อาดาเนลัะ 1
1
ลอง อาดาเนลัะ เฆ ฆึก อัน
1คูนดีคัม อายอยาคีม แฮะ อึบ มืง ยูดา อาดา โอย ซีนัม. ดอ อัน ตี อาเนบูคัดเนจา อี มูห คูนดีคัม อี อึบ มืง บาแบ บอ ดา ซึก อัน แฮะ ตัห กาโฆห ดี มืง เยรูซาแลม บอ โรบ มืง ตี. 2เฌาพรา บอ แตห อาเนบูคัดเนจา แป, แตห อัน ปึอน ดี เหมต คูนดีคัม อายอยาคีม. อัน บอ ดึห ฮาว บอ โกรวกราม มัง กาล็อะ อี บอด อี กอย แคง โฮว เฌาพรา. แฮะ ฮอต, อัน บอ วี ดึห โกรวกราม เฆ ตึอน, วี ฮาว อูน แคง ฌีดืก เฌา ปี กรึบ อัน.
3วาย อัน ตี คูนดีคัม อาเนบูคัดเนจา บอ จัร อาซาเบนาด อี มูห ดูอี อี อึบ อามู อามาด คูนดีคัม บอกาเฆลียด, แตห อัน ร็อห ฆอน กาโณม มัง อี กาแต ฆอน เฆ ดูอี อีซาเรลัะ บอ ฆอน กาโณม เฆ ดา กาณา อี อึบ มืง มัง อี, แตห เฆ ตัห ดี อัน. ฆอน กาโณม ตี บอ มูห ครึร คูนดีคัม บอ ครึร ดา กาณา อี อึบ มืง. 4กาโณม เฆ ตี โลว ชีด, มึห อารึบ แคม, มึห อางยาน, ปึอน เฮน หงึย หงึย บอ โลว นับ แบน โมยว แบน โมยว. เฆ โลว กาหลูห หงึย หงึย บอ นับ ดี โบง ฆาน แคง โฮว คูนดีคัม. อาซาเบนาด โลว มาโนว แตห เฆ นับ ดี ตีห แปะ บอ นับ โฆรห ดูอี อาโมยว บาแบ. 5คูนดีคัม มืร จัร แดเจณ อัน, ดอน ซีแง แตห เฆ แรน ปี ดี โฮม บอ อึม มางูน ปี เดียง เฆ แคง โฮว คูนดีคัม, วี เฮียง กาโณม เฆ ตี. วาย แฮะ ฮอต มาโนว อัน ดี เฆ อาต ปึอน โอย ซีนัม, เฆ โลว จูห ดี โบง ฆาน คูนดีคัม.
6แคง กาโณม เฆ ตี มึห อาดาเนลัะ, อาฮานานียา, อามีเซลัะ บอ อาฌารียา. เฆ บอ มูห โตต ดูอี อายูดา. 7ดา ตาง อี อึบ อามู อามาด คูนดีคัม ตึอน บอ วี ดาง จืร กามาย ดี เฆ. อาดาเนลัะ บอ วี จืร อาเบลัะเทซาจา, อาฮานานียา บอ วี จืร อาซาตารีก, อามีเซลัะ บอ วี จืร อาเมซีก บอ อาฌารียา วี จืร อาเบดเนโกว.
8อาดาเนลัะ ยี อูน น็อห, ตู แตห โดว อัน กาดาต โกบ ปี ดี โฮม บอ อึม มางูน ปี เฮียง คูนดีคัม. ปาย ตี อัน วี หมาณ, แตห อาซาเบนาด จอย อัน. 9เฌาพรา มืร โบง แตห อาซาเบนาด มึห น็อห กาเว อาดาเนลัะ บอ จอย อัน. 10มาแล, อาซาเบนาด ยี โยว คูนดีคัม บอ วี กาลาง ดี อาดาเนลัะ ต็อห, “คูนดีคัม แฮะ ฮอต เบลห อามีง, แตห เบ โฮม ปี ดี โฮม ปี ดี เดียง คูนดีคัม. เซ เบ ยี ตู โฮม, เซ เบ ตู มึห โดว โบ็ง แคม ปี กาโณม อี เฮา, อัน ดี บอ ง็อห แวน โอว.”
