2 ปต 2

1ดอ มึอน, อึณ บอ มึห แบน วี แบน วี อี ณึงราง ดี บยาน โฆรห เฌาพรา. ปาย ตี, กาแต เบ มืร, อึณ ดี มึห ดา ซารา อี มาโนว กาลึบ. เฆ ดี ปรา ดี มาโนว โฆรห อี ตู หมาน, แตห เฆ อี โทม ชึม. เฆ บอ แวน เฌาพรา อี อึบ โตต อี แฮะ ทูด เลห เฆ แคง หมาบ. ปี โบง เฆ ฌึร ตี, อึณ แตห เฆ เจว ลึร, เจว ชึม. 2ดูอี กืน ดี ณึง เฆ บอ โบง อี หมึอม ซาย. โกบ ปี โบง เฆ ตี, เฆ อี เฮา ดี บอ ลูกตาย นา มูห นา หมาน. 3ดูอี เฆ ตี, เฆ มึห น็อห ลอพัะ. เฆ ดี บอ กาลาง โฆรห ดาคึย อี เลห แคง อางยาน เฆ บอ เกา ดี โฮม เบ. ซีณ อาต นี แฮะ เหลณ, อัน เฌา แฮะ ต็อห ดี ดัม หมาบ ดี เฆ. อัน ดืน ดี โบง แตห เฆ ลึร ชึม.

4บอ เฆ อามู อามาด เฌาพรา อี โบง หมาบ, เฌาพรา มืร ตู หลัยะ เฆ. อัน แฮะ แตห เฆ โจห กาโละ งาราย. อัน แฮะ ปัก อูน เฆ แคง อับ ว็อง, แตห เฆ บัร ซีแง ปัน ดี ซูงพยาด อัน เฌา อามู เฆ. 5บอ เฆ ดูอี อี กอย บาน ดอ มึอน, เฌาพรา มืร ตู หลัยะ เฆ. อึณ มึห มี อาโนว อี กาลาง นา มูห นา หมาน ดี ดูอี บอ เฆ อี เฮา บู วี แปะ แฮะ คยอด เฌาพรา. แดง ตี, เฆ อี ตู หณึม เฌาพรา, อัน เฌา แฮะ แตห อึม อึณปูน โตต เฆ บอกาเฆลียด. 6บอ มืง โซวโดม ฆาย มืง โฆวโมวรา, เฌาพรา แฮะ ดึอม ดัม หมาบ ดี เฆ, แตห เงา กาซึม อา มืง ตี. ลอง อัน ตี, อัน เฌา แฮะ แตห อึณ แบน อูพามา ดี เฆ อี ตู หณึม เฌาพรา. 7อัน เฌา ยี แฮะ คยอด อาโลด อี มึห น็อห ซืร น็อห หมาน. ดอ กอย อัน กาแต เฆ ดูอี ฮาย ดูอี มืก อี โบง นา จีจีว, อึณ บอ แบน น็อห กาปยาต ดี อัน. 8ดูอี อี มึห น็อห ซืร น็อห หมาน ตี, อัน บอ กาดูห ดี ยึร กาดูห ดี โทม ปี โบง เฆ อี ตู หมึอม ดอน โมยว. อัน มืร โลว คัม อี ดูก ดี น็อห อัน ดอง คืน ดอง วัน. 9ปาย ตี, เฌาพรา นับ ดี คยอด เฆ อี โบยว ดี โดบ อัน. อัน แตห เฆ ลอด แคง ดูก แบน โมยว แบน โมยว. อัน บอ วี คร็อง อูน เฆ อี โบง นา ตู บอด นา ตู หมึอม, แตห เฆ คัม หมาบ เฆ. เฆ บอ โลว กอย ปาย ตี บอ บัร ซีแง ปัน ดี ดัม อัน เฌา หมาบ ดี เฆ. 10อึณ ยี มูห เฆ อี โบง โดบ น็อห บรีม เฆ, โบง อี หมึอม กาอีห อี หมึอม กาดาต, บอ ลูกตาย ปวน เฌาพรา, เฆ ดี โลว คัม กืน หมาบ เฆ หลึอม อี เฮา. เฆ ปีคึก น็อห เฆ บอ ตู โยว ดี ลูกตาย โมยว อี มึห ปวน แคง ฆางหราว.

