Mateo 2

Rá te̱e tu̱ꞌva níchí xi̱ni̱ꞌ kua̱ne̱ꞌyá ráa Jesús

1Jee sáá nkaku Jesús ñuunꞌ Belén, ya̱ yɨ́ꞌɨ́ xi̱ntíín ñuꞌun Judea. Jee tiempúꞌ yukuán kúvi Herodes te̱e tátúníꞌ re̱ꞌ rá ñuunꞌ vá. Jee nu̱u̱nꞌ ñuunꞌ Jerusalén nkenta sava rá te̱e tu̱ꞌva níchí xi̱ni̱ꞌ ya̱ váji ráa ne̱ ichi nu̱u̱nꞌ kénta nka̱niiꞌ. 2Jee ni̱ka̱tu̱ꞌún ráa:

―¿Né núꞌ íyó maáréꞌ ya̱ nkaku ya̱ kúvi te̱e tatúníꞌ nu̱u̱nꞌ rá ñɨvɨ Israel? Chi ne̱ ichi nu̱u̱nꞌ kénta nka̱niiꞌ niniꞌ ráníꞌ tiu̱u̱nꞌ ya̱ jiáꞌa‑a seña ya̱ ya nkaku te̱e tatúníꞌ vá. Jee saáva váji ráníꞌ kuneñu̱ꞌun ráníꞌ maa ―nkachiꞌ ráa.

3Jee Herodes, te̱e tátúníꞌ, jee sáá nteso̱ꞌo re̱ꞌ tu̱ꞌun vá, jee nku̱níní víꞌí iniꞌ re̱ꞌ, jín suni ntáká rá ñɨvɨ ñuunꞌ Jerusalén ranika̱ꞌ. 4Saájee nna̱stútú re̱ꞌ ntáká rá su̱tu̱ꞌ kúñáꞌnú jín ntáká rá te̱e xínéꞌénꞌ nu̱u̱nꞌ rá ñɨvɨ jie̱ꞌe̱ꞌ tu̱ꞌun tátúníꞌ Ndiosíꞌ yanaꞌán, jee ni̱ka̱tu̱ꞌún re̱ꞌ ráa, né núꞌ kúvi nu̱u̱nꞌ kaku maáréꞌ ya̱ kuvi re̱ꞌ máá Cristo. 5Jee nkachiꞌ ráa:

―Nu̱u̱nꞌ ñuunꞌ Belén, ya̱ yɨ́ꞌɨ́‑ɨ xi̱ntíín ñuꞌun Judea. Chi sukuán ntee te̱e nna̱kani tu̱ꞌun nkene yuꞌú máá maá Ndiosíꞌ yanaꞌán, sáá nkáchíꞌ Ndiosíꞌ:

6Noꞌó, ñuunꞌ Belén, ya̱ káá‑a nu̱u̱nꞌ ñuꞌun Judea,

ntu núun ka̱ꞌ kúñáꞌnú nú nteñu rá kúñáꞌnú ya̱ tátúníꞌ ráa rá ñuunꞌ Judea,

chi nu̱u̱nꞌ nú kene ɨɨn te̱e ya̱ tatúníꞌ re̱ꞌ,

ya̱ kunaka re̱ꞌ rá ñɨvɨ ni̱ꞌ ya̱ kúvi ráa ñɨvɨ Israel,

káchíꞌ nu̱u̱nꞌ Tutuꞌ Ííꞌ ―nkachiꞌ ráa nu̱u̱nꞌ Herodes.

7Saájee nkana yuꞌuꞌ Herodes rá te̱e tu̱ꞌva níchí xi̱ni̱ꞌ vá, jee ni̱ka̱tu̱ꞌún va̱ꞌa re̱ꞌ ráa jee nku̱káꞌnú iniꞌ re̱ꞌ máá tiempúꞌ nkitu̱vi tiu̱u̱nꞌ vá. 8Jee nchu̱ichí re̱ꞌ ráa kɨ̱ꞌɨ̱nꞌ ráa ñuunꞌ Belén. Jee nkachiꞌ re̱ꞌ:

―Kuáꞌán ránú jee nanukútúꞌun kávii kuitɨꞌ rán jie̱ꞌe̱ꞌ su̱chí lúlí vá. Jee sáá naniꞌinꞌ rán maa, jee kikachiꞌ rán maa nu̱u̱nꞌ ni̱ꞌ, sáva suni ne̱ jíꞌín ni̱ꞌ kɨ̱kuneñu̱ꞌun ni̱ꞌ maa ―nkachiꞌ Herodes.

