1 ยฮ 4

1อึย เบ บีนอง ปี ร็อก โอว, แกวะ แตห เบ หณึม ดอน อี อี ต็อห, อัน แฮะ มึห น็อห พึอม เฌาพรา. แตห เบ ซาคีะ ดี ยอด, โยว อึณ มูห ตู มูห น็อห พึอม เฌาพรา. โคว, อึณ แฮะ มึห กืน เฆ อี ณึงราง ดี บยาน โฆรห เฌาพรา. เฆ แฮะ ฮาว ดอน นา ดอน โปละ แดง กาดาย นี. 2เซ เบ ซี นับ อี มูห ตู มูห น็อห พึอม เฌาพรา, เบ โลว ซาคีะ ดี ยอด ปี หณึม เฆ. ดอน อี อี ต็อห, เฌา เยซู แฮะ แบน ดูอี, น็อห พึอม อัน แฮะ มูห น็อห พึอม เฌาพรา. 3อาเซ ยี ตู ต็อห, อัน หณึม เฌา เยซู, น็อห พึอม อัน ตู มูห น็อห พึอม เฌาพรา. อึณ มูห น็อห พึอม ดูอี ตึอน, อี มูห รันซู เฌา เยซู, อี กาบัห ดี อัน เฌา เซเซ. เบ มืร แฮะ ดึอม ยึร อี ต็อห, วี ตี ดี ตัห. มาแล, ดอ ตี นี ดูอี อี มึห น็อห พึอม อัน, เฆ แฮะ ฮอต ตัห กอย แดง กาดาย นี.

4อึย เบ อี ปี ฆอน ปี ร็อก โอว, เบ แฮะ แบน ดูอี ปี อึบ เฌาพรา. เบ มืร แฮะ ออง เฆ ดูอี อี ณึงราง ดี บยาน โฆรห เฌาพรา ตี, โกบ แฮะ กอย น็อห พึอม เฌาพรา แคง น็อห เบ. น็อห พึอม เฌาพรา ตี, แฮะ มึห อาพูง ดังโคว ตาง หลึอม รันซู เฌา เยซู อี กอย แดง กาดาย นี. 5พึง เฆ ตี, เฆ มูห ดูอี แดง กาดาย นี. เฆ บอ กาลาง อาโมยว ปี กาพา เฆ ดูอี อี กอย แดง กาดาย นี. ดูอี อี กอย แดง กาดาย นี มืร ดี บอ โทม โฆรห เฆ. 6อี มูห เอ, เอ มูห ดูอี ปี อึบ เฌาพรา. อาเซ แฮะ นับ เฌาพรา, อัน ดี โทม โฆรห เอ. อาเซ ตู มูห ดูอี ปี อึบ เฌาพรา, อัน ตู โทม โฆรห เอ. ปาย ตี, เอ ดี บอ นับ ซีคยา, อาเซ มึห น็อห พึอม อี หมาน บอ อาเซ มึห น็อห พึอม อี ตู หมาน.

7อึย เบ บีนอง ปี ร็อก โอว, แตห เอ ลาย ร็อก. โคว, เฌาพรา แตห เอ มึห น็อห ร็อก. อาเซ มึห น็อห ร็อก, อัน มูห ฆอน เฌาพรา, อัน บอ นับ เฌาพรา. 8อาเซ ตู มึห น็อห ร็อก, อัน ตู นับ เฌาพรา. โคว, เฌาพรา มึห น็อห ร็อก. 9เฌาพรา แฮะ บยัะ น็อห ร็อก อัน ปาย นี. อัน เฌา ปี บอ มึห ฆอน มี อู วี มืร, อัน ยี ตึย ฆอน อัน ตี, แตห อัน โลง แดง กาดาย นี, แตห อัน ปึอน ดี ดัว อาซาก กามาย ดี เอ. 10น็อห ร็อก ปี ต็อห โอว ตี, อาว มูห เอ อี ร็อก เฌาพรา. อึณ มูห เฌาพรา อี แฮะ ร็อก เอ. อัน แฮะ ตึย ฆอน อัน ตัห โลง แดง กาดาย นี บอ คัม ดี ยัม กาดาง เอ, แตห อัน ฆ็อห แวน หมาบ เอ. 11อึย เบ บีนอง ปี ร็อก โอว, โกบ แฮะ ร็อก เฌาพรา ดี เอ ปาย ตี, เอ มืร แฮะ โลว ลาย ร็อก. 12อาว มึห อาเซ อี แฮะ ดึอม ยึร เฌาพรา. เซ เอ ยี ลาย ร็อก, เฌาพรา ดี กอย กาดึก กาด็อะ ดี เอ. น็อห ร็อก อัน เฌา มืร ดี โนะ แคง น็อห เอ.

