อาโยวเอลัะ 3

ลอง เฌาพรา ดี ซูงพยาด อามู ดูอี ดอน โมยว

1เฌาพรา ปี วี ต็อห, “อาคราว ปัน ดี วี ดึห ตัห โอว เฆ ดูอี อายูดา บอ ดูอี แคง มืง เยรูซาแลม แปะ แฮะ เหมต ฮาว อี, แตห เฆ วี ตัห กอย ดาคึย โดง กอย บรีม เฆ ปี คา อาต.

2โอว ดี แตห เฆ ดา ซึก ดอน โมยว แดง กาดาย ตัห กาฌูะ แคง ดีลัยะ อายอซาพาด. ดี ตี โอว ดี บอ ซูงพยาด อามู เฆ. โคว, เฆ แฮะ โบง นา มืก นา ฮาย ดี ดูอี ปี อึบ โอว อี ปี คาฆูน โอว. เฆ มืร แฮะ โบง แตห ดูอี อีซาเรลัะ กาย็อห กาเรห, กอย ดอน มาน ดอน มืง บอ แตห มืง เฆ อาว ฮู มึห คอ อู มืง.

3เฆ บอ กาตาม อาดา เฆ ดูอี ปี อึบ โอว. เฆ ดึห ฆอน อีมาย ฆอน ดีรอย เฆ, วี ลาย การ็อห ดี ยา มาลัม. เฆ มืร แฮะ ดึห ฆอน อีบึณ ฆอน ดีรอย ย็อง, แตห เฆ วี จึห ดี เดียง อึม มางูน, แตห เฆ กอ ยึต.

4อึย เบ อี กอย แคง มืง ทูโรว, มืง ซีโดน บอ แคง มาน มืง พีลีที บอกาเฆลียด, เบ ลาย บาะ มาเซ ดี โอว? เบ ซี ดี วี โบง เวียะ อาเพ อาเร ดี โอว? เซ เบ ซี โบง ปาย ตี, โอว ดี วี แตห เบ คัม ปี ลูต เบ ตี ครัน ครัน. 5เบ แฮะ ดึห รึอน โอว, ดึห ครีว โอว บอ โกรวกราม อี ง็อห ตาง อี ล็อะ น็อห โอว, วี ฮาว อูน แคง โฌง เบ. 6เบ แฮะ ดึห เฆ ดูอี อายูดา บอ ดูอี แคง มืง เยรูซาแลม, วี ย็อง ดัว ดี ดูอี ฆรีก, แตห เฆ ดูอี ฆรีก วี ย็อง ฮาว เฆ, แตห เฆ วี กอย กาโต็ง ดี มืง บรีม เฆ.

7มาแล, ดอ ตี นี โอว ดี วี ดึห เลห เฆ แคง มืง โดง แฮะ ย็อง ฮาว เบ, แตห เฆ วี ตัห. โอว ดี วี โบง เวียะ ดี เบ แคะ ปี โบง ลูต เบ, แตห เบ วี คัม. 8ฆอน อีบึณ บอ ฆอน อีมาย เบ บอกาเฆลียด, เบ ดี กาดูห ดี ย็อง ดัว ดี ดูอี อายูดา. เฆ ปี ดี วี ย็อง ดัว ดี ดูอี อาราบ อี มูห ดูอี อี กอย กาโต็ง.” เฌาพรา แฮะ กาลาง อูน ปาย ตี.

9แตห เบ กาลาง ดี ดูอี ดอน ฌึร ดอน โมยว อี กอย กาโต็ง ต็อห, “แตห เบ บอกาเฆลียด แรน อูน บอ ครึง กาโฆห เบ, แตห เบ กาซูห น็อห เฆ ดา ซึก อี กยัะ อี มึห น็อห ยัะ. แคะ กอย ดา ซึก บอกาเฆลียด, แตห เฆ ฮาว ณืร, ฮาว เครียะ, แตห เฆ กาโฆห.

10แตห เบ ดึห ฮีน มัง แท เบ, วี จึม แบน มาปัวะ ลาง. วี ดึห อึณวาต เบ, วี จึม แบน บลา เลียห. แตห เบ มาโนว เฆ อี ตู มึห โปลม เฆ แฮณ แตห เฆ ต็อห, ‘โอว มึห โปลม กืน.’

