ꤕꤚꤟꤢꤧ꤬ꤞꤤꤖꤢꤧꤍꤟꤥ 4
4
ꤖꤢꤧ꤭ ꤒꤣ꤬ꤕꤚꤟꤢꤧ꤬ ꤘꤛꤢꤩꤟꤢꤧ꤭ꤘꤛꤢꤩꤚꤢꤩ꤬ ꤔꤟꤤ ꤢ꤬ꤖꤢꤨ ꤘꤣ ꤢ꤬ ꤊꤟꤢꤦ ꤔꤟꤤꤘꤢ꤭ ꤜꤢꤨ꤭ꤍꤟꤥ
ꤒꤟꤢꤧ꤬ꤞꤤꤖꤢꤧ ꤢ꤬ꤙꤝꤤꤒꤢ꤬ꤚꤛꤢꤩ꤭ ꤒꤢ꤬ꤟꤢꤩ꤬
1ꤊꤣ꤮ ꤠꤢ꤭ꤖꤢꤨ ꤞꤤ꤭, ꤠꤢ꤭ ꤤ꤬ꤞꤛꤥ ꤐꤟꤢꤨ꤭ꤊꤜꤛꤢ ꤞꤤ꤭ ꤚꤢꤪ ꤔꤟꤤꤘꤢ꤭ ꤠꤢ꤭ꤍꤟꤥ,
ꤘꤛꤢ꤬ꤞꤢꤨ꤬ꤘꤛꤢ꤬ꤞꤢꤧ ꤠꤢ꤭ꤜꤟꤢ꤭, ꤒꤢꤦꤚꤢꤪ ꤞꤤ꤭ ꤔꤟꤤꤙꤢꤧ꤬ ꤒꤟꤢꤧ꤬ꤞꤢꤧꤑꤢꤩ꤭ ꤘꤣ ꤢ꤬ꤕꤜꤥ꤭ꤢ꤬ꤖꤢꤧ꤯#ꤓꤢꤨ꤬ꤞꤢꤧꤓꤛꤢ꤬ ꤃꤄:꤁꤁, ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤈
2ꤠꤢ꤭ ꤒꤟꤢꤧ꤬ꤐꤟꤢꤨ꤭ꤊꤜꤛꤢꤐꤟꤢꤨ꤭ꤊꤜꤥ꤭ ꤗꤢ꤬ ꤢ꤬ꤚꤛꤢ꤯
ꤠꤤ꤭ꤊꤛꤢ꤭ ꤒꤢꤧ꤭ ꤠꤢ꤭ꤍꤟꤥ ꤗꤟꤢꤩ ꤔꤤ꤮꤯
3ꤘꤣ ꤠꤢ꤭ ꤕꤢ꤬ꤡꤟꤢꤧ ꤕꤢ꤭ ꤕꤚꤢꤧ ꤢ꤬ꤋꤢꤧ꤭ꤔꤌꤣ꤬꤮ ꤗꤢ꤬, ꤠꤢ꤭ ꤥ꤬ꤒꤟꤣꤊꤟꤌꤣ꤭ ꤔꤢ ꤠꤢ꤭ꤖꤢꤧ꤭ꤖꤢꤧ꤭꤯
ꤠꤢ꤭ꤗꤟꤌꤣ ꤗꤟꤥ꤬ꤔꤟꤤ ꤠꤢ꤭ ꤖꤢꤨ꤮ ꤢ꤬ꤖꤢꤨꤥ꤬ ꤒꤢꤦ꤮ ꤒꤣ꤬ꤕꤚꤟꤢꤧ꤬ ꤔꤌꤣ꤬ ꤡꤢꤪ꤯
4ꤠꤢ꤭ꤖꤢꤧ꤭ ꤤ꤬ꤞꤛꤥꤤ꤬ꤞꤛꤢ꤬ꤔꤟꤤ ꤠꤢ꤭ ꤔꤢ,
“ꤒꤟꤥ꤭ꤗꤢ꤬ꤔꤟꤤꤜꤟꤢꤪ꤭ ꤠꤢ꤭ꤒꤟꤢꤧ꤬ꤗꤢꤩ꤬ꤊꤛꤢ꤭ꤍꤟꤥ ꤛꤢꤩ꤭ ꤔꤢ ꤔꤟꤢꤧ꤬ꤞꤢꤧꤕꤜꤢꤪ꤬ꤏꤤ꤭ꤗꤢꤩ꤭꤯
ꤡꤟꤢꤨ꤭ꤢꤩ꤬ꤔꤟꤤꤕꤜꤢꤦꤜꤟꤢꤪ꤭ ꤠꤢ꤭ꤍꤟꤥ, ꤒꤢꤦ꤮ ꤗꤢ꤬ ꤔꤟꤢꤧ꤬ ꤊꤟꤢꤦ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤇:꤂
