Jonás 4
4
1Soo nku̱níní iniꞌ Jonás jie̱ꞌe̱ꞌ ya̱ nsa̱ꞌá Ndiosíꞌ jee nki̱tɨ̱ꞌ iniꞌ re̱ꞌ. 2Saájee nkaꞌanꞌ Jonás jín I̱toꞌoꞌ‑ó, jee nkachiꞌ re̱ꞌ:
―I̱toꞌoꞌ ni̱ꞌ, yaꞌá ví ya̱ nkaꞌvi iniꞌ ni̱ꞌ ya̱ kuvi ne̱ sáá nééꞌ ni̱ꞌ ñuunꞌ ni̱ꞌ. Saáva máá hora yukuán nkuini ni̱ꞌ kɨ̱ꞌɨ̱nꞌ ni̱ꞌ ñuunꞌ Tarsis, chi jíníꞌ ni̱ꞌ ya̱ kúvi nú Ndiosíꞌ ya̱ íyó mániꞌ iniꞌ nú jín ya̱ náꞌví iniꞌ nú, ya̱ ntu ki̱tɨ̱ꞌ ñamaꞌ iniꞌ nú, chi na̱ ka̱ꞌ káꞌnú ka̱ꞌ iniꞌ nú, jee nákani iniꞌ nú xinóꞌo nú ñɨvɨ.
3’Saájee, jíkánꞌ táꞌvíꞌ ni̱ꞌ nu̱u̱nꞌ nú, I̱toꞌoꞌ ni̱ꞌ, ya̱ saꞌá nú xá ya̱ kuviꞌ ni̱ꞌ. Chi va̱ꞌa ka̱ꞌ ví ni̱ꞌ ya̱ kuviꞌ ni̱ꞌ nsú káꞌ ya̱ kutekuꞌ ni̱ꞌ ―nkachiꞌ Jonás.
4Saájee nna̱xiníkó I̱toꞌoꞌ‑ó nu̱u̱nꞌ re̱ꞌ:
―¿Á íyó na̱ jie̱ꞌe̱ꞌ ki̱tɨ̱ꞌ iniꞌ nú?
5Saájee nkene Jonás nu̱u̱nꞌ ñuunꞌ vá, jee kua̱ꞌa̱nꞌ‑a ichi nu̱u̱nꞌ kénta nka̱niiꞌ kuneeꞌ‑e. Jee yukuán nsa̱ꞌá‑a ɨɨn veꞌi tu̱yukúꞌ jee ña̱kuneeꞌ‑e iniꞌ nu̱u̱nꞌ násɨ́ꞌ kátɨ́ vá. Nétu‑u kuniꞌ‑i na̱kuá kuvi jín ñuunꞌ vá.
6Saájee nsa̱ꞌá I̱toꞌoꞌ‑ó Ndiosíꞌ ya̱ taꞌviꞌ ɨɨn yokúꞌúꞌ nééꞌ víꞌí naꞌá, jee ñaꞌnu ya̱chi̱ꞌ‑i sáva kasɨꞌ kátɨ́‑ɨ xi̱ni̱ꞌ re̱ꞌ, sáva nuva̱ꞌa iniꞌ re̱ꞌ. Jee nku̱sɨ̱ɨ̱ꞌ víꞌí iniꞌ re̱ꞌ jie̱ꞌe̱ꞌ yokúꞌúꞌ vá.
7Soo sáá nku̱nijinꞌ ki̱vɨ̱ꞌ steñu̱ꞌún, jee nsa̱ꞌá Ndiosíꞌ ɨɨn ti̱na̱kú, jee nki̱vɨ‑ɨ yokúꞌúꞌ vá, jee nnachi‑i.
8Jee sáá ntu̱u̱nꞌ nka̱niiꞌ, jee nsa̱ꞌá Ndiosíꞌ ya̱ ña̱kɨ̱ꞌɨ ta̱chi̱ꞌ íꞌní ni̱ꞌin, jee sááꞌ víꞌí sáꞌá nka̱niiꞌ jee nka̱yu̱ꞌ víꞌí xi̱ni̱ꞌ Jonás, jee ne̱ nku̱neenꞌ nu̱u̱nꞌ re̱ꞌ, ne̱ kuviꞌ re̱ꞌ kúníꞌ re̱ꞌ. Jee nkachiꞌ re̱ꞌ:
―Va̱ꞌa ka̱ꞌ kuvi ni̱ꞌ ya̱ retánꞌ kuviꞌ ni̱ꞌ nsú káꞌ ya̱ kutekuꞌ ni̱ꞌ ―nkachiꞌ re̱ꞌ.
9Saájee nkachiꞌ Ndiosíꞌ nu̱u̱nꞌ re̱ꞌ:
―¿Na̱ kuvi chi ki̱tɨ̱ꞌ iniꞌ nú jie̱ꞌe̱ꞌ yokúꞌúꞌ yaꞌá?
Saájee nna̱xiníkó Jonás nu̱u̱nꞌ re̱ꞌ:
―Ki̱tɨ̱ꞌ víꞌí nijia iniꞌ ni̱ꞌ, va̱ne̱ꞌ tɨ́ɨn ñuꞌunꞌ xi̱ni̱ꞌ ni̱ꞌ ―nkachiꞌ Jonás.
10Saájee nkachiꞌ I̱toꞌoꞌ‑ó nu̱u̱nꞌ re̱ꞌ:
―Noꞌó ya̱ kúnáꞌví iniꞌ nú yokúꞌúꞌ yaꞌá ya̱ nsú noꞌó nsi̱kuéꞌnu maa, ya̱ nta̱ꞌvi̱ꞌ‑i ɨɨn yakuááꞌ, jee inka yakuááꞌ jee nnaanꞌ‑a.
11’Chisaꞌ ñuunꞌ Nínive nééꞌ víꞌí ka̱ꞌ sientúꞌ o̱ko̱ꞌ mil rá ñɨvɨ ya̱ ntu jíníꞌ ráa ná kúvi ya̱ váꞌa ni jín ya̱ niváꞌa, ya̱ kúvi ráa kuéntáꞌ rá kuáchí lúlí, jee suni íyó víꞌí rá sa̱na̱ꞌ yukuán.
’Jee nuꞌuꞌ, ¿Á ntu víꞌí ka̱ꞌ vá íyó kunáꞌví iniꞌ ni̱ꞌ rá ñɨvɨ ñuunꞌ vá, résa? ―nkachiꞌ I̱toꞌoꞌ re̱ꞌ nu̱u̱nꞌ re̱ꞌ.
Currently Selected:
Jonás 4: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