9Jee sáá nkuvi nteso̱ꞌo ráa ya̱ nkachiꞌ Herodes, jee kua̱ꞌa̱nꞌ ráa. Jee tiu̱u̱nꞌ ya̱ niniꞌ ráa ichi nu̱u̱nꞌ kenta nka̱niiꞌ, jee kua̱ꞌa̱nꞌ tiu̱u̱nꞌ vá yósóꞌ‑o ichinúúnꞌ ráa ne̱kua̱ꞌ nkenta‑a ña̱kui̱ñɨ̱ꞌ‑ɨ nu̱u̱nꞌ íyó su̱chí lúlí yɨ́ɨ́ vá. 10Jee sáá niniꞌ ráa tiu̱u̱nꞌ vá jee ne̱ sɨ̱ɨ̱ꞌ nkuvi iniꞌ ánímaꞌ ráa nku̱sɨ̱ɨ̱ꞌ iniꞌ ráa. 11Jee sáá nki̱vɨ ráa iniꞌ veꞌi, jee niniꞌ ráa su̱chí lúlí yɨ́ɨ́ vá jín nánáꞌ‑a María, jee ña̱kui̱ñɨ̱ꞌ ítɨ́ ráa, jee nneñu̱ꞌun ráa su̱chí lúlí vá. Jee nine ráa rá kajúnꞌ ya̱tu̱nꞌ ínaꞌá ráa nsi̱kútaꞌviꞌ ráa rá ta̱ꞌvi̱ꞌ nu̱u̱nꞌ su̱chí vá, ya̱ kúvi yu̱u̱ꞌ kuáán yɨ́yáꞌvi nasɨ́kuitɨꞌ, jín su̱jie i̱i̱ꞌ, jín inka ka̱ꞌ su̱jie naní mirra.

12Saájee nstúꞌva ya̱chi̱ꞌ Ndiosíꞌ ráa nu̱u̱nꞌ ñuma̱ꞌná ráa ya̱ nsáꞌ nikó ráa nu̱u̱nꞌ Herodes, saájee inka ka̱ꞌ ichi nkene ráa kua̱noꞌonꞌ ráa ñuunꞌ ráa.

Kua̱ꞌa̱nꞌ yuꞌuꞌ José jín María ñuunꞌ Egipto

13Jee sáá ya̱ kua̱noꞌonꞌ rá te̱e tu̱ꞌva níchí xi̱ni̱ꞌ vá, saájee ntu̱vi ɨɨn najiáꞌáꞌ ííꞌ I̱toꞌoꞌ‑ó nu̱u̱nꞌ ñuma̱ꞌná José jee nkachiꞌ‑i nu̱u̱nꞌ re̱ꞌ:

―Nako̱o, keꞌen te̱lúlí jín nánáꞌ re̱ꞌ, jee kene yuꞌuꞌ kaku nú kuáꞌánꞌ jín ráa nu̱u̱nꞌ ñuꞌún ñuunꞌ Egipto, jee kino̱o rán yukuán ne̱kua̱ꞌ kachiꞌ ni̱ꞌ nu̱u̱nꞌ nú ya̱ nikó rán. Chi Herodes tají re̱ꞌ rá te̱e nanukú ráa te̱lúlí yaꞌá sáva kaꞌniꞌ ráa maa ―nkachiꞌ najiáꞌáꞌ ííꞌ vá.

14Saájee nnako̱o José, jee nkeꞌen re̱ꞌ te̱lúlí jín nánáꞌ‑a yakuááꞌ jee kua̱ꞌa̱nꞌ ráa ñuunꞌ Egipto. 15Jee nneeꞌ ráa yukuán ne̱kua̱ꞌ ni̱ꞌi̱ꞌ Herodes. Sukuán nkuvi sáva nsi̱kúnkuvi tu̱ꞌun ya̱ nkachiꞌ I̱toꞌoꞌ‑ó yanaꞌán ya̱ njiáꞌa re̱ꞌ nu̱u̱nꞌ ɨɨn te̱e nna̱kani tu̱ꞌun nkene yuꞌú máá maá I̱toꞌoꞌ jee káchíꞌ: “Ne̱ ñuunꞌ Egipto nkana ni̱ꞌ Se̱ꞌya Yɨ́ɨ́ ni̱ꞌ kene nu̱u̱nꞌ ñuunꞌ vá niji yaꞌá.”

