2 อาซามูเอน 7
7
ลอง เฌาพรา ดัว กาดีก ซัดฌา ดี อาดาวีด
1วาย อัน ตี คูนดีคัม วี กอย ดาคึย แคง โฮว อัน. เฌาพรา แฮะ แตห อัน กอย ฆัด เยน, อาว ฮู โลว กาโฆห ดี รันซู อี กอย อาราบ อัน. 2ดอ อัน ตี คูนดีคัม กาลาง ดี ดา อี บยาน โฆรห เฌาพรา อี จืร อานาทาน ต็อห, “แม ยอด, โอว ปึอน ดี กอย แคง โฮว อี มูห แบน เฮ อารีด. อี มูห ฌีดืก เฌาพรา ยี กอย แคง ทึบ บีก.”
3อานาทาน วี กาลาง ดี คูนดีคัม ต็อห, “ฮาว โบง แคะ ปี อึง น็อห แม. เฌาพรา ดี อึง.”
4แคง หมึร ตึอน, เฌาพรา บอ กาลาง โฆรห ดี อานาทาน. อัน จัร อานาทาน 5ฮาว กาลาง โฆรห ดี อาดาวีด อี มูห แดเจณ อัน. อานาทาน โลว ต็อห, “เฌาพรา แฮะ นับ, แม ซี โบง กาง อัน. อัน ต็อห ดี แม, 6‘ซีณ ดอ ตึย โอว เฆ ดูอี อีซาเรลัะ, แตห เฆ เลห แคง มืง แอฆึบ ตึอน กอ ฌัม อาตึร นี, โอว ตู กอย แคง กาง. โอว แยต เบ ฮาว ดอน นา ดอน โปละ ดอ กอย โอว แคง ทึบ บีก ตึอน. 7โอว บอ ฮาว รึม โดบ เบ. เบ บอ ฌัม ดี เหมา, โอว ตู ดึอม จัร เบ โบง กาง อาดา โอว. โอว ตู ดึอม กาลาง ดี ดา ตาง อี อึบ เบ, อี ปี จัร โอว แตห เฆ ลึมลา ดูอี โอว อี มูห อาโมยว อีซาเรลัะ เฆ ตึอน. โอว ตู ดึอม ต็อห, เบ โลว ดึห เฮ อารีด โบง กาง อาดา โอว.
8โคว, ดอ ตี นี โอว อี มูห เฌาพรา อี อึบ โตต ดอน โมยว, โอว แฮะ ร็อห แม อาดาวีด. โอว แฮะ แตห แม เลห แคง กาปึม มาบู, แกวะ ฮู แตห แม เฮียง มาบู ตึอน. โอว แฮะ แตห แม แบน ดา กาณา อี อึบ ดูอี อีซาเรลัะ อี มูห ดูอี ปี อึบ โอว. 9แม บอ ฮาว นา เหมา, โอว แฮะ ฮาว รึม โดบ แม. โอว แฮะ ฮาว ดี อาต แม, ดึห แวน รันซู แม. โอว ดี บอ ดัว อาพูง ดี แม, แตห แม การัม เฆ อี มูห ดา ตาง ซืด แดง กาดาย. 10แดง ตี, เฆ ดูอี โอว อี มูห ดูอี อีซาเรลัะ, โอว ดี แตห เฆ ปึอน ดี กอย ซีคยา, แกวะ แตห เฆ กาดูห ดี กาโทะ วาย นี, แตห เฆ กอย โดง กอย เฆ ตี. เฆ อี ตู หมึอม ตึอน อาว ฮู ปึอน ดี ปยาต เบ ปี คา อาต. 11ซีณ ดอ แตห โอว อึณ มึห ดา ตาง อี อึบ ดูอี อีซาเรลัะ, เฆ แฮะ โบง นา ตู หมึอม. โอว ยี ดี แตห รันซู แม หราย โตต ดอน โมยว. แดง ตี, โอว เฌาพรา ดี แตห ครึร แม กอย ซีคยา เซเซ.
12เซ อาซาก แม ฮี โนะ, แม ฮี ยัม ปี ดา ดา แม เฆ ตึอน, อึณ ดี มึห หลูกหลาน อาราง แม อู วี, โอว ดี วี แตห อัน แบน ปี แม, แตห บอ มืง ปี อึบ อัน วี กอย เซเซ. 13หลูกหลาน แม ตี, อัน ดี โบง แตห อี กืน กาเซา วี อืบ โอว, แตห อึณ ปี อัน ซัม กาง อาดา โอว. บอ ครึร อัน ดี มึห โปลม เฆ แฮณ เซเซ. โอว มืร ดี แตห อัน อึบ มืง อัน เซเซ. 14โอว ดี แบน ฆูณ อัน. อัน ดี บอ แบน ฆอน โอว. เซ อัน ฮี โบง นา ตู หมึอม, โอว แตห อี เฮา โบง นา จีจีว ดี อัน, แตห อึณ ปี ฆูณ ดึห อึณเพียะ ซีเบรียะ ฆอน อัน. 15มาแล, โอว ดี ร็อก อัน เซเซ. โอว ตู โบง ปี ปี โบง โอว ดี อาซอลู อี แปะ แฮะ แวน โอว ดี อาต แม ตึอน. 16อึณกรึห แม โอว ดี แตห เฆ กอย ซีคยา เซเซ, แตห เฆ โหลห โอว เซเซ. เฆ ดี บอ อึบ มาน มืง ปี อึบ แม เซเซ.’” แคะ ตี เฌาพรา แฮะ จัร อานาทาน กาลาง ดี อาดาวีด. 17ปัน ตี อานาทาน บอ กาลาง โตต แคะ ปี ยึร อัน โฆรห เฌาพรา ดี อาดาวีด.
