1 อาซามูเอน 25
25
ลอง อีมาย ตู มึห อางยาน บอ อีบึณ อี มึห อางยาน
1วาย ตี อาซามูเอน บอ ยัม. ดูอี อีซาเรลัะ บอ กาโพรม ดี ตัห กาฌูะ บอ กลึร บอ ยาม. เฆ บอ กาโพรม ดี ฮาว ดีบ อัน ดี กาง อัน แคง มืง รามา ตึอน.
อึณ ยี มูห อาดาวีด, อัน ยีต ฮาว แคง แปร กาฮ็อห อี จืร มอนัะ. 2ดอ อัน ตี อึณ มึห ดูอี อู วี, อัน กอย แคง แปร กาฮ็อห อี จืร มอนัะ ตึอน. อัน มึห โกรวกราม กืน. อัน กอย ดี นอน ฆาเมลัะ ตึอน. ดูอี วี ตี, อัน มูห ดา อี ครัม ตาง. อัน มึห มาบู โอย แหรณ โดว, มาแป อู แหรณ โดว. อัน กับ ฮึก มาบู อัน, กอย กาตัด นอน ฆาเมลัะ ตึอน. 3ดูอี วี ตี จืร อานาบาลัะ. อีบึณ อัน จืร นาง เอพีเฆลา. อีบึณ ตึอน มึห อางยาน บอด. อารึบ อัน มืร ชีด. อีมาย อัน ยี มึห น็อห ดืร, โบง มี นา ตู หมึอม. อัน มูห หลูกหลาน อาฆาลีบ.
4อาดาวีด บอ กอย แคง แปร ตึอน. อัน บอ ยึร ลอง อานาบาลัะ กับ ฮึก มาบู อัน. 5อัน บอ จัร กาโณม ฆึร วี, กาลาง ดี เฆ ต็อห, “แตห เบ ฮาว โดง กอย อานาบาลัะ ดี นอน ฆาเมลัะ ตึอน. แตห เบ กาลาง โฆรห ดาคึย ดี อัน ต็อห, โอว แฮะ ตึย เบ. 6เบ โลว ต็อห, ‘แตห แม กอย ดาคึย. บอ อึณโฮม แม, แตห เบ ดาคึย. แคะ กอย เฆ อี กอย โดบ แม, แตห เบ ดาคึย โตต ดอน อี.
7ดอ ตี นี อาดาวีด แฮะ ยึร ลอง แม แฮะ กับ ฮึก มาบู แม. อัน แตห แม นับ, เฆ ดูอี อี เฮียง มาบู แม เฆ แฮะ ดึอม กาตูณ อัน บอ กอย โดบ อัน. อัน มืร ตู โบง ลูต มาเซ ดี เฆ. โจว กอย เฆ ดี กาดาย นอน ฆาเมลัะ ตี, โกรว แม มืร ตู โบยห มาเซ. 8เซ แม ดีหมอด ดูอี แม ตี, เฆ ดี ปึอน กาลาง ดี แม. โคว, แตห เย ยึร ฆูง แม. เย แฮะ ตัห ฌัม ซีแง โบง แม บลอย. หมาณ, แตห แม มึห ปี ดัว เวณ ดี เย บอ ดี ฆอน แม อี จืร อาดาวีด ตี.’”
9เฆ บอ ตัห ฌัม โดง กอย อานาบาลัะ ตึอน, เฆ มืร กาลาง ดี อัน แคะ ปี ต็อห อาดาวีด ดี เฆ.
10อานาบาลัะ วี กาลาง ดี เฆ ต็อห, “อาดาวีด ตี มูห อาเซ? ฆอน อาเยเซ ตี มูห อาเซ? ยาม ดอ ตี นี, หมาย อี เฮา แฮะ กืน อี เลห เตา ตัะ ดา กาณา เฆ. 11โอว ตู มึห ทูงฆยาม ดี ดึห คามูน โอว, อึม โอว บอ ยัง มาบู แปะ แฮะ ง็อห ดูอี โอว, วี ดัว ดี เฆ ดูอี ปี ตู นับ โอว นา ตัห.”
