ꤕꤚꤟꤢꤧ꤬ꤞꤤꤖꤢꤧꤍꤟꤥ 7
7
ꤖꤢꤧ꤭ ꤤ꤬ꤞꤛꤥꤔꤟꤤ ꤢ꤬ꤖꤢꤨꤋꤢꤨ꤭ ꤘꤣ ꤢ꤬ ꤊꤟꤢꤦ ꤡꤛꤣꤞꤢꤦ ꤢꤨ꤭ꤗꤢꤩ꤭ ꤒꤥ꤬ ꤢ꤬ꤑꤢꤩ꤭
1ꤊꤣ꤮ ꤠꤢ꤭ꤖꤢꤨꤋꤢꤨ꤭, ꤔꤟꤤꤘꤢ꤭ ꤠꤢ꤭ꤍꤟꤥ ꤛꤢꤩ꤭ ꤒꤢ꤬ꤟꤢꤩ꤬꤯
ꤒꤟꤥ꤭ꤗꤢ꤬ꤔꤟꤤ ꤠꤢ꤭ꤒꤟꤢꤧ꤬ꤗꤢꤩ꤬ꤊꤛꤢ꤭ꤍꤟꤥ ꤛꤢꤩ꤭ ꤒꤢ꤬ꤟꤢꤩ꤬ ꤔꤤ꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤈, ꤂:꤁, ꤆:꤂꤀
2ꤔꤟꤤꤘꤢ꤭ꤡꤟꤢꤨ꤭ꤢꤩ꤬ ꤊꤟꤌꤣ꤭ ꤠꤢ꤭ꤒꤟꤢꤧ꤬ꤗꤢꤩ꤬ꤊꤛꤢ꤭ꤍꤟꤥ ꤚꤢꤪ ꤔꤟꤢꤧ꤬ ꤊꤟꤢꤦ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ꤘꤢꤦ꤬ ꤕꤢ꤭꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤄:꤄
ꤖꤢꤨ ꤔꤟꤢꤧ꤬ ꤒꤢ꤬ꤊꤟꤢꤧ꤬ꤙꤤꤔꤟꤤ ꤔꤟꤢꤧ꤬ꤗꤢꤧ꤬ꤞꤢꤧ꤬ꤕꤜꤢꤪ꤬ ꤔꤌꤣ꤬, ꤊꤚꤝꤟꤥ꤭ꤗꤟꤢꤩ꤬ꤊꤟꤌꤣ꤭ ꤖꤢꤨ꤮ ꤠꤢ꤭ ꤐꤟꤢꤨ꤭ꤊꤜꤛꤢꤐꤟꤢꤨ꤭ꤊꤜꤥ꤭ ꤔꤟꤢꤧ꤬ ꤔꤌꤣ꤬ꤒꤢ꤬ꤟꤢꤩ꤬꤯
3ꤡꤢꤪ꤭ꤊꤜꤟꤢꤪ꤬ꤗꤢ꤬ꤥ꤬ꤜꤟꤢꤪ꤭ ꤜꤢꤨ꤭ ꤘꤣ ꤔꤟꤢꤧ꤬ꤊꤢ꤬ꤔꤢꤪ꤭ꤜꤟꤥ꤬꤯
ꤒꤟꤥ꤭ꤗꤢ꤬ꤔꤟꤤꤜꤟꤢꤪ꤭ ꤢꤧ꤬ ꤘꤣ ꤔꤟꤢꤧ꤬ꤞꤢꤧꤕꤜꤢꤪ꤬ꤊꤢꤨ꤭ ꤔꤤ꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤃:꤃, ꤆:꤂꤁
4ꤗꤟꤥ꤬ꤔꤟꤤ ꤒꤟꤢꤧ꤬ꤞꤤꤖꤢꤧ ꤖꤢꤨ ꤔꤟꤢꤧ꤬ꤕꤟꤌꤣꤕꤚꤟꤢꤧ꤬ꤗꤢꤪ꤬ ꤒꤣ꤬ꤕꤚꤟꤢꤧ꤬ ꤔꤌꤣ꤬꤯
