อาเยเรมี 38
38
ลอง เฆ เหมต บยัว อาเยเรมี แคง อึม คึม
1อาเซพาดี อี มูห ฆอน อามาทาน บอ อาเกตาลี อี มูห ฆอน อาบาซูรา บอ อาเยฮูกาลา อี มูห ฆอน อาเซลามี บอ อาบาซูรา อี มูห ฆอน อามาลาคียา, เฆ แฮะ ยึร โฆรห ปี กาลาง อาเยเรมี ดี เฆ ดูอี กืน. อัน แฮะ ต็อห, 2“เฌาพรา แฮะ กาลาง, ดูอี อี กอย แคง มืง นี, เฆ ดี บอ กาดูห ดี ยัม ดี มาปัวะ ลาง, ยัม ดี เอต ปี ดี โฮม บอ คัม เซา รอฆา. อาเซ ยี วี เตา ฮาว กอย โดบ ดูอี บาแบ, อัน ดี ลอด ยัม. อัน ดี วี ปึอน อาซาก อัน, แตห อึณ ปี อัน แฮะ ปึอน รูห อัน ดี บาง กาโฆห, อัน ยี ตู โลว ยัม. 3เฌาพรา แฮะ กาลาง, มืง นี อัน เฌา ดี อาบ ดี คูนดีคัม อี อึบ มืง บาแบ, แตห อัน อึบ โตต.” 4เฆ อามู อามาด แฮะ ฮอต ยึร โฆรห ตี, เฆ วี กาลาง ดี คูนดีคัม ต็อห, “ดูอี วี นี, แฮะ กาอาบ ง็อห แวน อัน. โคว, อัน แฮะ กาลาง โฆรห อี แตห น็อห เฆ ดา ซึก บอ เฆ ดูอี อี กอย ดี นี ดีหลัห อึณจัม. อัน มืร ตู นับ ดี ยอด แมน ดูอี เฆ นี. อัน นับ มี ดี ปยาต แตห เฆ ลึร.”
5คูนดีคัม อาเฌเดกี วี ต็อห ดี เฆ อามู อามาด อัน, “เบ ปึอน โบง ปี อึง เบ. โอว คูนดีคัม ตู ปึอน แคร ปี ซี โบง เบ.”
6ปัน อัน ตี เฆ บอ ดึห วัน, ปัก อาเยเรมี, วี ฮาว บยัว อัน แคง อึม คึม อี มูห อึม คึม อามาลาคียา อี มูห ฆอน คูนดีคัม. อึม คึม ตี กอย แคง แวง เฆ ดูอี อี บัร โฮว. อึณ ยี ตู มึห อึม นา แคง, อึณ มึห มี โณะ ดีโลย. เฆ แตห อาเยเรมี กอย แคง โณะ ตี.
7มาแล, อาเอเบตาเมเลก อี มูห ดูอี อาโมยว กูซา อี อึบ เฆ ฌืง นาง อี กอย แคง โฮว คูนดีคัม ตึอน, อัน บอ ยึร ลอง แฮะ ดึห บยัว เฆ อาเยเรมี แคง อึม คึม ตึอน. ดอ อัน ตี คูนดีคัม แปะ แฮะ งยา ฮาว กอย อัน ดี บาง มาโลห อี จืร มาโลห อาเบนยาม. 8ปาย ตี อาเอเบตาเมเลก บอ เลห แคง โฮว คูนดีคัม, วี ฮาว โดง กอย คูนดีคัม, วี กาลาง ดี อัน ต็อห, 9“อึย แม เฌา, แม มูห คูนดีคัม ตาง, ปี โบง เฆ ตี ดี อาเยเรมี แฮะ ฮอต กาลึบ. เฆ แฮะ ดึห ดูอี อี บยาน โฆรห เฌาพรา, บยัว โลง แคง อึม คึม. อัน ดี บอ ยัม ดี ตี โกบ ตู ปึอน อัน ดี โฮม มาเซ. โคว, แคง มืง นี มืร, อาว ฮู มึห คามูน.”
