มท 1
1
ลอง ฌาราง เฆ ฆูณ ดา เฌา เยซู
1อานี มูห ฌาราง เฆ ฆูณ ดา ดา เฌา เยซู อี มูห หลูกหลาน คูนดีคัม อาดาวีด ตึอน. คูนดีคัม อาดาวีด ยี มูห หลูกหลาน อาบราฮัม.
2ดา อาบราฮัม ตึอน มูห ฆูณ อาแซก. อาแซก มูห ฆูณ อาโกบ. อาโกบ มูห ฆูณ อายูดา บอ เฆ อูกัด อูวา อัน.
3อายูดา มูห ฆูณ อาเพเรด ฆาย อาเฌรา. มา ฆาย อา วี ตี มูห นาง ทามา. อาเพเรด มูห ฆูณ อาเฮฌาโรน. อาเฮฌาโรน มูห ฆูณ อาราม.
4อาราม มูห ฆูณ อามีนาดาบ. อามีนาดาบ มูห ฆูณ อานาโซน. อานาโซน มูห ฆูณ อาซาลาโมน.
5อาซาลาโมน มูห ฆูณ อาโบวอาบ. อาโบวอาบ มูห ฆอน นาง ราฮาบ. อัน บอ มูห ฆูณ อาโอวเบด. มา อาโอวเบด มูห นาง รูทา. อัน บอ มูห ฆูณ อาเยเซ.
6อาเยเซ มูห ฆูณ อาดาวีด, อี แบน คูนดีคัม ตึอน. อาดาวีด มูห ฆูณ อาซาโลวโมว, มา อาซาโลวโมว มูห อีบึณ อาอูรียา ตึอน.
7อาซาโลวโมว มูห ฆูณ อาเรโบม. อาเรโบม มูห ฆูณ อาพียัะ. อาพียัะ มูห ฆูณ อาซา.
8อาซา มูห ฆูณ อายอซาพาด. อายอซาพาด มูห ฆูณ อาเยโฮวรัม. อาเยโฮวรัม มูห ฆูณ อาอูฌียา.
9อาอูฌียา มูห ฆูณ อาโยวทาม. อาโยวทาม มูห ฆูณ อาคาด. อาคาด มูห ฆูณ อาเฮจัะกี.
10อาเฮจัะกี มูห ฆูณ อามานาเซ. อามานาเซ มูห ฆูณ อาโมน. อาโมน มูห ฆูณ อาโยวซียา.
11อาโยวซียา มูห ฆูณ อาเยโควยา#1:11 อาเยโควยา บอ อาเยคอนี (2 คูนดีคัม 24:6) มูห อู โมยว เฆ วา อัน. เฆ กอย ดอ เหมต อี เฮา ดี เฆ ดูอี อีซาเรลัะ, วี ตึย เฆ ฮาว มืง บาแบ ตึอน.
12วาย แฮะ ฮอต เฆ ตึย ดูอี อีซาเรลัะ ฮาว มืง บาแบ ตึอน, อาเยโควยา ตึอน แบน ฆูณ อาเซทีเอน. อาเซทีเอน มูห ฆูณ อาเฌรูบาเบน.
13อาเฌรูบาเบน มูห ฆูณ อาบีฮูด. อาบีฮูด มูห ฆูณ อาเอยาคีม. อาเอยาคีม มูห ฆูณ อาโฌวรา.
14อาโฌวรา มูห ฆูณ อาฌาโดก. อาฌาโดก มูห ฆูณ อาคีม. อาคีม มูห ฆูณ อาเอลีอูด.
15อาเอลีอูด มูห ฆูณ อาเลอาซา. อาเลอาซา มูห ฆูณ อามาทาน. อามาทาน มูห ฆูณ อายาโกบ.
16อายาโกบ มูห ฆูณ อาโยวแซบ อี แฮะ ลาย นาง มารี แตห ฆาย แบน ฆูณ มา อาเยซู อี มูห ดูอี ปี ร็อห ปี ตึย เฌาพรา แตห อัน คยอด ดูอี.
