Hebreos 5

1Chi ta ɨɨn rá su̱tu̱ꞌ kúñáꞌnú, jee nka̱ji Ndiosíꞌ re̱ꞌ nteñu rá ñɨvɨ, jee ñani Ndiosíꞌ re̱ꞌ sáva sikúnkuvi re̱ꞌ rá tiñu nu̱u̱nꞌ Ndiosíꞌ jie̱ꞌe̱ꞌ ya̱ váꞌa rá ñɨvɨ, sáva so̱ko̱ꞌ re̱ꞌ nu̱u̱nꞌ Ndiosíꞌ rá nantíñú jín rá sa̱na̱ꞌ jie̱ꞌe̱ꞌ rá kua̱chi rá ñɨvɨ. 2Jee su̱tu̱ꞌ vá kuvi koo másúꞌ iniꞌ re̱ꞌ jín rá ñɨvɨ ntu jiáku̱ꞌun iniꞌ ráa Tu̱ꞌun Ndiosíꞌ jín ya̱ kújíká ráa nu̱u̱nꞌ tu̱ꞌun vá, chi suni ne̱ maá su̱tu̱ꞌ vá táyáꞌ iniꞌ re̱ꞌ kuéntáꞌ rá ñɨvɨ vá. 3Jee jie̱ꞌe̱ꞌ vá saáva suni íyó so̱ko̱ꞌ re̱ꞌ sa̱na̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi re̱ꞌ, kuéntáꞌ kua̱ꞌ jie̱ꞌe̱ꞌ kua̱chi rá ñɨvɨ.

4Jee ni ɨɨn te̱e ntu kúvi sáꞌá‑a maáa ɨɨn su̱tu̱ꞌ kúñáꞌnú, ntu kúvi sáñáꞌnú‑u maáa suꞌva. Chisaꞌ ɨɨn te̱e ya̱ kána maá Ndiosíꞌ ni̱ꞌi̱nꞌ‑i ya̱ kuvi‑i su̱tu̱ꞌ kúñáꞌnú, kuéntáꞌ kua̱ꞌ nkana Ndiosíꞌ Aarón sáva kuvi re̱ꞌ su̱tu̱ꞌ kúñáꞌnú. 5Jee sunisaá Cristo nika̱ꞌ, chi nsú maáréꞌ nsa̱ꞌá re̱ꞌ maáréꞌ kuñáꞌnú re̱ꞌ sáva kuvi re̱ꞌ su̱tu̱ꞌ kúñáꞌnú ka̱ꞌ, chisaꞌ maá Ndiosíꞌ nsáñáꞌnú re̱ꞌ maa chi nkachiꞌ re̱ꞌ nu̱u̱nꞌ‑u:

Suvinú kúvi Se̱ꞌya ni̱ꞌ.

Vitan nsa̱ꞌá ni̱ꞌ ya̱ nkenta kúvi ni̱ꞌ Tááꞌ nú.

6Jee inka nu̱u̱nꞌ suni tukuni nkachiꞌ Ndiosíꞌ nu̱u̱nꞌ Tutuꞌ Ííꞌ:

Noꞌó, nɨ́ɨ́nkání kúvi nú su̱tu̱ꞌ,

kuéntáꞌ kua̱ꞌ nkuvi su̱tu̱ꞌ Melquisedec.

