อาเอเซเคน 12
12
ลอง อาเอเซเคน เลห แคง มืง เยรูซาแลม
1เฌาพรา ปี วี กาลาง โฆรห ดี โอว. อัน ต็อห, 2“อึย แม ฆอน ดูอี, แม กอย กาแต เฆ ดูอี อี นับ มี ดี โบง กาบัห ดี โอว. เฆ มึห งาย, เฆ ยี ตู ยึร. เฆ มืร มึห โหยะ, ยี ตู นับ ดี โทม โกบ มูห เฆ ดูอี อี ออน ดี โบง กาบัห.
3โกบ อึณ ปาย ตี แม ฆอน ดูอี, แตห แม ดีเฆรียบ โกรว แม ดอ ตี นี, แตห อึณ ปี อี เฮา ดี ตัห เหมต ฮาว แม ปอ อู โปละ. แตห แม โบง ปาย ตี ดอ กาแต ซีแง, แตห ดูอี บอกาเฆลียด ปึอน ดี ยึร. เฆ ปี บอ มูห ดูอี อี ซีมา โบง กาบัห มืร, เซ เฆ ยึร แม ฮาว, โยว อึณ บอ กาหลูห ดี น็อห. 4แม โลว ดีเฆรียบ โกรว แม บอ เบลห อูน นา เรต กาง ดอ กาแต ซีแง, แตห อึณ ปี ปี โบง ดูอี แปะ แฮะ เหมต ฮาว อี. แม โลว เลห ฮาว ดอ บา ดี อับ, แตห แม ปี ดูอี แปะ แฮะ เหมต ฮาว อี. 5ดอ ซีงยา ยอด เฆ ดี แม ตี, แตห แม บลูห แรง กาง แม แตห อึณ กาเดา, แตห แม ปัห โกรว แม เลห ฮาว ดี ตี. 6แตห แม ดึห กาบยาว โกรว แม ตี, ฆอด แดง ยัะ แม, วี เลห ฮาว ดี อาต เฆ ดอ บา ดี อับ. แม โลว ดึห บีก, กาโหมะ ฆีณ แม บอ นา แม, แกวะ แตห แม วี ยึร มืง โดง แฮะ เลห ฮาว แม ตี. ปี โบง แม ตี, อึณ ดี บอ แบน อี ดัม ซาดีก ดี ดูอี อีซาเรลัะ.”
7ปาย ตี โอว มืร โบง โดบ แคะ ปี กาลาง เฌาพรา ตี ดี โอว. ซีแง ตี โอว มืร แรน ปัห โกรว โอว, แตห อึณ ปี โกรวกราม ดูอี อี ดี เตา. ดอ บา ดี อับ ตี, โอว มืร บลูห กาเดา แรง กาง โอว, วี ปัห กาบยาว โกรว โอว ตี, เลห ฮาว ดอ ยอด เฆ ดี โอว.
8บอ ฌัม ปัน แคหณา เฌาพรา ปี วี กาลาง ดี โอว ต็อห, 9“อึย แม ฆอน ดูอี, ดอ ตี นี เฆ ดูอี อีซาเรลัะ อี ออน ดี โบง กาบัห ตึอน, เฆ ดี บอ ดีหมอด แม ต็อห, ‘มาเซ ปี โบง แม?’
10แตห แม วี ต็อห ดี เฆ, ‘เฌาพรา อี อึบ โตต ดอน โมยว แฮะ กาลาง ปาย นี. ปี บยัะ อัน เฌา ตี, อึณ บอ ลาย บาะ ดี คูนดีคัม อี อึบ มืง เยรูซาแลม บอ เฆ ดูอี อีซาเรลัะ อี กอย แคง มืง ตี. 11แตห แม กาลาง บอ ลอง ปี โบง แม ตี, อึณ มูห ลอง อี บยัะ อี ดี โบว แบน ดี เฆ. เฆ ดี บอ กาดูห อี เหมต ฮาว เฆ ปาย ตี.
12คูนดีคัม อี อึบ เฆ ตี อัน ดี บอ ดึห กาบยาว โกรว อัน, ฆอด แดง ยัะ อัน, เลห ฮาว ดอ บา ดี อับ. อัน ดี บอ เตา เลห แคง กาเดา ดี แรง โดง บลูห ดัว เฆ ดี อัน. อัน ดี บอ ดึห บีก, กาโหมะ นา อัน, แกวะ แตห อัน ซี วี ยึร มืง โดง เลห เตา อัน ตี. 13อึณ มืร ปี โอว ดี วี บลัห อึณรับ โอว, แตห อัน ลึบ แคง อึณรับ โอว ตี. โอว มืร ดี วี ดึห ฮาว อัน แคง มืง บาแบ. อัน ปี บอ ดี ฮาว ยัม โดง ตี มืร, อัน ยี ตู ปึอน ยึร มืง ตี. 14โอว ดี ดึห บอ เฆ ดา ตาง อี กอย โคบ อัน บอ เฆ ดูอี อี ดัว อากยาม อางยาน ดี อัน บอ เฆ ดา ซึก อี บัร อาซาก อัน บอกาเฆลียด, แตห เฆ เตา, กาย็อห ฮาว ดอน บลาก. โอว มืร ดี บอ วี เหรต เฆ, แตห เฆ ยัม ดี มาปัวะ ลาง เฆ.
