ดา อี หลู 19
19
ลอง โดว ซีงา บอ ลอง น็อห ซืร
1เฌาพรา วี จัร อาโมวแซ, 2แตห อัน วี กาลาง ปอ อึณ ปัว ดี เฆ ดูอี อีซาเรลัะ บอกาเฆลียด ต็อห, “แตห เบ ซีงา บอด. โคว, โอว อี มูห เฌาพรา ปี กรึบ เบ, โอว แฮะ ซีงา บอด.
3เบ ดอน อี โลว โรวเซ ฆูณ มา เบ. แตห เบ กัม บอ ซีแง ดีเหลา, แตห อึณ ปี ปี กาลาง โอว ตึอน. โอว มูห อัน เฌา อี มูห เฌาพรา ปี กรึบ เบ.
4เบ แกวะ กรึบ อารึบ. แกวะ ดึห ฮีน เฆ บ็อง, โบง แตห อึณ แบน อารึบ ปี ดี กรึบ เบ. โอว มูห อัน เฌา อี มูห เฌาพรา ปี กรึบ เบ.
5เซ เบ หลู ปี ดี หลู อี โลว กอย กาฌูะ โฮม รึม, เบ โลว โบง ดอน โมยว แตห โอว ปึอน ดี รับ ปี หลู ตี ดี เบ. 6ยัง โดว ปี หลู เบ, เบ ปึอน โฮม ซีแง หลู เบ ตี บอ ปา แคหณา. ยัง อี กาโลย ฌัม ตัะ หณา, เบ โลว โดะ กาซึม แคง เงา. ฌึร ตี อาว ฮู ซีงา. 7ยัง ปี โฮม เบ ตัะ หณา ตี, อึณ แฮะ หมึอม กาอีห. โอว มืร ตู รับ ปี หลู ตี. 8ดูอี อี โฮม ยัง ตี, อัน โลว คัม หมาบ อัน โกบ ตู โรวเซ อัน ปี ดี หลู ดี เฌาพรา อี บอด กาเซา. เบ โลว เบลห แวน อัน, แกวะ มาด อัน มูห ดูอี อาโมยว เบ.
9ดอ โซะ เบ โหงว แคง โดง นา เบ, อาว โลว โซะ โตต ดี กาโตะ ดี โคบ อัน. อาว โลว วี ฮาว โซะ โหงว อี ซี ฆีด ซี กอย ตึอน. 10เซ เบ แฮะ ฮอต เบต เบล มางูน เบ, อาว โลว ฮาว เบต ปอ อู เฌณ, เบต อี ซี ฆีด ซี กอย. อาว โลว วี ทอน เบล อี โจห อี รัห ตึอน. เบ โลว อูน เบล ตี อาดา เฆ ดูอี ฆีน, ดูอี เอต บอ อาดา เฆ ดูอี อาโมยว เฮา. โอว มูห อัน เฌา อี มูห เฌาพรา ปี กรึบ เบ.
11เบ แกวะ ปรา โกรวกราม อี. แกวะ กาโลว อี. แกวะ กาลาง โฆรห ตู หมาน.
12แกวะ คัม ดืง เซ อึณ ตู หมาน. แกวะ ต็อห, ‘เซ โฆรห โอว ตู หมาน, แตห เฌาพรา ดัม หมาบ ดี โอว.’ เซ เบ โบง ปาย ตี อึณ ปี เบ ตู รีมาด แคะ บอด โอว. โอว มูห อัน เฌา อี มูห เฌาพรา ปี กรึบ เบ.
13เบ แกวะ คาหนาบ บอ หมาบ หมัร อี เฮา. เบ แกวะ ปีหล็อก พาด รึร โกรวกราม อี. รูห ปี โลว ปึอน เฆ ดูอี ฌาง ดี เบ, เบ โลว ดัว, แกวะ แตห อึณ ปวน หมึร ตี.
