อาอีซายัะ 55

ลอง เฌาพรา มึห น็อห ร็อก กาเว

1เฌาพรา วี ต็อห, “อึย เบ ดูอี ดอน อี อี ซี เดียง อึม, แตห เบ ตัห โดง มึห อึม. เบ อี ตู มึห รึอน, แตห เบ ตัห จึห ปี ดี โฮม. เบ ปี ซัะ โตต รึอน, แตห เบ ตัห จึห อึม มางูน บอ อึม ปู มัก.

2เหมา อึณ ปาย ปี ฌาย เบ รึอน จึห อี ตู แบน โปลม แบน แฮณ ดี เบ? เบ แฮะ รัณ ฆาน จัน กาเซา. รูห รัณ เบ ตี, เหมา อึณ ปาย ปี วี จึห เบ ปี ดี โฮม อี ตู แตห เบ แพ? แตห เบ วี โทม โฆรห โอว บอ โบง โดบ ปี ต็อห โอว. เซ เบ โบง ปาย ตี, เบ ดี บอ โบยว ดาคึย, แตห อึณ ปี เบ ปึอน ดี โฮม ปี ดี โฮม อี ซีแงห อี บอด.

3แตห เบ โทม โฆรห โอว บอ วี ตัห กอย โดบ โอว. เซ เบ โบง โดบ โฆรห โอว ตี, น็อห พึอม เบ ดี วี อีม, วี มึห อาซาก กามาย. โอว ดี วี ดัว กาดีก ซัดฌา ดี เบ อี ตู บลืง ดอ เหมา. โอว ดี ม็องการา ดัว นา บอด ดี เบ, แตห อึณ ปี ปี ดึอม กาแซณ โอว ดี คูนดีคัม อาดาวีด ตึอน.

4โอว แฮะ แตห อัน กาลาง ลอง โอว ดี ดูอี เฮา, แตห อัน แบน บอ อี อึบ อี ซูงพยาด ดารา ดี เฆ ดูอี แบน โมยว แบน โมยว.

5แตห เบ ยอด, อึณ ดี มึห ดูอี อู โมยว ปี ตู ดึอม นับ เบ, เฆ ดี เตา ตัห โดง กอย เบ. บอ เฆ ดูอี แบน โมยว แบน โมยว อี ตู ดึอม นับ ลอง เบ บอ เฆ ดี ตัห โดง กอย เบ. โคว, โอว เฌาพรา อี มูห เฌาพรา อี อึบ เบ, อี มูห เฌาพรา อี ซีงา บอด ปี กรึบ เบ ดูอี อีซาเรลัะ, โอว แฮะ แตห เบ มึห ซาเร.”

6แตห เบ วี เหรต เฌาพรา ดอ ปึอน เบ ดี กาตูณ อัน. แตห เบ บอ ซาคึร ดี เฌาพรา, ดอ กอย เครียะ อัน ดี เบ.

7ดูอี อี โบง นา ฮาย นา มืก, แตห อัน แวน ปี โบง อัน ตี. ดูอี อี คราม ดี โบง นา ตู หมึอม, แตห อัน แวน ปี คราม อัน ตี, วี โดบ เฌาพรา. อัน เฌา ดี บอ กาเว อัน. แตห อัน วี โบง อี ล็อะ น็อห เฌาพรา อี มูห เฌาพรา ปี กรึบ เอ. อัน เฌา ดี บอ ฆ็อห แวน หมาบ อัน อี กืน.

8เฌาพรา วี ต็อห, “อากยาม อางยาน โอว ตู ปี อากยาม อางยาน เบ. อึณเตณ ปี แหน โอว ดี เบ มืร, อึณ ตู ปี อึณเตณ ปี อึง เบ ดี โดบ.

9ฆางหราว ฆาย กาดาย นี ลาย กาโต็ง แคะ เหมา, แคะ ตี อึณเตณ ปี แหน โอว ดี เบ บอ อึณเตณ ปี อึง เบ ดี โดบ แฮะ ลาย กาโต็ง. บอ อากยาม อางยาน โอว ฆาย อากยาม อางยาน เบ มืร, แฮะ ลาย กาวัห แคะ ตี.

10โฆรห ปี กาลาง โอว, อึณ บอ ปี ฆลาย บอ อึม ดาด อี โจห แดง กาดาย. อึณ มืร ตู วี โฮะ ดีโลย ดีลาย. อึณ ยี แตห กาดาย อัม, บอ แตห เฮ มึห เบล กืน. อึณ บอ แตห ปี ซัม อี ลัต, แตห อึณ วี มึห บอ ซีมา อี ปึอน วี ซัม. แตห อึณ บอ มึห โหงว อี ดี ปึอน โฮม.

11โฆรห ปี กาลาง โอว, อึณ บอ ปาย ตี. แคะ ปี กาลาง อูน โอว, อัน ตู ฆาด คอ อู แด. โฆรห โอว ตี, อึณ บอ มึห ปวน ดี แตห อึณ โบว แบน แคะ ปี ต็อห โอว. อึณ บอ มึห ปวน ดี โบง แตห อึณ แบน ปี ซี โบง โอว.

12เบ ดี บอ มึห น็อห ฌอนโฌม บอ โคย ดี วี เลห โดง กอย เบ. เบ ดี บอ มึห น็อห ฆัด เฆียด น็อห ดาคึย ดี เลห ตัะ มืง ตี. อึณ ดี บอ ปี นอน เตียะ เฆ นอน ตาง ดี บอ ดัด ต็อห โหมว. บอ แคะ กอย เฮ บอกาเฆลียด ดี บอ โบง ปี ดูอี กาทัะ แด.

13เฮ อึณเก ดี บอ วี ลัต กาดาง ยวน. เฮ มูราตู ดี บอ ลัต กาดาง มาอาต. ลอง อัน ตี, อึณ ดี บอ แบน ลักซานา อี แตห อี โหลห เซเซ แคะ ตาง อาพูง ดังโคว เฌาพรา.”

Currently Selected:

อาอีซายัะ 55: pce

Highlight

Copy

Compare