ꤘꤛꤢ꤬ ꤒꤟꤢꤧ꤬ꤞꤢꤧꤑꤢꤩ꤭ꤒꤟꤢ꤭ꤕꤜꤢꤨ ꤖꤢꤨ ꤔꤟꤢꤧ꤬ꤋꤥ꤭ꤙꤢꤪꤞꤛꤥꤗꤟꤥ꤬ ꤒꤣ꤬ꤕꤚꤟꤢꤧ꤬ ꤔꤌꤣ꤬꤯
5ꤢ꤬ ꤊꤟꤢꤦ ꤗꤟꤢꤩ꤬ꤏꤤ꤬ꤕꤜꤢꤧ ꤘꤢꤦ꤬ ꤔꤟꤢꤧ꤬ ꤘꤣ ꤒꤟꤢꤧ꤬ꤡꤛꤣꤞꤢꤦ ꤢꤨ꤭ꤗꤢꤩ꤭ ꤔꤢ ꤕꤚꤟꤢꤧ꤬ꤗꤢꤪ꤬ ꤘꤣ ꤢ꤬ ꤟꤢꤩꤙꤢꤧ꤬ꤤ꤬ꤜꤥ꤬ꤤ꤬ꤜꤛꤢ ꤡꤟꤛꤢ ꤢꤨ꤭ ꤔꤌꤣ꤬ ꤕꤢ꤭꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤆, ꤆:꤂꤄
ꤖꤢꤧ꤭ ꤒꤣ꤬ꤕꤚꤟꤢꤧ꤬ ꤗꤛꤢꤓꤛꤢꤩ꤬ ꤕꤚꤟꤢꤧ꤬ꤋꤢꤨ꤭ꤢꤟꤌꤣꤢꤛꤢ ꤒꤣ꤬ꤕꤚꤟꤢꤧ꤬
6ꤠꤢ꤭ ꤊꤢ꤬ꤓꤢꤪ꤬ꤥ꤬ ꤘꤣ ꤊꤢ꤬ꤘꤢ꤭ꤖꤢꤨꤋꤢ꤭ꤏꤛꤢꤩ ꤚꤢꤪ ꤠꤢ꤭ ꤗꤛꤢꤓꤢꤩ꤬ ꤘꤣ ꤠꤢ꤭ꤟꤤ꤬ꤊꤜꤢꤪ꤭꤯
7ꤘꤣ ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤊꤢ꤬ꤛꤢ꤭ꤢꤟꤌꤣꤢꤛꤢ ꤒꤣ꤬ꤗꤟꤢꤨ꤬ ꤢ꤬ꤊꤜꤢꤧ꤭ꤔꤌꤣ꤬, ꤠꤢ꤭ ꤗꤛꤢꤓꤛꤢꤩ꤬ ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤘꤣ ꤢ꤬ꤋꤢꤨ꤬ꤊꤜꤢꤪꤔꤟꤢꤪ꤭ ꤥ꤬ ꤊꤟꤌꤣ꤭ ꤢꤨ꤭ ꤒꤥ꤬ ꤒꤣ꤬ꤕꤚꤟꤢꤧ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤂꤂, ꤆:꤃꤂
ꤚꤢꤪ ꤠꤢ꤭ ꤗꤛꤢꤒꤟꤢ꤭ꤒꤟꤢꤩ꤬ꤔꤟꤤ ꤜꤢꤨ꤭꤯
8ꤢ꤬ ꤡꤛꤣꤖꤢꤦ꤬ ꤘꤣ ꤕꤚꤟꤢꤧ꤬ꤗꤢꤪ꤬ꤚꤛꤢꤒꤥ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤟꤤ꤬ꤋꤢ꤭ꤏꤛꤢꤩ꤯
