1 คูนดีคัม 4
4
ลอง อามู อามาด อาซาโลวโมว
1คูนดีคัม อาซาโลวโมว บอ อึบ บึง มืง อีซาเรลัะ บอ มืง. 2อี แบน อามู อามาด อัน, เฆ จืร อาฌารียา อี มูห ฆอน ดา อี หลู ดี เฌาพรา อี จืร อาฌาโดก.
3อาเอลีโฮวรีบ บอ อาฮียา อี มูห ฆอน อาซีซัะ ตึอน. ฆาย แบน ดา อี จอย ดา จาเร แดม แปะ. อายอซาพาด อี มูห ฆอน อาฮีลูด ตึอน, อัน แบน ดา จาเร.
4อาบีนายา อี มูห ฆอน อาเยฮอยาดา. อัน แฮะ แบน ดา โบว อี อึบ ดา ซึก. อาฌาโดก ฆาย อาบาทา แบน ดา อี หลู ดี เฌาพรา.
5อาฌารียา อี มูห ฆอน อานาทาน, อัน แบน ดา อี อึบ เฆ ดา ตาง อึบ มืง แบน มืง แบน มืง. อาฌาบูด อี มูห ฆอน อานาทาน ตึอน, อัน แบน ดา ตาง หลึอม โตต เฆ อามู อามาด คูนดีคัม. อัน มูห ฆึก คูนดีคัม.
6อาฮีซา แบน ดา อี อึบ แคง โฮว คูนดีคัม. อาโตวนีรัม อี มูห ฆอน อาบาตัะ, อัน แบน ดา ตาง ดูอี แฆบ คอน เฆ จึง.
7อาซาโลวโมว บอ ดาง ดา ตาง ฆึร ดี อา วี, แตห เฆ อึบ มืง แบน มืง แบน มืง, แตห เฆ ลาย กาปลูะ ดัว ปี ดี โฮม ดี คูนดีคัม บอ ดี เฆ อี กอย แคง โฮว อัน. อู ซีนัม, ดา ตาง ฆึร ดี อา วี ตี โลว ดัว แคะ ปี โลว คูนดีคัม, อู วี อู มาเฆียน. 8ดูอี เฆ ตี, เฆ จืร ปาย นี.
อาบีฮูรา อี กอย ดี นอน อาเอพารีม,
9อาบีนเดกา อี อึบ มืง มากัด, มืง ซาบาบีม, มืง เบดเซเมด บอ มืง เอโลนเบดฮา.
10อาบีนฮาซีด อี อึบ มืง อารูโบด บอ มืง โจวโคว ฆาย โดง อี จืร เฮพา ปอ โปละ.
11เบนอาพีนาดาบ อี อึบ มืง นาโพดดอรา อัน ลาย นาง ตาพาก อี มูห ฆอน อาซาโลวโมว.
12อาบานา อี มูห ฆอน อาฮีลูด อัน อึบ มืง ทานัก, มืง มีกีตอ, มืง เบดแซอัน บอ มืง อี กอย โคบ มืง จาตานัะ นา เตต มืง เยจาเรลัะ ตึอน. กาดาย ปี อึบ อัน ตี, อึณ จูห ดี มืง เบดซัน กอ ฌัม มืง อาเบลัะมาฮาลัะ บอ นา กัว มืง โยกมัม.
13อาเบนเฆบา อี กอย แคง มืง ราโมดฆีเลอาด อัน อึบ โดง กอย เฆ ดูอี อายาอีรา อี มูห หลูกหลาน อามานาเซ อี กอย แคง มืง ฆีเลอาด. อัน บอ อึบ มืง อากอพัะ แคง กาดาย มืง บาซัน อี มึห มืง เดา ฆึร มืง อี มึห แรง บอ แซ มาโลห ปี โบง เฆ ตา บ็อง.
14อาฮีนาดับ อี มูห ฆอน อาอีตอ อัน อึบ มืง มาฮานาอีม.
15อาฮีมาด อี อึบ มืง นาบทาลี อัน แฮะ ดึห นาง บาซามาด อี มูห ฆอน อาซาโลวโมว, แตห อัน แบน อีบึณ อัน.
16อาบานา อี มูห ฆอน อาฮูเซ อัน อึบ มืง อาเซน บอ มืง อาโลด.
17อายอซาพาด อี มูห ฆอน อารูบา. อัน อึบ มืง อีซาคา.
18อาซีมี อี มูห ฆอน อาเอลา อึบ มืง อาเบนยาม.
19อาเกบา อี มูห ฆอน อาอูรี อัน อึบ มืง ฆีเลอาด. มืง ตี มูห มืง ปี อึบ คูนดีคัม อาซีโฮน อี มูห อาโมยว อาโมวรีด. อัน อึบ บอ มืง บาซัน ปี อึบ คูนดีคัม อาออคัะ. อัน อู วี มูห ดา กาณา อี ปึอน ดี อึบ มืง ตี.
ลอง ปี ดี โลว คูนดีคัม อาดา ดอน ซีแง
20ดอ อัน ตี ดูอี อายูดา บอ ดูอี อีซาเรลัะ เฆ กืน กาเซา กอ ฮู นับ ดี ตีห, กอ แหนน กาฮาต บาง อึม นัมมูกซารา. เฆ บอ กอย ดาคึย, โฮม ดาคึย. 21อาซาโลวโมว บอ อึบ บึง แคะ กอย มืง เฆ ตึอน. จูห ดี แบลง อึม ตาง ตึอน, กอ ฌัม มืง พีลีที บอ กาอูน กาดาย มืง แอฆึบ, อัน อึบ โตต. เฆ ดูอี แคง มืง เฆ ตี, เฆ ตัห อาบ ลักซอง ดี อาซาโลวโมว แตห กอ โนว บอ โจว อัน.
