบง. 7ฆาย วี ตึณ มาลา ตัห โดง กอย เฌา เยซู. เฆ อี เฮา วี ดึห ครึง ปี ตา เฆ, เบลห ดี กาตูะ มาลา, วี ดัว เฌา เยซู ป็อะ นา แดง. 8เฆ ดูอี กืน บอ ดึห ครึง ปี ตา เฆ, เบลห แดง อึณเตณ. บอ มัง อี แฮะ ฮาว แคง แปร บอ แดบ รา จึก, วี เบลห แดง อึณเตณ, แตห เฌา เยซู ฮาว นา แดง. 9เฆ ดูอี อี แยต ดี อาต เฌา เยซู บอ เฆ ดูอี อี โดบ ดี ปัน, เฆ บอกาเฆลียด ดัด ตาง ต็อห,

“อืบ อัน เฌา, อี มูห หลูกหลาน อาดาวีด. แตห เฌาพรา ม็องการา แตห ดี ดูอี ปี ตึย อัน. อืบ อัน เฌา อี ตาง หลึอม โตต.”

10เฌา เยซู แฮะ ฌัม แคง มืง เยรูซาแลม, เฆ ดูอี แคง มืง บอ มืง บอ นับ ลอง อัน ตี. เฆ วี ดีหมอด เฆ อี ตัห. เฆ ต็อห, “ดูอี ตี, อัน มูห อาเซ?”

11เฆ ดูอี กืน วี ต็อห, “อัน จืร อาเยซู. อัน มูห ดูอี อี บยาน โฆรห เฌาพรา ตัห มืง นาซาเรต, อี กอย แคง อืง อี จืร ฆาลีเล.”

ลอง ปี โบง เฌา เยซู แคง แวง โฮว เฌาพรา

12เฌา เยซู บอ ลึบ แคง แวง โฮว เฌาพรา. อัน บอ โฮว เลห ดูอี อี ลาย กาจึห กาย็อง แคง แวง โฮว เฌาพรา. อัน โจะ กาเบลียะ กาโช็ง เฆ ดูอี อี ลาย การ็อห กาฆู รึอน บอ ปยาต แวน โดง ย็อง เฆ มาโบลย. 13อัน ต็อห ดี เฆ, “แคง บับ เฌาพรา แฮะ แดม อูน, ‘กาง โอว มูห โดง ตัห ซาคึร ดูอี ดี เฌาพรา.’ เบ ยี แฮะ โบง แตห อึณ ปี โดง ตัห กาฌูะ ดา โฌน.”

14ดอ กอย เฌา เยซู แคง แวง โฮว เฌาพรา ตึอน, เฆ ดูอี อี งาย อับ บอ เฆ ดูอี อี ตู ปึอน ฮาว, เฆ วี ตัห โดง กอย อัน. อัน มืร ปีแกน เฆ. 15อึณ บอ มึห ฆอน อี กอย แคง แวง โฮว เฌาพรา ตึอน. เฆ วี ดัด ตาง ต็อห, “อืบ อัน เฌา, อี มูห หลูกหลาน อาดาวีด.” อึณ ยี มึห เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา ยูดา, เฆ บอ โทม โฆรห ฆอน เฆ ตี บอ ยึร นา หมึอม อาม กาเซา ปี โบง เฌา เยซู. อึณ ยี ตู ล็อะ น็อห เฆ.

16เฆ วี ดีหมอด เฌา เยซู, วี ต็อห, “แม นับ โฆรห ปี ดัด ฆอน เฆ ตี?” เฌา เยซู วี ต็อห, “โอว แฮะ นับ ลอง อัน ตี. อึณ ยี มูห เบ. เหมา อึณ ปาย ปี ตู ดึอม ตีห เบ แคง บับ เฌาพรา ลอง อัน ตี? อึณ ต็อห, ‘อัน เฌา แฮะ แตห เฆ ฆอน ดีแตด บอ เฆ ฆอน ดีรอย วี อืบ อัน.’”

17อัน แฮะ ฮอต กาลาง โฆรห ตี ดี ดา ตาง ตึอน, อัน วี เลห โดง กอย เฆ, วี ฮาว ฌัม แคง เรา เบทานี, วี ตัม แคง เรา ตี.