5ꤗꤛꤢꤕꤟꤢꤨ꤭ ꤒꤟꤢꤧ꤬ꤞꤤꤖꤢꤧ, ꤗꤛꤢꤠꤟꤛꤢ ꤒꤟꤢꤧ꤬ꤞꤢꤧꤑꤢꤩ꤭ꤒꤟꤢ꤭ꤕꤜꤢꤨ꤯
ꤏꤥ꤭ꤒꤢ꤬ꤕꤟꤢ꤬ ꤒꤢꤧ꤭ ꤠꤢ꤭ꤍꤟꤥ ꤗꤟꤢꤩ, ꤒꤢ꤬ꤚꤤꤡꤛꤣꤋꤥꤊꤛꤢ꤭ ꤒꤢꤧ꤭ ꤠꤢ꤭ꤜꤟꤢ꤭ ꤗꤟꤢꤩ꤯
6ꤠꤤ꤭ꤊꤛꤢ꤭ ꤊꤛꤢ꤭ ꤒꤢꤧ꤭ ꤒꤟꤢꤧ꤬ꤞꤤꤖꤢꤧ ꤗꤟꤢꤩ, ꤢ꤬ ꤊꤟꤢꤦ ꤒꤢ꤬ꤊꤟꤢꤧ꤬ꤙꤤꤔꤟꤤ ꤔꤟꤢꤧ꤬ ꤕꤢ꤭꤯
ꤗꤟꤥ꤬ꤔꤟꤤ ꤢꤧ꤬, ꤚꤢꤪ ꤢ꤬ ꤊꤟꤢꤦ ꤥ꤬ꤕꤟꤢꤪꤗꤛꤢꤋꤝꤢꤧ꤬ꤔꤟꤤ ꤔꤟꤢꤧ꤬ ꤕꤢ꤭꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤁
7ꤔꤟꤤꤙꤢꤧ꤬ ꤒꤟꤢꤧ꤬ꤞꤤꤖꤢꤧ ꤔꤌꤣ꤬ꤗꤢ꤬ ꤒꤟꤢꤧ꤬ ꤘꤣ ꤢ꤬ꤜꤥ꤬ꤘꤢꤨ꤬ꤜꤣ ꤒꤣ꤬ꤡꤣ꤬ ꤟꤢꤪ꤯
ꤔꤟꤢꤧ꤬ ꤕꤟꤢꤨ꤭ꤖꤛꤢꤩꤔꤟꤤ ꤒꤟꤢꤧ꤬ ꤤ꤭ꤒꤢꤩ꤭ꤒꤢꤩ꤭꤮ ꤙꤢꤧ꤬ꤙꤢꤧ꤬, ꤢ꤬ ꤜꤥ꤬ꤘꤢꤨ꤬ ꤊꤚꤟꤢꤦ꤬ ꤔꤢ ꤒꤟꤢꤧ꤬ꤞꤢꤧꤑꤢꤩ꤭ꤒꤟꤢ꤭ꤕꤜꤢꤨ ꤒꤣ꤬ꤡꤣ꤬꤮ ꤒꤥ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂꤃:꤂꤃
8ꤙꤢꤩ꤬ꤘꤢꤨ꤬ꤔꤟꤤ ꤒꤟꤢꤧ꤬ꤞꤤꤖꤢꤧ ꤗꤢ꤬ ꤢ꤬ ꤙꤢꤩ꤬ꤓꤛꤢ꤬ꤜꤣ꤭ ꤔꤟꤤ ꤔꤟꤢꤧ꤬꤯
ꤔꤟꤢꤧ꤬ ꤖꤛꤢꤙꤢꤦꤗꤢ꤬ꤔꤟꤤ ꤜꤢꤨ꤭ ꤗꤢ꤬, ꤢ꤬ ꤔꤢꤪ꤭ ꤘꤛꤢ꤬ꤘꤢꤨ꤬ꤐꤟꤢꤦꤑꤟꤢ ꤔꤟꤤ ꤢꤨ꤭ ꤔꤢ ꤔꤟꤢꤧ꤬꤯
9ꤢ꤬ ꤤ꤬ꤠꤟꤢ꤬ꤓꤛꤢ꤬ ꤕꤢꤩ ꤔꤟꤢꤧ꤬ ꤒꤟꤢꤧ꤬ꤖꤥ꤭ꤒꤝꤟꤥ꤮ ꤘꤣ ꤔꤟꤢꤧ꤬ꤋꤢꤨ꤬ꤊꤜꤢꤪꤋꤢꤨ꤬꤯