11อึณ ยี มูห เฆ อามู อามาด เฌาพรา, เฆ ปี บอ มึห ปวน หลึอม เฆ ดา ซารา อี มาโนว กาลึบ ตี มืร, เฆ ยี ตู แน ตู พยาก เฆ อี มึห ปวน ตี ดี อาต เฌาพรา. 12ดูอี เฆ ตี, เฆ นับ ดี แคณ ปี ตู นับ เฆ. เฆ บอ ปี โดว ซัด อี ตู นับ ดี กาพา. อึณ ฆีด มี ดี เหมต ง็อห ยัม เฆ. ดูอี ฮาย เฆ ตี, เฆ ดี บอ ชึม ปี มาโดว แปร ตี.

13เฆ โลว วี คัม ดูก แคะ ปี ดึอม โบง เฆ ดี อี เฮา. เฆ บอ อึง ดี เดียง ป็อห บอ โบง ซีนัน ซีนืง กาแต ซีแง. เฆ โบง แตห อึณ เบระ ดี น็อห เฆ, แตห อึณ โดบ น็อห กาวาต เฆ. ดอ โฮม รึม เฆ โดบ เบ, เฆ บอ โบยว ดาคึย ดี โบง แตห อึณ แบน อี หมึอม ซาย บอ อี ชึม ซาเร ดี เบ. 14งาย เฆ มืร ยอด โดบ น็อห กาวาต เฆ อี ซี ลูต อีบึณ อี เฮา. น็อห ซี โบง เฆ หมาบ มืร, อาว นับ ดี ฆืด, อาว นับ ดี จู ดอ เหมา. เฆ บอ นับ ดี กาซูห เฆ อี มึห น็อห ตู มัน ซีคยา. เฆ บอ มึห อาฆยาง ลามาก กาเซา. เฆ ดืน ดี แบน ดูอี ปี ดืง ปี เอห เฌาพรา. 15เฆ มืร แวน นา มูห นา หมาน, แตห เฆ โดบ ปี โบง อาบาลาอัม อี มูห ฆอน อาปอซอ, อี โบง นา ตู หมึอม โกบ ซี ปึอน อัน รึอน. 16อึณ มูห มาลา อัน อี ตู นับ ดี กาลาง โฆรห. อัน ยี กาดูห ดี กาลาง โฆรห ดูอี บอ แคร นา รึร นา มืก ปี โบง ดูอี อี บยาน โฆรห เฌาพรา ตี.

17ดูอี ฌึร ตี, เฆ บอ ปี อึม คึม อี ตู มึห อึม. เฆ ปี บอ อึณอูะ ปี บูด ฮาว คูน. เฌาพรา มืร แฮะ แรน โดง ดี กอย เฆ อี มูห โดง อับ ว็อง กาเซา. 18โคว, เฆ กาลาง โฆรห ปีคึก อี ตู มึห ดีโคว. เฆ บอ อึง ดี โบง โดบ น็อห บรีม เฆ อี กาดาต กาเซา. เฆ กาซูห บอ อี เฮา โดบ. เฆ บอ วี ปยาต น็อห เฆ ดูอี อี แฮะ กาจูห ดี วัห เฆ ดูอี อี โบง กาลึบ แบน โมยว แบน โมยว. 19เฆ บอ กาแซณ ดี แตห ดูอี ปึอน ดี กอย ทังฮาง. โดว บรีม เฆ ยี ตู กอย ทังฮาง. เฆ นับ ดี โบง กาลึบ เซเซ. อึณ ปี หมาบ แฮะ อึบ เฆ. โคว, ปี ตู แป ดูอี ดี อึบ, อึณ ดี วี อึบ เฆ. 20เซ ดูอี อู วี แฮะ ฮอต ลอด เลห ดี โมยว อี หมึอม กาดาต แดง กาดาย นี โกบ แฮะ นับ อัน เฌาพรา บอ เฌา เยซู อี แฮะ คยอด เอ, เซ อัน ปี วี โบง โดบ เฆ ดูอี อี ตู แป ดี อึบ นา ตู หมึอม, อัน ดี วี คัม ดูก หลึอม ปี ดึอม คัม อัน อาต นี. 21เซ อัน ยี ตู ดึอม นับ นา มูห นา หมาน, อึณ แฮะ หมึอม หลึอม อัน แฮะ ฮอต นับ, ยี วี แวน โฆรห บอด แปะ แฮะ ดึอม โทม อัน. 22อึณ มูห โฆรห อางยาน อี หมาน อาคาคัร ต็อห, “มาโซว บอ วี โฮม ฮึร บรีม อัน.” ปอ อู โมยว อึณ ต็อห, “เซ ดูอี แฮะ ฮอต บาย มาเลต, แตห โดว อัน ซีงา, อัน ปี วี แร แคง โณะ ปี บรีม.” ปี โบง ดูอี เฆ ตี, อึณ บอ ปาย ตี.

Currently Selected:

2 ปต 2: pce

Highlight

Copy

Compare