อาเอเซเคน 22
22
ลอง หมาบ ปี โบง เฆ ดูอี แคง มืง เยรูซาแลม
1เฌาพรา ปี วี กาลาง โฆรห ดี โอว ต็อห, 2“อึย แม ฆอน ดูอี, เซ แม ดี ซูงพยาด อามู เฆ ดูอี แคง มืง เยรูซาแลม อี แฮะ ง็อห ยัม ดูอี กืน, แม โลว แตห เฆ ดูอี แคง มืง ตี วี นับ โตต แปะ แฮะ โบง เฆ อี หมึอม กาอีห. 3แตห แม ต็อห ดี เฆ, ‘เฌาพรา อี อึบ โตต ดอน โมยว อัน แฮะ กาลาง ปาย นี. โกบ แฮะ ง็อห ยัม เบ ดูอี กืน กาเซา, โกบ แฮะ โบง เบ แตห โดว เบ กาดาต ดอ กรึบ เบ อารึบ ราง, เบ แฮะ โบง แตห โอว ดัม หมาบ ดี เบ, แตห เบ ฌัม ดูก ตาง. 4เบ มึห หมาบ โกบ ง็อห เบ อาซาก อี บอ โกบ กรึบ เบ อารึบ ราง ปี โบง เบ. โกบ อึณ ปาย ตี อึณ แตห ซีแง ดี ดัม โอว หมาบ ดี เบ เจว ฌัม. อาคราว อัน แฮะ ฮอต เฌะฌูง ดอ ตี นี. ปาย ตี โอว แตห ดูอี อาโมยว เฮา แนนัะ เบ. แตห ดูอี ดอน มาน ดอน มืง กาณัห เบ. 5อึย เบ ดูอี อี กอย แคง มืง ปี ตู โรวเซ อี เฮา, ดูอี อี กอย กาตัด เฆ ดูอี อี กอย โต็ง, เฆ ดี บอ กาณัห เบ, ปี วาณาก ดี เบ โกบ แฮะ โบง ลูต เบ ดารา ตี.
6เฆ ดูอี อี กอย แคง มืง ตี อี อึบ ดูอี อีซาเรลัะ, เฆ ดึห ปวน เฆ, ง็อห ยัม ดูอี. 7เฆ ดูอี แคง มืง เยรูซาแลม อาว ฮู โรวเซ ฆูณ มา เฆ. เฆ บอ คาหนาบ ดูอี อาโมยว เฮา บอ ตู โบง นา มูห นา หมาน ดี ยา ซีปรัห เฆ ฆอน ซีปรัห, ฆอน ตู มึห ฆูณ มา. 8แดง ตี, เบ อาว ฮู รีมาด โดง ซีงา บอด. เบ มืร ตู กัม ซีแง ดีเหลา. 9แคง มืง เบ ตี แฮะ มึห มัง อี อี แค จาว ลอง อี เฮา, แตห เฆ ปึอน ดี ง็อห ยัม อี เฮา ตี. อึณ บอ มึห มัง อี อี แฮะ โฮม ปี ดี โฮม แปะ แฮะ ฮอต หลู ดี อารึบ ราง. บอ มัง อี แฮะ โบง อี หมึอม ซาย, อี ตู กาอาบ โบง. 10มัง อี แฮะ วี ลาย ลูต ลาย ลาย ดี อีบึณ ฆูณ เฆ. มัง อี แฮะ อีด โดบ อีบึณ อี มึห ครึง กาปลูะ อี ตู ซีงา โมยว อี โดบ ดารา. 11มัง อี วี ลูต อีบึณ อี เฮา อี กอย กาตัด เฆ, มัง อี วี ลูต เอา เฆ. มัง อี วี ลูต ฆอน อีบึณ บลาก ฆูณ เฆ. เซ อาว ปาย ตี มืร เฆ ลูต ฆอน อีบึณ บลาก มา เฆ. 12ดูอี อี กอย แคง มืง เบ มัง อี ฌาง ดี ง็อห อี เฮา. มัง อี บอ ดึห ดี โฮม เอียง รึอน ดี ดูอี อี มูห ดูอี อีซาเรลัะ ปี เฆ. มัง อี บอ คาหนาบ อี แตห เฆ ครัม, วีน ดี พาด ดึห โกรวกราม อี เฮา. เฆ แฮะ ฮอต ปีว โอว.’ เฌาพรา อี อึบ โตต ดอน โมยว แฮะ กาลาง ปาย ตี.
