Génesis 38
38
Judá jín Tamar
1Jee tiempúꞌ yukuán, Judá nku̱sɨ́ɨ́n re̱ꞌ nu̱u̱nꞌ rá ñaniꞌ re̱ꞌ jee kua̱ꞌa̱nꞌ re̱ꞌ kino̱o re̱ꞌ veꞌi ɨɨn te̱e naní Hirá, ya̱ kúvi te̱e ñuunꞌ Adulam. 2Jee yukuán niniꞌ Judá se̱ꞌya sɨ́ꞌɨ́ ɨɨn te̱e ñuunꞌ Canaán ya̱ naní Súa, jee nta̱na̱ꞌá Judá jín ñaꞌan vá jee nkixiꞌ re̱ꞌ jín ña, 3Jee nna̱nise̱ꞌya ña jee ni̱yo ɨɨn se̱ꞌya yɨ́ɨ́ ráa, jee nsi̱kúnání ráa maa Er. 4Jee tukuni nna̱nise̱ꞌya ña jee ni̱yo inka ka̱ꞌ se̱ꞌya yɨ́ɨ́ ráa, ya̱ nsi̱kúnání ráa maa Onán. 5Jee tukuni ni̱yo inka ka̱ꞌ se̱ꞌya yɨ́ɨ́ ráa, ya̱ nsi̱kúnání ráa maa Sela, ya̱ nsi̱káku ña maa sáá nééꞌ Judá ñuunꞌ Quezib.
6Jee nstánáꞌá Judá Er, ya̱ kúvi se̱ꞌya yɨ́ɨ́ ñaꞌnu re̱ꞌ, jín ɨɨn ñaꞌan ya̱ naní Tamar. 7Soo jíníꞌ I̱toꞌoꞌ‑ó Ndiosíꞌ ya̱ niva̱ꞌa Er, ya̱ kúvi se̱ꞌya yɨ́ɨ́ ñaꞌnu Judá, jee nsa̱ꞌá I̱toꞌoꞌ‑ó ya̱ kuviꞌ‑i. 8Saájee nkachiꞌ Judá nu̱u̱nꞌ se̱ꞌya yɨ́ɨ́ re̱ꞌ Onán:
―Kɨ̱kusuꞌ nú jín ñasɨ́ꞌɨ́ ñaniꞌ nú ya̱ nkino̱o náꞌví jee suꞌva sikúnkuvi nú jín ñujiínꞌ ya̱ íyó saꞌá nú, sáva sikɨ́koo nú se̱ꞌya ichiyúkúnꞌ ya̱ kuvi ñaniꞌ nú ―nkachiꞌ Judá nu̱u̱nꞌ Onán.
9Soo jíníꞌ Onán ya̱ se̱ꞌya re̱ꞌ ya̱ koo‑o nkúvi kuvi‑i kuéntáꞌ se̱ꞌya maáréꞌ. Saáva sáá nkixiꞌ re̱ꞌ jín ñaꞌan náꞌví ya̱ kúvi ñasɨ́ꞌɨ́ ñaniꞌ re̱ꞌ vá, jee ñatɨ re̱ꞌ nute yátáꞌ re̱ꞌ nu̱u̱nꞌ ñuꞌun, ˻sáva ntu̱ví kúvi kɨ̱kuchi̱ji ña˼, sáva nkúꞌva re̱ꞌ ichiyúkúnꞌ nu̱u̱nꞌ ñaniꞌ re̱ꞌ. 10Jee nku̱níní iniꞌ I̱toꞌoꞌ nne̱ꞌyá re̱ꞌ ya̱ nsa̱ꞌá‑a, jee suni nsa̱ꞌá re̱ꞌ ya̱ kuviꞌ‑i. 11Saájee nkachiꞌ Judá nu̱u̱nꞌ sia̱nú re̱ꞌ Tamar:
―Kino̱o náꞌví nú kuneeꞌ nú veꞌi tátáꞌ nú nekuaꞌ kueꞌnu se̱ꞌya yɨ́ɨ́ ni̱ꞌ, Sela, jee kenta kui̱ya̱ꞌ re̱ꞌ ya̱ kuvi tana̱ꞌá re̱ꞌ ―nkachiꞌ Judá yaꞌá sáva ntu suni sa̱naanꞌ kuviꞌ Sela kuéntáꞌ ni̱ꞌi̱ꞌ rá ñaniꞌ‑i. Jee saáva kua̱ꞌa̱nꞌ Tamar kuneeꞌ ña veꞌi tátáꞌ ña.
