1 อาซามูเอน 5
5
ลอง ฌีดืก เฌาพรา กอย แคง มืง พีลีที
1เฆ ดูอี พีลีที บอ ดึห เลห ฌีดืก เฌาพรา แคง มืง เอปัะเนจัะ, วี ฮาว แคง มืง อาจูด. 2ดูอี พีลีที บอ ดึห ฌีดืก เฌาพรา, อูน แคง โฮว ปี กรึบ เฆ อัน เฌา อี จืร เฌา ดาโฆน. เฆ แตห ฌีดืก ตี กอย โคบ อารึบ เฌา ดาโฆน ตี. 3ปา แคหณา เฆ ดูอี แคง มืง อาจูด ตึอน บอ ยีต ซีณวัห เจว. เฆ บอ ยึร อารึบ เฌา ดาโฆน ตึอน แฮะ เกห กาตับ ดี กาดาย, กอย นา อาต ฌีดืก เฌาพรา. เฆ วี บยีต อารึบ ตี, วี อูน โดง กอย อัน. 4ปอ อู ซีแง ซีณวัห เจว เฆ ยีต ยึร อารึบ เฌา ดาโฆน ตึอน กาตับ ดี กาดาย นา อาต ฌีดืก เฌาพรา ตึอน. บอ ฆีณ อัน บอ แด อัน บอ อา บลาก แฮะ ฮอต กาดัด เลห, วี กอย แดง บันโดก มาโลห ตึอน. อึณ ฆีด มี โดว อัน ปาย ดี ฆึง. 5โคว อัน ตี, กอ ฌัม อาตึร นี, เฆ ดูอี หลู ดี เฌา ดาโฆน ตี บอ เฆ อี ลึบ แคง โฮว เฌา ดาโฆน ตึอน บอกาเฆลียด, เฆ ตู แณต บันโดก มาโลห ดี โฮว เฌา ดาโฆน อี กอย แคง มืง อาจูด ตึอน.
6เฌาพรา บอ ดัว ดูก แบน โมยว แบน โมยว ดี เฆ อี กอย แคง มืง อาจูด บอ มืง. อัน แตห มาน มืง เฆ บอ กาปยาต ลึร บอ แตห เฆ ดูอี มึห บึบ ดี โดว เฆ. 7เฆ ดูอี อาจูด ตึอน, เฆ บอ ยึร ลอง แฮะ ปาย ตี เฆ บอ กาลาง ต็อห, “ฌีดืก เฌาพรา ปี กรึบ เฆ ดูอี อีซาเรลัะ ตึอน, อึณ ตู ปึอน กอย โดง กอย เอ. อัน เฌา ตี แฮะ ดัว ดูก กาเซา ดี เอ บอ ดี เฌา ดาโฆน เอ.” 8เฆ วี แดะ กาฌูะ เฆ ดา ตาง แคง มืง พีลีที, วี ดีหมอด เฆ ต็อห, “เหมา เอ ดี ปาย ดี ฌีดืก เฌาพรา ปี กรึบ เฆ ดูอี อีซาเรลัะ นี?” เฆ ปี วี ลาย ต็อห, “แตห เอ ดึห ฌีดืก ตี, ฮาว อูน ดี มืง ฆาทัะ.” ปัน ตี เฆ บอ ดึห ฮาว ฌีดืก ตึอน.
9วาย แฮะ ฮอต เฆ ฮาว อูน ฌีดืก, เฌาพรา บอ ปยาต เฆ อี กอย แคง มืง ตึอน, แตห เฆ ดูอี อี กอย แคง มืง ตี บอ ชึม. อัน เฌา แตห บอ ฆอน บอ ดูอี ดี ตาง เลห บึบ ดี เฆ บอ โดว. 10ปัน ตี เฆ วี กาโพรม ดี ดึห ฌีดืก เฌาพรา ตี, วี ฮาว อูน ดี มืง เอโครน.
ดอ ตัห ฌัม ฌีดืก เฌาพรา แคง มืง เอโครน, เฆ ดูอี แคง มืง เอโครน ตี บอ กาโพรม ดี ดัด ต็อห, “เฆ แฮะ ดึห ตัห ฌีดืก เฌาพรา ปี กรึบ เฆ ดูอี อีซาเรลัะ โดง กอย เอ, แตห บอ เอ ดี ยัม ดี ชึม.” 11เฆ ปี วี แดะ กาฌูะ ดา ตาง ดูอี พีลีที, วี กาลาง ดี เฆ ต็อห, “แตห เบ ดึห ฮาว อูน ฌีดืก เฌาพรา ปี กรึบ เฆ ดูอี อีซาเรลัะ, แตห อึณ วี ฌัม โดง กอย บรีม อัน. แกวะ แตห อึณ แตห บอ เย โลว ยัม.” เซา อี แตห อี ยัม อึณ แฮะ กาลัยะ บอ มืง ดอน โปละ, แตห เฆ ดอน อี กอ โยว กาเซา. อึณ ยี มูห เฌาพรา อี แฮะ โบง. 12เฆ อี ตู ยัม, เฆ บอ มึห เซา บึบ. ปี หงูน กาเซา เฆ วี ปึอน ยึร ดอน นา ดอน โปละ, แตห อึณ กอ ลึห ฌัม ฆางหราว.
Currently Selected:
1 อาซามูเอน 5: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
