1 คร 6
6
1เซ เบ มึห อามู กาแต เบ, แตห เบ แตห อึณ ฮอต แคง พึง เบ ดูอี อี หณึม เฌาพรา. เซ เบ ยี วี ยัะ ฮาว แตห ดา ตาง อี ตู หณึม เฌาพรา ซูงพยาด อามู เบ, อาตี อึณ ตู หมึอม. 2แตห เบ โหลห, เฆ ดูอี อี บอด, อี หณึม เฌาพรา, เฆ ดี โลว ซูงพยาด อามู ดูอี แดง กาดาย นี. เซ เบ โลว ซูงพยาด อามู ดูอี แดง กาดาย อี อาเร ตาง, เบ ดี บอ นับ ดี ซูงพยาด อามู เบ อี อาเร ตู ตาง. 3แตห เบ บอ โหลห, เบ ดี โลว ซูงพยาด บอ อามู เฆ อามู อามาด เฌาพรา. โกบ อึณ ปาย ตี, อามู ดูอี บาน ดอ ตี นี, เอ แฮะ แว โลว ซูงพยาด. 4เซ เบ ยี มึห อามู, เหมา อึณ ปาย ปี ตู วี ฮาว เบ โดง กอย ดูอี อี ตู มูห ดา ตาง แคง พึง เฌา เยซู, แตห เฆ ซูงพยาด อามู เบ? 5โอว กาลาง ปาย ตี, แตห เบ ซาย อี. เซ เบ ต็อห, กาแต เบ บีนอง, อู วี มืร อาว มึห อี มึห อางยาน, อี นับ ดี ซูงพยาด อามู เบ, อาว หมึอม หณึม. 6เบ บีนอง ยี โบง อามู กาแต เบ, ปี วี แตห เฆ อี ตู หณึม เฌาพรา ยึร.
7โกบ ฮาว เบ ดี ดูอี อี ตู หณึม, แตห เฆ ซูงพยาด อามู เบ ตี, เบ แฮะ ฮอต กาลึบ. เหมา อึณ ปาย ปี ตู คัม เบ นา จีจีว ปี โบง อี เฮา ดี เบ? เหมา อึณ ปาย ปี ตู คัม เบ ปี ปีหล็อก อี เฮา ดี เบ? 8เบ ยี ตู คัม ดี โบง ปาย ตี. แดง ตี, เบ บีนอง นังฆัน ปี วี ลาย กาลูต กาแทณ, ลาย ปีหล็อก กาแต เบ.
9แตห เบ โหลห, เฆ ดูอี ฮาย, เฆ ตู ปึอน ดี ลึบ แคง มืง ปี อึบ เฌาพรา. แกวะ แตห เบ วี กาโลว โดว บรีม เบ. เฆ ดูอี ลูต เรา, เฆ อี กรึบ อารึบ, อี ลูต อีบึณ อี, เฆ อีมาย อี ลาย ลูต ลาย ลาย แคง โฌง, เฆ อีมาย นังฆัน บอ อีบึณ นังฆัน, 10บอ เฆ อี ปรา อี เฮา, อี มึห น็อห ลอพัะ, อี เดียง ป็อห, อี กาย็อง อี เฮา, บอ เฆ อี วีน ดี โฌน อี, เฆ ดูอี ฌึร ตี ตู ปึอน ดี ลึบ แคง มืง ปี อึบ เฌาพรา. 11กาแต เบ แฮะ มึห มัง อี อี แฮะ ดึอม โบง ปาย ตี. มาแล, เฌาพรา แฮะ ฮอต ฆ็อห แวน หมาบ เบ, แตห เบ แบน ดูอี อี ซีงา บอด, แตห เบ มึห น็อห หมาน. เฌาพรา แฮะ โบง ปาย ตี, โกบ หณึม เบ เฌา เยซู บอ โกบ แฮะ กอย น็อห พึอม เฌาพรา แคง น็อห เบ.
12มัง อี บอ ต็อห, “โอว แฮะ ปึอน โบง โตต ดอน โมยว.” อึณ ปี บอ แฮะ หมาน มืร, อาว มูห ดอน โมยว ดี แบน อาฆยึร ดี เอ. โอว มืร แฮะ ต็อห, “โอว ปึอน โบง โตต ดอน โมยว.” มาแล, ปี โบง โอว ดอน โมยว ตี, โอว ตู แตห อึณ อึบ โอว คอ อู โมยว. 13ดูอี มัง อี บอ นับ ดี ต็อห, “ปี ดี โฮม โลว บลึบ แคง วัต. วัต โลว บลึบ ปี ดี โฮม.” อึณ ปี บอ แฮะ หมาน มืร, เฌาพรา ดี ปยาต แวน บอ อา โมยว. โดว โบ็ง เอ อาว กาอาบ ลูต เรา. อึณ กาอาบ โดว โบ็ง เอ โบง ปี อึง เฌาพรา. เฌาพรา มืร ดี ยอด ลึมลา โดว โบ็ง เอ. 14ปวน เฌาพรา อี แฮะ แตห เฌา เยซู วี ยีต วี อีม, อัน ดี แตห บอ เอ วี ยีต วี อีม.
15เบ โลว โหลห, พึง เฌา เยซู ปี โดว โบ็ง เฌา เยซู. โคว, โดว โบ็ง เบ, อึณ ปี แฮะ กอย แคง โดว โบ็ง เฌา เยซู. เซ อึณ ปาย ตี, อาว กาอาบ โอว ดึห โดว โบ็ง โอว อี บาะ แคง โดว โบ็ง เฌา เยซู, วี โดบ ยา มาลัม. อาว ปึอน โบง ปาย ตี ดอ เหมา. 16แตห เบ โหลห, อาเซ โดบ ยา มาลัม, อึณ ปี โดว ฆาย อา วี แฮะ แบน โดว อู โบ็ง. โคว, แคง บับ เฌาพรา แฮะ แดม อูน, “อา วี ดี แบน โดว อู โบ็ง.” 17มาแล, อาเซ แตห เฌา เยซู ลึบ แคง น็อห อัน, น็อห พึอม อัน บอ น็อห พึอม เฌา เยซู แฮะ แบน อู โมยว.
18แตห เบ วัห เตา โมยว ลาย ลูต ลาย ลาย. หมาบ ปี โบง ดูอี โมยว เฮา, อาว ดึร โดว อัน. มาแล, เซ ดูอี ลาย ลูต ลาย ลาย, อึณ ดี แตห โดว เฆ ลึร. 19เบ โลว โหลห, โดว โบ็ง เบ แฮะ ปี โฮว เฌาพรา. น็อห พึอม เฌาพรา ปี ดัว อัน ดี เบ แฮะ กอย แคง โดว โบ็ง เบ. โคว, อาว ฮู มูห เบ อี อึบ โดว บรีม เบ. 20อึณ ปี เฌาพรา แฮะ จึห โดว โบ็ง เบ, แฮะ ดัว ง็อห ตาง กาเซา. โคว, แตห ปี โบง เบ บอ อืบ มยูก เฌาพรา.
Currently Selected:
1 คร 6: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