13เฌาพรา แฮะ ดัว น็อห พึอม อัน ดี เอ. โคว, เอ นับ ซีคยา, เฌาพรา แฮะ กาดึก กาด็อะ ดี เอ, บอ เอ แฮะ กาดึก กาด็อะ ดี เฌาพรา. 14เย ยี แฮะ ฮอต ยึร, แฮะ วี กาลาง ดี ดอน อี ลอง เฌาพรา อี มูห ฆูณ เอ, อัน แฮะ ตึย ตัห ฆอน อัน, แตห อัน คยอด ดูอี แดง กาดาย บอกาเฆลียด. 15อาเซ ต็อห, เฌา เยซู มูห ฆอน เฌาพรา, ดูอี วี ตี แฮะ กาดึก กาด็อะ ดี เฌาพรา. เฌาพรา มืร แฮะ กาดึก กาด็อะ ดี อัน. 16โคว อัน ตี เอ แฮะ นับ, แฮะ ปึอน หณึม, เฌาพรา แฮะ ร็อก เอ.

เฌาพรา มึห น็อห ร็อก. ดูอี ดอน อี อี มึห น็อห ร็อก มืร, อัน แฮะ กาดึก กาด็อะ ดี เฌาพรา. เฌาพรา มืร แฮะ กาดึก กาด็อะ ดี อัน. 17เซ เอ กาดึก กาด็อะ ดี เฌาพรา ปาย ตี, น็อห ร็อก เฌาพรา กอ โนะ แคง น็อห เอ. เอ มืร ดี มึห น็อห ยัะ ปัน ดี ฌัม ซีแง ดี ซูงพยาด อัน เฌา อามู อี. โคว, ดอ กอย เอ แดง กาดาย นี, เอ มืร โบง ปี ดึอม โบง เฌา เยซู. 18เซ เอ ร็อก, เอ มืร ตู โยว. เซ เอ ร็อก ซีคยา, อึณ บอ แป ดี ซูต เตา น็อห โยว. ปี โยว เอ, เอ โยว ดี คัม หมาบ. โคว, อาเซ ซี มึห น็อห โยว, อัน หณัม ร็อก ซีคยา.

19เอ มึห น็อห ร็อก โกบ แฮะ ร็อก เฌาพรา เอ ดี อาต. 20เซ อึณ มึห ดูอี อี ต็อห, “โอว แฮะ ร็อก เฌาพรา.” อัน ยี ซี ฌ็อง บีนอง อัน, ดูอี วี ตี กาโลว. โคว, เซ อัน ตู ปึอน ร็อก บีนอง แปะ แฮะ ยึร อัน, อัน ตู ปึอน ร็อก เฌาพรา ปี ตู ปึอน ยึร อัน. 21โคว, เฌา เยซู แฮะ ดัว ดารา ดี เอ. อัน ต็อห, อาเซ ร็อก เฌาพรา, อัน ดี โลว ร็อก บอ บีนอง อัน.

Currently Selected:

1 ยฮ 4: pce

Highlight

Copy

Compare