เลห 22

ดารา ลอง โกรวกราม ดอน โมยว

เฌาพรา วี เบลห อูน ดารา ลอง โกรวกราม อี. อัน ต็อห,

1“เซ อึณ มึห ดูอี อู วี, เซ อัน ปรา มัก อาโล็ง บอ ปรา มาบู อี, แฮะ ฮอต อัน วี ง็อห วี ย็อง, ดูอี ตี โลว วี ดัว มัก อาโล็ง พัน โดว โกบ ปรา อัน มัก อู โดว. เซ อึณ ยี มูห มาบู ปี ปรา อัน, อัน โลว วี ดัว พวน โดว โกบ ปรา อัน อู โดว ตี.

2เซ ดูอี อู วี ปรา แคง หมึร, ดูอี เฮา ยี เหมต อัน, วี มัห อัน แตห อัน ยัม, ดา อี มัห อัน ตึอน, อาว มึห หมาบ โกบ ง็อห อาซาก อี. 3เซ อัน ยี ง็อห ยัม ดา ปรา กาแต ซีแง, อึณ แบน หมาบ ดี อัน.

เซ อึณ มูห ดา ปรา, อัน โลว วี ดัว โกรว ปี ปรา อัน. เซ อัน ยี ตู มึห โกรว มาเซ ปี ปึอน วี ดัว, เฆ โลว ย็อง อัน, แตห อัน วี แบน หมาย อี, แตห อัน วี มึห ดี ดัว แคะ ปี โลว อัน ดัว โกบ ปรา อัน.

4เซ เฆ ยี ยึร โดว ซัดดาวา ปี ปรา ดา ปรา, บอ มูห มัก อาโล็ง, บอ มูห มาโลว เฆ มาบู, ดา ปรา ตึอน โลว วี ดัว อา บูน.

5เซ ดูอี อู วี ตู บัร ซีคยา โดว ซัดดาวา อัน, แตห เฆ วี ลึบ โฮม โกรว อี เฮา แคง มาน แคง จัะ อี เฮา, ดา กาณา อัน โลว วี เวียะ โกรว ตี, แตห อึณ แบน โกรว หมึอม หลึอม โตต อี เลห แคง มาน แคง จัะ อัน.

6เซ อึณ ยี มึห เงา กูห แคง มาอาต วี ดัณ กาซึม บอ ซีบัยะ โหงว ปี เบลห อูน อี, เซ อึณ บอ กาซึม โหงว แคง นา, เซ อึณ ดี บอ กาซึม นา บอ แด, ดูอี อี แตห เงา กาซึม ตึอน, อัน วี โลว เวียะ แคะ ปี ชึม ดา กาณา โหงว ตึอน.

7เซ อึณ มึห ดูอี อี อาบ อูน รึอน อัน บอ โกรวกราม อัน แคง กาง ฆึก อัน, แตห ฆึก วี บัร ดาง อัน, เซ อึณ วี มึห ดูอี ปรา โกรว ตี แคง กาง ตึอน, เซ เฆ วี ปึอน ดี เหมต ดา ปรา ตึอน, อัน โลว วี ดัว อา บูน แคะ ปรา อัน. 8เซ เฆ ยี ตู ปึอน ยึร ดา ปรา ตึอน, ดูอี อี อูน โกรว ตึอน แคง กาง อัน, อัน วี โลว ฮาว กาลาง โตต ดี อาต ดา ตาง, แตห เฆ ซูงพยาด อามู ตี, โยว อัน แฮะ ดึห ตู ดึห โกรวกราม อี เฮา ตึอน. 9ดอน เฌณ, เซ ดูอี ปีะ ปอ อู วี ต็อห, ‘โกรวกราม ปี มึห แม มูห โกรวกราม โอว,’ เฆ ดูอี บอ อา บลาก โลว ฮาว กาลาง โตต ดี อาต เฌาพรา. อึณ บอ มูห มามัก, มาโลว, มาบู บอ ดูอี อู วี แฮะ หราย, บอ มูห ครึง ตา บอ โกรว แบน โมยว แบน โมยว, เซ อัน วี ยึร โกรว อัน ตี โดง กอย ดูอี เฮา, แตห ดูอี อา วี ตึอน วี ตัห กาลาง โตต ดี อาต ดา ตาง, แตห เฆ วี ซูงพยาด อามู ตี, แตห เฆ นับ, อาเซ โบง นา ตู หมึอม. ดูอี อี โบง นา ตู หมึอม, อัน โลว วี ดัว อา บูน ง็อห ดอน โมยว ดี ดูอี ปอ วี.

