ปร 23

1ปัน ตี อาปอลู วี ยอด ซืร ดี เฆ ดอน อี อี กอย กาฌูะ. อัน วี ต็อห “อึย เบ ดา ตาง, เบ บีนอง โอว. อู ซีณ ดอ โฆว กอ ฌัม อาตึร โอว แฮะ โดบ ซีคยา เฌาพรา. น็อห โอว ตู ต็อห, แปะ แฮะ โบง โอว อาว หมาน.” 2อัน แฮะ ฮอต ต็อห ปาย ตี, อึณ มูห ดา ตาง อี อึบ โตต ดูอี อี หลู ดี เฌาพรา. อัน จืร อานานี. อัน กาลาง ดี ดูอี อี กอย กาตัด อาปอลู, จัร เฆ กาทัะ โมต อัน. 3อาปอลู วี ต็อห ดี อานานี ตึอน, “เฌาพรา ดี วี กาทัะ โมต แม. แม ปี แรง อี พ็อห ทูน. แม แฮะ ตัห กอย ดี นี, ต็อห ดี ซูงพยาด อามู โอว โกบ ตู โดบ โอว ดารา. แฮะ ฮอต แม วี จัร อี กาทัะ โมต โอว. อึณ วี มูห แม อี ตู โดบ ดารา.”

4เฆ ดูอี อี กอย กาตัด อาปอลู วี ต็อห ดี อัน, “เหมา อึณ ปาย ปี ยัะ กาลาง แม โฆรห ตู หมึอม ดี ดา ตาง อี อึบ โตต ดูอี อี หลู ดี เฌาพรา?”

5อาปอลู วี ต็อห, “อึร เบ บีนอง, โอว ตู นับ ลอง อัน ตี. โอว ตู นับ ลอง มูห อัน ดา ตาง อี อึบ โตต ดูอี อี หลู ดี เฌาพรา. อึณ แฮะ แดม อูน แคง บับ เฌาพรา ต็อห, ‘เบ แกวะ กาลาง โฆรห ตู หมึอม ลอง ดา ตาง อี อึบ เบ.’”

6แฮะ ฮอต ปัน ตี อาปอลู วี ยึร, เฆ ดา ตาง อี กอย ดี อาต อัน, เฆ มูห อา พึง. มัง อี เฆ มูห ดูอี พึง พารีแซ. บอ มัง อี เฆ มูห พึง ซาดูแค. อาปอลู แฮะ ยึร ลอง อัน ตี, อัน จูห ดี กาลาง โฆรห ตาง, แตห เฆ ดา ตาง ปึอน ดี โทม ซีคยา. อัน ต็อห, “เบ บีนอง โอว, โอว มูห ดูอี พึง พารีแซ. บอ ฆูณ โอว แฮะ มูห ดูอี พึง พารีแซ. ดอ ตี นี เฆ แฮะ ต็อห, โอว มึห หมาบ โกบ หน็อะ อึณด็อะ โอว ลอง เฆ ดูอี ยัม ดี วี ยีต วี อีม.” 7อาปอลู แฮะ ฮอต กาลาง โฆรห ตี, เฆ ดูอี พึง พารีแซ บอ เฆ ดูอี พึง ซาดูแค, เฆ วี ลาย กาแทณ ตู ลาย โพรม. เฆ อาว ฮู มูห อู น็อห. 8เฆ ดูอี พึง ซาดูแค, เฆ ต็อห, เซ ดูอี แฮะ ฮอต ยัม, อาว ปึอน วี ยีต วี อีม. เฆ บอ ต็อห, อามู อามาด เฌาพรา บอ กานัม มืร ตู มึห. เฆ พึง พารีแซ, เฆ ยี ต็อห, ปี มาโนว เฆ พึง ซาดูแค โอย โมยว ตี อาว หมาน.

9ปัน ตี เฆ แกร ดี นัน กืน, กาลาง โฆรห ตาง, บอ ซีนัน ซีนืง. เฆ ดา ซารา อี มาโนว ดารา ยูดา มัง อี, เฆ อี มูห พึง พารีแซ, เฆ วี ยีต, กาลาง โฆรห ตาง. เฆ ต็อห, “ดูอี ตี, อัน ตู มึห หมาบ มาเซ. เซ โฆรห อัน แฮะ มูห แฮะ หมาน, บอ มูห กานัม, บอ มูห อามู อามาด เฌาพรา อี แฮะ กาลาง โฆรห ดี อัน, อัน ตู มึห หมาบ มาเซ.” 10ปัน ตี เฆ หงา ดี ลาย กาลูต. โบว ตาง โรวมา ตึอน, อัน โยว เฆ วี ดืด กายาต โดว อาปอลู. โคว, โบว ตาง วี แดะ ดา ซึก มัง อี, จัร เฆ ฮาว ดึห เลห อาปอลู โดง กอย เฆ พึง ดา ตาง ยูดา. เฆ วี ตึย อัน วีว แคง ดับ เฆ ดา ซึก.

