Romanos 4

Ntaji Abraham ɨɨn ichi nu̱u̱nꞌ‑ó

1¿Ná kúvi ya̱ kachiꞌ‑ó ya̱ nníꞌinꞌ Abraham, ya̱ kúvi jííꞌ‑ó yanaꞌán? 2Chi retú nstúvi Abraham ya̱ nkino̱o na̱a̱ꞌ re̱ꞌ jie̱ꞌe̱ꞌ tiñu nsa̱ꞌá re̱ꞌ, jee íyó jie̱ꞌe̱ꞌ ya̱ kuvi kaꞌanꞌ téyɨ́ɨ́ re̱ꞌ, soo ntu̱ví nu̱u̱nꞌ Ndiosíꞌ. 3Chi, ¿ná káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ? Káchíꞌ‑i: “Jee ni̱nu̱ꞌ iniꞌ Abraham Ndiosíꞌ jee jie̱ꞌe̱ꞌ vá nkuna̱a̱ꞌ iniꞌ Ndiosíꞌ ya̱ kínóo na̱a̱ꞌ re̱ꞌ nu̱u̱nꞌ‑u.” 4Soo ɨɨn ñɨvɨ sátíñú re̱ꞌ jee níꞌínꞌ re̱ꞌ xu̱ꞌún ya̱ꞌvi re̱ꞌ jee ntu ntɨ́ɨn kuéntáꞌ maa kuéntáꞌ ya̱ nsi̱kútaꞌviꞌ te̱e xí tiñu xu̱ꞌún vá nu̱u̱nꞌ re̱ꞌ jie̱ꞌe̱ꞌ íyó mániꞌ iniꞌ‑i néꞌyá‑a re̱ꞌ chisaꞌ táyáꞌvi‑i vá nu̱u̱nꞌ re̱ꞌ. 5Soo ɨɨn ñɨvɨ ya̱ ntu̱náꞌ sáꞌá‑a sáva kino̱o na̱a̱ꞌ‑a nu̱u̱nꞌ Ndiosíꞌ soo kúneí iniꞌ ñɨvɨ vá Ndiosíꞌ, saájee nkuna̱a̱ꞌ iniꞌ re̱ꞌ ya̱ kínóo na̱a̱ꞌ‑a nu̱u̱nꞌ re̱ꞌ jie̱ꞌe̱ꞌ kúneí iniꞌ‑i re̱ꞌ. Maá Ndiosíꞌ kúvi re̱ꞌ ya̱ sííyo re̱ꞌ kua̱chi ñɨvɨ ya̱ ntu̱náꞌ nsáꞌá‑a sáva íyó ni̱ꞌi̱nꞌ‑i vá. 6Jee suni sukuán káchíꞌ David ya̱ netuꞌ kúvi ñɨvɨ ya̱ kúnáaꞌ iniꞌ Ndiosíꞌ ya̱ kínóo na̱a̱ꞌ‑a nu̱u̱nꞌ re̱ꞌ jee nsú jie̱ꞌe̱ꞌ tiñu váꞌa sáꞌá ñɨvɨ vá:

7Na̱ ka̱ꞌ netuꞌ ka̱ꞌ kúvi ñɨvɨ ya̱ nne̱káꞌnú iniꞌ Ndiosíꞌ jie̱ꞌe̱ꞌ rá tiñu niváꞌa nsa̱ꞌá‑a ya̱ jiáꞌa‑a nu̱u̱nꞌ tu̱ꞌun ya̱ tátúníꞌ re̱ꞌ,

jín ya̱ ntu ntɨ́ɨn kuéntáꞌ re̱ꞌ kua̱chi‑i kuéntáꞌ jiásɨ́ꞌ re̱ꞌ nu̱u̱nꞌ vá.

8Na̱ ka̱ꞌ netuꞌ ka̱ꞌ kúvi ñɨvɨ ya̱ I̱toꞌoꞌ‑ó ni ntu̱né tɨ́ɨn kuéntáꞌ kuitɨꞌ re̱ꞌ ka̱ꞌ rá kua̱chi ñɨvɨ vá.