17อู ซีณ ดอ กอย อาบราฮัม กอ ฌัม อาดาวีด ตึอน, อึณ มูห ฆึร ดี พวน โจว. อู ซีณ ดอ กอย อาดาวีด กอ ฌัม อาคราว ดี ฌัม เฆ ดูอี อีซาเรลัะ แคง มืง บาแบ ตึอน, อึณ วี มึห ปอ ฆึร ดี พวน โจว. อู ซีณ ดอ กอย เฆ แคง มืง บาแบ ตึอน กอ ฌัม อาคราว ดอ ฆึอด เฌา เยซู อี มูห ดูอี ปี ร็อห ปี ตึย เฌาพรา, อึณ วี มึห ปอ ฆึร ดี พวน โจว.
ลอง เฌา เยซู แบน ดูอี
18ลอง เฌา เยซู แฮะ แบน ดูอี, อึณ ปาย นี.
อึณ มูห มา อัน อี จืร นาง มารี. อัน แฮะ ฮอต ลาย แบน อู ปาว ดี อาโยวแซบ. อาต โบง เฆ คัด ดอ ซี มูห อัน ดีบยา, อัน ยี วี นับ, อัน ตู อัห. อึณ ยี มูห น็อห พึอม เฌาพรา อี แตห อัน ตู อัห. 19ปัน ตี อึณ มูห อาโยวแซบ ตึอน, อัน มึห น็อห ซี โบง นา หมาน เซเซ. อัน มืร ตู ซี โบง แตห นาง มารี หมึอม ซาย ดี อาต อี. โคว, อัน วี คราม ดี แวน, แกวะ แตห อี นับ ลอง อัน ตี.
20อัน แฮะ ฮอต เฌณฌา ลอง อัน ตี, อึณ วี มูห อามู อามาด เฌาพรา วี ตัห กาปลูห ดี อัน ดอ อีด อึณบาว อัน. อามู อามาด เฌาพรา ตึอน วี ต็อห, “อึย, แม อาโยวแซบ อี มูห หลูกหลาน อาดาวีด, แกวะ แตห แม โยว ดี แดะ นาง มารี โดบ แม, แบน อีบึณ แม. โคว, ฆอน อี กอย แคง วัต อัน มูห ฆอน ปี ดัว น็อห พึอม เฌาพรา ดี อัน. 21นาง มารี ดี มึห ฆอน อีมาย. แม ยี โลว แตห อัน จืร อาเยซู. แม โลว แตห อัน จืร ปาย ตี. โคว, อัน ดี บลัวะ แวน หมาบ เฆ ดูอี อาโมยว อัน, แตห อัน คยอด เฆ.”
22อี แบน ฌึร ตี ดอน โมยว, อึณ โดบ โฆรห เฌาพรา ปี ดึอม กาลาง อัน ดี ดูอี อี บยาน โฆรห เฌาพรา. อัน แฮะ ดึอม ต็อห, 23“อึณ ดี มึห ดีบยา, อัน ดี ตู อัห. อัน ดี บอ มึห ฆอน อีมาย. เฆ ดี วี แตห อัน จืร ‘อาอีมานูเอน.’ ลอง ดาง อัน ตี มูห ‘เฌาพรา กอย รึม โดบ เอ.’”
24อามู อามาด เฌาพรา แฮะ ฮอต กาลาง โฆรห ตี, อาโยวแซบ ตึอน บอ วี อึณซึห, วี โบง ปี จัร อามู อามาด เฌาพรา อัน โบง. อัน วี ดึห นาง มารี แบน อีบึณ อัน, วี โบง คัด. 25ฆาย ยี หณัม มึห ดี อีด กาโดบ อาต ฆึอด ฆอน ตี อี มูห ฆอน อีมาย. อาโยวแซบ มืร แตห ฆอน อีมาย ตี จืร อาเยซู.
Currently Selected:
มท 1: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.