22ปี ดี โฮม อาซาโลวโมว เฆ ดูอี อัน, อาดา อู ซีแง อึณ โตต กาแปะ เคาคยูง อี กามูน ซีคยา โอย ฆึร กอรัะ,#4:22 อึณ ปี บู มาย็อห ดี บู ฆึร ปูง กาแปะ เคาคยูง อี ตู กาลาต ซีคยา เดา ฆึร กอรัะ.#4:22 อึณ ปี อู แหรณ ดี พัน มาย็อห ปูง 23เฆ โฮม บอ มามัก อี ฆลัณ ซีคยา, ฆึร โดว, มามัก ปี เบลห เฆ แตห อึณ โฮม เปต ปอ อา ฆึร โดว, มาบู เฆ มาแป ปอ อู มาย็อห โดว. แดง ตี, ปี วี มึห บอ มาฌัะ, มังเฆียห เฆ มาบวห บอ มาเอียน ปี เฮียง เฆ. 24อาซาโลวโมว บอ อึบ มืง กืน. จูห ดี แบลง อึม ตาง ดี มืง ทีพาซา บอ ฮาว นา เฆต ซีแง กอ ฌัม มืง ฆาซา อัน แฮะ อึบ โตต. เฆ อี กอย โรบ อัน อาว มึห อาเซ อี กาโฆห ดี อัน. 25จูห ดี มืง ดาน, กอ ฌัม มืง บีราเซบา ตึอน, เฆ ดูอี อายูดา บอ ดูอี อีซาเรลัะ เฆ บอ กอย ดาคึย ดอ มูห โจว บาน อาซาโลวโมว ตึอน. เฆ ดอน อี กอย ซีคยา ครึม เฮ มางูน บอ เฮ ดีปู อัน. 26อาซาโลวโมว มึห โดง กอย มังปร็อง อี ลาก ลักเลา อาดา พวน หมึณ โปละ. อัน มึห บอ ดูอี อี ป็อะ มังปร็อง อู หมึณ ดี อา แหรณ วี.
27อาซาโลวโมว แฮะ เบลห ดา ตาง อึบ มืง แคง มืง แบน มืง แบน มืง ปี อึบ อัน, แตห เฆ กอย อู วี อู มืง. เฆ ดา ตาง ตี เฆ ดึห ปี ดี โฮม, ตึย ดี คูนดีคัม, แตห บอ อาซาโลวโมว บอ เฆ อี กอย รึม โดบ อัน ปึอน ดี โฮม. เฆ โบง ปาย ตี อู วี อู มาเฆียน. แกวะ แตห อึณ ลูด, แกวะ แตห อึณ รัม.
28เฆ ดอน อี บอ ดึห ซีโฆ็งรา บอ เหรียง กาฮ็อห อาดา มังปร็อง ลักเลา เฆ มังปร็อง ป็อะ. อาเซ มืร โลว ดึห ตัห, อัน บอ ตัห อูน โกรว ตี ดี โดง ปี โลว อูน อัน.
ลอง อางยาน ปี ดัว เฌาพรา ดี อาซาโลวโมว
29เฌาพรา บอ ดัว อางยาน กืน กาเซา ดี อาซาโลวโมว. อัน เฌา แตห อาซาโลวโมว นับ โตต ดอน โมยว. แคะ ปี นับ อัน อึณ กืน ปี กาฮาต อี กอย บาง อึม นัมมูกซารา. 30อางยาน อาซาโลวโมว ตึอน อึณ หลึอม โตต อางยาน ดูอี อี กอย นา เลห ซีแง. อึณ บอ หลึอม อางยาน ดูอี แคง มืง แอฆึบ. 31อัน มึห อางยาน หลึอม ดูอี บอกาเฆลียด. อางยาน อัน บอด หลึอม อาเอทาน อี มูห หลูกหลาน อาเอจารา. อึณ บอ บอด หลึอม อาเฮมาน, อากากอลัะ บอ อาดาราดา, เฆ อี มูห ฆอน อามาโฮว. เฆ ดอน อี แคง มืง แบน มืง แบน มืง อี กอย โรบ มืง ปี อึบ อัน, เฆ บอ นับ ลอง อัน ตี, เฆ บอ โรวเซ อัน. 32โฆรห มากาทัะ ปี กาลาง อัน, อึณ มึห โอย แหรณ แด. โหมว ปี ต็อห อัน, อึณ มึห อู แหรณ ดี พัน คาน. 33อัน บอ นับ ดี กาลาง ลอง เฮ แบน โมยว แบน โมยว. บอ เฮ อารีด อี กอย แดง นอน เลบานูน บอ เดา ฮูโซบ อี ลัต ดี แรง มาว อัน นับ ดี กาลาง โตต ลอง อัน ตี. อัน นับ ดี กาลาง บอ ลอง โดว ซัดดาวา. อี มูห มาซีม, โดว อี กอย แดง กาดาย บอ มาฆา อี กอย แคง อึม, อัน นับ ดี กาลาง ลอง ดอน โดว ฌึร ตี. 34คูนดีคัม ดอน มืง อี แฮะ ดึอม ยึร ซาดาง ลอง อางยาน อาซาโลวโมว, เฆ ดอน อี วี ตึย ดูอี เฆ, แตห เฆ ตัห ฌัม โดง กอย อาซาโลวโมว, แตห เฆ โทม โฆรห อัน.
Currently Selected:
1 คูนดีคัม 4: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