10เซ อึณ มึห ดูอี อี อาบ อูน โดว ซัดดาวา อัน อู โดว, แตห ฆึก อัน บัร ลึมลา, เซ โดว อัน ตี บอ ยัม, เซ อัน บอ มึห เซา, เซ อึณ บอ มึห ดา ปรา ดึห ดอ ตู มึห อี ยึร, 11แตห บอ ดา กาณา บอ ดูอี บัร ตึอน ฮาว ดี อาต เฌาพรา. เซ อัน ตู ปรา โดว ปี บัร อัน, แตห ดูอี บัร ตึอน วี ดัว กาดีก ซัดฌา ดี อาต เฌาพรา. ปัน ตี ดูอี อี อาบ อูน โดว ซัดดาวา อัน แตห อี บัร, อัน โลว หณึม ปี ต็อห ฆึก อัน ตึอน. ดูอี บัร โดว ตึอน ตู โลว วี ดัว มาเซ. 12เซ อี เฮา ยี แฮะ ปรา โดว ปี โลว บัร ดูอี ตึอน, ดูอี ตู บัร ซีคยา โลว วี ดัว ดี ดา กาณา ตึอน แคะ ปี ปรา อี. 13เซ อึณ ยี มูห โดว แคง แปร อี แฮะ ตัห ก็อะ โดว ซัดดาวา ปี บัร ดูอี ตึอน, อัน โลว ตึย บยัะ กาโลย อัน ดี ดา กาณา อัน, แตห อัน วี ยึร ซีคยา ลอง แฮะ ก็อะ โดว แปร. ปัน ตี ดูอี บัร โดว ตึอน, อัน ตู โลว วี ดัว มาเซ ดี ดา กาณา อัน.

14เซ ดูอี อู วี ยี วาย มาฆรัะ เฆ มัก อาโล็ง อี เฮา, เซ โดว ปี วาย อัน ยี เซา, เซ อัน วี เซา บอ ยัม ดอ ตู กอย ดา กาณา อัน, ดูอี อี วาย โดว ตึอน โลว วี ดัว แคะ ชึม ดา กาณา อัน. 15เซ ดา กาณา อัน ยี ยึร ดอ เซา ดอ ยัม อัน, ดูอี อี วาย โดว ตึอน, อัน ตู โลว ดัว มาเซ ดี ดา กาณา อัน. เซ ดูอี ยี แฮะ คาด ดี วาย โดว ซัดดาวา ตึอน, อัน ตู โลว ดัว มาเซ. ง็อห คาด อัน ดี วาย ตึอน แฮะ ลาย ลัวะ ดี ง็อห โดว อี แฮะ ชึม ตึอน.” ปาย ตี เฌาพรา แฮะ เบลห อูน ลอง โกรวกราม ดูอี.

ลอง ปี ตู แตห เฌาพรา ดูอี โบง

เฌาพรา แฮะ ฮอต กาลาง ฌึร ตี, อัน วี ต็อห,

16“เซ อีมาย ลูต ดีบยา, อัน โลว ดัว โตต ง็อห คัด ดี ฆูณ ดีบยา. แฮะ ฮอต อัน โลว ดึห ฆอน ดีบยา ตึอน แตห อัน แบน อีบึณ อัน. 17เซ ฆูณ อีบึณ ตึอน ยี ตู ซี แตห ฆอน อัน ดี อีมาย ตึอน, อัน ดืน โลว ดัว ง็อห คัด.