ꤢ꤬ ꤡꤛꤣꤚꤝꤥ꤮ ꤊꤜꤛꤢꤡꤛꤣ ꤘꤣ ꤕꤚꤟꤢꤧ꤬ꤗꤢꤪ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤟꤤ꤬꤯
9ꤗꤟꤢꤪꤒꤟꤢ꤭ ꤟꤢꤪ ꤚꤢꤪ ꤢ꤬ꤋꤤꤕꤢ꤬ꤜꤟꤥ ꤟꤢꤪ꤯
ꤗꤟꤢꤪꤋꤤꤐꤟꤢ꤭ ꤚꤢꤪ ꤢ꤬ꤋꤤꤒꤢ꤬ꤚꤟꤢꤦ꤬ ꤟꤢꤪ꤯
10ꤚꤢꤪ ꤕꤚꤟꤢꤧ꤬ꤗꤢꤪ꤬ ꤒꤣ꤬ꤕꤚꤟꤢꤧ꤬ ꤓꤢꤩ꤬ꤗꤛꤢꤓꤛꤢꤩ꤬ꤏꤢꤦ꤬ ꤜꤢꤨ꤭꤯
ꤢ꤬ ꤊꤢꤦ꤭ꤞꤛꤢꤔꤟꤤ ꤞꤛꤢꤡꤢꤪ ꤔꤢ ꤟꤤ꤬ꤗꤢꤖꤢꤧ꤬ꤗꤟꤌꤣ꤯
ꤢ꤬ ꤊꤚꤢꤩ꤬ ꤤ꤬ꤜꤥ꤬ꤔꤟꤤ ꤜꤢꤨ꤭ ꤘꤣ ꤢ꤬ ꤊꤟꤢꤦ ꤥ꤬ꤗꤛꤢꤩ꤭ꤒꤟꤣ ꤔꤢ ꤜꤢꤨ꤭꤯
11ꤢ꤬ ꤟꤢꤩꤙꤢꤧ꤬ꤏꤛꤥ꤬ꤟꤢꤩꤙꤢꤧ꤬ꤏꤢꤪ꤭, ꤢ꤬ꤋꤢꤨ꤬ꤊꤜꤢꤪꤕꤚꤟꤛꤢꤩ꤭꤯
ꤢ꤬ ꤥ꤬ ꤊꤟꤌꤣ꤭ ꤘꤣ ꤢ꤬ꤟꤤ꤬ ꤒꤣ꤬ꤖꤟꤌꤣ꤮ ꤒꤥ꤬꤯
12ꤋꤥ꤭ꤑꤟꤢꤚꤢꤪ ꤢ꤬ꤥ꤬ ꤘꤣ ꤊꤜꤛꤢꤘꤢ꤭, ꤏꤛꤢꤩꤕꤢ꤭ꤚꤢꤪ ꤢ꤬ꤥ꤬ ꤘꤣ ꤊꤜꤢꤧꤊꤢꤨ꤭꤯
ꤢ꤬ ꤡꤛꤣꤥ꤬ꤕꤟꤢꤪꤤ꤬ꤜꤥ꤬ ꤕꤚꤟꤢꤧ꤬ꤋꤢꤨ꤭ ꤘꤣ ꤊꤜꤛꤢꤔꤟꤢ ꤕꤝꤟꤥ꤭꤮ ꤒꤣ꤬ꤖꤥ꤬꤯
13ꤢ꤬ ꤖꤛꤢꤙꤢꤦ ꤕꤚꤟꤢꤧ꤬ꤋꤢꤨ꤭ ꤘꤣ ꤢ꤬ꤋꤢꤨ꤬ꤊꤜꤢꤪꤔꤟꤢꤪ꤭ ꤥ꤬ ꤊꤟꤌꤣ꤭ꤢꤨ꤭ ꤒꤥ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤚꤢꤪ ꤢ꤬ ꤔꤟꤌꤣ꤬ꤗꤢꤦ ꤜꤢꤨ꤭꤯