12กาโณม เฆ ตึอน บอ วี เวณ กาลาง โฆรห ตี ดี อาดาวีด. 13อาดาวีด มืร วี กาลาง ดี ดูอี อัน ต็อห, “เบ ดึห มาปัวะ ลาง เบ, ปัก ดึก ดี ณอย เบ ดอน อี.” ปัน ตี ดูอี อาดาวีด เฆ บอ ดึห มาปัวะ ลาง, ปัก ดึก ดี ณอย เฆ ดอน อี. เฆ กอย พวน มาย็อห วี อี ฮาว โดบ อาดาวีด. อาดา อา มาย็อห วี บอ กอย บัร โกรวกราม เฆ.
14อึณ ยี มึห แดเจณ อานาบาลัะ อู วี, อัน บอ กาลาง ดี นาง เอพีเฆลา อี มูห อีบึณ อานาบาลัะ ตึอน. อัน ต็อห, “แม ยอด, อาดาวีด แฮะ จัร ดูอี แคง แปร ตัห กาลาง โฆรห ดาคึย ดี ดา กาณา เอ นี. อัน ยี วี เอห กาเซา เฆ. 15เฆ ตี ยี แฮะ ดึอม กาเว กืน เย. ยาม ดอ กอย กาตัด เย โดง กอย เฆ, เฆ แตห เย แบน ฆึก กาโดบ ดี เฆ. เย มืร ตู ชึม มาเซ. โกรวกราม เย มืร ตู หราย คอ อู โมยว. 16ยาม ดอ เฮียง เย มาบู แบน ฆึก กาโดบ ดี เฆ, บอ กาแต ซีแง บอ แคง หมึร เฆ ตี แฮะ แบน ดา อี แร อี ฆ็อง เย เซเซ. 17โคว อึณ ปาย ตี แม ยา กาณา, แม กาพา อึณ โลว ปาย เหมา แกวะ แตห อึณ แบน อี ตู หมึอม ดี ดา กาณา เอ ตี บอ ดี อึณโฮม อัน ดอน อี. โคว, ดา กาณา นี แฮะ ฮาย กาเซา. อาว มึห อาเซ อี ปึอน กาลาง โฆรห ดี อัน.”
18ปัน ตี นาง เอพีเฆลา ตึอน บอ ปีครัน อัน ดี แรน ปี ดี ตึย ดี อาดาวีด. อัน บอ ดึห คามูน อา มาย็อห โบ็ง, อึม มางูน อา ปูง, มาบู แปะ แฮะ ฮอต แรน อูน เฆ พัน โดว, โหงว มาตูห พัน แบล, เบล มางูน กาฮ็อห อู มาย็อห ดีแคลบ, บอ เบล ดีปู กาฮ็อห อา มาย็อห ดีแคลบ. อัน บอ ปีครัน อัน ดี ดึห ฮับ แดง ดาง มาโลว. 19อัน บอ กาลาง ดี แดเจณ อัน เฆ ตึอน ต็อห, “แตห เบ แยต โอว ฮาว. โอว มืร ดี โดบ เบ.” นาง ตึอน ยี ตู กาลาง แตห อีมาย อัน อี จืร อานาบาลัะ ตึอน นับ ลอง อัน ตี.
20ดอ ป็อะ นาง เอพีเฆลา มาลา, ฮาว โดบ อึณเตณ, อัน บอ ฌัม ดี โรง แดง นอน, อึณ มูห อาดาวีด เฆ ดูอี อัน, เฆ บอ ตัห ลาย กาตูณ ดี อัน. 21อาต ฌัม, อาต ลาย กาตูณ เฆ ตึอน, อาดาวีด แฮะ ต็อห, “โอว บัร ดีโลย ดีลาย โกรว ดูอี วี นี. ดอ กอย เฆ แคง แปร กาฮ็อห ตึอน, โกรว อัน คอ อู โมยว มืร ตู หราย. อี หมึอม ปี โบง โอว ดี อัน, อัน วี โบง เวียะ อี ตู หมึอม ดี โอว. 22แคหณา ซีณวัห ฮี บลาง, โอว ดี ง็อห แวน โตต บอ อัน บอ อีมาย เฆ อี โดบ อัน. เซ ฮี ฆีด คอ อู วี, แตห เฌาพรา วี ดัว ดูก กาเซา ดี โอว.”