ลอง เฮ ดีปู อี ยัม

18ปา แคหณา ซีณวัห เจว, เฌา เยซู บอ ดีแบ อัน วี เลห แคง เรา เบทานี ตึอน, วี ฮาว มืง เยรูซาแลม. ดอ ฮาว เฆ โดบ อึณเตณ, เฌา เยซู วี กาปราณ ปี ดี โฮม. 19อัน บอ ยึร เฮ ดีปู อี กอย โคบ อึณเตณ. อัน วี ฮาว กาตัด, วี ยอด, อาว มึห เบล อัน. มึห มี หลา อัน. ปัน ตี อัน วี ต็อห ดี เฮ ตี, “แกวะ แตห แม วี มึห เบล ดอ เหมา.” เฌา เยซู แฮะ ฮอต กาลาง โฆรห ตี, เฮ ตี วี เฮียะ ดีหลัห อู เฌณ.

20เฆ ดีแบ อัน บอ ยึร อาตี, เฆ วี อาม กาเซา. เฆ วี ดีหมอด เฌา เยซู ต็อห, “เหมา อึณ ปาย ปี เฮียะ เฮ ตี?”

21เฌา เยซู วี ต็อห, “โอว ต็อห อาคัร ดี เบ. เซ เบ หณึม ซีคยา, ตู มึห น็อห กาลีง กาแล, บอ เบ ปึอน ดี โบง แคะ ปี โบง โอว ดี เฮ ตี. อาว วัน แคะ ตี. เบ ดี บอ ปึอน ดี ต็อห ดี นอน, ‘แตห แม กาโทะ โดง กอย แม นี, วี โลง แคง อึม ดึง.’ แฮะ ฮอต, อึณ ดี บอ แบน ปาย ตี. 22เซ เบ ซาคึร ดี เฌาพรา, เซ เบ บอ หณึม อัน เฌา, เบ ดี บอ ปึอน แคะ ปี หมาณ เบ.”

ลอง ปวน เฌา เยซู

23ปัน ตี เฌา เยซู วี ลึบ แคง แวง โฮว เฌาพรา, วี มาโนว ดูอี. ดอ อัน ตี เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ตาง อี อึบ มืง, เฆ ตัห โดง กอย อัน. เฆ ต็อห, “แม แฮะ ดึห ปวน อาเซ, โบง ปี โบง แม ดอน โมยว? อาเซ แฮะ ควาง แม โบง ฌึร ตี?”

24เฌา เยซู วี เวียะ โฆรห เฆ ตี. อัน ต็อห, “บอ โอว ดี วี ดีหมอด เบ. เซ เบ นับ ดี กาลาง ดี โอว, บอ โอว ดี แค ดี เบ ลอง ปวน ปี ดึห โอว, โบง แคะ ปี โบง โอว. 25อาเซ แฮะ จัร ดา ซารา อายอฮาน ตึอน, แตห อัน จึบ ดูอี แคง อึม? อึณ มูห เฌาพรา? อึณ มูห ดูอี?” เฆ วี ลาย ซังคยาง ลอง อัน ตี กาแต เฆ. เฆ วี ต็อห, “เซ เอ ดี ต็อห, ‘อึณ มูห เฌาพรา,’ อัน ดี บอ ต็อห, ‘เหมา อึณ ปาย ปี ตู หณึม เบ ดี อัน?’ 26เซ เอ ยี ต็อห, ‘อึณ มูห ดูอี’ เอ โลว โยว ดูอี กืน. โคว, เฆ บอกาเฆลียด ต็อห, ดา ซารา อายอฮาน ตึอน มูห ดูอี อี บยาน โฆรห เฌาพรา.” 27แฮะ ฮอต ลาย ซังคยาง ปาย ตี, เฆ วี ต็อห ดี เฌา เยซู, “เย ตู นับ ลอง อัน ตี.” เฆ แฮะ ฮอต กาลาง โฆรห ตี, เฌา เยซู วี ต็อห, “เซ อึณ ปาย ตี, บอ โอว ตู กาลาง ดี เบ ปวน อาเซ โอว ดึห, โบง ปี โบง โอว.”