ꤢ꤬ ꤞꤢꤧꤒꤢ꤬ꤚꤟꤢꤧ꤭ ꤊꤟꤌꤣ꤭ꤢꤨ꤭ ꤒꤥ꤬꤯ 14ꤚꤢꤪ ꤢ꤬ ꤟꤢꤩ ꤜꤢꤨ꤭ ꤔꤢ, “ꤛꤢꤩ꤭ꤒꤣ꤬ꤑꤢꤩ꤭ ꤠꤢ꤭ ꤗꤟꤢꤩ꤬ꤞꤛꤢꤩ꤭ ꤜꤢꤨ꤭ꤒꤛꤢ꤭ꤓꤛꤢ꤬ ꤒꤟꤢꤧ꤬ꤖꤢꤨꤒꤟꤢꤧ꤬ꤜꤟꤛꤢꤩ꤬ ꤖꤢꤨ ꤒꤟꤢꤧ꤬ꤙꤢꤪꤞꤛꤥꤋꤢꤧꤋꤥ꤭ ꤒꤟꤢꤧ꤬ꤜꤢꤨ꤭ꤒꤛꤢ꤭ꤓꤛꤢ꤬ ꤔꤌꤣ꤬, ꤚꤢꤪ ꤢ꤬ꤐꤛꤢꤩ꤬ ꤥ꤬ ꤘꤣ ꤠꤢ꤭ꤟꤤ꤬ꤊꤢꤨ꤭ ꤛꤢꤩ꤭꤯
ꤛꤢꤩ꤭ꤒꤣ꤬ꤑꤢꤩ꤭ ꤠꤢ꤭ ꤗꤟꤢꤩ꤬ꤜꤣꤗꤟꤢꤩ꤬ꤙꤢ꤭ ꤓꤌꤣ꤭ꤟꤢꤪ ꤖꤢꤨ꤮ ꤠꤢ꤭ ꤢꤪꤜꤟꤛꤢ꤬ ꤓꤌꤣ꤭ ꤔꤌꤣ꤬ ꤟꤢꤪ꤯#ꤡꤢꤪꤙꤢꤨ꤬ꤡꤢꤪꤙꤢꤧ꤭ ꤇:꤁꤁-꤁꤇
15ꤖꤢꤨꤔꤌꤣ꤬ꤋꤢꤨ꤬ꤋꤛꤢꤩ꤭, ꤠꤢ꤭ ꤓꤢꤩ꤬ꤗꤛꤢꤓꤛꤢꤩ꤬ꤏꤢꤦ꤬ ꤔꤟꤢꤧ꤬꤯
ꤠꤢ꤭ ꤗꤛꤢꤕꤟꤢꤨ꤭ ꤔꤟꤢꤧ꤬ ꤚꤢꤪ ꤠꤢ꤭ ꤗꤛꤢꤓꤛꤢꤩ꤬ ꤟꤢꤪ ꤔꤟꤢꤧ꤬꤯
16ꤠꤢ꤭ ꤤ꤬ꤘꤢꤧ꤭ ꤟꤢꤪ ꤠꤢ꤭ꤜꤟꤢꤩꤗꤛꤢꤩ꤭ꤘꤢꤧ꤭ ꤍꤟꤢꤨ꤬ꤘꤢꤨ꤬ꤒꤝꤟꤥ ꤥ꤬ ꤘꤣ ꤤ꤬ꤡꤛꤤꤊꤟꤢꤩ ꤟꤛꤢ꤭ ꤔꤌꤣ꤬ꤒꤢ꤬ꤟꤢꤩ꤬ ꤟꤢꤪ꤯
17ꤠꤢ꤭ ꤒꤢ꤬ꤏꤤ ꤔꤟꤌꤣ꤬ꤗꤢꤦ ꤔꤟꤤ ꤠꤢ꤭ꤜꤟꤢꤩꤗꤛꤢꤩ꤭ ꤔꤢ ꤗꤢꤨꤚꤢ꤬, ꤢ꤬ꤜꤢꤨꤎꤢ꤬ ꤔꤢ ꤞꤢꤪ꤬ꤞꤤꤔꤢ꤬ꤗꤥ꤬ ꤘꤣ ꤢ꤬ꤔꤟꤌꤣ꤬ꤗꤢꤦ ꤒꤢ꤬ꤟꤢꤩ꤬꤯
18ꤟꤛꤢ꤭ꤗꤢꤪ꤭, ꤕꤟꤢꤧ꤬ ꤥ꤬ꤗꤛꤢꤩ꤭ꤔꤟꤌꤣ꤬ꤗꤢꤦꤖꤛꤢꤙꤢꤦ ꤔꤟꤤ ꤜꤢꤨ꤭ ꤒꤣ꤬ꤞꤢꤧ꤭꤮ ꤒꤣ꤬ꤞꤢꤧ꤭,
ꤕꤟꤢꤧ꤬ ꤗꤟꤢꤩ꤬ꤗꤟꤥ꤬ ꤔꤟꤤꤘꤛꤢꤩ ꤕꤟꤢꤧ꤬ꤔꤟꤢꤩ ꤕꤥ꤮꤯
19ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤠꤢ꤭ꤠꤟꤢꤧ꤬ ꤥ꤬ ꤘꤣ ꤟꤤ꤬ ꤒꤥ꤬꤯
ꤢ꤬ ꤓꤢꤩ꤬ꤡꤛꤣꤊꤛꤢ꤭ ꤓꤌꤣ꤭ꤟꤢꤪ ꤊꤜꤛꤢ ꤘꤣ ꤢ꤬ꤐꤟꤛꤢꤩ꤬ ꤟꤢꤪ꤯
20ꤢ꤬ ꤏꤢꤨ꤬ꤔꤟꤌꤣ꤭ꤙꤢ꤭ ꤡꤛꤣꤔꤟꤤ ꤚꤢꤦ꤭ ꤔꤢ ꤚꤢꤦ꤭ꤊꤢꤪ꤭꤯
