มท 17
17
ลอง อารึบ เฌา เยซู กาบลืง
1วาย อัน ตี เดา ซีแง, เฌา เยซู วี แดะ อาเปตารู, อายาโกบ บอ อายอฮาน อี มูห วา อายาโกบ, แตห เฆ ฮาว รึม โดบ อัน. เฆ โฮะ แดง นอน จา, ตู แตห อี เฮา โดบ เฆ. 2เฆ แฮะ ฮอต ฌัม แดง นอน ตึอน, อารึบ เฌา เยซู วี บลืง, แตห เฆ ดีแบ อัน โอย วี ปึอน ดี ยึร. นา อัน วี บลาง ปี ซีแง. บอ ครึง ปี ชึบ อัน วี ลูย ราว. 3ดอ อัน ตี อึณ บอ มึห ดา อาโมวแซ ฆาย ดา อาเอลียัะ อี กอย บาน ดอ มึอน, ฆาย วี กาปลูห ดี อาต เฆ, กาลาง โฆรห ดี เฌา เยซู.
4อาเปตารู วี ต็อห ดี เฌา เยซู, “แม เฌา, อึณ แฮะ ดาคึย กอย ดี นี. เซ แม โลว, โอว ดี โบง ทึบ โอย ทึบ, แตห บอ แม บอ อาโมวแซ บอ อาเอลียัะ กอย อู วี อู ทึบ.”
5ดอ กาลาง อัน โฆรห ตี, อึณ มึห อึณอูะ อี บลาง ตัห ปลึก เฆ. บอ มึห โฆรห อี เลห แคง อึณอูะ ตี ต็อห, “ดูอี ตี มูห ฆอน ปี ร็อก โอว. ปี โบง อัน, อึณ ล็อะ น็อห โอว. แตห เบ โทม โฆรห อัน.”
6เฆ ดีแบ อัน โอย วี แฮะ ฮอต โทม โฆรห ตี, เฆ วี เกห, วี โยว กาเซา. 7เฌา เยซู วี ตัห บยีต เฆ ต็อห, “ยีต. แกวะ โยว.” 8เฆ วี ซากึห ยอด, วี ยึร มี เฌา เยซู อู วี. อาว ฮู ยึร ฆาย อา วี ตึอน.
9ดอ วี โลง เฆ แดง นอน, เฌา เยซู วี ต็อห ดี เฆ, “แกวะ แค ดี อาเซ ลอง แปะ แฮะ ยึร เบ นี, แตห อึณ กอ ฌัม อาคราว ดี วี ยีต วี อีม โอว วาย แฮะ ฮอต ยัม โอว.”
10ปัน ตี เฆ ดีแบ เฌา เยซู วี ดีหมอด อัน. เฆ ต็อห, “เฆ ดา ซารา อี มาโนว ดารา, เฆ ต็อห, อาเอลียัะ ตึอน อี แฮะ ฮอต ยัม, อัน โลว วี ตัห แดง กาดาย นี อาต ตัห ดูอี ปี ร็อห ปี ตึย เฌาพรา ตี. เหมา อึณ ปาย ปี ต็อห เฆ ปาย ตี?”
11เฌา เยซู วี ต็อห, “แฮะ มูห, แฮะ หมาน, แคง บับ เฌาพรา อึณ ต็อห ลอง อาเอลียัะ ดี วี ตัห แดง กาดาย นี, แตห อัน อึณปราย โตต ดอน โมยว อาต ดี ตัห ดูอี ปี ร็อห ปี ตึย เฌาพรา แตห อัน คยอด ดูอี. 12โอว ยี ต็อห ดี เบ, ดูอี อี ปี อาเอลียัะ ตึอน, อัน แฮะ ฮอต ตัห. เฆ ยี ตู นับ อึณ มูห อัน. โคว, เฆ แฮะ โบง ดอน โมยว ปี อึง เฆ ดี อัน. ปาย ตี เฆ ดี บอ ฌ็อง บอ จาว บอ ดี โอว อี แฮะ แบน ฆอน ดูอี.” 13เฌา เยซู แฮะ ฮอต กาลาง ปาย ตี, เฆ ดีแบ อัน กอ นับ, อัน กาลาง ลอง ดา ซารา อายอฮาน อี จึบ ดูอี แคง อึม ตึอน. อัน ปี ดา อาเอลียัะ ตึอน.
ลอง เฌา เยซู ซูต กานัม เลห แคง โดว โบ็ง ดูอี อู วี
14เฆ แฮะ ฮอต โลง แดง นอน, วี ฌัม โดง กอย เฆ ดูอี กืน, อึณ มึห ดูอี อู วี, อัน ตัห ครึบเครา ดี อาต เฌา เยซู. 15อัน ต็อห, “แม เฌา, แตห แม กาเว ฆอน อีมาย โอว. อัน มึห งาน อี แตห อัน คัม ดูก กาเซา. แบน เฌณ แบน เฌณ อัน เกห แคง เงา บอ เกห แคง อึม. 16โอว แฮะ ตึย อัน ตัห ดี นี, แตห เฆ ดีแบ แม ปีแกน อัน. เฆ ยี ตู แป.”