13โกบ แฮะ โบง เบ ปาย ตี โอว ดี กาชัวะ เบ, แตห อึณ ปี โอว แฮะ หงา กาลึม โอว ดี เบ. โอว ดี วี โบง นา จีจีว ดี เบ โกบ แฮะ พาด ดึห เบ โกรวกราม อี เฮา บอ ง็อห ยัม อี เฮา. 14ซีแง ดี ซูงพยาด โอว อามู เบ ตี, เบ ทาง เบ ซี ดี มึห โปลม บอ น็อห ยัะ? โอว เฌาพรา แฮะ กาลาง ปาย ตี, โอว มืร ดี โบง ปาย ตี. 15โอว ดี แตห เบ กาย็อห กอย กาแต ดูอี ดอน โมยว, แตห เบ กอย ดอน มาน ดอน มืง. โอว ดี ดึห แวน อี หมึอม กาอีห, หมึอม กาดาต อี ดึก ดี เบ. 16ปาย ตี เฆ ดูอี อาโมยว เฮา มืร ดี นับ แคะ กาดาต เบ. ปัน ตี เบ มืร ดี นับ, โอว มูห เฌาพรา.”
17แฮะ ฮอต, เฌาพรา ปี วี กาลาง โฆรห ดี โอว ต็อห, 18“อึย แม ฆอน ดูอี, ดูอี อาโมยว อีซาเรลัะ อาว มึห ดีโคว มาเซ ดี โอว. เฆ แฮะ ปี เอียง บ็อง เดณ เฆ เอียง ฮีน บอ มีเจต อี ซี ฆีด วาย แฮะ ฮอต ทารอง เลห อี ดี รึอน แฌด ตึอน. 19โอว เฌาพรา อี อึบ โตต ดอน โมยว แฮะ กาลาง ปาย นี. โกบ แฮะ ปี เบ เอียง ฮีน ปี แวน อี, โอว ดี ดึห กาฌูะ เบ แคง มืง เยรูซาแลม. 20ดูอี นับ ดี กาฌูะ รึอน เฆ บ็อง เดณ, ฮีน เฆ มีเจต, ฮับ แคง กาโละ, แตห อึณ ดัง แดง เงา. โกบ แฮะ รู กาเซา โอว ดี เบ, โอว ดี โบง แตห เบ ฌึอม ลาต ปาย ตี. แตห อึณ ปี อี ดัง รึอน เฆ ครีว, แตห อึณ ลาต แคง เงา. 21โอว ดี แดะ กาฌูะ เบ แคง มืง เยรูซาแลม. โอว ดี โบง ดี เบ, แตห อึณ ปี โอว บูด เงา แคง กาฟาง. แตห อึณ ปี เบ ฌึอม ลาต แคง กาฟาง ตี โกบ แฮะ รู กาเซา โอว ดี เบ. 22อี ดัง ลาต รึอน แคง เงา ปาย ตี, เบ โลว คัม อี ปี อี เฮา ดัง ลาต เบ แคง เงา. ดอ อัน ตี เบ ดี นับ แคะ แฮะ รู โอว เฌาพรา ดี เบ.”