15เซ โอว ฮี โบง แตห เฆ กอย กาย็อห กาแต ดูอี ดอน ฌึร ดอน โมยว บอ ดอน มาน ดอน มืง. ปัน อัน ตี เฆ ดี บอ วี นับ, โอว มูห เฌาพรา. 16โอว ดี โบง แตห ดูอี มัง อี ลอด ยัม ดี มาปัวะ ลาง บอ ดี เอต ปี ดี โฮม บอ ดี เซา รอฆา, แตห เฆ วี โหลห ลอง อัน ตี บอ กาลาง ลอง อี แฮะ หมึอม กาอีห กาเซา ตี กาแต ดูอี กืน. แตห เฆ นับ โอว มูห เฌาพรา.’”
17เฌาพรา ปี วี กาลาง โฆรห ดี โอว ปอ อึณ ปัว ต็อห, 18“อึย ฆอน ดูอี, แตห แม โฮม ปี ดี โฮม บอ ดียูห ดีเยณ. แตห แม เดียง อึม บอ โยว บอ กาปึณ. 19แตห แม กาลาง ดี เฆ ดูอี อี กอย แคง มาน มืง นี ลอง ปี บยัะ เฌาพรา อี อึบ โตต ดอน โมยว ดี ดูอี อี กอย แคง มืง เยรูซาแลม บอ เฆ อี ซี กอย แคง มืง อีซาเรลัะ ต็อห, ดอ โฮม เฆ ปี ดี โฮม, เฆ ดี บอ โยว ดียูห ดีเยณ. ดอ เดียง เฆ อึม, เฆ ดี บอ โยว บอ กาปึณ กาเซา. โคว, แคะ กอย ดูอี อี กอย แคง มืง เยรูซาแลม บอ แคง กาดาย มืง นี, เฆ ดี กาดูห อี พาด แวน โกรวกราม เฆ ดอน โมยว โกบ ตู โบง เฆ อี หมึอม. 20ดอน มืง อี แฮะ มึห ดูอี กอย นา แคง เฆ ดี บอ ลึร ชึม โตต. มืง ตี ดี บอ ราม, แบน โดง เยน โดง ง็อง ดูอี. ปัน อัน ตี เฆ ดี วี นับ โอว มูห เฌาพรา.”
21เฌาพรา ปี วี กาลาง โฆรห ดี โอว ต็อห, 22“อึย ฆอน ดูอี, โฆรห มากาทัะ ปี ดึอม กาลาง เบ แคง มืง อีซาเรลัะ อี ต็อห, ‘อาคราว อัน แกร ดี ปวน ฮาว. อี หมึอม อาม กาเซา ปี บยัะ เฌาพรา ดี อี มืร แฮะ หราย,’ ลอง อัน ตี อึณ มึห ซีเพา มาเซ? 23ดอ ตี นี, โอว เฌาพรา อี อึบ โตต ดอน โมยว ปี วี กาลาง ดี แม, แตห แม กาลาง ดี เฆ ดูอี อีซาเรลัะ ต็อห, ‘โอว ดี โบง แตห โฆรห มากาทัะ ตี หราย. วาย นี เฆ มืร อาว ฮู กาลาง โฆรห มากาทัะ ตี แคง มืง อีซาเรลัะ ดอ เหมา.’ มาแล, แม โลว ต็อห ดี เฆ, ‘อาคราว อัน แฮะ ฮอต ฌัม. แปะ แฮะ ดึอม บยัะ เฌาพรา ดี เฆ มืร, แฮะ ฮอต เฌะฌูง.’ 24โคว วาย นี, กาแต เฆ ดูอี อีซาเรลัะ อาว มึห อี ณึงราง ดี กาลาง ปี บยัะ เฌาพรา บอ อาว มึห ดา อี บยาน โฆรห เฌาพรา อี ดี มาโนว กาลึบ, มาโนว บลืง ดอ เหมา. 25โอว เฌาพรา อี ดี กาลาง โฆรห ปี อึง โอว ดี เฆ. โฆรห ปี กาลาง โอว ตี, อึณ ดี บอ เฌะฌูง โตต ดอน โมยว. อึย เบ ดูอี อี ออน ดี กาบัห ดี โอว, โฆรห แปะ แฮะ ดัม โอว ซาดีก, แปะ แฮะ ต็อห โอว ดี โบง, โอว ดี บอ โบง แตห อึณ แบน ดอ มูห โจว บาน เบ.” 26แฮะ ฮอต, เฌาพรา ปี วี กาลาง โฆรห ดี โอว ปอ อึณ ปัว ต็อห, 27“อึย ฆอน ดูอี, เฆ ดูอี อีซาเรลัะ, เฆ บอ ทาง โฆรห ปี กาลาง แม ลอง ปี บยัะ เฌาพรา ตี, ซีแง อัน บอ อาคราว อัน, อึณ ซี ดี โต็ง กาเซา.
28โกบ อึณ ปาย ตี แตห แม กาลาง ดี เฆ ต็อห, ‘โอว เฌาพรา อี อึบ โตต ดอน โมยว แฮะ ฮอต กาลาง. อึณ ตู ทืง ตู เหลณ แคะ เหมา. แคะ ปี กาลาง โอว ตี, อึณ ดี บอ แบน โตต ดอน โมยว. เฌาพรา อี อึบ โตต ดอน โมยว แฮะ กาลาง อูน ปาย ตี.’”
Currently Selected:
อาเอเซเคน 12: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