17เฌา เยซู วี ต็อห, “เบ ดูอี อี กอย ฌาด นี, เบ ตู หณึม มาเซ. ปี เฌณฌา เบ บอ ปี โบง เบ อาว หมึอม. แคะ เหมา อึณ ดี เหลณ, โอว ดี บอ โลว กอย รึม โดบ เบ? แคะ เหมา อึณ ดี เหลณ, โอว ดี บอ โลว คัม ดูอี ปี เบ?” เฌา เยซู แฮะ ฮอต กาลาง โฆรห ตี, อัน วี ต็อห ดี ดูอี ตึอน, “ตึย ฆอน แม ตัห ดี โอว.” 18ปัน ตี เฌา เยซู ซูต เลห กานัม แคง โดว ฆอน ตี. แฮะ ฮอต กานัม มืร เลห. ฆอน อีมาย ตึอน แฮะ แกน อู เฌณ.
19วาย อัน ตี ดอ ตู กอย อี เฮา, เฆ ดีแบ เฌา เยซู วี ตัห ดีหมอด อัน. เฆ ต็อห, “เหมา อึณ ปาย ปี ตู แป เย ดี ซูต กานัม ตี เลห เตา?”
20เฌา เยซู วี เวียะ โฆรห เฆ ตี ต็อห, “เบ หณึม อี แจก. โคว, เบ ตู แป ดี จัร กานัม ตี เลห แคง โดว ดูอี ตี. โอว ต็อห อาคัร ดี เบ, เซ เบ มึห น็อห หณึม อี ดาน กาอาง เดา เซียม, เบ ดี บอ นับ ดี โบง โตต ดอน โมยว. อาว มึห มาเซ ปี ตู แป เบ. เบ ดี บอ ต็อห ดี นอน อี กอย ซวน ตัะ ดอย, ‘กาโทะ โดง กอย แม.’ อัน ดี บอ กาโทะ. 21กานัม ฌึร ตี, เฆ ยี ตู เลห เซ เบ ตู ซาคึร บอ ยืน ปี ดี โฮม.”
22วาย อัน ตี อู ซีแง เฆ ดีแบ เฌา เยซู บอกาเฆลียด กอย รึม โดบ อัน ดอ กอย เฆ แคง อืง ฆาลีเล. ดอ อัน ตี เฌา เยซู วี ต็อห ดี เฆ, “อึณ มูห โอว, อี แฮะ แบน ฆอน ดูอี, เฆ ดี อาบ โอว ดี รันซู โอว. 23เฆ ดี บอ ง็อห อาซาก โอว. วาย แฮะ ฮอต ยัม โอว, ฮี โนะ โอย ซีแง, เฌาพรา ดี แตห โอว วี ยีต วี อีม.” โกบ กาลาง อัน โฆรห ตี, เฆ ดีแบ อัน วี แบน น็อห กลึร.
ลอง รึอน จึง
24เฌา เยซู บอ ดีแบ อัน แฮะ วี ตัห ฌัม แคง มืง กาเปนารึม, อึณ วี มึห ดูอี อี แฆบ รึอน จึง, เฆ ตัห โดง กอย อาเปตารู. รึอน จึง ตี มูห รึอน อู ควาย ปี โลว ดัว อีมาย ดอน อี, แตห อึณ แบน รึอน ปี จัร แคง โฮว เฌาพรา. เฆ ดูอี แฆบ รึอน จึง ตี, เฆ ต็อห ดี อาเปตารู, “เหมา อึณ ปาย ปี ตู ดัว ดา ซารา แม รึอน จึง อาดา โฮว เฌาพรา ตี?”
25อาเปตารู วี ต็อห, “อัน ดี ดัว.” อาเปตารู วี ลึบ แคง กาง โดง กอย เฌา เยซู. เฌา เยซู วี ต็อห อู เฌณ, “อาซีโมน, มาเซ ปี ทาง แม? เฆ คูนดีคัม อี กอย แดง กาดาย นี, เฆ แฆบ รึอน จึง ดี อาเซ? เฆ ดึห ดี ฆอน เฆ? เฆ ดึห ดี อี เฮา?”
26อาเปตารู วี ต็อห, “เฆ ดึห ดี อี เฮา.” เฌา เยซู วี ต็อห, “เซ อึณ ปาย ตี, ฆอน คูนดีคัม ตู โลว ฮับ รึอน จึง. 27ปี บอ แฮะ ปาย ตี มืร, เอ ยี ตู ซี โบง ปี ตู อึง เฆ. โคว, แม ฮาว ดี บาง อึม, บยัว อึณแปด แม. เซ มาฆา แฮะ ดึก, แม ดึห มาฆา โดว ตี, กาวึห โมต อัน. อึณ ดี มึห รึอน อู โบ็ง แคง โมต อัน. รึอน ตี แม ดึห ดัว ดี เฆ ดูอี อี แฆบ รึอน จึง ตี. อึณ แฮะ ฆลึม แคะ ปี โลว ดัว อาย.”
Currently Selected:
มท 17: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
