อาโฮวซียา 1
1
ลอง อีบึณ อาโฮวซียา เฆ ฆอน อัน
1เฌาพรา กาลาง โฆรห ดี อาโฮวซียา อี มูห ฆอน อาเบเอรี. ดอ อัน ตี อึณ บอ มูห อาคราว คูนดีคัม อาอูฌียา, คูนดีคัม อาโยวทาม, คูนดีคัม อาคาด บอ คูนดีคัม อาเฮจัะกี เฆ อี มูห คูนดีคัม อี อึบ มืง ยูดา. อึณ บอ มูห อาคราว อาเยโรวโบว อี มูห ฆอน อาโยวอาด, อี แฮะ แบน คูนดีคัม แคง มืง อีซาเรลัะ.
2ดอ อัน ตี เฌาพรา จูห ดี กาลาง โฆรห ดี อาโฮวซียา ต็อห, “แตห แม ฮาว ดึห ยา มาลัม, แตห อัน แบน อีบึณ แม. อีบึณ แม ตี อัน ดี โดบ อีมาย แบน วี แบน วี. บอ ฆอน แม ดี บอ ปี อัน. อึณ บอ ปาย ตี โคว, เฆ ดูอี ปี อึบ โอว แฮะ แวน โอว บอ โดบ เฌา ปี กรึบ ดูอี อาโมยว เฮา.” 3ปัน ตี อาโฮวซียา มืร ดึห อีบึณ อี จืร นาง โฆมา อี มูห ฆอน อาตีปาลีม. อีบึณ ตี บอ แด บาดีก ซันเท บอ มึห ฆอน อีมาย.
4เฌาพรา บอ วี กาลาง ดี อาโฮวซียา ต็อห, “แตห แม ดาง จืร ฆอน แม ตี, แตห อัน จืร อาเยจาเรลัะ. โคว, อาว บอ เหลณ โอว ดี ดัม หมาบ ดี คูนดีคัม ดูอี อีซาเรลัะ โกบ หมาบ ปี โบง ฆูณ ดัง เฆ อี มูห อาเยฮู. อึณ มูห หมาบ แปะ แฮะ ง็อห ยัม อัน ดูอี แคง มืง เยจาเรลัะ ตึอน. โอว ดี โบง แตห หลูกหลาน คูนดีคัม อาเยฮู หราย โตต. 5ปาย ตี โอว ดี ปยาต แวน ปวน ดา ซึก ดูอี อีซาเรลัะ แคง ดีลัยะ เยจาเรลัะ.”
6นาง โฆมา ตึอน ปี วี มึห ฆอน ปอ อู วี. วี ตี บอ มูห ฆอน อีบึณ. เฌาพรา วี กาลาง ดี อาโฮวซียา ต็อห, “แตห แม แตห อัน จืร ลอรูฮามา.#1:6 ซีเพา ‘ลอรูฮามา’ มูห ‘ตู ร็อก’ โคว, วาย อัน ตี โอว มืร ตู ร็อก กาเว เฆ ดูอี อีซาเรลัะ, ตู ฆ็อห แวน หมาบ เฆ. 7อี มูห เฆ ดูอี อายูดา, โอว ยี ดี ร็อก กาเว. โอว อี มูห เฌาพรา ปี กรึบ เฆ, โอว ดี บอ คยอด เฆ. มาแล, โอว ตู จัร อัะ, ตู จัร เฆ ดา ซึก บอ มาปัวะ ลาง, ลาย กาโฆห, ตู จัร มังปร็อง บอ ดา ซึก อี ป็อะ มังปร็อง ตี.”
8นาง โฆมา แฮะ ฮอต แตห ฆอน อัน อี จืร ลอรูฮามา ฆ็อห ปู, อัน ปี วี แด บาดีก ซันเท ปอ อู เฌณ. อัน วี มึห ฆอน อีมาย. 9เฌาพรา ปี วี ต็อห, “แตห แม แตห อัน จืร อาลออัมมี.#1:9 ซีเพา ‘อาลออัมมี’ มูห ‘อาว มูห ดูอี อาโมยว โอว’ โคว, เฆ ดูอี อีซาเรลัะ อาว ฮู มูห ดูอี ปี อึบ โอว. โอว มืร อาว ฮู มูห เฌาพรา ปี กรึบ เฆ.
10มาแล, เฆ ดูอี อีซาเรลัะ ยี แกร ดี แบร กืน กอ ปี กาฮาต อี กอย โคบ อึม นัมมูกซารา อาว นับ ดี ตีห. อาตึร นี เฌาพรา ปี บอ ต็อห, ‘เบ มูห ดูอี โอว’ มืร, อึณ ยี ดี มึห อาคราว ดี วี ต็อห อัน ดี เฆ, ‘เบ มูห ฆอน เฌาพรา อี กอย เซเซ.’ 11เฆ ดูอี อายูดา บอ เฆ ดูอี อีซาเรลัะ เฆ ดี วี ลาย โพรม รึม. เฆ ดี วี ร็อห คูนดีคัม อู กาดัง, แตห อัน แบน คูนดีคัม อี อึบ เฆ ดอ วี ฮาว ฌัม เฆ แคง มืง บรีม เฆ. โดง จืร เยจาเรลัะ ตึอน ดี วี แบน โดง โบยว ดาคึย.”
Currently Selected:
อาโฮวซียา 1: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