Tátúníꞌ Herodes ya̱ kaꞌniꞌ ráa ntáká rá su̱chí lúlí yɨ́ɨ́

16Sáá nku̱káꞌnú iniꞌ Herodes ya̱ nxi̱náꞌví rá te̱e tu̱ꞌva níchí xi̱ni̱ꞌ vá re̱ꞌ, jee nki̱tɨ̱ꞌ nasɨ́kuitɨꞌ iniꞌ re̱ꞌ. Jee nta̱jí re̱ꞌ rá soldado re̱ꞌ kɨ̱kaꞌniꞌ ráa ntáká rá su̱chí lúlí yɨ́ɨ́ rá íyó nu̱u̱nꞌ ñuunꞌ Belén, jín ntáká rá íyó ni̱kótíyu yukuán. Ntají re̱ꞌ ráa kɨ̱kaꞌniꞌ ráa ntáká rá íñɨ́ u̱vi̱ꞌ kui̱ya̱ꞌ jín rá núun ka̱ꞌ kui̱ya̱ꞌ, sánikua̱ꞌ tiempúꞌ nku̱káꞌnú iniꞌ re̱ꞌ ya̱ nkitu̱vi tiu̱u̱nꞌ xúꞌún vá ya̱ nkachiꞌ rá te̱e tu̱ꞌva níchí xi̱ni̱ꞌ vá sáá ni̱ka̱tu̱ꞌún re̱ꞌ ráa. 17Sukuán nsi̱kúnkuvi tu̱ꞌun njiáꞌa I̱toꞌoꞌ ya̱ sákachiꞌ Jeremías te̱e nna̱kani tu̱ꞌun nkene yuꞌú máá maá I̱toꞌoꞌ ne̱ yanaꞌán sáá nkachiꞌ‑i:

18Ñuunꞌ Ramá nteso̱ꞌo ɨɨn nusuyuꞌú ñɨvɨ,

náꞌyúꞌ‑u ya̱ jiáku nasɨ́kuitɨꞌ iniꞌ‑i,

Raquel náꞌyúꞌ ña jie̱ꞌe̱ꞌ rá se̱ꞌya ña,

jee ni ntu kuíni ña nachuneí ñɨvɨ iniꞌ ña,

chi ya̱ ni̱ꞌi̱ꞌ rá se̱ꞌya ña,

káchíꞌ nu̱u̱nꞌ Tutuꞌ Ííꞌ.

Níkó tuku José jín María nu̱u̱nꞌ ñuunꞌ Nazaret

19Jee sáá ni̱ꞌi̱ꞌ Herodes, saájee ntu̱vi ɨɨn najiáꞌáꞌ ííꞌ I̱toꞌoꞌ‑ó nu̱u̱nꞌ ñuma̱ꞌná José ne̱ nu̱u̱nꞌ nééꞌ re̱ꞌ ñuꞌun Egipto, jee nkachiꞌ‑i:

20―Nako̱o, jee keꞌen te̱lúlí jín nánáꞌ re̱ꞌ, jee kuánoꞌonꞌ nú ñuꞌun Israel, chi ni̱ꞌi̱ꞌ rá ñɨvɨ ya̱ nnu̱kú ráa kaꞌniꞌ ráa maa nékúvi ―nkachiꞌ najiáꞌáꞌ ííꞌ vá.

21Saájee nnako̱o José, jee nkeꞌen re̱ꞌ te̱lúlí jín nánáꞌ‑a, jee kua̱ꞌa̱nꞌ re̱ꞌ jín ráa nu̱u̱nꞌ ñuꞌun Israel. 22Soo sáá nteso̱ꞌo re̱ꞌ ya̱ Arquelao nna̱kuiñɨꞌ‑ɨ nu̱u̱nꞌ tátáꞌ‑a Herodes tátúníꞌ‑i ñuꞌun Judea, jee nyu̱ꞌví José kɨ̱ꞌɨ̱nꞌ re̱ꞌ yukuán. Jee nstúꞌva Ndiosíꞌ re̱ꞌ nu̱u̱nꞌ ñuma̱ꞌná re̱ꞌ jee nkene re̱ꞌ kua̱ꞌa̱nꞌ re̱ꞌ nu̱u̱nꞌ ñuꞌun tɨ́ɨn Galilea. 23Jee sáá nkenta re̱ꞌ yukuán, jee kua̱ꞌa̱nꞌ re̱ꞌ kuneeꞌ re̱ꞌ ɨɨn ñuunꞌ naní Nazaret. Sukuán nsi̱kúnkuvi rá tu̱ꞌun nkachiꞌ rá te̱e ya̱ nna̱kani ráa tu̱ꞌun nkene yuꞌú máá maá Ndiosíꞌ ne̱ yanaꞌán, ya̱ kuna̱ní Jesús te̱e ñuunꞌ Nazaret.

Currently Selected:

Mateo 2: meh

Highlight

Copy