Nkachiꞌ David nu̱u̱nꞌ Tutuꞌ Ííꞌ.

9Rá ñɨvɨ Israel ya̱ níso ráa seña Ndiosíꞌ nu̱u̱nꞌ yɨkɨkúñu ráa naní circuncisión, ¿á kua̱chi maáráa netuꞌ kuvi ráa sukuán?, áxí, ¿á suni rá ñɨvɨ ntu kúvi Israel ya̱ ntu níso seña vá ranika̱ꞌ? Chi káchíꞌ‑ó ya̱ ni̱nu̱ꞌ iniꞌ Abraham Ndiosíꞌ jee nkuna̱a̱ꞌ iniꞌ re̱ꞌ ya̱ kínóo na̱a̱ꞌ Abraham nu̱u̱nꞌ re̱ꞌ. 10Saájee, ¿né tiempúꞌ nkuna̱a̱ꞌ iniꞌ Ndiosíꞌ ya̱ na̱a̱ꞌ kúvi Abraham, résa? ¿Á sáá ya̱ níso re̱ꞌ seña naní circuncisión? Áxí, ¿á ne̱ sáá ntiáꞌan ka̱ꞌ kuniso re̱ꞌ maa? Nsáꞌ né ya̱ níso re̱ꞌ maa, chi né ntiáꞌan ka̱ꞌ nsa̱ꞌá circuncidar re̱ꞌ maáréꞌ. 11Jee nni̱ꞌi̱nꞌ re̱ꞌ seña vá nu̱u̱nꞌ yɨkɨkúñu re̱ꞌ, ya̱ kúvi ɨɨn seyúꞌ ya̱ stúvi‑i ya̱ naáꞌ ya̱ kínóo na̱a̱ꞌ re̱ꞌ nu̱u̱nꞌ Ndiosíꞌ jie̱ꞌe̱ꞌ ya̱ nku̱neí iniꞌ re̱ꞌ maa, sáá ntiáꞌan kuniso re̱ꞌ seña vá. Jee sukuán íyó sáva kúvi Abraham tátáꞌ ntáká rá ñɨvɨ ya̱ kúneí iniꞌ ráa Ndiosíꞌ, sú ntu níso ráa seña vá. Chi kúneí iniꞌ ráa Cristo, sáva kuna̱a̱ꞌ iniꞌ Ndiosíꞌ ya̱ kínóo na̱a̱ꞌ ráa nu̱u̱nꞌ re̱ꞌ. 12Jee suni Abraham kúvi re̱ꞌ tátáꞌ nu̱u̱nꞌ rá ñɨvɨ Israel ya̱ níso ráa seña circuncisión. Soo nsú tátáꞌ ráa kúvi re̱ꞌ jie̱ꞌe̱ꞌ ya̱ kua̱chi kuitɨꞌ níso ráa seña vá, chisaꞌ suni jíka ráa ichi njiáꞌa tátáꞌ ránꞌ Abraham ya̱ nku̱neí iniꞌ re̱ꞌ Ndiosíꞌ. Jee nku̱neí iniꞌ re̱ꞌ sukuán ne̱ sáá ntiáꞌan saꞌá circuncidar re̱ꞌ maáréꞌ, nékúvi.

