อาอีซายัะ 20

ลอง ดูอี อาซูรียา ตึก ดูอี มืง แอฆึบ ฆาย มืง กูซา

1อู ซีนัม คูนดีคัม อาซาราน อี อึบ มืง อาซูรียา บอ ดัว อามีง ดี ดา โบว ตาง อี อึบ ดา ซึก แคง มืง อาซูรียา, แตห อัน แยต เฆ ฮาว กาโฆห ดี ดูอี แคง มืง อาจูด. ดอ อัน ตี เฆ บอ ฮาว กาโฆห บอ แป มืง อาจูด ตี. 2ดอ อัน ตี เฌาพรา แฮะ ดึอม จัร อาอีซายัะ อี มูห ฆอน อาโมด ต็อห, “แตห แม บูต เลห คูดีณ แม, บูต บอ ครึง จาน ปี ชึบ แม.” อัน มืร โบง โดบ โฆรห ตี บอ ฮาว โดว ฆลัะ, ตู ชึบ คูดีณ อัน.

3วาย อัน ตี เฌาพรา วี ต็อห, “แดเจณ โอว อี จืร อาอีซายัะ ตึอน, อัน แฮะ กอย โดว ฆลัะ บอ ตู ชึบ คูดีณ อาดา โอย ซีนัม. ลอง อัน ตี, อึณ บยัะ อี ดี โบว แบน แคง มืง แอฆึบ บอ แคง มืง กูซา. 4คูนดีคัม อาซูรียา ดี เหมต ดูอี อา มืง ตี, บูต แวน ครึง ตา เฆ, แตห เฆ กอย อาฆลัะ, แบน บอ หมาย อัน. บอ ดูอี ฆัด บอ ดูอี หนึม เฆ ตู ปึอน ชึบ คูดีณ, เฆ กาดูห ดี ฮาว อาฆลัะ ดอน อี, อาว ปึอน ดึห มาเซ กาบีด ซีโป็ง เฆ, แตห อึณ พยาก ซาเร เฆ ดูอี แอฆึบ. 5แคะ กอย เฆ อี น็อห ตาง ดี ดูอี มืง กูซา บอ อืบ มยูก มืง แอฆึบ, เฆ ดี วี โยว กาเซา บอ ซาย อี. 6อาคราว ดอ อัน ตี เฆ อี กอย โคบ บาง อึม นัมมูกซารา, เฆ ดี บอ ต็อห, ‘แตห เบ ยอด, โดง แฮะ คราม เอ ดี เตา ฮาว เครียง แตห เอ ลอด ดี รันซู เอ อี มูห คูนดีคัม อาซูรียา ตึอน, อึณ แฮะ วี ปาย เหมา ดอ ตี นี? เหมา เอ ดี ปาย แตห เอ ลอด?’ ”

Currently Selected:

อาอีซายัะ 20: pce

Highlight

Copy

Compare