ꤥ꤬ꤕꤟꤥ ꤔꤛꤢꤩ꤭ꤊꤜꤢꤧ ꤡꤢꤪ꤮ ꤗꤢ꤬ ꤢ꤬ ꤊꤟꤢ꤬ꤒꤟꤌꤣ ꤟꤤꤔꤢ ꤒꤥ꤬꤯”
21ꤢ꤬ ꤟꤢꤩꤙꤢꤧ꤬ꤤ꤬ꤜꤥ꤬ ꤡꤛꤣꤞꤢꤦꤊꤛꤢ꤭ ꤕꤚꤟꤢꤧ꤬ꤋꤢꤨ꤭ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤊꤜꤛꤢ꤯
ꤢ꤬ ꤟꤢꤩꤙꤢꤧ꤬ꤤ꤬ꤜꤢꤪ꤭ ꤡꤛꤣꤔꤟꤤꤊꤛꤢ꤭ ꤜꤢꤨ꤭ ꤔꤢ ꤢ꤬ꤒꤟꤢꤧ꤬ꤟꤢꤩꤙꤢꤧ꤬ꤠꤤ꤬ꤏꤢꤦ꤭꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤅:꤃, ꤆:꤂꤄
22ꤒꤣ꤬ꤖꤟꤌꤣꤒꤌꤣ꤭ ꤕꤚꤟꤢꤧ꤬ꤋꤢꤨ꤭ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤊꤚꤝꤟꤥ꤭ꤊꤟꤌꤣ꤭ ꤜꤢꤨ꤭ ꤋꤛꤢꤩ꤭꤯
ꤞꤛꤢꤔꤢ ꤕꤟꤢꤨꤖꤢꤧ꤭ ꤡꤛꤣꤒꤥ꤭ ꤘꤣ ꤜꤟꤢꤩꤗꤟꤢꤩ꤬ꤏꤥ꤭ꤢꤩ꤬ ꤜꤢꤨ꤭꤯
ꤞꤛꤢꤔꤢ ꤊꤚꤢꤪꤖꤢꤧ꤭ ꤊꤜꤛꤢ꤬ꤡꤛꤣꤒꤥ꤭ ꤘꤣ ꤒꤢ꤬ꤗꤢꤪ꤭ꤊꤢꤨ꤭꤯
23ꤚꤢꤪ ꤕꤚꤟꤢꤧ꤬ꤜꤟꤢꤦ꤬ꤒꤟꤢꤧ꤬ꤗꤟꤤ꤬ ꤋꤢꤧꤙꤢꤧ꤬ꤊꤛꤢ꤭ ꤜꤢꤨ꤭ꤞꤢꤧꤕꤜꤢꤪ꤬ ꤔꤢ ꤕꤜꤟꤢꤧ꤯
ꤢ꤬ꤞꤛꤢꤔꤢ ꤓꤢꤨ꤬ ꤡꤛꤣꤕꤟꤢꤪꤔꤟꤤ ꤘꤢꤘꤥ꤭ ꤔꤌꤣ꤬ꤟꤢꤪ, ꤕꤚꤟꤢꤧ꤬ꤋꤢꤨ꤭ ꤛꤢꤩ꤭ ꤢ꤬ ꤊꤟꤢꤦꤚꤟꤢꤩ ꤒꤟꤌꤣꤘꤣ ꤒꤟꤢꤧ꤬ꤞꤛꤢꤩ꤭ ꤔꤌꤣ꤬ ꤢ꤬ ꤞꤢꤧꤑꤢꤩ꤭ꤔꤟꤤ ꤢ꤬ꤔꤟꤢꤩ ꤒꤥ꤬꤯
24ꤠꤢ꤭ꤖꤢꤨ, ꤗꤟꤢꤩ꤬ꤖꤢꤨꤔꤌꤣ꤬ꤚꤢꤪ ꤋꤥ꤭ꤑꤟꤢ ꤔꤟꤤꤘꤢ꤭ ꤒꤟꤢ꤭ꤒꤟꤢꤩ꤬ ꤊꤟꤌꤣ꤭ ꤠꤢ꤭ꤍꤟꤥ꤯