10แฮะ ฮอต, คูนดีคัม บอ วี กาลาง ดี อาเอเบตาเมเลก อี มูห ดูอี อาโมยว กูซา ตี ต็อห, “แตห แม แดะ ดูอี โอย ฆึร วี ฮาว โดบ แม, แตห เบ ฮาว ดึห เลห อาเยเรมี แคง อึม คึม ตี, อาต ยัม อัน.”
11ปาย ตี อาเอเบตาเมเลก บอ ฮาว แดะ ดูอี, แตห เฆ วี เวณ ลึบ แคง โฮว คูนดีคัม, วี ยอด แคง ฌีดืก, วี ดึห ครึง บรีม, ครึง กาปยาต บอ วัน, วี ฮาว บยัว โลง โดง กอย อาเยเรมี แคง อึม คึม ตึอน. 12อาเอเบตาเมเลก อี มูห ดูอี อาโมยว กูซา ตึอน, อัน บอ แดะ ดี กาลาง ดี อาเยเรมี ต็อห, “แตห แม ดึห ครึง บรีม, ครึง กาปยาต เฆ ตี, วี กาบัน วัน, แตห อึณ แหลง ดัง กาแลว แม.” 13แฮะ ฮอต ปาย ตี เฆ บอ ดืด เลห อาเยเรมี แคง อึม คึม ตึอน. วาย อัน ตี อาเยเรมี บอ วี ปึอน ดี กอย แคง แวง ตึอน.
ลอง คูนดีคัม อาเฌเดกี ปรา ดี วี ดีหมอด อาเยเรมี
14คูนดีคัม อาเฌเดกี บอ วี แดะ อาเยเรมี ตัห โดง กอย อัน โดบ อึณเตณ ณ็อง ฮาโอย อี ฮาว ลึบ ดี โฮว เฌาพรา. คูนดีคัม วี ต็อห ดี อาเยเรมี, “โอว ดี ดีหมอด แม อู โมยว อาโมยว. แม แกวะ เครียง มาเซ ดี โอว.”
15อาเยเรมี วี กาลาง ดี คูนดีคัม อาเฌเดกี ต็อห, “เซ โอว กาลาง ซืร ดี แม, โอว ทาง แม ดี บอ ง็อห ยัม โอว อาคาคัร หมาน. เซ โอว ฮี กาลาง ดัว อากยาม อางยาน ดี แม, แม ตู ดี โทม.”
16คูนดีคัม อาเฌเดกี บอ วี ดืง กาแซณ ดี อาเยเรมี ต็อห, “แฮะ มูห แฮะ หมาน เฌาพรา แฮะ อีม บอ แฮะ ฮับ น็อห พึอม แคง น็อห เอ. ปาย ตี บอ โฆรห โอว นี แฮะ มูห แฮะ หมาน. โอว ตู ง็อห ยัม แม. โอว มืร ตู อาบ แม ดี เฆ ดูอี อี เหรต ดี ง็อห ยัม แม.”
17แฮะ ฮอต, อาเยเรมี บอ กาลาง ดี อาเฌเดกี ต็อห, “เฌาพรา อี มูห เฌาพรา อี อึบ โตต ดอน โมยว อี มูห เฌาพรา ปี กรึบ ดูอี อีซาเรลัะ, อัน แฮะ กาลาง ปาย นี. เซ แม กอ วี มึห น็อห โฆม, วี ฮาว ครูด ดี เฆ อามู อามาด คูนดีคัม มืง บาแบ, แม คูนดีคัม ดี ลอด ยัม. อาซาก แม มืร ดี ฆัด เฆียด. มืง นี มืร ดี ลอด กาซึม แคง เงา. แม คูนดีคัม บอ บีนอง วอแว แม บอ ครึร แม มืร ดี ลอด ยัม. 18เซ แม ตู ปีเตียม น็อห แม ดี เฆ คูนดีคัม แคง มืง บาแบ ตี, เฆ ดูอี บาแบ ดี อึบ มืง นี. เฆ ดี บอ ดึห เงา โดะ, แตห อึณ กาซึม โตต. แม คูนดีคัม มืร ตู ลอด เฆ อึบ แม.”
