1 ทม 4

1น็อห พึอม เฌาพรา แฮะ กาลาง ซีคยา ต็อห, นา อาต นี ฮาว, ดูอี มัง อี เฆ ดี แวน ปี หณึม เฆ, วี หณึม กานัม อี กาโลว อี. เฆ ดี วี โบง โดบ ปี มาโนว กานัม. 2ปี มาโนว ฌึร ตี, อึณ ตัห ดี ดูอี อี ณึงราง บอด, ยี ซีมา กาโลว. เฆ ฮู นับ อี หมึอม อี ตู หมึอม. น็อห เฆ แฮะ ปี ยัง อี แฮะ ซีน โกบ แฮะ ตาด ดี เงา. 3เฆ บอ มาโนว ต็อห, “อาว โลว คัด. อาว หมึอม โฮม ปี ดี โฮม โมยว นี โมยว นี.” มาแล, เอ ยี แฮะ นับ, เฌาพรา แฮะ พาน เบลห ปี ดี โฮม ดอน โมยว, แตห เฆ ดูอี อี หณึม อัน บอ เฆ ดูอี อี นับ นา มูห นา หมาน บอ ปึอน ดี โฮม บอ ดาง ฆูง เฆฌู ดี เฌาพรา. 4ปี พาน เบลห เฌาพรา ดอน โมยว แฮะ หมึอม. เซ เอ แฮะ ซาคึร ดาง ฆูง เฆฌู ดี เฌาพรา, อาว มึห ดี โลว กัม โลว วัห คอ อู โมยว. 5โคว, ฌึร ตี ดอน โมยว แฮะ ฮอต ซีงา บอด โกบ โฆรห ปี กาลาง เฌาพรา ลอง อัน ตี บอ โกบ แปะ แฮะ ซาคึร เอ.

6เซ แม มาโนว ปาย ตี ดี เฆ บีนอง แคง พึง เฌา เยซู, แม ดี แบน ดูอี อี โบง ซีคยา ฆาน เฌา เยซู. โคว, ซีณ ดีแตด แม, แม แฮะ โทม ปี มาโนว อี ลอง อี มูห อี หมาน บอ ลอง โลว หณึม ลอง อัน ตี. แม มืร แฮะ โดบ ซีคยา ปี มาโนว ตี. 7แกวะ แตห แม โทม อาบึม แบน โมยว แบน โมยว อี ตู มูห ลอง เฌาพรา. แกวะ แตห แม โทม ปี แค ยา กัด เฆ อี ตู โดบ ดารา เฌาพรา, แกวะ แตห อึณ ลึบ น็อห แม. แตห แม ยี พึก ดี โดบ เฌาพรา. 8โคว, เซ แม คัด น็อห ดี พึก โดว โบ็ง แม, อึณ แบน อาฆยึร มัง โมยว มัง โมยว. เซ แม ยี วี โฆยวฆยา ดี โดบ เฌาพรา, อึณ แฮะ แว มึห อาฆยึร ดอน โมยว. บอ ฌาด นี บอ ฌาด ดี ตัห แฮะ มึห อาฆยึร อัน.

9โฆรห ตี แฮะ มูห โฆรห หมาน อาคาคัร. อึณ แฮะ หมึอม หณึม หมึอม โดบ. 10โคว, เอ บอ คัด น็อห ดี โบง ฆาน เฌาพรา บอ โฆยวฆยา ดี โบง ปี อึง อัน. เอ บอ หณึม บึง เฌาพรา อี กอย เซเซ, อี มูห เฌาพรา อี นับ ดี คยอด ดูอี บอกาเฆลียด. อัน ดี คยอด เฆ อี หณึม อัน อาคัร หมาน.

11แตห แม มาโนว อี ลอง อัน ตี บอ จัร เฆ โดบ ปี มาโนว ตี. 12แกวะ แตห อี ลูกตาย แม โกบ ซี หนึม แม. แตห เฆ อี หณึม ดอน อี ยอด ปี ปาย แม. อึณ บอ มูห ปี กาลาง แม โฆรห, ปี โบง แม ดอน โมยว, ปี ร็อก แม อี เฮา, ปี หณึม แม อัน เฌา บอ ปี ซาดีก แม น็อห แม, แตห อึณ ซีงา, แกวะ แตห อึณ หมึอม กาอีห, แตห ฌึร ตี ดอน โมยว แบน อูพามา ดี อี เฮา. 13แตห แม ออน ดี ตีห บับ เฌาพรา โดง ตัห กาฌูะ เฆ ดูอี แคง พึง เฌา เยซู. แตห แม บอ โฮว ดารา บอ มาโนว โฆรห เฌาพรา, แตห อึณ กอ ฌัม ปัน ดี ตัห โอว. 14แม แกวะ ซาดาก ซาราย ปี เฆฌู น็อห พึอม เฌาพรา ดี แม. แม แฮะ ปึอน เฆฌู ตี ดอ กาลาง เฆ ดา ตาง แคง พึง เฌา เยซู โฆรห เฌาพรา ดี แม, บอ ดอ ดาง เฆ แด เฆ แดง ฆีณ แม, ซาคึร ดาง แม. แกวะ แตห แม ปีว ลอง อัน ตี.

15แตห แม โหลห ลอง อัน ตี เซเซ. แตห แม โฆยวฆยา ดี โบง โตต ดอน โมยว ปี ต็อห โอว ตี, แตห อึณ บอ ลึห ซีคยา ดี ดูอี ดอน อี, แคะ แฮะ ตาง อาฆยึร ปี โบง แม ตี. 16แตห แม นับ ดี ซาดีก โดว แม บอ ปี มาโนว แม, แตห อึณ หมาน เซเซ. เซ แม โบง ปาย ตี, อึณ ดี จอย บอ แม บอ เฆ บีนอง อี โทม โฆรห แม ตี, แตห อึณ คยอด เบ.

Currently Selected:

1 ทม 4: pce

Highlight

Copy

Compare