Tu̱ꞌun nchi̱sóyuꞌú Ndiosíꞌ síkúnkuvi re̱ꞌ maa jie̱ꞌe̱ꞌ kúneí iniꞌ‑ó maáréꞌ

13Chi nchi̱sóyuꞌú Ndiosíꞌ ta̱ꞌvi̱ꞌ nu̱u̱nꞌ Abraham jín nu̱u̱nꞌ rá se̱ꞌya ichiyúkúnꞌ váji ne̱ nu̱u̱nꞌ re̱ꞌ ya̱ ni̱ꞌi̱nꞌ ráa nɨꞌɨ ñuꞌun ñɨ̱vɨ́ yaꞌá. Jee nchi̱sóyuꞌú Ndiosíꞌ maa nsú jie̱ꞌe̱ꞌ nsi̱kúnkuvi Abraham tu̱ꞌun ley ya̱ nta̱túníꞌ Ndiosíꞌ ya̱ njia̱ꞌa‑a nu̱u̱nꞌ Moisés, chisaꞌ jie̱ꞌe̱ꞌ kínóo na̱a̱ꞌ re̱ꞌ ya̱ váji ne̱ nu̱u̱nꞌ kúneí iniꞌ re̱ꞌ Ndiosíꞌ. 14Chi retánꞌ rá ñɨvɨ ya̱ núkú ráa síkúnkuvi ráa ley ví rá ñɨvɨ ya̱ ni̱ꞌi̱nꞌ ta̱ꞌvi̱ꞌ vá, nékúvi, saájee íyó ka̱ꞌá ya̱ kúneí iniꞌ‑ó tu̱ꞌun nkachiꞌ re̱ꞌ, jee síjíta‑a ya̱ nchi̱sóyuꞌú re̱ꞌ. 15Chi tu̱ꞌun ley nta̱túníꞌ Ndiosíꞌ síkíji‑i ya̱ ni̱ꞌi̱nꞌ ñɨvɨ ya̱ ki̱tɨ̱ꞌ iniꞌ Ndiosíꞌ jee xinóꞌo re̱ꞌ ráa jie̱ꞌe̱ꞌ ntu kúneí ráa sikúnkuvi ráa nɨꞌɨ ya̱ káchíꞌ ley vá. Soo nu̱u̱nꞌ ntu íyó ni ɨɨn ley, jee suni ntu jiáꞌa ñɨvɨ nu̱u̱nꞌ ya̱ káchíꞌ ley.

16Saáva ni̱ꞌi̱nꞌ ñɨvɨ ta̱ꞌvi̱ꞌ ya̱ nchi̱sóyuꞌú Ndiosíꞌ jie̱ꞌe̱ꞌ ya̱ kúneí iniꞌ ráa re̱ꞌ, sáva kúvi ta̱ꞌvi̱ꞌ vá ya̱ síkútaꞌviꞌ re̱ꞌ nu̱u̱nꞌ‑ó sú ntu íyó ni̱ꞌi̱nꞌ‑ó maa. Síkútaꞌviꞌ re̱ꞌ maa sáva kino̱o kutú ya̱ nchi̱sóyuꞌú re̱ꞌ nu̱u̱nꞌ nta̱ká rá ñɨvɨ ya̱ kúvi ichiyúkúnꞌ Abraham. Soo síkútaꞌviꞌ re̱ꞌ maa nsú kua̱chi kuitɨꞌ nu̱u̱nꞌ rá ñɨvɨ Israel ya̱ yɨ́ꞌɨ́ ráa nu̱u̱nꞌ ley, chisaꞌ suni nu̱u̱nꞌ nta̱ká rá ñɨvɨ ya̱ kúneí iniꞌ ráa Ndiosíꞌ kuéntáꞌ kua̱ꞌ Abraham. Sukuán suvire̱ꞌ kúvi tátáꞌ ntáká‑órán ichinúúnꞌ Ndiosíꞌ. 17Suꞌva káchíꞌ tu̱ꞌun níso nu̱u̱nꞌ Tutuꞌ Ííꞌ ya̱ nkachiꞌ Ndiosíꞌ nu̱u̱nꞌ Abraham: “Ñani ni̱ꞌ noꞌó sáva kuvi nú tátáꞌ rá ñɨvɨ kue̱ꞌe̱ꞌ nación.” Ni̱nu̱ꞌ iniꞌ Abraham re̱ꞌ, chi maáréꞌ ví ya̱ nástekúꞌ i̱i̱ꞌ re̱ꞌ rá níꞌiꞌ jín ya̱ tátúníꞌ re̱ꞌ sáꞌá re̱ꞌ ya̱ koo rá nantíñú ya̱ ni ntiáꞌan koo.