11แคง หมึร ตี, เฌา เยซู ยี ตัห ฌัม โดง กอย อาปอลู, กอย โคบ อัน. อัน ต็อห ดี อาปอลู, “แม แกวะ โยว. แม แฮะ ยัะ กาลาง โฆรห ซืร แคง มืง เยรูซาแลม นี. ปาย ตี, แม บอ โลว กาลาง ลอง โอว บอ แคง มืง โรวมา.”

ลอง ดูอี คราม ดี ง็อห แวน อาปอลู

12ปา แคหณา, แปร แฮะ ฮอต วัห, เฆ ดูอี อายูดา มัง อี วี ตัห กาฌูะ แบน อู พึง บอ ดืง ต็อห, “แตห เฌาพรา แวน เอ, เซ เอ ฮี โฮม โบม, ฮี เดียง อึม อาต ปึอน ดี ง็อห แวน เอ อาปอลู.” 13เฆ ดูอี อี แฮะ ดืง ตี, เฆ กอย พวน ฆึร โลย. 14เฆ ยี ฮาว ฌัม โดง กอย เฆ ดา ตาง อี แยต เฆ ดูอี อี หลู ดี เฌาพรา. เฆ ต็อห, “เย มูห พึง อี แฮะ ดืง ต็อห, เย ตู โฮม มาเซ อาต ง็อห แวน เย อาปอลู ตึอน. 15โคว อัน ตี เบ ดา ตาง อี แยต เฆ ดูอี อี หลู ดี เฌาพรา บอ เบ ดา ตาง อี อึบ มืง, แตห เบ วี ฮาว ดี โบว ตาง, หมาณ ดี อัน, แตห อัน ตึย อาปอลู ตัห ฌัม โดง กอย เบ. แตห เบ ณึงราง ดี ดีหมอด ซีคยา อาปอลู ปอ อู เฌณ. อี มูห เย, เย ดี หน็อะ บัร อึณเตณ อัน, แตห เย ปึอน ดี ง็อห ยัม อัน อาต ตัห ฌัม อัน โดง กอย เบ.”

16ดอ กาลาง เฆ โฆรห ตี ดี ดา ตาง ยูดา, อึณ มึห ดูอี อู วี ตา ยึร โฆรห ตี. อัน มูห หลาน อาปอลู. อัน แฮะ ฮอต โทม ปี ลาย โพรม เฆ, อัน วี ฮาว ซืร โดง กอย เฆ ดา ซึก, วี กาลาง ดี อาปอลู ลอง อัน ตี.

17อาปอลู ยี แดะ โบว อี อึบ อู มาย็อห, แตห อัน ตัห โดง กอย อัน. อัน วี ต็อห ดี โบว ตี, “แตห แม ฮาว ตึย กาโณม นี, แตห อัน ฌัม ดี อาต โบว ตาง. อัน โลว กาลาง โฆรห ดี โบว ตาง.” 18ปาย ตี, โบว ตี วี ตึย อัน ฮาว ฌัม โดง กอย โบว ตาง. อัน วี ต็อห ดี โบว ตาง, “อาปอลู ปี คร็อง แม แคง กาปึม, อัน แฮะ แดะ โอว ตัห ดี อัน. อัน แฮะ จัร โอว ตึย กาโณม นี ดี แม. อัน มึห โฆรห ปี ซี กาลาง ดี แม.”

19โบว ตาง วี ปา แด กาโณม ตี, วี ฮาว ปอ อู โปละ, วี ดีหมอด อัน, “มาเซ ปี ซี กาลาง แม ดี โอว?”

20กาโณม ตึอน วี ต็อห, “เฆ ดูอี อายูดา, เฆ แฮะ ลาย โพรม ดี หมาณ, แตห แม ตึย วีว อาปอลู โดง กอย เฆ. เฆ ดี ณึงราง ต็อห, เฆ ดี วี ดีหมอด ซีคยา อัน. 21โคว, แกวะ แตห แม โบง ปี หมาณ เฆ. อึณ มึห ดูอี พวน ฆึร โลย. เฆ แฮะ ฮอต ดืง ต็อห, เฆ ตู โฮม ตู เดียง มาเซ อาต ง็อห ยัม เฆ อาปอลู. เฆ แฮะ ต็อห ดี กอย หน็อะ ดอ ฮาว อัน โดบ อึณเตณ. เฆ แฮะ ฮอต แรน โตต ดอน โมยว. อึณ ฆีด มี ปี ดี โพรม แม.”

