Filipiye 4
4
1Andumu ba jii mi kuna, mi ŋa jala be kavura mono kuna. Be kase ka mi, ŋa ma be mi ejogo. Ma bwa, abuga a mi ajya, leka pa nca omwo o be bila Mfumu.
Lemono kase nca Mfumu
2Mi ampa kawasi ŋa Evodi bila Sintice ma kabaga ecimiŋi emon nca Mfumu. 3Ŋa we se, buga le mi le ojanji le jaajaa, mi epiza we ma kayamba akaazi ba, okorogo bo ajwani mvuru bila mi ma Ncya Yeemve ye yeni, mva bwa bila Kelemant ŋa abuga a mi aso ba osala. Ankuumu a bo kabaraga kanca buku le omwo.
4Lemono kase ma antini aso kanca Mfumu, mi evura lyele be, leka nca kase.
5Leka ma ove bila baari aso. Mfumu yiga tuga kaya. 6Lendaga kabaraga, ŋaa ma antini aso le piza ŋa Njyami nca ebwoni beeli be ŋa kama, ŋa lesa lo ŋa ma kampa nde leve. 7Ŋa kadusu ka Njyami, keevuli oyeri aso, aje kakyele etuma e be ŋa ecimiŋi e be bevuniŋi ma Kirisite Jezu.
8Andumu, lemono mbari mi ebira: lekyele etuma e be nca amaami maave, eli lebuna kabwono, elogo bya njwori e jaajaa, njwori ba kanyima, tele, cece, ove, ŋa ba njwori eli ayaga ma angaga ambwele. 9Lesa mva a be ma leyigi ma mi, ŋa ma bagi be ma mi bila ma eyugi be ma mi, ŋa ma moni be mi esa. Ŋa Njyami wo ampa kadusu aje kaka bila be.
Poole ampa aFilipye leve ma ambwoŋi
10Mi bagi kase kuna kanca Mfumu. Okorogo, be lemi vura mvyere e jii e be ma mi. Ejii bya be ŋa jo, ŋaa be leki baga osina ma kavyere jo ŋi. 11Ŋa mi eka lyele bwa kabila mi li nca kama. Okorogo, mi yigi ma kamono njele ma mi bubu. 12Mi yayi kaka nca ofuga, mi yayi kaka nca kabaga. Antini aso ŋa ebiri njwori, mi ma ayiga ma kamono njele se mi ŋa kiila ka kaja sikali njala, ŋa ma kaka bila kuna ŋa bila nceti. 13Mi ebuna bya njwori kasa ma Kirisite wo ampa mi mpari. 14Ŋaa be yemiŋi lesi ma kayaga bugu le ampasi a mi.
15Be le yayi yemiŋi ma be ankulu, Filipye: ntini ye cyegi mi Masedoyine, ma ovu eli Ncya Yeemve abaani ma kampa, Okuga okima ki yaga bugu ma ka kaba bila mi ma kampa ŋa ma kabaga elogo. Be maatu ba lesi. 16Ntini ye kiigi mi ka Tesalonike, antini aso be le tumi mi elogo beeli mi kiigi ŋa kama. 17Mi eka saga kabaga olasi be ŋi. Ka jii mi ni Njyami kampa be opuga ma elasi e be. 18Mi bagi njwori e be ba letiini mi, ŋa ekugi. Yiga Epaferodite ma ya bila mi elasi e be, mi li ŋa njwori. Elasi bya mva ambwoŋi aculu yeemve, mbwoŋi eli Njyami ayalaga bila e nde ye kajya. 19Ŋa Njyami a mi aje kampa be njwori bekaami be ma Jezu Kirisite, ma osumbu wo kabaga ka nde keeve. 20Ŋa Njyami o Taara bizi lekuma leka ŋa we obu-obu! Ee bwa.
Ebigi embira
21Lebiga baari aso a cece ma Kirisite Jezu. Andumu baali bila mi ba biga be. 22Baari aso a cece ba abiga be, vulivuli ba baasala ma Sezar.
23Ndi puga le Mfumu Jezu Kirisite leka bila be aso.
Currently Selected:
Filipiye 4: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