23อัน แฮะ ฮอต กาลาง โฆรห ตี, นาง เอพีเฆลา ตึอน บอ ยึร อาดาวีด, อัน บอ เลห แดง กาตูะ มาลา อัน, วี มูด ฆึบ ดี อาต อาดาวีด บอ ครึบเครา ดี กาดาย. 24อัน บอ มูด ฆึบ ดี เปลา อาดาวีด ตึอน ต็อห, “อึย แม ดา กาณา โอว, ปี ลูต เย แฮะ แบน หมาบ ดี โอว. โอว อี ดี คัม โตต. โอว หมาณ ดี กาลาง โฆรห แตห แม โทม, หมาณ แตห แม โทม โฆรห แดเจณ แม นี. 25แม แกวะ กาพา ลอง อานาบาลัะ อี มูห ดูอี น็อห ฮาย กาเซา ตี. จืร อัน มืร อึณ กาดาน ดี อัน. ซีเพา อัน อึณ ปี, ‘ดูอี รึร, ดูอี มืก.’ อี มูห โอว, อีบึณ แดเจณ แม นี, โอว ตู ยึร ดอ ตัห ดูอี แม โดง กอย เย.
26ดอ ตี นี แตห บอ เฌาพรา บอ แม โทม โฆรห โอว อี หมาน อาคาคัร. เฌาพรา แฮะ แร แม, แกวะ แตห แม โบง เวียะ นา ตู หมึอม ดี อี, แกวะ แตห แม โลว ง็อห อี. โคว, รันซู แม บอ เฆ อี ซี ปยาต แม, แตห เฆ ปี อานาบาลัะ ตี. 27ดอ ตี นี โอว หมาณ แม, แตห แม ดึห คอซอง ปี ดึห ตัห โอว นี, แตห แม ดัว ดี เฆ ดูอี อี โดบ แม นี. 28หมาณ แม ฆ็อห แวน ปี ลูต โอว ตี. โอว แฮะ นับ, แม กาโฆห มี ปี จัร เฌาพรา ดี แม. โคว, เฌาพรา ดี โบง แตห บอ แม บอ หลูกหลาน แม ปึอน ดี อึบ มืง เย เซเซ. โกบ อึณ ปาย ตี แกวะ แตห แม โบง นา ตู หมึอม ดอ เหมา. 29ดูอี มัง อี, แฮะ เหรต ดี ง็อห ยัม แม. มาแล, อาซาก แม ดา กาณา โอว, แฮะ กอย ซีคยา. เฌาพรา อี มูห เฌาพรา ปี กรึบ แม, อัน ดี ยอด แมน แม. อึณ ยี มูห รันซู แม, อัน เฌา ดี แวน แตห อึณ ปี มาว อี เลห แคง วัน ปี วึณ อี. 30เซ เฌาพรา เฆฌู แม, เซ อึณ ฮี แบน โตต ดอน โมยว ปี ดึอม กาลาง อัน ดี แม, เซ แม ฮี แบน ดา อี อึบ ดูอี อีซาเรลัะ นี, 31แม แฮะ ปึอน กอย ดาคึย. แม อาว โลว เฌณฌา แบน น็อห กลึร ลอง ปี ดึอม ง็อห แม ดูอี, อี ตู มึห ดีโคว. บอ ปาย ตี แม อาว ฮู มึห ดี โหลห ลอง แปะ แฮะ ดึอม โบง เวียะ แม ดี อี. เซ เฌาพรา ฮี จอย แม, หมาณ, แกวะ แตห แม ปีว บอ โอว.”
32นาง เอพีเฆลา แฮะ ฮอต กาลาง โฆรห ตี, อาดาวีด วี กาลาง ดี อัน ต็อห, “โอว อืบ เฌาพรา อี อึบ ดูอี อีซาเรลัะ, อี แฮะ จัร แตห แม ตัห ลาย กาตูณ ดี โอว อาตึร นี. แตห อัน เฌา ม็องการา แตห ดี แม. 33แม มึห อางยาน บอด. แม มืร แฮะ แคร โอว, แกวะ แตห โอว โบง หมาบ, แกวะ แตห โอว โบง เวียะ นา ตู หมึอม ดี อี เฮา, แกวะ แตห โอว ง็อห อี อาตึร นี. โคว อัน ตี, แตห เฌาพรา ม็องการา แตห ดี แม. 34เฌาพรา อี มูห เฌาพรา ปี กรึบ ดูอี อีซาเรลัะ, อัน แฮะ แคร โอว, แกวะ แตห โอว โบง นา ตู หมึอม. เซ แม ตู ดีงัณ ดี ตัห ครัน ครัน, แตห แม กาตูณ โอว, แคหณา ซีณวัห แปร ฮี บลาง, โอว แฮะ ต็อห ดี ง็อห แวน หมาน อีมาย แม, อี จืร อานาบาลัะ บอ เฆ อี กอย โดบ อัน.”