ꤢ꤬ ꤘꤛꤢꤩ ꤔꤟꤢꤧ꤬ ꤋꤢꤨ꤬ꤊꤜꤝꤟꤥ꤭ꤓꤢꤧ꤭ ꤘꤣ ꤢ꤬ꤒꤢ꤬ꤚꤛꤢꤩ꤭ꤘꤢꤨ꤬ꤓꤢꤨ꤭,” ꤠꤢ꤭ꤖꤢꤧ꤭ ꤟꤢꤩ ꤠꤢ꤭ ꤖꤢꤨꤔꤌꤣ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤉
ꤡꤛꤣ ꤘꤣ ꤊꤜꤛꤢꤒꤥ꤭ꤊꤜꤛꤢꤙꤢꤧ꤬
10ꤊꤣ꤮ ꤠꤢ꤭ꤖꤢꤨ, ꤞꤛꤢꤖꤢꤨ ꤔꤟꤢꤧ꤬ ꤊꤟꤢꤦ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ ꤢ꤬ꤑꤢꤩ꤭ꤔꤌꤣ꤬,
ꤔꤟꤤꤘꤢ꤭ ꤠꤢ꤭ꤍꤟꤥ, ꤡꤟꤢꤨ꤭ꤢꤩ꤬ ꤠꤢ꤭ꤜꤟꤢ꤭ ꤔꤤ꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤃:꤂
11ꤠꤢ꤭ ꤤ꤬ꤞꤛꤥ ꤕꤢꤩ ꤔꤟꤢꤧ꤬ ꤒꤟꤢꤧ꤬ꤞꤤꤖꤢꤧ ꤢ꤬ꤊꤜꤛꤢ꤯
ꤠꤢ꤭ ꤤ꤬ꤞꤛꤢ꤬ ꤕꤢꤩ ꤔꤟꤢꤧ꤬ ꤒꤟꤢꤧ꤬ꤡꤢꤪꤒꤟꤢꤧ꤬ꤒꤟꤢꤩ꤬ ꤢ꤬ꤊꤜꤥ꤭꤯
12ꤙꤤ ꤔꤟꤢꤧ꤬ ꤡꤛꤣ ꤔꤢ ꤒꤟꤢꤧ꤬ꤞꤤꤖꤢꤧ ꤢ꤬ꤋꤢꤧ꤭ꤔꤌꤣ꤬, ꤢꤨ꤭ ꤗꤟꤢꤩ꤬ꤒꤟꤢ꤭ꤒꤟꤢꤦ꤭ ꤙꤢꤧ ꤔꤟꤢꤧ꤬ ꤒꤣ꤬ꤡꤣ꤬꤮ ꤒꤥ꤬꤯
ꤔꤟꤢꤧ꤬ ꤊꤟꤢꤦ ꤞꤛꤢꤔꤢ ꤊꤢ꤬ꤛꤢ꤭ ꤘꤣ ꤢ꤬ ꤊꤜꤛꤢ꤬ ꤚꤢꤪ ꤢ꤬ ꤏꤤꤒꤢ꤬ꤊꤜꤟꤌꤣ꤭ꤜꤢ꤬ꤋꤢꤦ ꤒꤥ꤬ ꤔꤌꤣ꤬ꤕꤢ꤭꤯
13ꤕꤟꤢꤦꤊꤜꤟꤢꤪ꤬ꤗꤢ꤬ ꤔꤟꤤꤚꤛꤢ ꤠꤢ꤭ꤒꤟꤢꤧ꤬ꤤ꤬ꤞꤛꤥ ꤐꤟꤢꤨ꤭ꤊꤜꤛꤢꤐꤟꤢꤨ꤭ꤊꤜꤥ꤭ ꤔꤌꤣ꤬ꤒꤢ꤬ꤟꤢꤩ꤬, ꤠꤤ꤭ꤊꤛꤢ꤭ ꤊꤛꤢ꤭ꤒꤢꤧ꤭ ꤢꤧ꤬ ꤗꤟꤢꤩ꤯
ꤡꤟꤢꤨ꤭ꤢꤩ꤬ ꤜꤢꤨ꤭ ꤚꤢꤪ ꤢ꤬ ꤘꤛꤢꤩ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ ꤥ꤬ꤗꤟꤥ꤬ꤥ꤬ꤖꤝꤤ꤭ ꤔꤟꤢꤧ꤬ ꤕꤢ꤭꤯