22โบว ตาง แฮะ ฮอต โทม โฆรห ตี, อัน วี แตห ฆอน กาโณม ตึอน เวณ. อัน ต็อห, “แม แกวะ กาลาง ดี อาเซ ลอง ตัห กาลาง แม โฆรห ดี โอว.”

ลอง อาปอลู ฮาว ฌัม ดี อาต ดา กาณา โรวมา

23วาย อัน ตี โบว ตาง ตึอน วี แดะ โบว อี อึบ ดา ซึก อู มาย็อห อา วี. ฆาย แฮะ ฮอต ตัห ฌัม โดง กอย อัน, อัน วี ต็อห, “บาย โลว แรน ดา ซึก อา มาย็อห วี, ดา ซึก อี ป็อะ อึณปร็อง บู ฆึร วี บอ ดา ซึก อี โฆ็ง เลียห อา มาย็อห วี, แตห บาย แยต เฆ ฮาว มืง เกซาเร. ฮี โนะ ดีม นารี แคง หมึร นี, เบ โลว เลห ฮาว. 24บาย โลว แรน บอ อึณปร็อง มัง โดว แตห อาปอลู ป็อะ, แตห บาย วี ตึย อัน ฌัม ซีคยา โดง กอย ดา กาณา โรวมา อี อึบ กาดาย มืง เอ นี, อี จืร อาเพลีก.”

25โบว ตาง บอ แดม แปะ ตึย ดี อาเพลีก. อัน แดม ต็อห, 26“โอว อี จืร อากาโลวดีลัก ลูซียัะ, โอว แดม แปะ ดี แม อาเพลีก, อี มูห ดา กาณา อี หมึอม กาเซา อี อึบ มืง เอ. อึย, แม ดา กาณา, แตห แม ฆยามซา.

27เฆ ดูอี อายูดา แฮะ เหมต ดูอี วี นี. เฆ แฮะ หงา ดี ง็อห ยัม อัน. ดอ อัน ตี โอว บอ นับ, อัน มูห ดูอี โรวมา. โคว, บอ โอว บอ ดา ซึก โอว แฮะ ฮาว คยอด อัน. 28โอว ยี โลว นับ ซีคยา เหมา อึณ ปาย ปี เหมต เฆ ดี อัน. โคว, โอว แฮะ ตึย อัน ฮาว ฌัม ดี อาต เฆ ดา ตาง อี อึบ แคง กาดาย มืง ยูดา. 29ปัน ตี โอว บอ นับ, อึณ มูห ลอง ดารา เฆ. อึณ ตู มึห มาเซ ปี โบง อัน, อี กาอาบ เหมต ง็อห อัน. 30วาย อัน ตี โอว วี ยึร ลอง เฆ ดูอี อายูดา แฮะ ลาย โพรม ดี ปรา ดี ง็อห แวน อัน. ดอ อัน ตี อู เฌณ, โอว วี ตึย อัน ฮาว ฌัม โดง กอย แม. โอว มืร แฮะ ต็อห ดี ดูอี อี เหมต อัน, แตห เฆ ฮาว กาลาง ปี ดี พยาก เฆ ดี อัน โดง กอย แม. แคะ ตี โอว แดม.”

31วาย อัน ตี เฆ ดา ซึก วี โบง แคะ ปี จัร โบว ตาง ตึอน. เฆ วี ฮาว แคง หมึร, ตึย อาปอลู, แตห อัน ฌัม มืง อันทีพาทารี. 32ปา แคหณา เฆ ดา ซึก วี วีว มืง เยรูซาแลม, โดง กอย เฆ. อึณ ฆีด มี เฆ ดา ซึก อี ป็อะ อึณปร็อง อี ซี กอย โดบ อาปอลู. เฆ วี ตึย อาปอลู ฮาว โดบ อึณเตณ ฌัม มืง เกซาเร. 33เฆ แฮะ ฮอต ฌัม มืง เกซาเร, เฆ วี อาบ แปะ ตึอน ดี ดา กาณา โรวมา, อาบ บอ อาปอลู ดี อัน. 34ดา กาณา มืร วี ตีห แปะ ตี. แฮะ ฮอต, อัน วี ดีหมอด มืง บรีม อาปอลู, อึณ มูห มืง เหมา. 35ดอ วี นับ อัน, มืง บรีม อาปอลู มูห อืง คีลีคี, อัน วี ต็อห ดี อาปอลู, “เซ เฆ ดูอี พยาก แม ฮี ตัห, โอว ดี วี โทม อามู แม.” แฮะ ฮอต ปัน ตี อัน วี จัร เฆ บัร อาปอลู แคง โฮว คูนดีคัม อาเฮโรด.

Currently Selected:

ปร 23: pce

Highlight

Compare

Copy