อาเยเรมี 33
33
ลอง เฌาพรา ดี แตห มืง เยรูซาแลม วี ปี บรีม
1เฌาพรา วี กาลาง โฆรห ดี อาเยเรมี ปอ อู เฌณ. ดอ อัน ตี, อัน ซี กอย แคง กาปึม ดา ซึก อี บัร โฮว คูนดีคัม. เฌาพรา ต็อห, 2“เฌาพรา อี แฮะ พาน เบลห กาดาย อี แฮะ โบง แตห อึณ แบน โตต ดอน โมยว, อัน แตห อี แดะ อัน จืร เฌาพรา. เฌาพรา ตี แฮะ ต็อห, 3แตห แม แดะ โอว. โอว มืร ดี อึร โฆรห แม. โอว ดี แตห แม ยึร อี อาเร ตาง กาเซา บอ อาโมยว ปี ตู ดึอม ยึร ปี ตู ดึอม นับ แม.” 4เฌาพรา อี มูห เฌาพรา ปี กรึบ ดูอี อีซาเรลัะ, อัน แฮะ วี กาลาง ต็อห, “โฮว คูนดีคัม อี อึบ มืง ยูดา อี แฮะ ลึร กาปยาต. เฆ ดูอี บาแบ บอ ดึห กาง กาปยาต ตี, แบน บล็อะ อึณแตง บอ ตา มาปัวะ ลาง เฆ. 5เฆ แฮะ ตัห แตห เฆ ปึอน ดี กาโฆห ดี ดูอี บาแบ. มาแล, อึณ ยี มึห มี ดูอี แปะ แฮะ แตห โอว เฆ ยัม โกบ แฮะ รู แฮะ จาว กาเซา โอว ดี เฆ. โคว, โอว แฮะ แวน มืง นี. อึณ มูห โกบ แฮะ โบง เฆ บอกาเฆลียด อี ตู หมึอม.
6มาแล, โอว ยี ดี วี แตห เฆ ปึอน ดี กอย ดาคึย, กอย ฆัด เฆียด, แตห อึณ ปี ดูอี อี มึห เซา แฮะ วี แกน, วี หราย. โอว ดี แตห เฆ ยึร นา บอด นา หมึอม บอ แตห เฆ กอย ซีคยา เซเซ. 7โอว ดี วี โบง แตห มืง ยูดา บอ มืง อีซาเรลัะ วี แบน โดง บอด โดง หมึอม. โอว ดี วี อึณปราย มืง เฆ แตห อึณ วี ปี บรีม, ปี อาต นี. 8โอว ดี วี ฆ็อห แวน หมาบ แปะ แฮะ ลูต เฆ ดี โอว. โอว มืร ดี บลัวะ แวน แปะ แฮะ กาลึบ แปะ แฮะ หลึร เฆ ดารา โอว. 9มืง นี, อึณ ดี วี แบน อี แตห โอว โบยว ดาคึย, แตห อี เฮา อืบ มยูก โอว, แตห ซาเร โอว ลึห ดี ดูอี ดอน โมยว อี กอย แดง กาดาย นี. เฆ อี แฮะ ยึร ลอง ปี เฆฌู โอว บอ ลอง ปี โบง โอว ดี เฆ บอ ลอง นา บอด นา หมึอม ดอน โมยว บอ ลอง กอย ดาคึย ฆยามซา เฆ บอ ลอง แปะ แฮะ ยอด ลึมลา โอว มืง นี, ดูอี เฆ ตี ดี บอ โยว ดียูห ดีเยณ โกบ ดอน โมยว ปี ดี ดัว โอว ดี เฆ.”
10แฮะ ฮอต, เฌาพรา ปี วี ต็อห, “โดง นี เบ นับ ดี ต็อห, ‘แฮะ แบน โตต โดง ลึร โดง ราม, อาว มึห ดูอี เฆ โดว ซัดดาวา อี กอย.’ แฮะ หมาน, มืง ยูดา บอ โดบ อึณเตณ แคง มืง เยรูซาแลม แฮะ แบน โตต โดง เบลา โดง ราม, อาว มึห ดูอี เฆ โดว ซัดดาวา อี กอย. 11มาแล, วาย นี กาซืร ตี ดี วี มึห โฆรห อี โบยว ดาคึย. โฆรห อี โคย อี เกยา. อึณ ดี มึห บอ โฆรห กาโณม อี ดี คัด บอ โฆรห ดีบยา อี ดี คัด บอ โฆรห เฆ อี แฮะ ตัห แคง โฮว เฌาพรา, โฆ็ง ปี ดี หลู อี ดาง ฆูง เฆฌู ดี เฌาพรา. เฆ มืร ดี ต็อห, ‘แตห เอ อืบ เฌาพรา อี อึบ โตต ดอน โมยว อัน เฌา แฮะ บอด มยาด กาเซา, บอ น็อห ร็อก อัน เฌา บอ กอย เซเซ, อาว บยอง ดอ เหมา.’ อึณ ดี แบน ปาย ตี โคว, โอว ดี วี โบง, วี อึณปราย มืง นี, แตห อึณ วี ซีคยา วี หมึอม ปี บรีม.” เฌาพรา แฮะ กาลาง ปาย ตี.