12Jee sáá njia̱ꞌa kue̱ꞌe̱ꞌ tiempúꞌ jee ni̱ꞌi̱ꞌ ñasɨ́ꞌɨ́ Judá, ya̱ kúvi se̱ꞌya Súa. Sáá nnuva̱ꞌa iniꞌ Judá nu̱u̱nꞌ tu̱nkuéká iniꞌ re̱ꞌ ya̱ níꞌiꞌ ñasɨ́ꞌɨ́ re̱ꞌ, jee kua̱ꞌa̱nꞌ re̱ꞌ ñuunꞌ Timnat, nu̱u̱nꞌ íñɨ́ rá ñɨvɨ sété kachiꞌ rá lanchi re̱ꞌ. Jee kutáꞌán Hirá jín re̱ꞌ, ya̱ káꞌánꞌ mani jín re̱ꞌ, ya̱ kúvi te̱e ñuunꞌ Adulam. 13Jee nkachiꞌ ñɨvɨ nu̱u̱nꞌ Tamar:
―Kuniꞌ chi táchi̱so nú kua̱ꞌa̱nꞌ re̱ꞌ nu̱u̱nꞌ ñuunꞌ Timnat kua̱seté re̱ꞌ rá lanchi re̱ꞌ.
14Jee ntavaꞌ ña saꞌma ñúꞌún ña ya̱ stúvi‑i ya̱ nkino̱o náꞌví ña, jee nna̱ku̱ꞌun ña inka saꞌma jee ñasɨꞌ ña yɨkɨnúúnꞌ ña jín ɨɨn saꞌma, jee ña̱kuneeꞌ ña yuꞌú nu̱u̱nꞌ ki̱vɨ rá ñɨvɨ nu̱u̱nꞌ ñuunꞌ Enaim, ya̱ káá ichi nu̱u̱nꞌ kua̱ꞌa̱nꞌ ñuunꞌ Timnat. Jee nsa̱ꞌá ña yaꞌá suꞌva chi niniꞌ ña ya̱ ya ñaꞌnu Sela, jee ni ntiáꞌan stánáꞌá Judá ña jín Sela. 15Jee sáá niniꞌ Judá ña, jee nkaꞌvi iniꞌ re̱ꞌ ya̱ kúvi ña ɨɨn rá ñaꞌan sɨ́ɨ́ꞌ iniꞌ ya̱ xíkó ña maáña nu̱u̱nꞌ rá tee, chi jie̱ꞌe̱ꞌ nika̱ꞌ ñasɨꞌ ña yɨkɨnúúnꞌ ña. 16Saájee nku̱sɨ́ɨ́n re̱ꞌ yuíchí sáva kikuyatin re̱ꞌ nu̱u̱nꞌ ña, jee nkachiꞌ re̱ꞌ nu̱u̱nꞌ ña:
―¿Taji nú maánú nune̱ꞌén ni̱ꞌ jín noꞌó? ―nkachiꞌ re̱ꞌ nu̱u̱nꞌ ña soo ni nsáꞌ jíníꞌ re̱ꞌ ya̱ sia̱nú re̱ꞌ ví ña.
Jee nna̱xiníkó ña nu̱u̱nꞌ re̱ꞌ:
―¿Ná kúvi ya̱ taji nú jie̱ꞌe̱ꞌ ya̱ kava ni̱ꞌ jín nú? ―nkachiꞌ ña nu̱u̱nꞌ re̱ꞌ.
17Jee nna̱xiníkó re̱ꞌ:
―Tají ni̱ꞌ ɨɨn lítú lúlí nu̱u̱nꞌ nú ya̱ kúvi ɨɨn rá lítú ni̱ꞌ ―nkachiꞌ Judá.
Jee nkachiꞌ ña:
―Kuvi, retú taji nú ɨɨn nantíñú maánú nu̱u̱nꞌ ni̱ꞌ ya̱ kuvi kuéntáꞌ ɨɨn ya̱ nááꞌ nekuaꞌ tají nú lítú kiji nu̱u̱nꞌ ni̱ꞌ ―nkachiꞌ ña.
18Saájee nkachiꞌ Judá:
―¿Ná kúvi ya̱ taji ni̱ꞌ nu̱u̱nꞌ nú ya̱ kuvi‑i ya̱ nááꞌ? ―nkachiꞌ Judá.
Saájee nna̱xiníkó ña:
―Taji seyúꞌ nú, jín yoꞌo yúꞌvéꞌ yɨ́ꞌɨ́ seyúꞌ nú ya̱ nítakaa su̱ku̱nꞌ nú, jín karútíꞌ ya̱ ínaꞌá nú nu̱u̱nꞌ ni̱ꞌ ―nkachiꞌ ña.
