มท 19

ลอง อีมาย อีบึณ ลาย แวน

1เฌา เยซู แฮะ ฮอต กาลาง โฆรห ฌึร ตี, อัน วี เลห แคง อืง ฆาลีเล, วี ฮาว ฌัม แคง อืง ยูดา. อัน มืร ฮาว นา ตัะ แบลง ยอดาน. 2ดอ อัน ตี อึณ วี มึห ดูอี กืน อี ตัห โดบ อัน. อัน มืร ปีแกน เซา เฆ ดอน โมยว.

3อึณ บอ มึห ดูอี แคง พึง พารีแซ มัง อี, เฆ ตัห โดง กอย อัน. เฆ ซี เหรต ดัง อัน, แตห เฆ ปึอน ดี พยาก เฌา เยซู. เฆ ต็อห, “เซ ดูอี อู วี ซี แวน อีบึณ อัน, บอ นับ ดี กาลาง ปี ลูต อีบึณ อัน ลอง มาเซ อาว ต็อห, อึณ โดบ ตู โดบ ดารา?”

4เฌา เยซู วี ต็อห, “เบ แฮะ ดึอม ตีห แคง บับ เฌาพรา ลอง อู ซีณ ดอ โฆว อัน, ดอ โบง เฌาพรา บอ อีมาย บอ อีบึณ. 5ดอ อัน ตี เฌาพรา มืร แฮะ ต็อห, ‘โคว อัน ตี อีมาย ดี แวน ฆูณ มา อัน, แตห อัน โดบ อีบึณ อัน. ฆาย มืร ดี แบน ปี โดว โบ็ง อู โบ็ง.’ 6อึณ ปี ฆาย อาว ฮู มูห ดูอี อา วี. ฆาย แฮะ แบน ปี อู วี. โคว, เซ เฌาพรา แฮะ แตห อา วี ลาย คัด, วี แบน ปี อู วี, ดูอี อาว ปึอน โบง แตห ฆาย วี กาย็อห.”

7เฆ วี ต็อห, “เซ อึณ ปาย ตี, เหมา อึณ ปาย ปี ต็อห ดา ซารา อาโมวแซ ตึอน, อีมาย ปึอน แดม แปะ ลอง ลาย แวน? แฮะ ฮอต อัน ปึอน โฮว เลห อีบึณ อัน แคง กาง อัน.”

8เฌา เยซู วี ต็อห, “อาโมวแซ ตึอน แฮะ ควาง เบ อีมาย แวน อีบึณ เบ, โกบ ตู มึห เบ น็อห ร็อก กาเว ดูอี. อู ซีณ ดอ โฆว อัน อึณ ยี ตู มูห ปาย ตี. 9โอว ต็อห ดี เบ, เซ อีบึณ ตู มึห น็อห กืน, อีมาย ยี แวน อีบึณ อัน ตี, วี ลาย อีบึณ ปอ อู วี, หมาบ อัน ปี หมาบ ลูต อีบึณ อี.”

10เฌา เยซู แฮะ ฮอต กาลาง โฆรห ตี, ดีแบ อัน, เฆ วี ต็อห ดี อัน, “เซ ลอง อีบึณ อีมาย บอ หณาบ ปาย ตี, อาว หมึอม ลาย ดึห.”

11เฌา เยซู วี ต็อห, “ปี ดี กาลาง โอว ดอ ตี นี, อาว มูห ดูอี ดอน อี ดี ปึอน โดบ. อึณ ยี มึห มัง อี, เฌาพรา แฮะ แตห เฆ ปึอน โดบ. 12อึณ มึห อีมาย มัง อี อี แฮะ ซัห อู ซีณ ดอ ฆึอด เฆ. อึณ บอ มึห มัง อี อี แฮะ คัม ดี ซัห. ปอ มัง อี ทาง, เซ เฆ ตู คัด, เฆ ปึอน ดี โบง ซีคยา ฆาน เฌาพรา. โคว, เฆ ตู ดึห อีบึณ, คัม ดี ยืน. อาเซ ทาง, อัน แป ดี คัม ฌึร ตี, แตห อัน คัม.”

ลอง ฆอน ดีแตด ตัห โดง กอย เฌา เยซู

13วาย อัน ตี เฆ ตัห ตึย ฆอน ดีแตด โดง กอย เฌา เยซู, แตห เฌา เยซู ดาง แด อัน แดง ฆีณ เฆ, ซาคึร ดาง เฆ. เฆ ดีแบ เฌา เยซู ยี เอห เฆ อี ตัห ตึย ฆอน เฆ ตี.

14เฌา เยซู ยี ต็อห, “แตห เฆ ฆอน ดีแตด ตัห ดี โอว. แกวะ แคร เฆ. อาเซ ซี กอย แคง มืง ปี อึบ เฌาพรา, อัน โลว แบน ปี ฆอน เฆ นี.” 15ปัน ตี อัน มืร ดาง แด อัน แดง ฆีณ เฆ, ซาคึร ดาง เฆ. แฮะ ฮอต, อัน วี เลห โดง กอย อัน ตึอน.

ลอง ดูอี ครัม

16วาย อัน ตี อึณ บอ มึห ดูอี อู วี, อัน ตัห ฌัม โดง กอย เฌา เยซู. อัน วี ดีหมอด เฌา เยซู ต็อห, “ซารา, โอว โลว โบง นา หมึอม โมยว เหมา, แตห โอว ปึอน ดี กอย รึม โดบ เฌาพรา เซเซ?”

