อี ซูงพยาด 12
12
ลอง อาเยพาดา ฆาย ดูอี อาเอพารีม
1เฆ ดูอี ครึร อาเอพารีม บอ วี แรน ดา ซึก. เฆ กาโลห อึม แบลง ยอดาน, วี ฮาว ดี มืง จาโพน. เฆ ต็อห ดี อาเยพาดา, “เหมา อึณ ปาย ปี ฮาว กาโฆห แม ดี ดูอี อัมโมน, ยี ตู แดะ เย? เย ดี ดึห เงา โดะ กาง แม, แตห อึณ ดีฆรับ ทีบ ยัม แม.”
2มาแล, อาเยพาดา วี กาลาง ดี เฆ ต็อห, “โอว บอ เฆ ดูอี โอว, เย แฮะ ลาย กาลูต ปาย คาคัร ดี ดูอี อัมโมน. โอว แฮะ ดึอม แดะ เบ จอย โอว, เบ ยี ตู แป ดี จอย แตห เย ลอด ดี เฆ. 3โอว บอ นับ, เบ ตู แป ดี คยอด เลห เย ตี, โอว บอ จูน อาซาก โอว, กาโลห ฮาว กาโฆห ดี เฆ. เฌาพรา มืร แฮะ แตห โอว แป เฆ. ดอ ตี นี เหมา อึณปาย ปี ซี ตัห กาโฆห เบ ดี โอว?”
4ดอ อัน ตี อาเยพาดา บอ แดะ กาฌูะ แคะ กอย อีมาย แคง มืง ฆีเลอาด บอกาเฆลียด, กาโฆห ดี ดูอี อาเอพารีม. แฮะ ฮอต อัน บอ แป เฆ. เฆ โบง ปาย ตี โคว, เฆ ดูอี อาเอพารีม แฮะ แนนัะ เฆ ต็อห, “เบ ดูอี อาโมยว ฆีเลอาด, เบ มูห ดูอี อาเอพารีม อี เตา เลห แคง อาโมยว อาเอพารีม ฆาย ดูอี อามานาเซ.” 5เฆ มืร ตู แตห ดูอี อาเอพารีม ปึอน ดี ลอด คอ อู วี. เฆ ดูอี อาโมยว ฆีเลอาด แฮะ บัร ดี บาง กาโลห ดอน โปละ โดบ อึม แบลง ยอดาน อี ปึอน ฮาว ดี มืง อาเอพารีม. เซ อึณ มึห ดูอี อาเอพารีม ตัห หมาณ ดี กาโลห, เฆ ดูอี ฆีเลอาด ดีหมอด ดูอี วี ตี ต็อห, “แม มูห ดูอี อาเอพารีม?” เซ ดูอี ตี วี ต็อห, “โอว ตู มูห,” 6เฆ ปี วี จัร แตห อัน กาลาง โฆรห ต็อห “ซีปอเลด.” เซ ดูอี วี ตี ยี วี ต็อห “จีปอเลด,” โกบ ตู บรี โฆรห ปี กาลาง อัน, เฆ ง็อห แวน อัน ดี บาง กาโลห ตี. ดอ อัน ตี เฆ ดูอี อาเอพารีม บอ ยัม พวน หมึณ ดี อา แหรณ วี.
7อาเยพาดา อี มูห ดูอี อาโมยว ฆีเลอาด, อัน บอ แบน ดา ตาง อี ซูงพยาด ดารา ดี เฆ ดูอี อีซาเรลัะ อาดา เดา ซีนัม. แฮะ ฮอต, อัน บอ ยัม. เฆ บอ ฮาว ดีบ โดว โบ็ง อัน ดี มืง บรีม อัน แคง มืง ฆีเลอาด ตึอน.
ลอง อาอีบาจาน, อาเอโลน บอ อาบาโตน
8วาย อาเยพาดา ตี แฮะ ฮอต ยัม, อาอีบาจาน อี มูห ดูอี มืง เบดแลม, อัน บอ วี แบน ดา ตาง อี ซูงพยาด ดารา ดี เฆ ดูอี อีซาเรลัะ. 9อัน มึห ฆอน อีมาย โอย ฆึร วี บอ ฆอน อีบึณ โอย ฆึร วี. อัน แตห ฆอน อีบึณ อัน ฮาว คัด ดึห อีมาย อี ตู มูห ครึร อัน. อัน แตห บอ ฆอน อีมาย อัน คัด ดึห ดูอี โอย ฆึร วี อี ตู มูห ครึร อัน, แตห เฆ ตัห แบน เอา อัน. อาอีบาจาน ตี บอ แบน ดา ตาง อี ซูงพยาด ดารา ดี เฆ ดูอี อีซาเรลัะ อาดา บู ซีนัม. 10แฮะ ฮอต, อัน บอ ยัม. เฆ บอ ฮาว ดีบ โดว โบ็ง อัน แคง มืง เบดแลม.
11วาย อาอีบาจาน ตี แฮะ ฮอต ยัม, อาเอโลน อี มูห ดูอี ครึร อาเฌบูโลน บอ วี แบน ดา ตาง อี ซูงพยาด ดารา ดี เฆ ดูอี อีซาเรลัะ อาดา ฆึร ซีนัม. 12แฮะ ฮอต, อัน บอ วี ยัม. เฆ บอ ฮาว ดีบ โดว โบ็ง อัน ดี มืง อาจาลูน อี กอย แคง กาดาย มืง อาเฌบูโลน.
13วาย อาเอโลน ตี แฮะ ฮอต ยัม, อาบาโตน อี มูห ฆอน อาฮีเลลา อี มูห บอ ดูอี อาโมยว บีราโทน, อัน บอ วี แบน ดา ตาง อี ซูงพยาด ดารา ดี เฆ ดูอี อีซาเรลัะ. 14อัน บอ มึห ฆอน อีมาย พวน ฆึร วี, มึห หลาน ฆอน อีมาย โอย ฆึร วี. เฆ บอ ป็อะ มาลา บู ฆึร โดว. อาบาโตน บอ แบน ดา ตาง อี ซูงพยาด ดารา ดี ดูอี อีซาเรลัะ อาดา ดา ซีนัม. 15แฮะ ฮอต, อัน บอ ยัม. เฆ บอ ฮาว ดีบ โดว โบ็ง อัน ดี มืง บีราโทน อี กอย แคง มืง อาเอพารีม ดี กาแต นอน โดง มูห กาดาย มืง ดูอี อามาเลก.
Currently Selected:
อี ซูงพยาด 12: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