14แกวะ เอห แกวะ ดืง ดูอี โหยะ กาอาว. แกวะ ดึห โมยว อี ดี แตห อี เฮา กาฟัห, เบลห นา อาต ดูอี งาย อับ. เบ โลว โยว โอว. โอว มูห อัน เฌา อี มูห เฌาพรา ปี กรึบ เบ.
15เซ เบ ซูงพยาด อามู อี, เบ โลว ซูงพยาด โดบ ดารา บอ โบง ซืร ซืร หมาน หมาน. บอ มูห ดูอี ฆีน, บอ มูห ดา ตาง, แกวะ แตห เบ มึห โดง ร็อก โดง ฌ็อง.
16เบ แกวะ แบน ดูอี โฮะ กาง กัว, โลง กาง เตต, กาย็อง ดูอี อาโมยว เบ. เซ ดูอี อู วี มึห อามู อี กาดาน ยัม, เซ เบ นับ ดี จอย อัน, แตห เบ กาลาง. โอว มูห อัน เฌา อี มูห เฌาพรา.
17เบ แกวะ อูน น็อห ดี อี เฮา. เซ อี เฮา แฮะ โบง นา ตู หมึอม, เบ โลว กาลาง ซืร ดี อัน, แกวะ แตห บอ เบ บา แคง หมาบ ตี.
18เบ แกวะ วี โบง เวียะ นา ตู หมึอม ดี อี เฮา. แกวะ อูน น็อห ดี อัน. เบ ร็อก โดว เบ แคะ เหมา, แตห เบ ร็อก อี เฮา แคะ ตี. โอว มูห อัน เฌา อี มูห เฌาพรา.
19แตห เบ โบง โดบ ดารา โอว ดอน โมยว. แกวะ แตห โดว ซัดดาวา เบ อี ตู มูห อู โมยว ลาย โดบ. แกวะ บรัด ซีมา อี ตู มูห อู โมยว แคง มาน แคง โดง นา เบ. แกวะ ดึห เซณ บอ ฮึก โดว ซัด, วี ด็อะ กาวัร, แตห อึณ แบน ครึง ตา เบ.
20เซ ดูอี อู วี วี ดึห วี ลาย อีบึณ อี มูห หมาย อี, ปี แฮะ ฮอต ดีหมอด, ยี หณัม ดัน คัด, ฆาย บอ อา วี โลว คัม หมาบ ฆาย. มาแล, หมาบ ฆาย หณัม กาดาน ยัม. โคว, อีบึณ ตี หณัม กอย ทังฮาง, อัน ซี มูห หมาย อี. 21อีมาย วี ตี ยี โลว ดึห มาบู อาโล็ง อู โดว, ฮาว ดี โคบ มาโลห ทึบ บีก บอด, หลู ดี เฌาพรา, แตห อึณ แบน ปี หลู อี ฆ็อห แวน แปะ แฮะ กาลึบ อี. 22ดา อี หลู ดี เฌาพรา โลว ดึห โดว ปี หลู ตี, โบง แตห อึณ แบน ปี หลู อี ฆ็อห แวน ปี กาลึบ ดูอี ตี, แตห อัน วี กาล็อะ ดี เฌาพรา. เฌาพรา มืร ดี ฆ็อห แวน หมาบ แปะ แฮะ กาลึบ อัน.
23ปัน ดี ฮาว ฌัม เบ แคง มืง กานัณ, เซ เบ บอ ซัม เฮ อี มึห เบล ปี ดี โฮม เบ ดอน โมยว, อาดา โอย ซีนัม เบ ตู ปึอน โฮม เบล ตี. เบ โลว มาด เบล ตี ปี เบล ตู ซีงา. 24ดอ ฌัม ซีนัม อึณ พวน, เบ โลว เบต เบล เฆ ตี หลู, แตห อึณ แบน ปี หลู อี ดาง ฆูง เฆฌู ดี เฌาพรา. 25ฮี ฌัม ซีนัม อึณ พัน, เบ แฮะ ปึอน โฮม เบล ตี. เซ เบ โบง ปาย ตี เฮ เบล เฆ ตี ดี แว เบล มึก เบล กืน. โอว มูห อัน เฌา อี มูห เฌาพรา ปี กรึบ เบ.