17เฌา เยซู วี ต็อห, “เหมา อึณ ปาย ปี กาลาง แม ลอง นา หมึอม? อึณ มึห มี อัน เฌา อู กาดัง อี แฮะ หมึอม. เซ แม ซี ปึอน อาซาก กามาย ปี ดัว เฌาพรา, แตห แม โบง โดบ ดารา อัน เฌา.”

18อัน วี ดีหมอด, “ดารา มาเซ อึณ มูห?” เฌา เยซู วี ต็อห, “แกวะ ง็อห อาซาก อี, แกวะ ลูต อีบึณ อี เฮา, แกวะ ปรา โกรว อี, แกวะ กาโลว ดอ กาลาง เบ ซักเซ ลอง อี เฮา, 19โรวเซ ฆูณ มา เบ บอ, เบ โลว ร็อก อี เฮา, แตห อึณ ปี ปี ร็อก เบ โดว บรีม เบ.”

20ดูอี ตึอน วี ต็อห, “ฌึร ตี โอว แฮะ โบง โตต ดอน โมยว. มาเซ อึณ ซี มึห, ปี โลว โอว โบง?”

21เฌา เยซู วี ต็อห, “เซ แม ซี โบง แตห อึณ เฌะฌูง, แม โลว ย็อง โตต โกรวกราม แม. แคะ ปี ปึอน แม, แม โลว วี กาซาง ดี ดูอี ฆีน. เซ แม โบง ปาย ตี, อึณ ปี โกรวกราม ปี ดี ปึอน แม แคง ฆางหราว, อึณ ดี กืน. แม ฮี ฮอต โบง ปาย ตี, แม โลว วี ตัห, โดบ โอว.”

22ดูอี ตึอน แฮะ ยึร โฆรห ตี, อัน วี เวณ. น็อห อัน บอ กลึร. โคว, อัน แฮะ ครัม กาเซา.

23ปัน ตี เฌา เยซู วี กาลาง ดี ดีแบ อัน. อัน ต็อห, “โอว ต็อห อาคัร ดี เบ, เซ อึณ มูห ดูอี ครัม, อึณ หณาบ, แตห อัน ปึอน ดี ลึบ แคง มืง ปี อึบ เฌาพรา. 24โอว ต็อห ดี เบ, เซ ดูอี โลว ฮับ วัน ตาง,#19:24 โฆรห ปี กาลาง เฌา เยซู ตี มึห ซีเพา อา โมยว. อู โมยว อัน เลห วัน ตาง, ปอ โมยว บอ เลห มังปร็อง กาฮาต. โคว, มัง อี แฮะ บยาน ต็อห มังปร็อง กาฮาต แตห อึณ ลึบ แคง กาเดา โหยะ มาลัต, อึณ หงึย หลึอม ดูอี ครัม ปึอน ดี ลึบ แคง มืง ปี อึบ เฌาพรา.”

25เฆ ดีแบ อัน แฮะ โทม โฆรห อัน ตี, เฆ มืร อาม กาเซา. เฆ วี ดีหมอด อัน ต็อห, “เซ อึณ ปาย ตี, อึณ แหนน ตู มึห อาเซ อี ปึอน ดี ลึบ แคง มืง ปี อึบ เฌาพรา.”

26เฌา เยซู วี ยอด เฆ, วี ต็อห, “ปี ตู ปึอน โบง ดูอี, เฌาพรา ยี ปึอน โบง โตต ดอน โมยว.”

27อาเปตารู วี ต็อห, “เย แฮะ ฮอต แวน โตต, แตห เย ปึอน ดี โดบ แม. เย ดี ปึอน อาฆยึร มาเซ?”

28เฌา เยซู วี ต็อห, “โอว ต็อห อาคัร ดี เบ. เซ เฌาพรา ดี บอ โบง แตห อึณ กามาย โตต ดอน โมยว, โอว อี แฮะ แบน ฆอน ดูอี, โอว ดี กอย แดง มาลาง อี บยัะ อาพูง ดังโคว โอว, แตห โอว อึบ กาดาย. ดอ อัน ตี บอ เบ อี แฮะ โดบ ซีคยา โอว, เบ ปึอน ดี กอย แดง มาลาง ฆึร ดี อา โบ็ง, แตห เบ ซูงพยาด อามู เฆ ดูอี อีซาเรลัะ ฆึร ดี อา ครึร. 29อึณ มึห ดูอี กืน, อี แฮะ แวน กาง เฆ อูกัด อูวา เฆ, อี แฮะ แวน บอ ฆูณ มา เฆ บอ ฆอน เฆ บอ มาน บอ โดง นา เฆ โกบ โดบ เฆ ดี โอว, โบง ปี จัร โอว. เฆ ดี วี ปึอน หลึอม แปะ แฮะ แวน เฆ อู มาย็อห บูน. โอว ดี ดัว บอ อาซาก กามาย ดี เฆ, แตห เฆ ปึอน ดี กอย รึม โดบ เฌาพรา เซเซ. 30อึณ ยี มึห ดูอี อี แฮะ แยต ดี อาต, เฆ ดี วี กอย นา ปัน. เฆ ดูอี อี โดบ ดี ปัน, เฆ ยี วี กอย นา อาต.”

Currently Selected:

มท 19: pce

Highlight

Copy