1 คร 3

1อึย เบ บีนอง, โอว ตู ปึอน กาลาง ดี เบ, แตห อึณ ปี โอว กาลาง ดี เฆ อี แฮะ มึห น็อห พึอม เฌาพรา. โอว โลว กาลาง ดี เบ แตห อึณ ปี เบ ซี โดบ อางยาน ดูอี, เบ ปี ฆอน งัะ อี ซี หณึม กามาย เฌา เยซู. 2โกบ หณัม กาฆึง กาดาน เบ, โอว หณัม ปึอน แตห เบ โฮม ปี ดี โฮม อี โปลม. อึณ ปี โอว ซี แตห เบ เดียง มี อึม ปู. ฌัม ดอ ตี นี, เบ หณัม กาฆึง กาดาน. 3โคว, เบ โดบ น็อห โดว บรีม เบ. เซ เบ ยี ลาย กาเอห ลาย กาแทณ, ลาย ซีแฆะ, เบ ปี ดูอี อี ตู นับ เฌาพรา. 4โคว, เบ มัง อี ต็อห, “โอว มูห ดีแบ ดา ซารา อาปอลู.” มัง อี บอ ต็อห, “โอว มูห ดีแบ ดา ซารา อาพอโลน.” โกบ ปี โบง เบ ตี, เบ ปี ดูอี ตู นับ เฌาพรา.

5เซ อึณ ปาย ตี, ดา ซารา อาพอโลน มูห อาเซ? ดา ซารา อาปอลู มูห อาเซ? ยาย บอ อา วี, ยาย มูห มี แดเจณ เฌาพรา. ยาย มาโนว แตห เบ หณึม เฌา เยซู. ยาย บอ อา วี โบง ฆาน ปี อาบ เฌาพรา ยาย โบง.

6โอว ปี ดูอี อี ซัม ซีมา โหงว. ดา ซารา อาพอโลน บอ ปี ดูอี อี รึก อึม. เฌาพรา ยี โบง แตห อึณ เหรห, แตห อึณ ตาง. 7โคว, ดูอี อี ซัม ฆาย ดูอี อี รึก อึม, ฆาย ตู บอ คึกคัม แคะ เหมา. มี เฌาพรา อี โบง แตห อึณ เหรห แตห อึณ ตาง ตี, อัน แฮะ คึกคัม. 8ปี คราม ดูอี อี ซัม ฆาย ดูอี อี รึก อึม แฮะ มูห อู โมยว. เฌาพรา ยี ดี ดัว รูห ดี ดอน อี แตห อึณ กาดาน ฆาน แปะ แฮะ โบง วี เหมา วี อัน. 9ยาย บอ อา วี, ยาย มูห ดูอี อี โบง รึม ฆาน เฌาพรา. เบ บอ ปี กาปึม มาน เฌาพรา. เบ ปี บอ โฮว ปี ซัม เฌาพรา.

10เฌาพรา แฮะ เฆฌู โอว, แตห โอว ปี ดูอี อี แหลว ดี ซัม กาง, แตห โอว ปึอน ดี ซัม อูน เจณ ร็อง แคง โฮว เฌาพรา ตี. ดูอี ปอ อู วี บอ วี โฆว โฮะ นา แดง เจณ ร็อง ตี. ดอน อี ยี โลว ซาดีก ฆาน ปี โบง อัน, ราง อาเซ ราง อัน. 11เจณ ร็อง ตี แฮะ ฮอต ซัม. อาว ปึอน ดึห เจณ ร็อง ปอ อู โมยว วี ซัม. อึณ มูห เฌา เยซู อี ปี เจณ ร็อง ตี. 12มัง อี ดี ดึห ครีว, มัง อี ดี ดึห รึอน, มัง อี ดี ดึห แซณ. มัง อี ดี ดึห เฮ, ดึห แปร เฆ เหรียง วี โฆว โฮะ นา แดง เจณ ร็อง ตี. 13ฆาน ปี โบง ดอน อี, อึณ ดี ลึห ซีคยา ดอ ฌัม ซีแง ดี วี ตัห โลง เฌา เยซู. ซีแง ตี, เฌาพรา ดี ตา เงา โดะ ดี ยอด, ฆาน ปี โบง วี เหมา, อึณ มูห โมยว เหมา. 14เซ ปี โฆว ดูอี เฆ ตี ตู กาซึม, ดูอี วี ตี มืร ดี ปึอน รูห อัน. 15เซ ปี โฆว ดูอี ยี กาซึม, ดูอี วี ตี, อัน มืร ดี ชึม. อัน ยี ตู ชึม อาซาก อัน. อึณ ดี ปี อัน ลอด แคง เงา ตี.

16เบ โลว โหลห เซเซ, เบ แฮะ ปี โฮว เฌาพรา. น็อห พึอม เฌาพรา แฮะ กอย แคง น็อห เบ. 17อาเซ โบง แตห โฮว เฌาพรา ลึร, เฌาพรา มืร ดี โบง แตห ดูอี ตี ลึร. โคว, โฮว เฌาพรา อึณ มูห โดง ซีงา บอด. โดว เบ ยี ปี โฮว โดง กอย เฌาพรา.

18กาแต เบ, แกวะ แตห อึณ มึห อี วี กาโลว โดว บรีม อัน. เซ มัง อี ทาง เฆ แฮะ มึห อางยาน อี มูห อางยาน ดูอี, แตห เฆ มาด โดว เฆ ปี ดูอี รึร, แตห เฆ วี ปึอน อางยาน อี มูห อี หมาน. 19โคว, เซ ดูอี แดง กาดาย นี ทาง อางยาน เฆ แฮะ กยัะ กาเซา, ดี อาต เฌาพรา อึณ ยี ตู มึห ดีโคว. อึณ แฮะ แดม อูน แคง บับ เฌาพรา ต็อห, “เฌาพรา ดี เหมต เฆ ดูอี อี มึห อางยาน, อี ทาง เฆ แฮะ หล็อก.” 20แดง ตี อึณ บอ แดม ปอ อึณ ปัว ต็อห, “เฌาพรา นับ โตต ปี คราม เฆ ดูอี อี มึห อางยาน. อัน ยี ต็อห, อึณ ตู มึห ดีโคว มาเซ.”

21โกบ อึณ ปาย ตี, แกวะ แตห อาเซ อืบ ปี โบง ปี รัณ ดูอี. เซ ฮี กาพา ซีคยา, แคะ มึห แดง กาดาย นี, บอ มูห ดูอี, บอ มูห โกรวกราม, ดอน โมยว แฮะ แบน โตต โกรว เบ. 22บอ ปี มาโนว ดา ซารา อาปอลู, ดา ซารา อาพอโลน บอ ดา ซารา อาเคพาด,#3:22 อาเคพาด ฆาย อาเปตารู มูห อู วี อึณ แบน อาฆยึร ดี เบ. แดง ตี, บอ กาดาย นี, บอ อาซาก, บอ เฌา มารานัะ, บอ บาน ดอ ตี นี, บอ อี ดี แบน นา อาต ฮาว, ฌึร ตี ดอน โมยว แฮะ แบน โตต โกรว เบ. 23เบ ยี กอย รึม โดบ เฌา เยซู เซเซ. เฌา เยซู ยี กอย รึม โดบ เฌาพรา เซเซ.

Currently Selected:

1 คร 3: pce

Highlight

Copy

Compare