11อาดาเนลัะ บอ วี ฮาว โดง กอย ดา อี ยอด ลึมลา เฆ แปะ แฮะ จัร อาซาเบนาด, แตห อัน อึบ อาดาเนลัะ บอ ฆึก อัน โอย วี ตึอน. 12อัน บอ กาลาง ดี ดูอี วี ตี ต็อห, “แตห แม เทว ดี ยอด เย อี มูห แดเจณ แม อาดา ฆึร ซีแง. แตห แม แตห เย ฮาบ มี เดา เงียน บอ เดียง มี อึม ดีโลย. 13วาย อัน ตี แตห แม วี ยอด ปี ปาย นา เย บอ อารึบ เย, วี ลาย กาเฆา ดี เฆ กาโณม อี แฮะ โฮม ปี โฮม คูนดีคัม บอ เดียง อึม มางูน ปี เดียง อัน. ปัน อัน ตี แตห แม ซูงพยาด โดบ แคะ ปี ยึร แม.” 14อัน มืร โพรม ปี ต็อห อาดาเนลัะ ตี. อัน แตห เฆ เทว อาดา ฆึร ซีแง ตี.
15แฮะ ฮอต โนะ ฆึร ซีแง, เฆ ยี วี มึห โปลม มึห แฮณ บอ ชีด หลึอม เฆ อี เฮา อี แฮะ โฮม ปี ดี โฮม คูนดีคัม ตึอน. 16โคว, ดูอี ตึอน อาว ฮู แตห เฆ โฮม ปี ดี โฮม ปี ดี ฮาบ คูนดีคัม. อัน วี ดึห มี เดา เงียน, เฮียง เฆ โฮม.
17เฌาพรา บอ แตห เฆ พวน วี ตี มึห อางยาน บอ นับ ดี กาดัวะ กาพา ดอน โมยว, นับ บอ ดี เฌณฌา นา บอด นา หมึอม แบน โมยว แบน โมยว. อัน เฌา บอ ดัว ดี อาดาเนลัะ แตห อัน นับ ซีเพา ปี บยัะ เฌาพรา, นับ ดี กาลาง ลอง ดาง ปี อึณบาว อี.
18ดอ แฮะ โนะ โอย ซีนัม, แฮะ ฌัม แคะ ป็อก คูนดีคัม ตึอน, อาซาเบนาด บอ ดึห แคะ กอย เฆ กาโณม บอกาเฆลียด, แตห เฆ ฮาว ดี อาต คูนดีคัม อาเนบูคัดเนจา ตึอน. 19คูนดีคัม มืร ดีหมอด กาลาง ดี เฆ ดอน อี. อึณ บอ มูห อาดาเนลัะ, อาฮานานียา, อามีเซลา บอ อาฌารียา ตึอน อี ล็อะ น็อห คูนดีคัม หลึอม เฆ กาโณม อี เฮา. ปาย ตี เฆ มืร ปึอน ดี แบน แดเจณ คูนดีคัม. 20คูนดีคัม ปี บอ ดีหมอด โมยว เหมา อาว ต็อห, เฆ พวน วี ตี, เฆ บอ นับ ดี กาลาง หลึอม เฆ ดูอี อี มึห อางยาน บอ เฆ อี มูห ดา เบดาง อี กอย แคง มืง คูนดีคัม ดอน นา ดอน โปละ. เฆ บอ นับ หลึอม ดูอี เฆ ตี ฆึร บูน.
21อาดาเนลัะ บอ กอย แคง โฮว คูนดีคัม กอ ฌัม ดอ ตัห คูนดีคัม อาซายรัด อี อึบ มืง บีราซี, กาโฆห แป มืง บาแบ ตึอน.
Currently Selected:
อาดาเนลัะ 1: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
