อาเอเซเคน 45
45
ลอง กาซาง กาดาย แคง มืง อีซาเรลัะ
1เซ เบ กาซาง ดัว กาดาย ดี ดูอี ดอน ครึร แตห อึณ แบน คาฆูน ดี เฆ, เบ โลว ดึห อาดา อู โปละ, อาบ ดัว ดี เฌาพรา แตห อึณ แบน โดง บอด. โดง ตี โลว ดึห นา โต็ง อัน อา หมึณ ดี พัน แหรณ กานีห. นา กาว็อห อัน อา หมึณ กานีห. โดง ตี ดี แบน โตต โดง ซีงา บอด. 2แคง โดง ตี, โลว มึห อู โปละ, อี โต็ง บอ กาว็อห พัน มาย็อห กานีห อี ซี นา พวน บลาก, แตห อึณ แบน โดง ดี ซัม โฮว เฌาพรา. ปี วี โลว มึห โดง ตู มึห มาเซ, แตห อึณ โรบ โดง ตี, กาว็อห อัน พัน ฆึร กานีห. 3แคง โดง ซีงา บอด โลว กาย็อห อู กาแต นา โต็ง อัน อา หมึณ ดี พัน แหรณ กานีห, นา กาว็อห อัน อู หมึณ กานีห. โดง ตี มูห โดง ซีงา บอด หลึอม โตต. 4กาดาย โดง ตี วี แบน โดง ซีงา บอด อาดา เฆ ดา อี หลู ดี เฌาพรา อี โบง ฆาน เฌาพรา. เฆ โบง โตต ดอน โมยว แคะ ปี จัร เฌาพรา เฆ โบง. โดง ตี โลว ซัม กาง เฆ บอ โฮว เฌาพรา. 5อาดา ปอ อู กาแต อี ซี ฆีด อี โดบ นา โต็ง อัน อา หมึณ ดี พัน แหรณ กานีห บอ นา กาว็อห อัน อู หมึณ กานีห, อึณ ดี แบน กาดาย เฆ ดูอี ครึร อาเลวี อี โบง ฆาน เฌาพรา แคง โฮว เฌาพรา, แตห เฆ ปึอน ดี โฆว มืง อี ปึอน กอย นา แคง. 6กาดาย อี ลาย กาฌาบ นา เบรต โดง บอด ตึอน, แตห อึณ วี แบน กาอูน กาดาย มืง โดง ดี กอย เฆ ดูอี อีซาเรลัะ. กาดาย โดง ตี, อึณ บอ โต็ง อา หมึณ ดี พัน แหรณ กานีห บอ กาว็อห พัน แหรณ กานีห.
7คูนดีคัม มืร ดี ปึอน กาดาย อี กาฌาบ ดี โดง บอด บอ อา บลาก มืง ตึอน. อึณ ดี กอย บลาก นา เฆต ซีแง กอ ฌัม นัมมูกซารา. อี กอย บลาก นา เลห ซีแง วี ฮาว ฌัม นา เลห ซีแง ปอ อึณ ปัว. อึณ กอย โคบ โดง มูห กาดาย อี มูห คาฆูน เฆ ครึร ดูอี อีซาเรลัะ. 8กาดาย ตี ดี แบน คาฆูน คูนดีคัม. เฆ มูห ดา กาณา อี อึบ มืง ดูอี อีซาเรลัะ. เฆ ดา ตาง ฮู คาหนาบ ดูอี ปี อึบ โอว. เฆ ยี ควาง ดูอี อีซาเรลัะ มึห กาดาย โดบ ครึร เฆ.
9เฌาพรา อี อึบ โตต ดอน โมยว ปี วี ต็อห, “อึย เบ อี มูห ดา กาณา อี อึบ มืง ดูอี อีซาเรลัะ, อี ตู หมึอม แปะ แฮะ โบง เบ แฮะ กืน กาเซา. จู แคะ ตี. แตห เบ แวน ปี โบง เบ อี ตู หมึอม บอ ปี คาหนาบ เบ ดี อี เฮา. แกวะ แตห เบ โฮว เตา เฆ ดูอี ปี อึบ โอว แคง มืง เฆ ปอ อู เฌณ. เฌาพรา อี อึบ โตต ดอน โมยว แฮะ กาลาง แตห เบ โบง ปาย ตี. 10เบ โลว จัร ลัะจู อี หมาน อี กาฌี, บอ เอพา ฆาย ปาะ อี หมาน อี กาฌี. 11เอพา ปี เฆา เบ โมยว อี กาฮ็อห, อึณ บอ โลว การัม ฆาย ปาะ ปี เฆา เบ โมยว อี มูห อึม. ฆึร ปาะ ฮับ แคง อู โอมา. บอ ฆึร เอพา ฮับ แคง อู โอมา. โลว เฆา โมยว อี มูห อึม บอ อี กาฮ็อห ตา โอมา ตี. 12เซ อึณ มูห โมยว ปี ซัะ ดี ลัะจู, อา ฆึร ฆีรา บอ มูห อู เซเคน. เดา ฆึร เซเคน ปี วี มูห อู มีนา.
