YOBA 1
1
Satan Gaw Yoba Hpe Chyam Ai
1Yoba mying ai wa gaw Uza mung e nga nga nna Karai Kasang hpe nawku ai hte shi hta sadi dung ai wa rai nga ai. Shi gaw mai kaja ai masha langai mi rai nna, sadi sahka hte n hkru n hkra ai amu hpa mung n galaw ai wa rai nga ai. 2Shi gaw shadang sha sanit hte shayi sha masum lu nga ai, 3sagu hkying sanit, gawla-uk hkying masum, dumsu hkying mi hte lawze manga tsa madu da nga ai. Shi gaw shangun ma law law lu ai rai nna Sinpraw mung hta sut su htum ai wa rai nga ai.
4Yoba a shadang sha ni gaw langai hte langai san da ai nhtoi hta lusha poi galaw law rai nna kaga masha ni yawng mung sa du nga ma ai; shanhte gaw shanhte a kajan masum hte hpe mung sa shang lawm na matu tut nawng saw shaga ga di ma ai. 5Lusha poi ngut ai hpang e, Yoba gaw jau jau rawt nna shi a ma ni hpe jasan jaseng na nga, shanhte langai hte langai a matu shagu hkungga ni nawng ya wu ai. Shi gaw shanhte hta na marai langai ngai Karai Kasang hpe n dum shami n kaw n law di kau let shut hpyit kau mai nga ai nga nna myit nawn la nga wu ai majaw dai lam hpe shi galoi mung galaw nga ai.
6Sumsing sha ni dai Madu a man de dan pru na nhtoi du jang, Satan mung shanhte hta hkan ganan nang nga ai. #Nin 6:2. 7Dai Madu gaw shi hpe, “Nang hpa baw galaw hkawm n ta?,” ngu nna san wu ai.
Satan gaw, “Ngai gaw nang de, wo de htinglet hkawm nna ginding aga grup grup wam hkawm nngai,” ngu nna htan wu ai.
8Dai Madu gaw, “Nye a shangun ma Yoba hpe nang matsing da wu ni? Shi gaw kam sham nna mai kaja ai wa rai nhtawm shi zawn re ai mi ginding aga ntsa e kadai n nga nga ai. Shi gaw ngai hpe nawku nna sadi sahka hte n hkru n hkra ai amu hpa mung n galaw nga ai,” ngu nna san wu ai.
9Satan gaw, “Shi hpa n lu la ai rai yang, Yoba gaw nang hpe nawku na wu ni? #Shr 12:10. 10Nang gaw shi hpe mung, shi a dinghku hpe mung, shi madu da ai arung arai shagu hte hpe tut nawng makawp maga ya nga ndai. Shi galaw ai amu shagu hpe nang shaman ya nna, mungdan ting hpring wa lu hkra yam nga law law nang shi hpe jaw ya nit dai. 11Rai ti mung ya chyawm gaw shi lu malu hpe nang lama la kau ya ai rai yang, shi gaw na a myi man chyaw e nang hpe dagam kau na ra ai!,” ngu nna htan wu ai.
12Dai Madu gaw Satan hpe, “Rai sa, shi lu malu gaw na a lata hta rai nga lit dai, rai ti mung Yoba hpe nan chyawm gaw hkra lu na ndai n rai,” ngu nna tsun wu ai. Dai rai nna Satan pru mat wa wu ai.
Yoba A Kasha Ni Hte Sut Gan Jahten Shaza Hkrum Ai
13Lani mi na aten hta, Yoba a kasha ni gaw shanhte a kahpu ba nta hta lusha poi lu sha nga ma yang, 14kasa langai mi Yoba hpang de kagat sa wa nhtawm, “Anhte gaw dumsu utang ni hte yi sun hkauna ni shawt ga ai; lawze ni mung dai makau hkan udat shara hta makret sha nga ma ai. 15Sheba masha ni akajawng sha htim shang nhtawm dai ni yawng hpe la mat wa masai. Dai ni gaw ngai hta lai nna na a shangun ma ni hpe shanhte sat kau ma ai. Nang hpe shiga wa tsun dan lu na matu lawt wa hkrum ai gaw ngai chyu sha rai nga ai,” ngu nna tsun dan wu ai.
16Dai wa ga shaga pyi garai n htum yang, kaga shangun ma langai mi hkan du wa nhtawm, “Myihprap wan gala nna sagu hte sagu rem ai ni yawng hpe sat kau ma ai. Nang hpe shiga wa tsun dan na matu hprawng lawt wa ai gaw ngai chyu sha rai nga nngai,” ngu nna tsun wu ai.
17Dai wa ga shaga garai n htum yang, kaga shangun ma langai bai hkan du nang nna, “Hkalde hpung masum htim lung wa nna anhte hpe sa gasat ma ai; shing rai gawla-uk ni hpe la mat wa nhtawm ngai hta lai kaga shangun ma ni yawng hpe mung sat kau ma ai. Nang hpe shiga wa tsun dan na matu sha hprawng lawt wa lu ai gaw ngai chyu sha rai nga nngai, ngu nna tsun wu ai.
18Dai wa ga tsun garai n htum yang, kaga shangun ma langai mi du wa nna, “Na a ma ni gaw na a shadang sha alat a nta e lusha poi lu sha nga ma yang, 19nam mali de na nbung laru ahpawt magawn mat wa ai rai nna nta hpe daw gamyet ai hte shanhte yawng hpe sat kau nga ai. Nang hpe shiga wa shana na matu ngai chyu sha hprawng lawt wa lu ai rai nga nngai,” ngu nna tsun wu ai.
20Dai hpang Yoba gaw rawt tsap nna shi a hpun palawng ni hpe yawn hkyen ai hte gang je kau wu ai. Shi a baw shangun kau let ga de myi man yawng nhtawm gum dagup nga ai. 21Shi gaw, “Ngai gaw kaman hte shangai wa ai rai nna, kaman hte si wa na nngai. Dai Madu jaw nu ai, ya chyawm gaw shi bai la kau nu ai. Shi a mying ningsang shakawn kungdawn ai hkrum nga u ga law!,” ngu nna tsun wu ai.
22Lam shagu byin hkrum hkra ti mung, Yoba gaw Karai Kasang hpe mara shagun ai hku nna yubak n galaw nga ai.
Currently Selected:
YOBA 1: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.