14ꤡꤛꤣꤔꤟꤌꤣ꤭ ꤊꤟꤌꤣ꤭ꤒꤢꤧ꤭ ꤘꤣ ꤊꤢ꤬ꤛꤢ꤭ꤗꤢꤨ꤭ꤗꤟꤛꤢ ꤢ꤬ꤊꤜꤛꤢꤊꤢꤨ꤭ ꤗꤟꤢꤩ꤯
ꤊꤚꤝꤟꤥ꤭ꤊꤟꤌꤣ꤭ꤒꤢꤧ꤭ ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤢ꤬ꤊꤜꤥ꤭ ꤗꤟꤢꤩꤗꤟꤢꤩ꤯#ꤓꤢꤨ꤬ꤞꤢꤧꤓꤛꤢ꤬ ꤁:꤁, ꤕꤚꤟꤢꤧ꤬ꤞꤤꤖꤢꤧꤍꤟꤥ ꤁:꤁꤀, ꤁:꤁꤅
15ꤡꤛꤣꤠꤟꤢꤪ꤬ꤋꤢꤧ꤭ꤠꤟꤢꤪ꤬ꤊꤛꤢ꤭ ꤔꤢ ꤊꤜꤛꤢ ꤔꤌꤣ꤬ꤒꤢ꤬ꤟꤢꤩ꤬꤯
ꤡꤛꤣꤋꤥꤊꤛꤢ꤭ ꤢꤧ꤬ ꤚꤢꤪ ꤡꤛꤣꤒꤥ꤭ꤘꤢꤦ꤬ ꤘꤣ ꤔꤟꤢꤧ꤬ꤊꤜꤛꤢ ꤔꤌꤣ꤬꤯
16ꤢꤧ꤬ꤞꤤ꤭ ꤊꤤ꤬ ꤞꤢꤧꤋꤢ ꤗꤟꤢꤩ꤬ꤕꤛꤢꤩꤗꤟꤢꤩ꤬ꤊꤛꤢ꤭ꤔꤟꤤ ꤟꤤ ꤢꤨ꤭ꤚꤟꤌꤣ꤬ ꤒꤥ꤬ ꤟꤢꤩꤗꤢ꤬, ꤢ꤬ ꤥ꤬ꤗꤛꤢꤩ꤭ꤔꤟꤤꤡꤟꤛꤢ ꤒꤥ꤬꤯
ꤢꤧ꤬ꤞꤤ꤭ ꤊꤤ꤬ ꤗꤟꤢꤩ꤬ ꤏꤤꤒꤢ꤬ꤊꤜꤟꤌꤣ꤭ ꤜꤢ꤬ꤋꤢꤦꤔꤟꤤ ꤟꤤ ꤊꤢ꤬ꤛꤢ꤭ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤒꤥ꤬ ꤟꤢꤩꤗꤢ꤬, ꤢ꤬ ꤥ꤬ꤞꤢ꤭ꤊꤜꤛꤢ꤭ ꤒꤣ꤬ꤞꤢꤧ꤭꤮ ꤒꤣ꤬ꤞꤢꤧ꤭꤯#ꤓꤢꤨ꤬ꤞꤢꤧꤓꤛꤢ꤬ ꤃꤆:꤄, ꤗꤤꤊꤢ꤬ ꤂:꤁
17ꤢꤧ꤬ꤞꤤ꤭ ꤗꤟꤢꤩ꤬ ꤒꤢ꤬ꤗꤥ꤭ꤗꤥ꤭ꤡꤢꤪ ꤒꤟꤢꤧ꤬ꤗꤢꤨ꤭ꤗꤟꤛꤢ ꤖꤢꤨ ꤢꤨ꤭ ꤢꤩ꤬ꤘꤤ꤭꤯
ꤢꤧ꤬ꤞꤤ꤭ ꤗꤟꤢꤩ꤬ꤡꤟꤛꤢꤩ꤭ ꤢꤨ꤭ ꤔꤌꤣ꤬ ꤢ꤬ꤞꤛꤢ ꤕꤚꤢꤧ ꤔꤢ ꤢ꤬ ꤥ꤭ ꤓꤛꤢꤩ꤭ꤐꤟꤢ꤭꤯
18ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤢ꤬ꤊꤜꤛꤢ ꤗꤢ꤬ ꤢ꤬ꤞꤛꤢꤔꤢ ꤗꤟꤢꤪꤜꤤ꤭ꤙꤢꤨ꤭ꤟꤛꤢ꤭꤯