18แฮะ ฮอต, คูนดีคัม อาดาวีด บอ ลึบ ฮาว อี แคง, แตห อัน ปึอน ดี กาลาง โฆรห ดี เฌาพรา. อัน บอ ซาคึร ต็อห, “อึย แม เฌา อี มูห เฌาพรา บอด, บอ โอว บอ อึณกรึห โอว อาว มูห อาโมยว ดา ตาง. แม เฌา ยี มยูก โอว แตห โอว กอ ตาง แคะ นี. 19มาแล, แม เฌา แฮะ เฆฌู โอว กืน แคะ ตี. อึณ ยี ซี มูห อี แจก ดี แม เฌา. แดง นี, แม เฌา แฮะ กาลาง แตห โอว นับ, นา อาต อึณ ดี ปาย เหมา ดี อึณกรึห โอว. อึย แม เฌา อี มูห เฌาพรา บอด, แม นับ ดี โบง ปาย นี ดี เย อาโมยว ดูอี. 20โอว อาดาวีด อาว ฮู นับ ดี กาลาง ปอ อึณ ปัว. แม เฌาพรา, แม แฮะ นับ โอว. 21แปะ แฮะ โบง แม ดี โอว บอ แปะ แฮะ กาลาง แม ดี โอว ดอ ตี นี, อึณ โดบ โฆรห แปะ แฮะ ดึอม กาลาง แม. อึณ บอ โดบ ปี อึง แม.
22แม เฌาพรา แฮะ ตาง, แฮะ บอด หลึอม โตต ดอน โมยว. อาว มึห เฌาพรา ปอ อู กาดัง. อึณ มึห มี แม เฌาพรา นี. อึณ ปี แปะ แฮะ ดึอม แค อี ดี เย, แปะ แฮะ ยึร เย. 23แดง กาดาย นี อึณ ตู มึห ดูอี ปอ อู โมยว อี ปี ดูอี อีซาเรลัะ. แม เฌา แฮะ กาดูห ดี ทูด เลห เฆ แคง มืง แอฆึบ, แตห เฆ แบน ดูอี ปี อึบ แม, แตห อี เฮา ยึร แคะ ตาง ปวน แม. แม แฮะ โบง นา หมึอม อาม กาเซา บอ นา หมึอม โยว ดอ ซูต แม อาโมยว ดูอี เฮา บอ อารึบ ปี กรึบ เฆ, แตห เฆ เลห แคง มืง เฆ อาต ตัห ฌัม เฆ ดูอี อีซาเรลัะ. ปาย ตี แม เฌา แฮะ ทูด เลห เฆ แคง มืง แอฆึบ ตึอน. 24แม เฌา แฮะ แตห ดูอี อีซาเรลัะ แบน ดูอี อาโมยว แม เซเซ. แม มืร แบน เฌาพรา ปี กรึบ เฆ เซเซ.
25ดอ ตี นี แม เฌาพรา แฮะ ดัว กาดีก ซัดฌา ดี โอว บอ ดี ดูอี โอว. แตห แม เฌา โบง โดบ ปี ดัว แม กาดีก ซัดฌา ตี. 26แตห อี อืบ แม เฌาพรา เซเซ. แตห เฆ ต็อห, ‘เฌาพรา อี อึบ โตต ดอน โมยว, อัน บอ อึบ ดูอี อีซาเรลัะ.’ ปาย ตี บอ ดูอี โอว อาดาวีด นี, อี มูห แดเจณ แม, เฆ ดี กอย เซเซ บอ โดบ แม เฌาพรา เซเซ.
27แม เฌาพรา อี อึบ โตต ดอน โมยว, แม มูห เฌาพรา ดูอี อีซาเรลัะ. แม เฌา แฮะ ดัว กาดีก ซัดฌา ดี โอว ต็อห, ‘โอว ดี แตห ดูอี แม กอย ซีคยา เซเซ.’ โคว อึณ ปาย ตี โอว ยัะ ซาคึร หมาณ ดี แม เฌาพรา. 28แม เฌา, แม มูห เฌาพรา. โฆรห แม เฌา มืร มูห โฆรห มูห โฆรห หมาน. กาดีก ซัดฌา ตี แม เฌา มืร แฮะ ดัว ดี โอว. 29โกบ อึณ ปาย ตี โอว หมาณ, แตห อึณ ล็อะ น็อห แม เฌา, หมาณ แตห แม ม็องการา แตห ดี ดูอี โอว, แตห เฆ กอย เซเซ โดบ แม เฌา. แม เฌาพรา อี อึบ โตต, แคะ ปี กาลาง แม, แคะ ปี ม็องการา แตห แม, อึณ ดี แตห ครึร โอว ฆยามซา เซเซ.” แคะ ตี ปี ซาคึร อาดาวีด ดี เฌาพรา.
Currently Selected:
2 อาซามูเอน 7: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