35ปัน ตี อาดาวีด บอ ดึห ลักซอง ปี ดึห ตัห นาง เอพีเฆลา ตึอน. อัน บอ ต็อห, “แม วี เวณ ดี กาง แม. แตห แม กอย ดาคึย กอย ซีคยา. โอว แฮะ โทม โดบ โฆรห แคะ ปี ต็อห แม.”
36ปัน ตี นาง เอพีเฆลา ตึอน บอ วี เวณ โดง กอย อีมาย อัน อี จืร อานาบาลัะ ตึอน. อานาบาลัะ แฮะ งยา โฮม บลอย ดี กาง อัน ตึอน. อัน เฮียง ปี บลอย คูนดีคัม. แคง น็อห อัน แฮะ โบยว กาเซา โกบ แฮะ ยึต อัน ป็อห. โคว, อาต บลาง แปร, อีบึณ อัน ตึอน ตู ปึอน ดี กาลาง มาเซ ดี อัน. 37ปัน ตี แปร มืร บอ บลาง, ยึต ป็อห อัน แฮะ หราย, อีบึณ อัน บอ กาลาง โตต ดอน โมยว ลอง อาดาวีด ตึอน ดี อัน. ดอ อัน ตี พึอม อัน อาว ฮู ซีคยา. โดว อัน บอ โปลม แหนน มาว. 38วาย อัน ตี กาบัก ฆึร ซีแง, เฌาพรา บอ แตห อัน ยัม.
39อาดาวีด บอ ยึร ลอง อานาบาลัะ แฮะ ฮอต ยัม, อัน บอ ต็อห, “โอว อืบ แม เฌาพรา, อี นับ ลอง แปะ แฮะ แนนัะ อานาบาลัะ ตึอน ดี โอว. แม เฌาพรา แฮะ แคร โอว, แกวะ แตห โอว โบง นา ตู หมึอม ดี อัน. ดอ ตี นี แม เฌาพรา แฮะ วี โบง, แตห อัน คัม หมาบ อัน.”
ปัน ตี อาดาวีด บอ จัร เฆ ฮาว ดีหมอด นาง เอพีเฆลา ตึอน, แตห อัน แบน อีบึณ อัน. 40แดเจณ อาดาวีด บอ ตัห ฌัม โดง กอย นาง เอพีเฆลา ดี นอน ฆาเมลัะ ตึอน. เฆ บอ กาลาง ดี อัน ต็อห, “อาดาวีด แฮะ จัร เย ตัห ดีหมอด แม แบน อีบึณ อัน.”
41นาง ตึอน บอ วี มูด ฆึบ ดี กาดาย วี ต็อห, “โอว มูห แดเจณ อัน, แตห โอว ปึอน ดี แบน อี บาย เปลา อัน.” 42ปัน ตี อัน บอ ปีครัน อัน ดี ฮาว. อัน บอ แดะ นาง เฆ อี มูห แดเจณ อัน, เฆ พัน วี, แตห เฆ ป็อะ มาลา ฮาว โดบ ดูอี อาดาวีด เฆ อี ตัห แดะ เฆ ตึอน, แตห อัน ปึอน ดี แบน อีบึณ อาดาวีด. 43อาดาวีด บอ ดึห บอ นาง เอฮีนอง อี ตัห แคง มืง เยจาเรลัะ ตึอน, แตห ฆาย แบน อีบึณ อัน. 44อาซอลู บอ ดึห อี มูห ฆอน อัน อี จืร นาง มีคาลัะ ตึอน, อี มูห อีบึณ อาดาวีด, วี อาบ อัน ดี อาพาลัะ อี มูห ฆอน อาเลซา, อี มูห ดูอี มืง กาลีม ตึอน. อัน บอ แตห ฆอน อีบึณ อัน ตี วี แบน อีบึณ วี ตี.
Currently Selected:
1 อาซามูเอน 25: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
