Esima 2
2
Eyi ba Oduduma Cece
1Ŋaa cugu le cinda le aJife le ba acwolo ma Patekote leto, ayaligi kiigi aso amavunuŋa ka biri yoankulu yia. 2Parabu ŋaa, mono lesugu le wi yulu mva ka aruma pyebi leenini, ŋaa njo eso ye ba aka bo eluuli ma kakuru kia. 3Ŋaa mono ampele mva ampele a mbaa ka ma acalaga kayila ecu e mbuuru ŋa mbuuru. 4Bo kiigi a maaluula ma Oduduma Cece, ŋaa bo yiga ba alyele nca ajui akima, mva lemigi lempi Oduduma ndi bo alyele.
5Ŋi ka baasa bwa ka Jeruzaleme kiigi ŋa aJife baali ŋa otori ma Njyami ba awi esi eso ba okiri. 6Ntini ye yi nguza yia, erumabwa, lembuuru lekugi ma eju. Bo aso kiigi nca akimi baanini kabila mbuuru ŋa mbuuru oyugi maami ma akiigi lyele ayaligi ba nca jui le nde-ankulu. 7Bo aso kiigi nca ekoli bila nca kase ŋaa ma dugi bo: «Baari ba ba alyele ba ka asi Ngalile ŋi? 8Ŋaa yo bunu esa eli bizi a be yiga leyuga maami ma alyele mbuuru ŋa mbuuru nca jui le nde? 9Nca bizi a be ŋa baari ba ba awa kasi ka Parete, ka Medi bila Elame. Ŋa baari a Mezopotami, a Zude bila a Kapodose, ba Ponte bila ba bungu le Azi. 10Ake ba Feriji bila ba Pamfili, ba Ezipite bila ba bungu le Sirene, ba Libi, ŋaa ake ba awi Rome, 11ba Kerete bila Arabi, ake akula bo aJife, akima bo yiga amikiriga aJife. Ŋi bizi a be mbuuru ŋa mbuuru ayuga ka alyele bo eve emaami e Njyami nca jui le nde.» 12Bo aso kiigi nca ekoli beenini. Bo asagi kalogo ka kalyele, bo yiga ba apiza ma abuga ndi: «Bwa ma kalyele ndi ema?» 13Ŋaa baamo yiga ba alelege ayaligi ndi: «Bo ama kolo mali.»
Pyere alyele bila lembuuru
14Ŋaa Pyere sarigi bila antuma baamo a ŋa omo, ma nkeri nkeri, nde ŋa lembuuru ndi: «Be ba aJife bila baari ba baaka ka Jeruzaleme leyuzuga mi ove ove ŋaa ave be leyayi maami ma ma yira.» 15Baari ba akini kolo mali ŋi, mva lemigi le cimiŋa be ŋi, ŋi tari le kini tari lewuaa le encyere. 16Ŋaa yo ŋa yiga jaa le elyeli Njyami ma ntuma nde Zowele ndi:
17«Mono jaa ye yeya ma ecugu embiza, mva kadugi Njyami:
Mi eje kacala Oduduma mi kayila baari ba omuon,
Baana ba abalaga bila ba akaazi baaje kalyele ma mi.
Mi emvyere kalogo ma enkere e be,
ŋaa mpila ekubu mi etuma aluoro.
18Ee, ma ecugu bya, mi ecala Oduduma mi yila ajanji a mi ba abalaga bila ba akaazi, ŋaa bo ba alyele amaami ma a mi.
19Mi ecuzuga maami ma osizi kanca yulu
bila eliimi ba ampiri kabere yila ncye:
Yiga ye eka ŋa togi, ŋa mbaa bila ŋa eduba ba yugi.
20Muyi aje kayuuya
ŋa ngondo abye mva togi,
eli cugu le Mfumu lekini se kato ŋi, ma cugu leenini lya bila la lekuma.
21Ŋaa mpini mbuuru wo acwolo Mfumu avuuga.»
22«Be baari ba Ezerayele, leyuzuga jaa ye esaga lyele mi be. Jezu wo Nazarete, balaga lia le Njyami le kamwozi okani o Njyami ka kasa ma nde, bege le akaga ma ampiri bila ma eliimi ka miizi a be, mva lemigi leyayi bemankulu. 23Ampi balaga lia ma jiala e be. Njyami kiigi yayi keebani a nde ka nkani. Be le bumi nde, le komi nde ma lemaanji ma baari ba akini kayaa Njyami ŋi. 24Ŋaa Njyami nyusu nde, nde ciezi nde mpasi ye leku, kabila leku kiigi leki buna nde kakyele ma mpari a lo ŋi. 25Okorogo Davide wobi ma nde ndi:
“Mi kiigi selege mono Mfumu ka vuzu o mi.
