อาเยเรมี 27
27
1อาเฌเดกี อี มูห ฆอน คูนดีคัม อาโยวซียา อี อึบ เฆ ดูอี อายูดา กาจูห ดี แบน คูนดีคัม. ดอ อัน ตี เฌาพรา วี กาลาง โฆรห ดี อาเยเรมี. 2เฌาพรา ต็อห, “แตห แม โบง วัน บอ กันดาง, วี ชึบ ดี แมง แม. 3แตห แม วี กาลาง ฮาว โฆรห นี ดี เฆ คูนดีคัม อี อึบ มืง เอโดม, คูนดีคัม โมวอาบ, คูนดีคัม อัมโมน บอ คูนดีคัม อี อึบ มืง ทูโรว อี แฮะ ตัห ฌัม แคง มืง เยรูซาแลม. แตห แม กาลาง บอ ดี เฆ คูนดีคัม อี อึบ มืง.” 4อี มูห ดา กาณา อี อึบ มืง เฆ ตึอน, แตห แม กาลาง ดี เฆ ต็อห, “เฌาพรา อี อึบ โตต ดอน โมยว อี มูห เฌาพรา ปี กรึบ เฆ ดูอี อีซาเรลัะ, อัน แฮะ กาลาง ดี เบ ปาย นี.” 5อัน แฮะ ต็อห, “โอว แฮะ ตา ปวน โอว, โบง กาดาย บอ ดูอี บอ โดว ซัดดาวา อี กอย แดง กาดาย นี. โอว มืร ดี วี ดัว เฆ ดี ดูอี วี ปี ซี ดัว โอว. 6ดอ ตี นี, โอว ดี อาบ มืง เบ นี ดี แดเจณ โอว อี มูห คูนดีคัม อาเนบูคัดเนจา อี อึบ มืง บาแบ. เฆ มาโดว แปร ฮาย มืร, โอว แฮะ อาบ ดี อัน, แตห อัน อึบ เฆ. 7แคะ กอย ดูอี ดอน โมยว, เฆ โลว โบง ฆาน อัน บอ ฆาน เฆ หลูกหลาน อัน, แตห อึณ กอ ฌัม ปัน ดี ลึร โตต มาน มืง อัน. ปัน อัน ตี อึณ ดี วี มึห ดูอี กืน กาเซา. บอ คูนดีคัม อี มึห อาพูง ดังโคว ตาง ดี วี ตัห ดัม อัน, แตห อัน วี แบน หมาย เฆ.”
8เฌาพรา บอ ต็อห, “ดูอี โมยว เหมา อาว ต็อห, บอ ดูอี มืง เหมา อาว ต็อห, เซ อึณ มึห อี ตู โบง ปี ซูต ปี จัร อาเนบูคัดเนจา อี มูห คูนดีคัม อี อึบ มืง บาแบ, โอว ดี แตห เฆ วี คัม ดูก ดี มาปัวะ ลาง อัน บอ แตห เฆ เอต ปี ดี โฮม บอ แตห เฆ มึห เซา รอฆา. โอว ดี ดัม หมาบ ดี เฆ, แตห อึณ กอ ฌัม ปัน ดี ปยาต อัน แตห อึณ ลึร โตต ดอน โมยว. 9โคว อัน ตี แกวะ แตห เบ โทม โฆรห เฆ ดา ซารา อี บยาน โฆรห เฌาพรา, บอ เฆ ดา ซารา อี มาโนว ดารา บอ ดา ซารา อี นับ ดี อีด อึณบาว, ดา ซารา อี มึห พีคู. แกวะ แตห เบ โทม ดี ดูอี บอกาเฆลียด อี นับ ดี โบง บอ กาลาง ดี เบ ต็อห, ‘เบ ตู โลว คัม ดี แบน หมาย คูนดีคัม อี อึบ มืง บาแบ ตี.’ 10ดูอี เฆ ตี, เฆ นับ ดี กาลาง อี ตู หมาน อี แตห เบ ฮาว แคง มืง โต็ง. ปาย ตี โอว ดี โฮว เตา เบ, แตห เบ ลึร ชึม. 11อึณ ยี มูห เฆ อี แฮะ คัม ดี แบน ปี ซูต ปี จัร คูนดีคัม อี อึบ มืง บาแบ ตี, โอว ดี แตห เฆ กอย แคง มืง เฆ, แตห เฆ บัร มาน เฆ บอ โดง นา เฆ แคง มาน มืง เฆ.”