ꤢ꤬ ꤜꤤ꤭ꤟꤛꤢ꤭ ꤔꤢ ꤜꤤ꤭ꤟꤛꤢ꤭ ꤚꤢꤪ ꤢ꤬ꤜꤤ꤭ꤒꤢ꤬ꤋꤢꤧ꤭ꤡꤢꤪ ꤖꤢꤨ ꤗꤟꤢꤪꤓꤌꤣ꤬ ꤔꤌꤣ꤬꤯#ꤘꤢ꤬ꤔꤤ꤬ꤢꤩꤜꤢ꤬ ꤁꤂:꤃, ꤖꤤꤜꤤ꤬ꤕꤤ꤬ ꤂:꤁꤅
19ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤒꤢ꤬ꤟꤢꤩ꤬ ꤢ꤬ꤊꤜꤛꤢ ꤊꤢꤩ꤬ꤚꤢꤪ, ꤢ꤬ꤞꤛꤢꤔꤢ ꤒꤟꤢꤧ꤬ꤋꤤꤒꤢ꤬ꤚꤟꤢꤦ꤬꤯
ꤗꤢ꤬ꤤ꤭ꤒꤢꤩ꤭ ꤗꤟꤢꤩ꤬ꤏꤤꤒꤢ꤬ꤊꤜꤟꤌꤣ꤭ ꤜꤢ꤬ꤋꤢꤦ ꤢꤧ꤬ꤞꤤ꤭ ꤔꤌꤣ꤬, ꤢ꤬ ꤞꤢꤧꤑꤢꤩ꤭ ꤒꤥ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁꤃
20ꤊꤣ꤮ ꤠꤢ꤭ꤖꤢꤨ, ꤘꤛꤢ꤬ꤞꤢꤨ꤬ꤘꤛꤢ꤬ꤞꤢꤧ ꤠꤢ꤭ꤍꤟꤥ,
ꤔꤟꤤꤘꤢ꤭ ꤒꤟꤢ꤭ꤒꤟꤢꤩ꤬ꤚꤛꤢ ꤠꤢ꤭ꤜꤟꤢ꤭꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤅:꤁
21ꤔꤢꤪ꤭ ꤥ꤬ꤒꤢ꤬ꤖꤢ꤭ꤐꤟꤛꤢꤩ꤬ ꤊꤛꤢ꤭ ꤒꤢꤧ꤭ ꤢꤧ꤬ ꤘꤣ ꤔꤟꤢꤧ꤬ꤗꤢꤧ꤬ꤞꤢꤧ꤬ꤑꤢꤩ꤭ ꤗꤟꤢꤩ꤯
ꤒꤟꤥ꤭ꤗꤢ꤬ꤔꤟꤤ ꤜꤢꤨ꤭ ꤘꤣ ꤔꤟꤢꤧ꤬ꤞꤢꤧꤕꤜꤢꤪ꤬ꤊꤢꤨ꤭ ꤔꤌꤣ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤂:꤁, ꤃:꤂꤁, ꤇:꤁-꤂
22ꤍꤟꤥ ꤛꤢꤩ꤭ꤒꤢ꤬ꤟꤢꤩ꤬ ꤗꤢ꤬ ꤢ꤬ ꤘꤛꤢꤩ ꤊꤢ꤬ꤛꤢ꤭ ꤘꤣ ꤢ꤬ ꤗꤛꤢꤕꤟꤢꤨ꤭ꤗꤛꤢꤓꤛꤢꤩ꤬ ꤜꤢꤨ꤭ ꤒꤢ꤬ꤟꤢꤩ꤬ ꤒꤟꤢꤧ꤬ꤥ꤬ꤓꤝꤟꤥ꤭ꤕꤚꤟꤢꤧ꤬ ꤥ꤬ꤗꤟꤥ꤬ꤥ꤬ꤖꤝꤤ꤭꤯