18Jee súka̱ꞌ ntu̱náꞌ íyó jie̱ꞌe̱ꞌ koo tu̱ꞌun neí iniꞌ Abraham koo se̱ꞌya re̱ꞌ soo ni̱yo tu̱ꞌun neí iniꞌ re̱ꞌ, jee ni̱nu̱ꞌ iniꞌ re̱ꞌ ya̱ kenta kuvi re̱ꞌ “tátáꞌ rá ñɨvɨ kue̱ꞌe̱ꞌ nación”, sánikua̱ꞌ nkachiꞌ Ndiosíꞌ nu̱u̱nꞌ re̱ꞌ: “Sukuán kukueꞌeꞌ rá se̱ꞌya ichiyúkúnꞌ nú.” 19Jee ntu nnúun ka̱ꞌ ya̱ kúneí iniꞌ Abraham maá Ndiosíꞌ, súnika̱ꞌ ntɨɨn kuéntáꞌ re̱ꞌ ya̱ yɨkɨkúñu re̱ꞌ níyo kuéntáꞌ níꞌiꞌ re̱ꞌ chi ya̱ íñɨ́ re̱ꞌ yatin sientúꞌ kui̱ya̱ꞌ (100), jín ya̱ númáꞌ ñasɨ́ꞌɨ́ re̱ꞌ Sara. 20Jee ni ntu nñúꞌun kua̱chi iniꞌ re̱ꞌ ntu ñákui̱ñɨ̱ꞌ ínúꞌ iniꞌ re̱ꞌ tu̱ꞌun nchi̱sóyuꞌú Ndiosíꞌ nu̱u̱nꞌ re̱ꞌ, chisaꞌ nijia ka̱ꞌ ya̱ kúneí iniꞌ re̱ꞌ ka̱ꞌ, jee nna̱kuetúꞌún re̱ꞌ Ndiosíꞌ ya̱ kúñáꞌnú xá Ndiosíꞌ. 21Jee íchí kuitɨꞌ ni̱nu̱ꞌ nkáꞌnú iniꞌ re̱ꞌ ya̱ kuvi saꞌá Ndiosíꞌ ya̱ nchi̱sóyuꞌú re̱ꞌ. 22Saáva suni nkuna̱a̱ꞌ iniꞌ Ndiosíꞌ ya̱ kino̱o na̱a̱ꞌ Abraham nu̱u̱nꞌ re̱ꞌ.

23Jee nsáꞌ kua̱chi kuitɨꞌ jie̱ꞌe̱ꞌ Abraham níso nu̱u̱nꞌ Tutuꞌ Ííꞌ ya̱ nkuna̱a̱ꞌ iniꞌ Ndiosíꞌ ya̱ kínóo na̱a̱ꞌ re̱ꞌ. 24Chi suni níso tu̱ꞌun vá nu̱u̱nꞌ Tutuꞌ Ííꞌ jie̱ꞌe̱ꞌ yó ranika̱ꞌ, chi suni nkuna̱a̱ꞌ iniꞌ Ndiosíꞌ kino̱o na̱a̱ꞌ‑ó jie̱ꞌe̱ꞌ ya̱ kúneí iniꞌ‑órán Ndiosíꞌ. Jee maáréꞌ ví ya̱ nxi̱nákóo re̱ꞌ I̱toꞌoꞌ‑ó Jesús nkene‑e nteñu rá níꞌiꞌ jee nna̱stekúꞌ re̱ꞌ maa. 25Ya̱ nna̱ku̱ꞌva Ndiosíꞌ maa sáva kuviꞌ‑i jie̱ꞌe̱ꞌ kua̱chi‑ó jee nna̱tekuꞌ i̱i̱ꞌ‑i sáva siíyo Ndiosíꞌ kua̱chi‑ó sáva saꞌá re̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ.

Currently Selected:

Romanos 4: meh

Highlight

Copy

Compare