11อึย เบ ดูอี อาโมยว เฮา อี กอย ดอน นา ดอน โปละ, แตห เบ ปีครัน เบ ดี ตัห, แตห เบ ตัห กอย กาฌูะ กาดึม โดง แปะ แฮะ ต็อห โอว. อึย แม เฌาพรา, แตห แม แตห เฆ ดา ซึก ปี อึบ แม ตัห โดง ตี.

12แตห เฆ ดูอี ดอน ฌึร ดอน โมยว วี ฮาว ดี ดีลัยะ อายอซาพาด. โอว ดี บอ กอย โดง ตี, บัร ดี ซูงพยาด อามู เฆ ดูอี อาโมยว เฮา บอกาเฆลียด.

13แตห เบ ดึห อึณวาต. โคว, โหงว อี แฮะ โลว โซะ แฮะ ฮอต ซีน. แปรณ โดง กรีด เบล มางูน แฮะ ฮอต โนะ, แตห เบ ตัห กรีด. กาลัยะ โด็ง อึม มางูน แฮะ ฮอต โนะ ลูต. ปาย ตี หมาบ ปี โบง เฆ, แฮะ กืน กาเซา.”

14ดูอี แฮะ ตัห กาฌูะ กืน กาเซา ดี ดีลัยะ โดง ดี ซูงพยาด เฌาพรา อามู เฆ. ซีแง ดี ซูงพยาด เฌาพรา อามู ดูอี แคง ดีลัยะ ตี, แฮะ กาตัด ดี ฌัม.

15ดอ อัน ตี ซีแง ฆาย มาเฆียน ดี บอ อับ ว็อง. ซีมัณ มืร อาว ฮู บลาง.

16เฌาพรา ดี บอ กอย แดง นอน ฌีโอน บอ ดัด ตาง. อัน บอ กอย แคง มืง เยรูซาแลม บอ ดัด ตาง ตาง. เบลณ เฆ กาดาย บอ ดียูห ดีเยณ. มาแล, เฌาพรา ยี ดี แบน โดง บึง, โดง น็อห ตาง ดี เฆ ดูอี อีซาเรลัะ. อัน เฌา บอ แบน อี ฆ็อง อี แร อาดา เฆ ดูอี อาโมยว อีซาเรลัะ.

ลอง เฌาพรา วี ม็องการา ดัว ดี เฆ ดูอี ปี อึบ อัน

17“เซ เบ โทม ฮัม อัน ตี, เบ ดี บอ นับ โอว มูห เฌาพรา ปี กรึบ เบ. โอว บอ กอย แดง นอน ฌีโอน อี มูห นอน ซีงา บอด โดง กอย โอว. บอ มืง เยรูซาแลม ดี บอ แบน โดง ซีงา บอด. วาย อัน ตี ดา ซึก อาโมยว เฮา ตู วี แป มืง เยรูซาแลม ตี.

18ดอ อัน ตี อึม มางูน ดี กืน กาเซา ปี อึม อี แหล ตัห ดี นอน ดอน นอน. อึม ปู ดี บอ กืน กาเซา ปี อึม อี แหล ตัห ดี นอน จา ดอน โปละ. แบลง อึม แคง มืง ยูดา ดี บอ มึห อึม แหล ดอน แบลง. อึม ดี บอ โตห ดี โฮว เฌาพรา, แตห อึณ บอ แหล โดบ ดีลัยะ อี มึห เฮ กาทีน.

19มืง แอฆึบ ดี บอ แบน โดง เยน โดง ง็อง ดูอี. มืง เอโดม ดี บอ วี แบน แปร ตาง บอ ง็อง, อาว มึห ดูอี อี กอย. โคว, เฆ แฮะ คาหนาบ เฆ ดูอี อายูดา, แฮะ ง็อห ยัม ดูอี ตู มึห หมาบ.

20มืง ยูดา ยี ดี กอย เซเซ. มืง เยรูซาแลม ดี บอ กอย เซเซ ดอน โจว ดอน บาน ตู ราม ดอ เหมา.

21โอว ดี วี ฆ็อห แวน หมาบ เฆ ปี หณัม ฆ็อห แวน โอว. โอว อี มูห เฌาพรา อี อึบ ดูอี อีซาเรลัะ, โอว ดี กอย โดบ เฆ แคง มืง เยรูซาแลม.”

Currently Selected:

อาโยวเอลัะ 3: pce

Highlight

Copy

Compare