ลอง ปี ดี หลู ซีแง บลอย เฌาพรา
13“เซ อึณ มูห เคาคยูง อี เลห แคง มาน เบ, เดา ฆึร บูน อู บูน เบ โลว หลู. เซ อึณ มูห ซีโฆ็งรา อี แฮะ เลห แคง มาน เบ, เดา ฆึร บูน อู บูน เบ โลว หลู. 14นามัน แปะ แฮะ กรีด เลห เบ, เซ อึณ มูห อู กอรัะ เบ โลว ดึห หลู อู มาย็อห บูน อู บูน. เบ โลว เฆา ตา ปาะ อี มูห ฆึร ปาะ อู โอมา. ฆึร โอมา บอ มูห อู กอรัะ. 15มาบู มืร ปาย ตี. แคง พึง ดอน พึง อี มูห อา มาย็อห โดว อี ปึอน โฮม เปต อึณจัม แคง โดง นา แคง มืง อีซาเรลัะ โลว หลู อู โดว. เบ โลว ดึห ตัห โดว ตี, แตห อึณ แบน ปี หลู ดีฆาว, ปี หลู อี โดะ ดี เงา บอ ปี หลู อี กอย กาฌูะ โฮม รึม, แตห ดูอี วี กาล็อะ ดี เฌาพรา.” เฌาพรา อี อึบ โตต ดอน โมยว แฮะ กาลาง ปาย ตี. 16แตห เฆ ดูอี บอ มืง บอกาเฆลียด อาบ โดว ตี ดี ฆอน คูนดีคัม แคง มืง อีซาเรลัะ. 17ดา กาณา อี อึบ มืง โลว หลู ฌึร ตี, แตห อึณ แบน ปี หลู อี โดะ ดี เงา, ปี หลู ดีฆาว บอ ปี หลู ปี ดี เดียง. อัน โลว หลู ปี หลู ตี เซ ดูอี อีซาเรลัะ โบง บลอย อี มูห มาเฆียน กามาย, ซีแง ดีเหลา บอ บลอย แบน โมยว แบน โมยว. อัน ดี หลู บอ ปี ดี หลู อี ฆ็อห แวน หมาบ, ปี ดี หลู ดีฆาว, ปี ดี หลู อี โดะ ดี เงา บอ ปี ดี หลู อี กอย กาฌูะ โฮม รึม, แตห ดูอี อีซาเรลัะ วี กาล็อะ ดี เฌาพรา.”
18เฌาพรา อี อึบ โตต ดอน โมยว ปี วี ต็อห “มาเฆียน ดอ โฆว, ซีแง ดอ โฆว เบ โลว ดึห ฆอน มัก อาโล็ง อู โดว อี ตู มึห โดง เช โดง แน, วี หลู แตห อึณ แบน ปี ดี หลู อี แตห โฮว เฌาพรา ซีงา บอด. 19ดา อี หลู ดี เฌาพรา บอ โลว ดึห หนาม โดว ปี หลู เฆ อี ฆ็อห แวน หมาบ ตี มัง กาล็อะ, วี พ็อห ดี ร็อง โฮว เฌาพรา, ดี กาโช็ง หลู บอ พวน กาโตะ บอ ดี มาโลห โฮว เฌาพรา อี กอย ดี แวง โฮว เฌาพรา อี กอย นา แคง. 20มาเฆียน ตี, เซ ฮี ฌัม บู ซีแง, เบ โลว โบง ปาย ตี อาดา เฆ อี แฮะ กาลึบ ยี ตู เฌณฌา ลอง อัน ตี ดี อาต บอ อาดา เฆ อี ตู นับ ลอง แปะ แฮะ โบง เฆ แฮะ กาลึบ. เซ เบ โบง ปาย ตี, อึณ แตห โฮว เฌาพรา วี ซีงา.
21มาเฆียน ดอ โฆว ตี ดอ แฮะ ฌัม ฆึร ดี พวน ซีแง, เบ บอ โลว โบง บลอย. บลอย ตี เบ โลว โหลห เฌาพรา ดอ กาโลห อัน กาง เบ. อาดา บู ซีแง เบ โลว โฮม มี คามูน อี ตู ฮับ ซีนัม บรัห. 22ซีแง กาจูห บลอย ตี, ดา กาณา อี อึบ มืง โลว หลู มัก อาโล็ง อู โดว, แตห อึณ ฆ็อห แวน หมาบ อัน บอ หมาบ เฆ ดูอี บอกาเฆลียด. 23ดอ โบง เฆ บลอย ตี อาดา บู ซีแง, ดอน ซีแง อัน โลว หลู มัก อาโล็ง บู โดว บอ มาบู อาโล็ง บู โดว อี ตู มึห โดง เช โดง แน, แตห อึณ แบน ปี ดี หลู อี โดะ ดี เงา. อัน บอ โลว หลู บอ มาแป อาโล็ง, แตห อึณ แบน ปี ดี หลู อี ฆ็อห แวน หมาบ บอกาเฆลียด. 24ลอง ปี ดี หลู อี มูห มัก อาโล็ง อู โดว, อัน โลว หลู บอ กาแปะ อู เอพา โดบ ดอน โดว. มาบู อาโล็ง ดอน โดว อัน โลว หลู กาแปะ อู เอพา. กาแปะ ดอน เอพา อัน โลว หลู บอ นามัน อู กาเปา.
25อึณ มึห บลอย อู โมยว อาดา บู ซีแง, จูห มาเฆียน อึณบู, ซีแง ฆึร ดี อึณพัน. คูนดีคัม โลว หลู ปี ดี หลู อี โหลห ดอ กอย เฆ แคง ทึบ เฆ. อึณ มูห ปี ดี หลู อี ฆ็อห แวน หมาบ, ปี ดี หลู อี โดะ ดี เงา บอ ปี ดี หลู กาแปะ ฆาย นามัน.”
Currently Selected:
อาเอเซเคน 45: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