23เฌาพรา ปี วี กาลาง โฆรห ดี โอว ปอ อึณ ปัว ต็อห, 24“อึย แม ฆอน ดูอี, แตห แม กาลาง ดี เฆ ดูอี อีซาเรลัะ ต็อห, กาดาย มืง เบ นี แฮะ แบน มืง อี ตู ซีงา บอด. อึณ แฮะ แบน บอ กาดาย มืง อี ตู มึห อึม ฆลาย โกบ แฮะ รู กาเซา โอว. 25เฆ ดา ตาง อี อึบ มืง, เฆ แฮะ ลาย โพรม ดี โบง ปี มาครังซี อี แฮะ ก็อะ ดี โฮม มาโดว แปร. เฆ บอ ง็อห ยัม อี เฮา, บอ ดึห โตต แคะ กอย โกรวกราม บอ รึอน เฆ ครีว อี เฮา ดี เฆ. เฆ มืร โบง แตห อึณ มึห ยา ซีปรัห กืน. 26เฆ ดา อี หลู ดี เฌาพรา มืร แฮะ ปยาต แวน ดารา โอว. เฆ แฮะ โบง แตห โดง ซีงา บอด โดบ ปี ดัม ดารา วี กาดาต. ลอง อี ซีงา บอด บอ ลอง อี ตู ซีงา บอด, เฆ อาว ฮู แตห อึณ ลาย บลืง. เฆ มืร อาว ฮู มาโนว แตห อี นับ ลอง อี ซีงา บอด บอ ลอง อี ตู ซีงา บอด อี แฮะ ลาย บลืง แคะ เหมา. เฆ มืร แฮะ วัห แฮะ แวน ซีแง ดีเหลา. โกบ โบง เฆ ปาย ตี เฆ ดูอี อีซาเรลัะ มืร อาว ฮู โรวเซ โอว. 27เฆ อามู อามาด แคง มืง ตี, เฆ แฮะ ปี มาโซว แปร อี วีน ดี เหรต ดี ก็อะ โฮม มาโดว แปร. เฆ บอ ง็อห ยัม อี เฮา บอ โบง อี ตู หมาน แบน โมยว แบน โมยว โกบ ซี เจว ครัม เฆ. 28เฆ ดา อี บยาน โฆรห เฌาพรา มืร, เฆ บอ เครียง หมาบ เฆ ตี, โบง แตห อึณ ปี อี ดึห ทูน ลูย, พ็อห ดี แรง มาว อูด. เฆ ต็อห, เฆ แฮะ ยึร ปี บยัะ เฌาพรา ดี เฆ อี ตู หมาน, เฆ บอ กาลาง โฆรห ณึงราง ลอง ปี จัร เฌาพรา. เฌาพรา ปี ซัะ มึห ดี กาลาง มืร, เฆ บอ นับ ดี ต็อห, ‘เฌาพรา อี อึบ โตต ดอน โมยว แฮะ กาลาง.’ 29เฆ ดูอี เรา ดูอี กาง มืร โบง นา ฮาย นา มืก, บอ คาหนาบ ดูอี ฆีน ดูอี พลาน, บอ โฌน อี ดึห โกรวกราม เฆ ดูอี อี ฌูด ลูด. เฆ บอ โบง อี ตู กาซืร อี ตู โดบ ดารา ดี เฆ ดูอี อาโมยว เฮา.
30โอว แฮะ เหรต วี อี ดี จอย โอว กาลาง ดี เฆ, แตห เฆ แวน หมาบ เฆ, แกวะ แตห โอว โลว ปยาต แวน มืง เฆ ตี. โอว ยี ตู ยึร คอ อู วี.
31ปาย ตี โอว มืร ปีรู โอว ดี เฆ, แตห อึณ กอ ปี เงา แฮะ โจห แดง ฆีณ เฆ โกบ หมาบ แปะ แฮะ โบง เฆ ตี. โอว มืร ปยาต แวน เฆ.” เฌาพรา อี อึบ โตต ดอน โมยว แฮะ กาลาง ปาย ตี.
Currently Selected:
อาเอเซเคน 22: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