ꤢ꤬ ꤔꤢꤪ꤭ ꤥ꤬ꤏꤛꤥ꤬ꤥ꤬ꤕꤚꤛꤢ꤭ ꤡꤢꤪ ꤢꤨ꤭ꤔꤟꤢꤩꤊꤜꤟꤢꤪꤏꤤ꤭ꤕꤚꤟꤢꤧ꤬꤯#ꤕꤚꤟꤢꤧ꤬ꤞꤤꤖꤢꤧꤍꤟꤥ ꤃:꤈
23ꤚꤟꤢꤪ꤬ꤔꤟꤤ ꤔꤟꤢꤧ꤬ꤒꤟꤢꤧ꤬ꤒꤢ꤬ꤔꤟꤢꤩ꤬ ꤔꤤ꤯
ꤜꤟꤢꤪ꤭꤮ ꤔꤟꤢꤧ꤬ ꤗꤟꤢꤩ꤬ꤒꤟꤢꤧ꤬ ꤔꤌꤣ꤬ꤗꤢ꤬ ꤢ꤬ꤟꤛꤢ꤭ ꤘꤣ ꤔꤟꤢꤧ꤬ꤒꤟꤢꤧ꤬ꤒꤢ꤬ꤔꤟꤢꤩ꤬ ꤕꤚꤢꤧ꤯#ꤜꤢꤨꤊꤢ꤬ ꤆:꤄꤅
24ꤟꤢꤩꤙꤢꤧ꤬ꤊꤢ꤬ ꤒꤢꤧ꤭ ꤒꤣ꤬ꤗꤢꤦ꤭꤮ ꤗꤟꤢꤩ꤯
ꤟꤢꤩꤙꤢꤧ꤬ꤕꤜꤟꤛꤢ꤬ ꤒꤢꤧ꤭ ꤒꤣ꤬ꤡꤣ꤬꤮ ꤗꤟꤢꤩꤗꤟꤢꤩ꤯#ꤓꤢꤨ꤬ꤞꤢꤧꤓꤛꤢ꤬ ꤃꤄:꤁꤃, ꤕꤚꤟꤢꤧ꤬ꤞꤤꤖꤢꤧꤍꤟꤥ ꤆:꤁꤂, ꤈:꤁꤃, ꤁꤀:꤃꤂, ꤁꤉:꤁, ꤢꤩꤖꤢꤩꤎꤢꤨ꤬ ꤄:꤂꤅
25ꤗꤛꤢꤟꤛꤢ꤭ꤡꤢꤪ ꤥ꤬ꤔꤢꤩ꤬ꤚꤟꤢꤩ ꤘꤣꤑꤢꤩ꤭ ꤔꤌꤣ꤬꤯
ꤗꤛꤢꤓꤥ꤭ꤗꤛꤢꤜꤟꤛꤢ꤬ ꤒꤢꤧ꤭ꤗꤟꤢꤩ꤯
26ꤒꤢ꤬ꤔꤟꤢꤩ꤬ ꤒꤟꤢ꤭ꤒꤟꤢꤩ꤬ ꤊꤜꤛꤢ ꤘꤣ ꤔꤟꤢꤧ꤬ ꤊꤚꤝꤟꤥ꤭ ꤔꤌꤣ꤬ꤒꤢ꤬ꤟꤢꤩ꤬꤯
ꤜꤟꤢꤪ꤭꤮ ꤊꤜꤛꤢ ꤘꤣ ꤔꤟꤢꤧ꤬ ꤡꤛꤣ ꤔꤌꤣ꤬ ꤢ꤬ ꤊꤟꤢꤦꤒꤥ꤭ꤊꤟꤢꤦꤙꤢꤧ꤬ ꤕꤢ꤭꤯#ꤟꤤꤙꤚꤢꤨ ꤁꤂:꤁꤃
27ꤡꤛꤣꤕꤟꤢꤧ꤭ꤓꤥ꤭ ꤡꤛꤣꤕꤟꤢꤧ꤭ꤜꤟꤛꤢ꤬ ꤒꤢꤧ꤭ꤗꤟꤢꤩ꤯
ꤡꤛꤣꤒꤢ꤬ꤖꤢ꤭ꤊꤛꤢ꤭ ꤔꤢ ꤒꤟꤢꤧ꤬ꤗꤢꤨ꤭ꤗꤟꤛꤢꤚꤤ꤬ꤡꤟꤛꤢ ꤔꤌꤣ꤬꤯
Currently Selected:
ꤕꤚꤟꤢꤧ꤬ꤞꤤꤖꤢꤧꤍꤟꤥ 4: kyuNTOT
Highlight
Share
Compare
Copy
Want to have your highlights saved across all your devices? Sign up or sign in
Wycliffe Bible Translators, Inc.