19คูนดีคัม อาเฌเดกี วี ต็อห ดี อาเยเรมี, “โอว โยว เฆ ดูอี อายูดา อี แฮะ ฮาว กอย โดบ ดูอี บาแบ. โอว โยว เฆ ดี วี อาบ โอว ดี เฆ, แตห เฆ วี โบง นา ตู หมึอม ดี โอว.”
20อาเยเรมี วี ต็อห, “เฆ ตู ปึอน อาบ แม ปาย ตี. แตห แม โทม แล โฆรห เฌาพรา ปี กาลาง โอว ดี แม นี. เซ แม โบง ปาย ตี, แม ดี ปึอน ดี กอย ฆัด เฆียด. แม มืร ตู โลว ยัม. 21เซ แม ตู โบง ปาย ตี, เซ แม ตู โทม บอ ตู ปีเตียม น็อห แม ปาย ตี, โฆรห เฌาพรา แปะ แฮะ กาลาง เฌาพรา ดี โอว, อึณ ปาย นี. 22เฆ อีบึณ อี ซี ฆีด ซี กอย แคง โฮว คูนดีคัม มืง ยูดา, เฆ แฮะ กาดูห ดี วี เลห, ฮาว กอย โดง กอย เฆ อามู อามาด คูนดีคัม แคง มืง บาแบ. อีบึณ เฆ ตี, เฆ ดี บอ วี กาลาง ดี แม ต็อห, ‘เฆ ฆึก กาล็อะ แม เฆ ตึอน, เฆ แฮะ แป ดี กาซูห แม. ดอ ตี นี แม แฮะ ปี แฮะ โจห ฮ็อะ แคง โณะ. เฆ มืร แฮะ ฮอต วี เตา, แวน แม.’
23เฆ ดี บอ ดึห อีบึณ แม เฆ ฆอน แม, วี ฮาว โดง กอย ดูอี บาแบ. แม คูนดีคัม มืร ตู ปึอน ดี ลอด ดอ เหมา. แม โลว คัม แตห คูนดีคัม มืง บาแบ อึบ แม. มืง นี มืร เฆ ดี บอ ดึห เงา โดะ, แตห อึณ กาซึม โตต.”
24อาเฌเดกี ปี วี ต็อห ดี อาเยเรมี, “แกวะ แตห อึณ มึห คอ อู วี อี นับ ลอง ปี ลาย กาลาง อาย นี. เซ อาว ปาย ตี แม โลว ยัม. 25เซ เฆ อามู อามาด โอว ฮี ยึร ลอง กามวน โอว ดี แม, เซ เฆ ดี บอ ตัห โดง แม บอ ดีหมอด แม ต็อห, ‘แตห แม กาลาง ลอง มาเซ แปะ แฮะ กาลาง แม ดี คูนดีคัม. บอ คูนดีคัม อัน แฮะ กาลาง มาเซ ดี แม, แตห แม วี กาลาง ดี เย, อาว ปึอน เครียง คอ อู โมยว. เซ แม ตู กาลาง, เย มืร ดี ง็อห ยัม แม.’ 26เซ เฆ บอ ต็อห ปาย ตี ดี แม, แตห แม วี กาลาง ดี เฆ ปาย นี. แตห แม ต็อห, ‘โอว ฮาว โดง กอย คูนดีคัม, โอว หมาณ ดี อัน, แกวะ แตห โอว โลว วี เวณ โดง กอย อาโยวนาทาน, แกวะ แตห โอว โลว เวณ ยัม ดี ตี.’”
27ปาย ตี เฆ อามู อามาด บอ ตัห โดง กอย อาเยเรมี. เฆ บอ ดีหมอด แฌด อัน. อัน มืร กาลาง ดี เฆ โดบ ปี กาลาง อูน คูนดีคัม ดี อัน. เฆ มืร ตู วี ดีหมอด อัน ปอ อึณ ปัว. โคว, อาว มึห อาเซ อี แฮะ โทม แปะ แฮะ กาลาง อาเยเรมี ฆาย คูนดีคัม.
28ปาย ตี อาเยเรมี บอ วี กอย แคง แวง ตึอน, แตห อึณ กอ ฌัม ซีแง ดี ลึบ เฆ ดูอี บาแบ แคง มืง เยรูซาแลม.
Currently Selected:
อาเยเรมี 38: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