ลอง โลว โทม เฌาพรา

28เฌา เยซู วี แค อูพามา. อัน ต็อห, “มาเซ ปี ทาง เบ ลอง ปี กาลาง โอว ดอ ตี นี? อึณ แฮะ ดึอม มึห ดูอี อู วี. อัน มึห ฆอน อีมาย อา วี. อัน วี ฮาว โดง กอย ฆอน อัน อู วี, วี ต็อห, ‘อึย ฆอน, อาตึร แตห แม ฮาว โบง ฆาน แคง มาน มางูน เอ.’

29ฆอน ตึอน วี ต็อห, ‘โอว ตู ฮาว.’ มาแล, วาย แฮะ ฮอต อัน กาลาง โฆรห ตี, อัน วี บยอง น็อห, วี ฮาว โบง แคะ ปี จัร ฆูณ อัน โบง.

30แฮะ ฮอต ปัน ตี ฆูณ ตึอน วี ฮาว โดง กอย ฆอน อัน ปอ อู วี, วี จัร บอ อัน โบง ฆาน แคง มาน มางูน ตึอน. ฆอน วี ตี วี ต็อห, ‘อึร ฆูณ, โอว ดี ฮาว.’ มาแล, อัน ยี ตู ฮาว.

31แตห เบ กาลาง ดี โอว, ฆอน อา วี ตี, อาเซ โบง ปี อึง ฆูณ อัน?” เฆ วี ต็อห, “อึณ มูห ดูอี ปี จัร ฆูณ ดี อาต.” ปัน ตี เฌา เยซู วี ต็อห ดี เฆ ดูอี อี โทม โฆรห อัน ตี, “โอว ต็อห อาคัร ดี เบ. อึณ ดี มึห เฆ ดูอี อี แฆบ รึอน จึง บอ เฆ ยา มาลัม, เฆ ดี ลึบ แคง มืง ปี อึบ เฌาพรา อาต ลึบ เบ. 32โคว, อึณ ดึอม มึห ดา ซารา อายอฮาน ตึอน. อัน แฮะ ตัห โดง กอย เบ, วี บยัะ ดี เบ เหมา เบ ดี ปาย ดี โบง นา หมาน นา หมึอม. เบ ยี ตู หณึม อัน. อึณ ยี มึห เฆ ดูอี แฆบ รึอน จึง บอ เฆ ยา มาลัม, เฆ หณึม โฆรห อัน. บอ เบ แฮะ ยึร ปี โบง อัน แบน โมยว แบน โมยว, เบ ยี ตู แวน หมาบ เบ, ตู หณึม.”

ลอง ดูอี คาด ดี รัณ มาน

33วาย อัน ตี เฌา เยซู วี ต็อห, “แตห เบ วี โทม อูพามา ปอ อู โมยว. อึณ ดึอม มึห ดา กาณา อี โบง มาน มางูน. อัน โบง โล็ง ดี กาอูน มาน, วี ฆึห กาเดา ดี เนียะ เบล มางูน, แตห อึม อัน เลห. แฮะ ฮอต, อัน บอ ซัม กาโช็ง จา ดี บัร มาน. อัน แฮะ ฮอต โบง ฌึร ตี ดอน โมยว, อัน วี แตห ดูอี เฮา คาด ดี รัณ มาน ตี. อัน ยี วี ฮาว กอย ปอ อู โปละ. 34บอ ฌัม อาคราว แฮะ ซีน เบล มางูน, ดา กาณา มาน ตึอน วี ตึย หมาย อัน โอย วี, แตห เฆ ฮาว โดง กอย ดูอี อี คาด ดี รัณ มาน มางูน, แตห เฆ ฮาว ดึห เบล แคะ ปี โลว ปึอน ดา กาณา มาน.

35เฆ ดูอี อี รัณ มาน, เฆ วี เหมต หมาย อู วี, มัห อัน. เฆ บอ ง็อห อาซาก ปอ อู วี. แฮะ ฮอต, ปอ อู วี, เฆ วี ดึห มาว, วึณ ดี อัน. 36ปอ อู เฌณ ดา กาณา มาน ตึอน วี ตึย ฮาว หมาย อัน กืน หลึอม คา อาต. เฆ ดูอี คาด ดี รัณ มาน ตึอน, เฆ ยี โบง นา จีจีว ดี เฆ ปี คา อาต. 37แฮะ ฮอต, ดา กาณา มาน ตึอน วี ตึย ฆอน อีมาย อัน. อัน ต็อห, ‘เฆ ดี บอ โรวเซ อัน.’

