ยก 4

1เหมา อึณ ปาย ปี ลาย กาโฆห ลาย กาแทณ เบ? อึณ ปาย นี. น็อห เบ, อึณ มูห น็อห ซี ปึอน แบน โมยว แบน โมยว. ปี ซี ปึอน แบน โมยว แบน โมยว ฌึร ตี, อึณ ปี แฮะ ลาย กาโฆห แคง น็อห เบ. 2แคะ ปี ซี ปึอน เบ, เบ ตู ปึอน. เบ บอ ง็อห อี, แตห เบ ปึอน. เบ ยี ตู ปึอน แคะ ปี ซี ปึอน เบ. แฮะ ฮอต, เบ วี ลาย รู ลาย กาโฆห. โกบ ตู หมาณ เบ ดี เฌาพรา, เบ ตู ปึอน. 3เซ เบ ยี หมาณ ดี เฌาพรา, เบ ตู ปึอน ปี หมาณ เบ โกบ ตู กาซืร น็อห เบ. ปี ซี ปึอน เบ, เบ ซี แตห อึณ ล็อะ มี น็อห ลอพัะ เบ. เบ ตู ซี แตห อึณ ล็อะ น็อห เฌาพรา.

4ปี โบง เฆ ดี เฌาพรา, อึณ ปี ปี โบง เฆ อี ลูต อีบึณ. เบ โลว นับ, เซ เบ ลาย กาฆึก ดี ดูอี เฮา อี ตู หณึม, เบ ดี กาย็อห ดี เฌาพรา. โคว, เซ อึณ มึห ดูอี อู วี, ต็อห ดี แบน ฆึก เฆ ดูอี ตู หณึม เฌาพรา, อัน วี แบน รันซู เฌาพรา. 5แคง บับ เฌาพรา อึณ ต็อห ลอง น็อห พึอม เฌาพรา อี กอย แคง น็อห เอ, อัน หลัยะ เอ, แตห เอ ร็อก มี เฌาพรา. เบ โลว โหลห ลอง อัน ตี, แกวะ แตห เบ แวน โฆรห ตี. 6เฌาพรา ยี กาเว กาเซา เอ, ดัว น็อห หมาน ดี เอ. โคว อัน ตี อึณ แฮะ แดม อูน แคง บับ เฌาพรา ต็อห, “เฌาพรา ตู จอย ดูอี อี ปีคึก น็อห. อัน ยี กาเว ดูอี อี ตู ปีคึก น็อห.”

7โคว อัน ตี แตห เบ แตห เฌาพรา อึบ น็อห เบ. เซ โบว กานัม อี จืร ซาตาน ตัห กาตัด เบ, เบ โลว กาบีด น็อห เบ บอ แวน โฆรห อัน. ปัน ตี อัน ดี วี เตา ตัะ เบ อู เฌณ. 8เซ เบ ยี ต็อห ดี กอย กาตัด รึม โดบ เฌาพรา, เฌาพรา ดี วี ตัห กอย กาตัด เบ. เบ ดูอี อี โบง หมาบ เซเซ, แตห เบ แวน หมาบ, แตห อึณ ปี เบ บาย แด เบ, แตห อึณ วี บอด. บอ เบ ดูอี อี มึห น็อห กาเบลียะ กาบลัะ, แตห เบ แวน น็อห ตี, แตห อึณ วี แบน น็อห ซีงา บอด. 9แตห อึณ แบน น็อห กลึร น็อห ลึร ดี เบ โกบ หมาบ เบ, แตห เบ บอ ยาม ตาง. อาเซ กาณัห, แตห อัน วี กลึร. อาเซ โคย, แตห อัน วี แบน น็อห จัน, น็อห อาว ดาคึย. 10ปาย ตี เบ โลว ปีเตียม น็อห เบ, โฆม ดี อาต เฌาพรา. แฮะ ฮอต, เฌาพรา ดี แตห เบ วี ยีต, วี แตห เบ มึห น็อห ตาง.

11เบ บีนอง, แกวะ แตห เบ ลาย กาลาง นา ตู หมึอม, นา จาว. อาเซ กาลาง นา ตู หมาน ลอง บีนอง อัน บอ พยาก อัน, อึณ ปี, อัน พยาก ดารา เฌาพรา ต็อห, อึณ ตู หมาน, อาว โลว ร็อก อี เฮา โดบ ปี จัร ดารา เฌาพรา. เซ เบ ยี โบง ปาย ตี, บอ เบ อาว ฮู โดบ ดารา เฌาพรา. อึณ ปี เบ แฮะ แวน ดารา ตี ต็อห, อึณ ตู หมาน, อาว โลว โดบ. 12อึณ มึห มี เฌาพรา อู กาดัง อี แฮะ ดัว ดารา. มี อัน ปึอน ดัม หมาบ ดี อี. อัน ปึอน คยอด ดูอี บอ แตห อาซาก เฆ ชึม. เซ อึณ ยี มูห เบ, อาว มึห อาเซ ควาง เบ ซูงพยาด อามู อี ต็อห, เฆ มึห หมาบ.

13เบ โลว วี โทม ปอ อู โมยว. เบ นับ ดี ต็อห, “แคหณา เย ดี ฮาว มืง นา นี, มืง นา เนณ. เย ดี ฮาว กอย แคง มืง ตี อาดา อู ซีนัม, วี กาจึห กาย็อง โกรวกราม, แตห เย ปึอน กืน รึอน.” 14เซ เบ ต็อห ปาย ตี, เบ ยี ตู นับ, แคหณา อึณ ดี ปาย เหมา. อาซาก เบ อาว โต็ง. อึณ ปี ดัก เงา อี ปึอน ยึร อาดา อู กาจัน. แฮะ ฮอต, อึณ หราย, อาว ฮู ปึอน ยึร. 15โคว อัน ตี เบ โลว ต็อห, “เซ เฌาพรา แตห เย โบง, เซ เย ซี กอย ซี มึห อาซาก, เย ดี โบง ปาย นี ปาย นี.” 16เบ ยี ตู ต็อห ปาย ตี. เบ กาลาง โฆรห ปีพูง บอ ปีคึก น็อห เบ. โฆรห ฌึร ตี อาว หมึอม, อึณ แบน นา ฮาย นา มืก. 17อาเซ นับ นา หมึอม แบน โมยว แบน โมยว ปี โลว อัน โบง, เซ อัน ยี ตู โบง, อึณ แบน หมาบ ดี อัน.

Currently Selected:

ยก 4: pce

Highlight

Copy

Compare