12เฌาพรา อี อึบ โตต ดอน โมยว ปี วี ต็อห, “โดง แฮะ เบลา แฮะ ราม, โดง ตู มึห ดูอี เฆ โดว ซัดดาวา บอ แคง มืง เฆ ตี, อึณ ดี วี มึห ดา อี ตัห เฮียง มาบู. อึณ ดี บอ วี มึห เปต, แตห พึง มาบู ปึอน ดี โฮม บอ อีด ดาคึย. 13มืง อี กอย แดง นอน บอ มืง อี กอย แคง ฆลัง, มืง อี กอย บลาก นา เฆต ซีแง บอ มืง อาเบนยาม อี กอย โรบ มืง เยรูซาแลม บอ มืง อี กอย แคง กาดาย มืง ยูดา, แคะ กอย มาบู บอ ดอน โปละ ตี, เฆ วี โลว ตัห กาโลห ดา อี ตีห เฆ.” เฌาพรา แฮะ กาลาง ปาย ตี.
14เฌาพรา ปี วี ต็อห, “อึณ ดี บอ ฌัม ซีแง ปัน ดี วี เฆฌู โอว ดูอี อีซาเรลัะ บอ ดูอี อายูดา, แตห อึณ บอ โดบ กาดีก ซัดฌา แปะ แฮะ ดึอม ดัว โอว ดี ฆูณ ดัง เฆ.
15อาคราว ดอ อัน ตี โอว ดี แตห วี อี มึห น็อห ซืร น็อห หมาน ฆึอด ตัห แคง หลูกหลาน คูนดีคัม อาดาวีด. อัน ดี บอ ซูงพยาด โดบ ดารา ซืร ซืร หมาน หมาน แดง กาดาย นี.
16อาคราว ดอ อัน ตี อึณ ดี มึห อี คยอด เฆ ดูอี แคง มืง ยูดา. มืง เยรูซาแลม ดี บอ วี เยน ดาคึย. ปี จืร อัน เฌา ตี เฆ บอ ต็อห, ‘เฌาพรา อี แตห เอ มึห น็อห ซืร น็อห หมาน.’
17เฌาพรา แฮะ ฮอต ดึอม กาลาง, แคง หลูกหลาน คูนดีคัม อาดาวีด อึณ ดี มึห คูนดีคัม อี อึบ มืง อีซาเรลัะ เซเซ, อึณ ตู กาดัด ดอ เหมา. 18เฆ ดา อี หลู ดี เฌาพรา อี มูห ครึร อาเลวี อี โลว หลู ปี ดี หลู อี โดะ ดี เงา บอ ปี ดี หลู ดีฆาว แบน โมยว แบน โมยว. อึณ ดี มึห ดูอี อี หลู ปาย ตี เซเซ.”
19เฌาพรา ปี วี กาลาง โฆรห ดี อาเยเรมี ต็อห, 20“โอว แฮะ ต็อห, โอว แฮะ ดัว กาดีก ซัดฌา ดี ซีแง บอ แคง หมึร, แตห อึณ โดบ อาคราว อัน. กาดีก ซัดฌา ตี, อาว มึห อาเซ อี ปึอน ปยาต ดอ เหมา. 21กาดีก ซัดฌา ปี ดัว โอว ดี แดเจณ โอว อี จืร อาดาวีด มืร, อึณ บอ ปาย ตี. ดูอี แคง ครึร อัน ดี บอ แบน คูนดีคัม เซเซ. ดี ดา อี หลู ดี เฌาพรา อี มูห ครึร อาเลวี อี โลว โบง ฆาน โอว เซเซ มืร, โอว แฮะ ดัว กาดีก ซัดฌา ปาย ตี. อาว มึห อาเซ อี ปึอน ปยาต แวน ดอ เหมา. 22หลูกหลาน อาดาวีด อี มูห แดเจณ โอว บอ ครึร อาโมยว อาเลวี อี โบง ฆาน โอว, โอว ดี แตห เฆ กืน, แตห อึณ กอ ปี ซีมัณ อี กอย แคง ฆางหราว, แกวะ แตห ซี นับ ดี ตีห ดอ เหมา. โอว ดี บอ แตห เฆ กืน, แตห อึณ กอ ปี กาฮาต อี กอย โคบ อึม นัมมูกซารา อี ตู ปึอน เฆา ดี ยอด.”
23เฌาพรา ปี วี กาลาง โฆรห ดี อาเยเรมี ต็อห, 24“แม ปี ตู กาพา, ดูอี เฆ นี เฆ บอ นับ ดี ต็อห, ‘ดูอี อาโมยว แปะ แฮะ ร็อห เฌาพรา, อี มูห ดูอี อีซาเรลัะ บอ ดูอี อายูดา, อัน เฌา แฮะ ฮอต แวน.’ ดูอี เฆ ตี แฮะ ลูกตาย ดูอี ปี อึบ โอว. เฆ ตู มาด เฆ มูห ดูอี ปี อึบ โอว. 25เฌาพรา แฮะ ฮอต กาลาง, เซ กาดีก ซัดฌา ปี ดัว โอว ดี ซีแง ฆาย แคง หมึร ตี อาว ฮู มึห, เซ โอว มืร อาว ฮู แตห ฆางหราว เฆ กาดาย โดบ ดารา โอว เซเซ, 26โอว มืร กอ ดี แวน ดูอี อาโมยว ครึร อาโกบ บอ หลูกหลาน แดเจณ โอว อี จืร อาดาวีด. โอว มืร ตู ร็อห แตห อึณ มึห คูนดีคัม แคง หลูกหลาน อาดาวีด, แตห อัน อึบ หลูกหลาน อาบราฮัม, หลูกหลาน อาแซก บอ หลูกหลาน อาโกบ. โกบ อึณ ปาย ตี โอว ดี วี ดึห ตัห เฆ ดูอี แปะ แฮะ เหมต ฮาว อี เฮา. โอว ดี วี กาเว เฆ บอ เฆฌู เฆ.”
Currently Selected:
อาเยเรมี 33: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