ꤘꤛꤢ꤬ꤞꤢꤨ꤬ꤘꤛꤢ꤬ꤞꤢꤧ ꤊꤟꤌꤣ꤭ ꤍꤟꤥ ꤘꤣ ꤠꤢ꤭ ꤟꤢꤩꤙꤢꤧ꤬ ꤔꤌꤣ꤬ꤒꤢ꤬ꤟꤢꤩ꤬ ꤔꤤ꤯
25ꤘꤛꤢ꤬ꤥ꤬ ꤒꤢꤧ꤭ ꤕꤚꤟꤢꤧ꤬ꤗꤢꤪ꤬ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤢ꤬ꤚꤤ꤬ꤢ꤬ꤊꤛꤢ꤭ ꤘꤣ ꤔꤟꤢꤧ꤬ꤞꤢꤧꤕꤜꤢꤪ꤬ꤊꤢꤨ꤭ ꤗꤟꤢꤩ꤯
ꤔꤢꤪ꤭ ꤤ꤬ꤜꤥ꤬ꤔꤟꤤ ꤒꤢꤧ꤭ ꤔꤟꤢꤧ꤬ꤔꤟꤢꤩ ꤔꤢ ꤢꤧ꤬ ꤗꤟꤢꤩ꤬ꤒꤟꤢꤧ꤬ ꤔꤌꤣ꤬ꤒꤢ꤬ꤟꤢꤩ꤬ ꤗꤟꤢꤩ꤯
26ꤗꤟꤢꤩ꤬ꤒꤢꤩ꤭ꤟꤢꤩꤚꤢꤪ ꤢ꤬ ꤗꤟꤢꤩ꤬ꤞꤛꤢꤩ꤭ꤊꤛꤢ꤭ ꤢꤧ ꤔꤛꤢ꤬ꤡꤢꤪ ꤕꤚꤟꤢꤧ꤬ꤋꤢꤨ꤭꤯
ꤢ꤬ ꤗꤟꤢꤩ꤬ꤗꤟꤢꤩꤊꤛꤢ꤭ ꤢꤧ ꤔꤛꤢ꤬ꤡꤢꤪ ꤕꤚꤟꤢꤧ꤬ꤏꤛꤥ꤬ꤏꤢꤪ꤭ ꤒꤢ꤬ꤟꤢꤩ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤉:꤁꤈
27ꤔꤟꤢꤧ꤬ ꤡꤛꤣ ꤘꤣ ꤢꤧ꤬ꤟꤤ꤬ ꤔꤌꤣ꤬ꤗꤢ꤬, ꤔꤟꤢꤧ꤬ ꤡꤛꤣꤕꤚꤢꤧ ꤟꤢꤪ ꤘꤣ ꤜꤟꤌꤣ꤭ꤊꤟꤢꤩꤔꤢꤩꤘꤢꤪ꤭꤯
ꤊꤜꤛꤢ ꤒꤟꤢ꤭ꤔꤟꤌꤣ꤭ ꤘꤣ ꤒꤟꤢꤧ꤬ꤞꤛꤢꤩ꤭ ꤋꤢ꤭ꤜꤟꤢꤩ꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤈, ꤅:꤅, ꤉:꤁꤈
Currently Selected:
ꤕꤚꤟꤢꤧ꤬ꤞꤤꤖꤢꤧꤍꤟꤥ 7: kyuNTOT
Highlight
Share
Compare
Copy
Want to have your highlights saved across all your devices? Sign up or sign in
Wycliffe Bible Translators, Inc.
