1 คร 9

1โอว แฮะ ฮอต กอย ทังฮาง. โอว มืร แฮะ มูห ดูอี ปี ร็อห ปี ตึย เฌา เยซู. โอว แฮะ ฮอต ยึร เฌา เยซู. บอ เบ แฮะ หณึม เฌาพรา โกบ ตัห กาลาง โอว ดี เบ. 2อี เฮา ปี ซัะ ต็อห โอว มูห ดูอี ปี ร็อห ปี ตึย เฌา เยซู มืร, กาซืร เบ โอว ยี แฮะ มูห. โคว, เบ แฮะ แบน ปี ฌึม ปี ดอก เฌาพรา ดี ฆาน โอว อี มูห ฆาน ดูอี ปี ร็อห ปี ตึย เฌาพรา.

3อึณ มึห เฆ อี ซี ดัม หมาบ ดี โอว. ดอ ดีหมอด แฌด เฆ ดี โอว, โอว วี ต็อห, 4เย แฮะ ปึอน โฮม, แฮะ ปึอน เดียง ดอน โมยว. 5ดอ ฮาว เย โดบ อึณเตณ, เย แฮะ ปึอน ดึห บอ อีบึณ เย อี หณึม เฌา เยซู, ฮาว รึม โดบ เย. บอ ดูอี ปี ร็อห ปี ตึย เฌา เยซู, อี มูห เฆ วา เฌา เยซู บอ อาเคพาด#9:5 อาเคพาด ฆาย อาเปตารู มูห อู วี. แฮะ โบง ปาย ตี. 6อึณ บอ ปี เบ ทาง มี ยาย อาบานาบัะ โลว รัณ เฮียง โดว บรีม ยาย, ตู ปึอน หมาณ ดี อี.

7อาว มึห ดา ซึก อี วี รัณ เฮียง โดว บรีม อัน. อึณ มืร ตู มึห ดา กาณา มาน มางูน อี ตู วี โฮม เบล มางูน แคง มาน อัน. ดูอี อี เฮียง มาแป อี ตู วี เดียง อึม ปู มาแป อัน มืร, อึณ ตู มึห.

8ลอง อัน ตี, อาว มูห มี ดูอี อี โบง ปาย ตี. บอ แคง บับ ดารา เฌาพรา แฮะ แดม อูน. 9ดารา เฌาพรา แปะ แฮะ แดม อูน อาโมวแซ, อึณ ต็อห, “แกวะ ดึห ซีโบลห ชึบ ดี โมต มามัก ดอ แณต อัน ดี โหงว.” เฌาพรา ตู กาลาง โฆรห ตี ลอง มามัก. 10อาตี เฌาพรา กาลาง ลอง เอ, แตห อึณ แบน อาฆยึร ดี เอ. ดูอี แท โดง นา บอ ดูอี โซะ โหงว, เฆ รัณ ฆาน โกบ ซี ปึอน เฆ โหงว. 11อี มูห เย, เย กาลาง โฆรห เฌาพรา แตห อึณ ลึบ แคง น็อห เบ, แตห อึณ ปี อี บรัด ซีมา โหงว. เบ ยี ทาง, เย ตู กาอาบ ดึห ปี ดี โฮม ปี ดี ตา ดี เบ.

12เซ เบ ยี นับ ดี ดัว ดี อี เฮา, ดี เย เบ แฮะ แว โลว ดัว กืน. มาแล, เย ตู ดึอม ดึห มาเซ ดี เบ. แดง ตี, เย ยี คัม ดี โอด ดี ยืน ดอน โมยว, โกบ ตู ซี โบง เย มาเซ อี แตห อี เฮา ตู หณึม โฆรห ปี กาลาง เย ลอง เฌา เยซู อี แตห น็อห ดูอี ดาคึย. 13เบ โลว โหลห, อาเซ โบง ฆาน แคง โฮว เฌาพรา, อัน โลว โฮม ปี หลู อี แคง โฮว ตี. ดา อี โบง ฆาน ดี กาโช็ง หลู, อัน โลว โฮม ปี หลู ดูอี แดง กาโช็ง ตี. 14ปาย ตี, เฌาพรา แฮะ ฮอต กาลาง อูน. เฆ อี กาลาง ลอง เฌา เยซู แฮะ ปึอน ดึห ดี เฆ ดูอี อี โทม.