26เบ แกวะ โฮม ยัง อี ซี มึห หนาม. เบ แกวะ ยอด เบดาง, แกวะ ฆาว ปวน กานัม ดอ เหมา.
27เบ แกวะ ฆาะ ฮึก ฆีณ อี กอย โคบ อาโหยะ เบ. เบ แกวะ ฆาะ ดีโมห ดี กูงกาบ เบ.
28เซ เบ กลึร โกบ แฮะ ยัม ดูอี อู วี, อาว ปึอน กรีห, อาว ปึอน ซัวะ ยัง เบ เฆ ฮูน เบ, แตห อึณ แปะ. อาว ปึอน ซัม ดี โดว เบ แตห ดีเลน ดีลาย. โอว มูห อัน เฌา อี มูห เฌาพรา.
29เบ แกวะ แตห ซาเร ฆอน ดีบยา เบ พยาก. แกวะ แตห อัน แบน ยา มาลัม. เซ ฮี โบง ปาย ตี โยว บอ มาน บอ มืง ดี บอ โบง ลูต ดารา, โดบ เฌา อาโมยว เฮา, อี ปี ปี โบง ยา มาลัม.
30เบ โลว กัม ซีแง ดีเหลา. เบ โลว โรวเซ โดง กรึบ เบ ดี โอว. โอว มูห อัน เฌา อี มูห เฌาพรา.
31เบ แกวะ ฮาว ดีหมอด ยา เปร. เบ แกวะ บึง ดา บู มืง บอ เฆ อี โบง อาดาด. เซ เบ โบง ฌึร ตี, อึณ แตห โดว เบ กาดาต. โอว มูห อัน เฌา อี มูห เฌาพรา ปี กรึบ เบ.
32เบ โลว ฆันโดว เฆ ดูอี กัด ดูอี แฆ บอ โรวเซ เฆ. เบ บอ โลว โยว บอ รีมาด เฌาพรา ปี กรึบ เบ. อึณ มูห โอว อี มูห เฌาพรา ตี.
33เซ ดูอี อาโมยว เฮา กอย รึม โดบ เบ แคง มืง เบ, เบ แกวะ คาหนาบ เฆ.
34เบ โลว แบน อู ฆึก ดี เฆ, แตห อึณ ปี เบ มูห ดูอี อู โมยว. แตห เบ ร็อก เฆ, แตห อึณ ปี เบ ร็อก โดว บรีม เบ. แตห เบ โหลห ลอง แฮะ ดึอม แบน เบ แคต แคง มืง แอฆึบ ตึอน. โอว มูห อัน เฌา อี มูห เฌาพรา ปี กรึบ เบ.
35แกวะ โปห อี เฮา. บอ มูห โมยว ปี เฆา แบน กาซาน, บอ มูห ปี ซัะ ดี ณอย, บอ มูห ปี เฆา แบน แบล, แตห เบ โบง ซืร ซืร หมาน หมาน เซเซ. 36เบ โลว โฆ็ง ลัะจู เฆ ณอย อี หมาน อี หมึอม. บอ ฮับ เบล ซัะ อี หมาน อี หมึอม. เซ เบ เฆา ตา แบล เฆ คอน, แตห เบ ตา แบล เฆ คอน อี หมาน อี หมึอม. โอว มูห อัน เฌา อี มูห เฌาพรา ปี กรึบ เบ, อี แฮะ แยต เลห เบ แคง มืง แอฆึบ ตึอน.
37ปาย ตี แตห เบ โดบ ดารา โอว, บอ คัม โตต โฆรห ปี กาลาง โอว นี. โคว, โอว มูห อัน เฌา อี มูห เฌาพรา.”
Currently Selected:
ดา อี หลู 19: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