7Jee rá ki̱vɨ̱ꞌ kúvi Cristo te̱e ñunéꞌyúꞌ sáá nneeꞌ re̱ꞌ iniꞌ ñɨ̱vɨ́ yaꞌá, jee ni̱ka̱nꞌ táꞌvíꞌ re̱ꞌ nkaꞌanꞌ kua̱chi re̱ꞌ ne̱ jiáku iniꞌ re̱ꞌ nka̱najíín re̱ꞌ nnaꞌyuꞌ ntenúúnꞌ re̱ꞌ nu̱u̱nꞌ Ndiosíꞌ ya̱ níso‑o fuersáꞌ sikáku‑u re̱ꞌ ya̱ kuviꞌ re̱ꞌ nékúvi. Jee saáva ntɨɨn kuéntáꞌ Ndiosíꞌ maa jie̱ꞌe̱ꞌ ya̱ ñúyúꞌví iniꞌ re̱ꞌ néꞌyá re̱ꞌ Ndiosíꞌ. 8Jee saáva asúnika̱ꞌ kúvi re̱ꞌ Se̱ꞌya Ndiosíꞌ [ya̱ nka̱níjiá re̱ꞌ maa], jee jie̱ꞌe̱ꞌ tu̱nóꞌó nnoꞌo re̱ꞌ saájee nku̱tu̱ꞌva re̱ꞌ na̱sa kúvi tu̱ꞌun kaníjiá. 9Jee sáá ni̱yo tu̱ꞌva re̱ꞌ sukuán, jee nkenta kúvi re̱ꞌ ne̱ nu̱u̱nꞌ váji ya̱ nene ñɨvɨ nu̱u̱nꞌ kua̱chi ráa jee sikáku re̱ꞌ nɨ́ɨ́nkání ntáká rá ñɨvɨ ya̱ káníjiá ráa re̱ꞌ. 10Jee ñani Ndiosíꞌ re̱ꞌ ya̱ kuvi re̱ꞌ su̱tu̱ꞌ maa kúñáꞌnú víꞌí ka̱ꞌ, kuéntáꞌ kua̱ꞌ nkuvi su̱tu̱ꞌ Melquisedec.

I̱yo kúvi xinóo‑ó tu̱ꞌun kúneí iniꞌ‑ó Ndiosíꞌ

11Íyó víꞌí ka̱ꞌ na̱ jie̱ꞌe̱ꞌ kaꞌanꞌ‑ó jie̱ꞌe̱ꞌ ntáká tu̱ꞌun yaꞌá. Soo víjí nakachiꞌ va̱ꞌa ni̱ꞌ maa nu̱u̱nꞌ ránoꞌó, chi jie̱ꞌe̱ꞌ ya̱ kuéé nkenta chúꞌun iniꞌ rán maa. 12Chi ya̱ va̱ji kue̱ꞌe̱ꞌ víꞌí tiempúꞌ ya̱ jíníꞌ rán Tu̱ꞌun Ndiosíꞌ, jee mestrúꞌ ya̱ kúvi rán réáꞌ sukuán ví‑i. Soo ni ntu̱ví, chisaꞌ jíniñúꞌún rán ya̱ tukuni naxinéꞌénꞌ ɨɨn ñɨvɨ ránoꞌó rá tu̱ꞌun yánká ya̱ xíꞌnañúꞌún xínéꞌénꞌ ránꞌ jie̱ꞌe̱ꞌ Tu̱ꞌun Ndiosíꞌ. Chi nkenta kúvi rán kuéntáꞌ ɨɨn nchíkɨ́n ya̱ jíniñúꞌún i̱i̱ꞌ‑i xu̱kui nsú káꞌ neyu. 13Chi ntáká rá ñɨvɨ ya̱ kuéntáꞌ títí i̱i̱ꞌ‑i xu̱kui, ya̱ ni ntu jíjia iniꞌ‑i nu̱u̱nꞌ Tu̱ꞌun Ndiosíꞌ, chi kúvi ñɨvɨ vá kuéntáꞌ ɨɨn nchíkɨ́n. Jee sáꞌá Tu̱ꞌun Ndiosíꞌ ya̱ kino̱o na̱a̱ꞌ ñɨvɨ nu̱u̱nꞌ re̱ꞌ. 14Chisaꞌ rá ñɨvɨ jíjia iniꞌ ráa nu̱u̱nꞌ Tu̱ꞌun Ndiosíꞌ jee kuéntáꞌ yájíꞌ ráa neyu, chi súkuáꞌa ráa kueꞌnu na̱a̱ꞌ ráa, sáva koo tu̱ꞌva ráa ka̱ji ánímaꞌ ráa jie̱ꞌe̱ꞌ ya̱ váꞌa jín ya̱ niváꞌa.

Currently Selected:

Hebreos 5: meh

Highlight

Copy

Compare