38เฆ ดูอี อี คาด ดี รัณ มาน ตึอน, เฆ บอ ยึร ฆอน ดา กาณา ตึอน, เฆ วี ลาย กามวน ต็อห, ‘วี นี อี มูห อี ดี ปลูะ ฆูณ อัน. แตห เอ ง็อห แวน อัน, แตห เอ ปึอน คาฆูน อัน.’ 39โคว, เฆ วี เหมต อัน, ดึห เลห อัน นา เรต มาน มางูน, วี ง็อห แวน อัน.

40มาเซ ปี ทาง เบ? เซ ดา กาณา ตึอน วี ตัห ฌัม โดง กอย เฆ ดูอี อี คาด ดี รัณ มาน อัน, มาเซ ปี ดี โบง อัน ดี เฆ?”

41เฆ วี ต็อห, “อัน ดี โบง แตห เฆ ดูอี ฮาย ตึอน วี คัม ดูก ตาง กอ ฌัม ยัม. แฮะ ฮอต อัน ดี แดะ ดูอี เฮา, แตห เฆ รัณ มาน อัน ตี. อัน ดี ร็อห วี อี ดี ดัว ดี ดา กาณา แคะ ปี โลว ดัว เฆ ดอ ซีน เบล มางูน ตึอน.” แคะ ตี เฌา เยซู กาลาง อูพามา ลอง เฌาพรา ปี ดา กาณา มาน ตึอน.

42เฌา เยซู แฮะ ฮอต กาลาง อูพามา ตี, อัน วี ต็อห ดี เฆ ดูอี อี โทม, “เบ ตู ดึอม ตีห แคง บับ เฌาพรา ลอง โอว? อึณ ต็อห, ‘มาว ปี แวน เฆ ดูอี อี ซัม กาง, อัน แฮะ วี แบน เจณ ร็อง. อัน เฌา แฮะ โบง, แตห อึณ แบน ปาย ตี. เย มืร แฮะ อาม กาเซา ลอง อัน ตี.’

43มาว ตาง ตี, อึณ ปี โอว. อึณ ยี มูห เบ, เบ ปี ดูอี อี ซัม กาง, อี แฮะ แวน มาว ตี. โคว, โอว ต็อห ดี เบ, เฌาพรา ตู แตห เบ ลึบ แคง มืง ปี อึบ อัน. อัน ดี แตห ดูอี อี โทม โฆรห โอว ลึบ แคง มืง ปี อึบ อัน. ดูอี เฆ ตี, เฆ ปี เฮ อี มึห เบล. 44โอว ยี ปี มาว ตึอน. อาเซ ตู หณึม โอว, อัน ปี ดูอี ดี ตา ดูห เปลา อัน ดี มาว ตึอน. อัน ดี บอ เกห, กาบัก ลึร โตต. เซ มาว ตึอน บอ โจห แดง ดูอี, ดูอี ตี ดี กามูน ลึร, แบน ปี กาปูห.”

45เฌา เยซู แฮะ ฮอต กาลาง อูพามา ตี, เฆ ดา ตาง อี แยต เฆ ดูอี อี หลู ดี เฌาพรา บอ เฆ ดูอี แคง พึง พารีแซ, เฆ แฮะ โทม ซีคยา. เฆ บอ นับ, เฌา เยซู แฮะ กาลาง โฆรห ตู หมึอม ลอง เฆ. 46โคว, เฆ เฌณฌา, เหมา เฆ ดี ปาย ดี เหมต เฌา เยซู. เฆ ยี โยว ดูอี กืน. โกบ หณึม ดูอี กืน, เฌา เยซู มูห ดูอี อี บยาน โฆรห เฌาพรา, เฆ ตู ยัะ โบง มาเซ ดี อัน.

Currently Selected:

มท 21: pce

Highlight

Copy