15มาแล, โอว ปี บอ แฮะ ปึอน ดึห, โอว ยี ตู ดึอม ดึห, ตู ดึอม หมาณ มาเซ ดี เบ. ปี แดม โอว ดอ ตี นี มืร, อาว มูห โกบ ซี หมาณ โอว ดี เบ. เซ โอว ยี ดึห ปี ดัว เบ, อึณ ตู แตห โอว ปีพูง โอว ลอง อัน ตี. เซ โอว ดึห ดี เบ, ตัะ โอว ยัม ดี อาต. 16เซ โอว ยี กาลาง ลอง เฌา เยซู คยอด ดูอี แตห อึณ แบน น็อห ดาคึย ดี เฆ, โอว ตู ปึอน ปีพูง โอว. โคว, เฌาพรา แฮะ จัร โอว กาลาง. อึณ แฮะ มูห ฆาน ปี โลว โบง โอว. เซ โอว ยี ตู กาลาง ลอง อัน ตี, อึณ ดี แบน โวด ดี โอว. 17เซ โอว กาลาง โกบ ซี กาลาง โอว, โอว มืร ดี ปึอน ดี ดึห รูห อัน. มาแล, โอว กาลาง โกบ จัร เฌาพรา โอว กาลาง. 18โกบ อึณ ปาย ตี, โอว ตู ปึอน ดึห มาเซ, แตห อึณ แบน รูห ปี กาลาง โอว, เฌาพรา แฮะ ควาง โอว วีน ดี กาลาง ลอง อัน. อัน ตู แตห เฆ อี ปึอน ดี โทม โลว โตต มาเซ. โคว, โอว มืร ตู หมาณ คอ อู โมยว เซ โอว กาลาง ลอง เฌาพรา คยอด เบ, แตห น็อห เบ ดาคึย.

19โอว แฮะ มูห ดูอี อี กอย ทังฮาง, กอย ดาคึย, ตู มูห หมาย อาเซ. โอว ยี คัม ดี แบน หมาย ดูอี ดอน อี โกบ ซี แตห โอว ดูอี กืน หณึม เฌา เยซู. 20ดอ กอย รึม โอว โดบ ดูอี อายูดา, โอว โบง ปี ดูอี อายูดา, แตห เฆ มึห น็อห ซี หณึม. โอว ปี ซัะ โบง โดบ ดารา อาโมวแซ มืร, ดอ กอย โอว โดบ ดูอี อี โดบ ดารา ตี, โอว มืร โบง โดบ ปี เฆ, แตห เฆ มึห น็อห ซี หณึม. 21ปาย ตี, ดอ กอย รึม โอว โดบ เฆ ดูอี อี ตู โดบ ดารา อาโมวแซ, โอว มืร โบง ปี เฆ, แตห เฆ อี ตู โดบ ดารา ตี บอ มึห น็อห ซี หณึม. (อาว มูห โอว โบง กาบัห ดี ดารา เฌาพรา. โอว โดบ ดารา เฌา เยซู.)

22ดอ กอย รึม โอว โดบ เฆ อี ดีหลัห, ตู มึห โปลม, บอ โอว แฮะ แบน ปี เฆ, แตห เฆ บอ มึห น็อห ซี หณึม. ปาย ตี, โอว คัม ดี โบง ดอน โมยว อาดา ดูอี ดอน อี, แตห โอว โบง แคะ ปี ปึอน โอว ดี โบง แตห อึณ คยอด ดูอี มัง อี. 23ปี โบง โอว ฌึร ตี ดอน โมยว, โอว โบง โกบ หณึม โอว เฌาพรา อี แตห ดูอี แบน น็อห ดาคึย, แตห บอ โอว ปึอน อาฆยึร อัน ตี.

24เบ โลว โหลห, เซ ดูอี ลาย กาแคณ กาแบลบ, อึณ มึห ดูอี กืน อี ลาย กาแคณ. อึณ ยี มึห อู วี อี ดี ออง, อี ปึอน ลักซอง. โกบ อึณ ปาย ตี, แตห เอ ปี ดูอี อี กาแบลบ แฮ แฮ, แตห เอ ปึอน ลักซอง ปี ดัว เฌาพรา.

25เฆ อี ดี ลาย กาแคณ, เฆ บอ นับ ดี คาหนาบ โดว บรีม เฆ. เฆ บอ พึก โปลม พึก แฮณ เฆ ดอน โมยว, แตห เฆ ปึอน ลักซอง อี มูห มังฆึม. ดูอี ยี โบง มังฆึม ตี, ตา หลา เฮ อี ชีด อู กาจัน. แฮะ ฮอต, อึณ วี เฮียะ กาฮ็อห ลึร โตต. อี มูห เย, เย บอ โฆยวฆยา ดี โบง, แตห เย ปึอน มังฆึม อี กอย เซเซ, อี ตู นับ ดี ลึร, ตู นับ ดี ชึม. 26โกบ อึณ ปาย ตี, โอว ตู ปี ดูอี อี กาแบลบ ดีโลย ดีลาย, ตู มึห ปี คราม. โอว ตู กาลึม วัด แคง ดีโว็ง ดีวับ.

27โอว บอ โอด บอ ยืน คาหนาบ โดว บรีม โอว แตห โอว อึบ โตต, โยว โอว วี ชึม วาย แฮะ ฮอต มาโนว โอว ดี อี เฮา.

Currently Selected:

1 คร 9: pce

Highlight

Copy

Compare