12โอว มืร แฮะ กาลาง โฆรห ตี ดี คูนดีคัม อาเฌเดกี ต็อห, “แตห แม คัม ดี โบง ฆาน คูนดีคัม มืง บาแบ, แตห อึณ ปี อี ชึบ แอะเมา ดี แมง แม. แตห เบ คัม บอ ดี แบน ปี ซูต ปี จัร อัน, แกวะ แตห แม โลว ยัม. 13เซ แม ตู โบง ปาย ตี เฆ ดา กาณา แม บอ เฆ ดูอี แม บอกาเฆลียด, เบ ดี บอ ยัม โตต ดี มาปัวะ ลาง. เฆ ดี คัม บอ อาเพ อาเร เอต ปี ดี โฮม บอ เซา รอฆา. เฌาพรา ดี โบง ดี เฆ ดูอี อี ตู คัม ดี แบน ปี ซูต ปี จัร คูนดีคัม มืง บาแบ ปาย ตี. 14แกวะ แตห แม โทม โฆรห เฆ ดา อี บยาน โฆรห เฌาพรา อี กาลาง ดี แม ต็อห, ‘แม ตู โลว แบน ปี ซูต ปี จัร คูนดีคัม แคง มืง บาแบ.’ เฆ กาโลว แม. 15เฌาพรา ยี แฮะ ต็อห, โอว ตู จัร เฆ. เฆ บอ นับ ดี ฆาว ปวน โอว, ณึงราง ดี บยาน โฆรห เฌาพรา. อึณ บอ แตห โอว โลว วี โฮว เตา เบ บอ เฆ ดา อี บยาน โฆรห เฌาพรา ตี ดี เบ. อึณ แตห เบ ลึร ชึม โตต.”
16วาย อัน ตี, โอว กาลาง ดี เฆ ดา อี หลู ดี เฌาพรา บอ ดี เฆ ดูอี กืน ต็อห, “เฌาพรา แฮะ ต็อห, แกวะ แตห เบ โทม โฆรห เฆ ดา อี บยาน โฆรห เฌาพรา อี ต็อห ดี เบ, ‘อาว บอ เหลณ เอ ดี วี ดึห ตัห โตต โกรวกราม แคง โฮว เฌาพรา อี แฮะ วี ฮาว กอย แคง มืง บาแบ ตี.’ ดูอี เฆ ตี, เฆ นับ ดี กาลาง โฆรห กาโลว ดี เบ. 17แกวะ แตห เบ โทม โฆรห เฆ ตี, แตห เบ คัม ดี แบน ปี ซูต ปี จัร คูนดีคัม อี อึบ มืง บาแบ ตี, แกวะ แตห เบ โลว ยัม. แกวะ แตห เบ โบง แตห มืง นี แบน โดง เยน โดง ง็อง ดูอี. 18เซ ดูอี เฆ ตี แฮะ มูห ดูอี อี บยาน โฆรห เฌาพรา หมาน อาคาคัร, แตห เฆ วี ซาคึร หมาณ ดี เฌาพรา อี อึบ โตต ดอน โมยว ลอง โกรวกราม อี ซี ฆีด แคง โฮว เฌาพรา บอ แคง โฮว คูนดีคัม อี อึบ มืง ยูดา บอ กอย แคง มืง เยรูซาแลม, แกวะ แตห เฆ ปึอน ดี ดึห ฮาว แคง มืง บาแบ. 19อาเนบูคัดเนจา อี มูห คูนดีคัม อี อึบ มืง บาแบ ตี, 20ดอ เหมต ฮาว อัน อาเยคอนี อี มูห ฆอน คูนดีคัม อายอยาคีม อี อึบ มืง ยูดา บอ เฆ อามู อามาด อี กอย แคง มืง เยรูซาแลม บอ แคง มืง ยูดา, แตห เฆ ฮาว แคง มืง บาแบ ตึอน. อัน ซี อูน ร็อง บ็อง เดณ, อึณปาน บ็อง เดณ บอ กาเลณ เลา อี บึม อึณปาน อึม ตี บอ โกรวกราม แคง โฮว เฌาพรา มัง กาล็อะ.” 21เฌาพรา อี อึบ โตต ดอน โมยว อี มูห เฌาพรา ปี กรึบ เฆ ดูอี อีซาเรลัะ, อัน แฮะ กาลาง ปาย นี ลอง โกรวกราม อี ซี ฆีด, ซี กอย แคง โฮว เฌาพรา บอ แคง โฮว คูนดีคัม มืง ยูดา บอ แคง มืง เยรูซาแลม. อัน ต็อห, 22“โกรวกราม เฆ ตี, เฆ ดี ดึห ฮาว โตต แคง มืง บาแบ. อึณ ดี บอ กอย ดี ตี, แตห อึณ กอ ฌัม ซีแง ปัน ดี วี ตัห ดึห โอว โตต ดอน โมยว, วี ฮาว ตึย โดง กอย บรีม อัน.” เฌาพรา แฮะ กาลาง ปาย ตี.
Currently Selected:
อาเยเรมี 27: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