18เซ อึณ มึห อีบึณ อี แตห กานัม โลง ดี อัน, เบ โลว ง็อห แวน อัน.

19เซ อึณ มึห ดูอี อี ลาย โดว ซัดดาวา, เบ โลว ง็อห แวน บอ อัน.

20เซ อึณ มึห ดูอี อี หลู ดี เฌา ปี กรึบ ดูอี เฮา, เซ เฆ ตู กรึบ โอว อี มูห เฌาพรา, เบ โลว ง็อห แวน บอ ดูอี ตี.

21เซ อึณ มึห ดูอี อาโมยว เฮา อี กอย โดง กอย เบ, แกวะ โบง นา จีจีว ดี อัน. แตห เบ วี กาพา โหลห อาคราว ดอ กอย เบ แคง มืง แอฆึบ.

22แกวะ โบง นา จีจีว ดี ยา ซีปรัห เฆ ฆอน ซีปรัห อี กอย กาแต เบ. 23เซ เบ โบง นา จีจีว ดี เฆ, เซ เฆ ดี ซาคึร หมาณ แตห โอว จอย เฆ, โอว ดี วี โทม ซีคยา โฆรห ปี หมาณ เฆ. 24โอว ดี บอ รู กาเซา ดี เบ, แตห เบ ยัม ดี มาปัวะ ลาง อี เฮา. ปาย ตี เฆ อีบึณ เบ ดี แบน ยา ซีปรัห. บอ ฆอน เบ ตู วี มึห ฆูณ เฆ.

25เซ เบ แตห ดูอี ฆีน อู วี การ็อห รึอน เบ, เซ อัน มูห ดูอี อาโมยว ปี อึบ โอว, แกวะ โบง ดี อัน ปี ปี โบง เบ ดี ดูอี เฮา. แกวะ หมาณ เอียง ดี อัน. 26เซ อี กัม ซีโตว ดี เบ, เบ โลว วี ดัว วีว อาต เฆต ซีแง. 27โคว, อัน มึห ดี ชึบ มี ซีโตว อู พืน ตี ดอ อีด อัน, แตห อึณ แบน ฮึบ อัน. อาว มึห ครึง ปอ อู พืน. เซ แม ยี ดึห ครึง อู พืน ตี, อัน ตู มึห มาเซ แตห อัน ชึบ ดอ อีด อัน. เซ ดูอี ตี บอ วี หมาณ แตห โอว จอย อัน, โอว ดี โทม. โอว ดี วี จอย อัน โกบ มึห โอว น็อห กาเว ดูอี.

28แกวะ กาลาง โฆรห อี แคณ เฌาพรา. แกวะ ดืง ดา กาณา อี อึบ เบ.

29แกวะ เบลห อูน ปี โลว หลู เบ. อึณ บอ มูห โหงว ปี อูน เบ แคง บูะ เบ, อึณ บอ มูห อึม มางูน เฆ นามัน ปี อูน เบ แคง กาเปา, ดอน โมยว แตห เบ หลู ฆึร บูน อู บูน. เซ เบ ปึอน ฆอน อีมาย, เซ อึณ มูห ฆอน ฆีณ เบ, เบ โลว หลู ดี โอว. 30บอ ฆอน มัก อาโล็ง, ฆอน มาบู บอ ฆอน มาแป เบ, เซ อึณ มูห ฆอน ฆีณ, เบ โลว หลู บอ อัน. เบ โลว แตห ฆอน เฆ ตี กอย รึม โดบ มา อัน อาดา บู ซีแง. ดอ ฌัม ซีแง อึณดา เบ โลว ตัห หลู ดี โอว.

31เบ มูห ดูอี ปี ร็อห โอว, แตห เบ แบน ดูอี บอด ปี อึบ โอว. โคว, เซ โดว แปร แฮะ ก็อะ ยัม โดว ซัดดาวา อู โดว, เบ แกวะ โฮม ยัง อัน ตี. แตห เบ ดัว มาโซว โฮม.”

Currently Selected:

เลห 22: pce

Highlight

Copy

Compare