Nde li ka mpaana a mi, mabuni mi kimono bwogo ŋi.
26Kia kabila ka eli otuma mi ma mono ove,
eli ŋaa kase keenini nca mbari a mi,
njuru a mimankulu ye eka nca lila,
27kabila Mfumu we aka nyina mi nca baari ba akpaa kpaa ŋi, we aka yalaga ni,
mi wo mayalaga we, mi ki mbolo nca muuma ŋi.
28We ma amvyere mi anjila ma omuon,
mi ndi nca kase kabila we li bila mi.”»
29«Andumu a mi, mi ebuna lyele be tele ndi nkaaga a bizi a be Davide ma kpa. Ajiigi nde ŋa muuma nde lubu e kini mpila bizi a be. 30Ŋaa nde kiigi ntuma Njyami ŋaa nde kiigi yayi ndi Njyami kiigi ma mpa nde ndagi ŋaa nde ma laba okezi ndi nca ampabigi a nde omo aje kaka ma mbara nde ye omfumu. 31Davide kiigi ma amana mono jaa ya ye je kaya, nde wobi kiigi ŋaa ma enyuzigi ba Masiya ntini ye dugi nde ndi:
“Aki nyina nde nca baari ba akpaa kpaa ŋi,
ŋaa njuru a nde ekibolo nca ncye ŋi.”»
32Jezu wo elyele mi ma nde wua, Njyami ma nyusa nde nca leku, ŋaa bizi aso atemi. 33Ama kusa nde ma kwogo ka kalumu ka Njyami ŋaa Taara ma mpa nde Oduduma Cece, wo nde wo kalegi nde ndagi. Nde ma cala nde yila bizi, ŋaa lo yiga le mono be ŋa leyuga be li. 34Davide nde-ankulu ki je yulu ŋi, ŋa nde ndi: “Mfumu Njyami dugi ŋa Mfumu a mi:
Ya ka manci ka kwogo ka mi ka kalumu,
35tii kalege mi alogi a we aka ncina ntaami a we.”
36Ave baari aso ba Ezerayele ayayi jaa yia sysyele, Njyami maasa ma nde Mfumu bila Masiya, Jezu wo be wo le komo ma lemaanji wua.
37Ayuzigi asi sugu ma mbari yia. Bo apizi Pyere bila antuma baamo ndi: «Andumu, bizi lesa bunu?» 38Pyere ŋa bo ndi: «Lekala etuma e be ŋaa mbuuru ŋa mbuuru kayaga ateemi ma a Jezu Masiya, mabuni maami a be maabi abologo. Ŋaa be le eje kabaga bugu le mpa Njyami be, Oduduma Cece. 39Kabila Njyami kiigi maalege be bila baana a be ndagi, baari aso eli Mfumu Njyami a bizi a be asa kayaa mpila nde.»
40Pyere o seligi si bo kayuga lila ŋaa nde mpi bo kawasi, ŋaa nde ndi: «Ave bizi a be le vuuga ma kabiza baga wura le baari baama atamaŋa!» 41Bege le baari nca bo akiligi mbari a Pyere ŋaa bo awoli ateemi. Ma cugu lia, ankama a baari kiigi aya aki ankama a baari atari (3.000) baayi baraga oju wo ayaligi.
Omuon oncomi ba Okuga ka Jeruzaleme
42Ŋaa bo kiigi akivuŋuŋa cugu ŋa cugu ma kayaa eyizigi ba kiigi mpa antuma, ma kayamba mbuuru ŋa mbuuru, ŋaa ma kaja biri lemo ŋa ma kabwono bila abuga. 43Mbuuru ŋa mbuuru kiigi ŋa onyimi; antuma amono baasa bege le eliimi ŋa ampiri. 44Ayaligi aso kiigi jaa lemo ŋaa beekiigi ŋa bo aki kaba mpanaŋa bo. 45Bo ba katege kabaga ka bo bila elogo e bo, ŋaa ampara ma bagi bo, bo ba kaba bugu le ampara maa ma akaama a mbuuru ŋa mbuuru. 46Cugu ŋa cugu, antini aso bo ba kavunuŋa nca lebugu le Njo Njyami, bo ba ka kaba lempeembe nca anjo ŋaa bo ba kaja biila ŋa kase bila etuma beeve. 47Bo ba kaseme Njyami ŋaa baari aso kiigi ŋa njala bo. Ŋaa cugu ŋa cugu Mfumu kalusa oju o baari ba anyarigi ba avuzugi nde.
Currently Selected:
Esima 2: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