Saájee njia̱ꞌa Judá rá nantíñú vá nu̱u̱nꞌ ña jee nkusi̱kɨ́ re̱ꞌ jín ña. Jee ña̱kuchi̱ji ña nsa̱ꞌá re̱ꞌ. 19Jee kuíre nnako̱o Tamar jee kua̱ꞌa̱nꞌ ña, jee nxi̱tá ña saꞌma ñásɨ́ꞌ yɨkɨnúúnꞌ ña, jee nna̱ku̱ꞌun tuku ña saꞌma ñuꞌun ña ya̱ stúvi‑i ya̱ nkino̱o náꞌví ña. 20Jee kuíre nchu̱ichí Judá lítú lúlí jín te̱e ñuunꞌ Adulam vá ya̱ káꞌánꞌ mani jín re̱ꞌ, sáva naku̱ꞌva ñaꞌan vá rá nantíñú nxi̱nóo Judá nu̱u̱nꞌ ña, soo ntu̱ví nna̱niꞌinꞌ te̱e vá ña. 21Saájee ni̱ka̱tu̱ꞌún re̱ꞌ rá te̱e ñuunꞌ yukuán:
―¿Né núꞌ íñɨ́ ñaꞌan ya̱ xíkó ña maáña núnéꞌén ña jín rá te̱e ya̱ íñɨ́‑ɨ yuꞌú ichi ñuunꞌ Enaim? ―nkachiꞌ re̱ꞌ nu̱u̱nꞌ rá te̱e vá.
Jee nna̱xiníkó ráa:
―Ntu̱ví íñɨ́ ni ɨɨn ñaꞌan yaꞌá ya̱ xíkó ña maáña kúsíkɨ́ iniꞌ ña jín rá te̱e ―nkachiꞌ ráa nu̱u̱nꞌ re̱ꞌ.
22Saájee nni̱kó re̱ꞌ kua̱noꞌonꞌ re̱ꞌ nu̱u̱nꞌ Judá, jee nkachiꞌ re̱ꞌ:
―Ntu̱ví nna̱niꞌinꞌ ni̱ꞌ ñaꞌan vá, jee suni rá te̱e ñuunꞌ yukuán nkachiꞌ ráa ya̱ ntu̱ví íñɨ́ ɨɨn ñaꞌan ya̱ xíkó ña maáña kúsíkɨ́ iniꞌ ña jín rá te̱e yukuán ―nkachiꞌ re̱ꞌ nu̱u̱nꞌ Judá.
23Saájee nkachiꞌ Judá:
―Nkínóo ña jín rá nantíñú ni̱ꞌ, sáva nku̱níichiꞌ rá ñɨvɨ kune̱ꞌyá ráa yó, soo ví ka̱ꞌ chi nta̱jí ni̱ꞌ lítú lúlí yaꞌá nu̱u̱nꞌ ña jee ntu̱ví nna̱niꞌinꞌ nú ña ―nkachiꞌ Judá.
24Jee sáá njia̱ꞌa yatin u̱ni̱ꞌ yo̱o̱ꞌ, jee njia̱ꞌa rá ñɨvɨ tu̱ꞌun nu̱u̱nꞌ Judá:
―Nxi̱kó sia̱nú nú, Tamar, maáña nkusi̱kɨ́ iniꞌ ña jín inka te̱e jee ntañúꞌún nékue̱ꞌi̱ꞌ ña ―nkachiꞌ ráa nu̱u̱nꞌ Judá.
Jee nta̱túníꞌ Judá:
―¡Tavaꞌ rán ña jee teñuꞌunꞌ rán ña! ―nkachiꞌ re̱ꞌ.
25Soo sáá táváꞌ ráa ña chíkéꞌi, jee ntaji ña ráa kikachiꞌ ráa nu̱u̱nꞌ táchi̱so ña:
“I̱toꞌoꞌ rá nantíñú yaꞌá ví te̱e ya̱ nsa̱ꞌá ñúchíji ni̱ꞌ. Kune̱ꞌyá nú jee kuniꞌ nú né ɨɨn nantíñú ví seyúꞌ yaꞌá, jín yoꞌo yúꞌvéꞌ yaꞌá yɨ́ꞌɨ́ seyúꞌ vá, jín karútíꞌ yaꞌá”, nkachiꞌ ña.
26Saájee sáá nna̱kuniꞌ Judá rá nantíñú vá, jee nkachiꞌ re̱ꞌ:
“Na̱a̱ꞌ ka̱ꞌ kúvi ña nsú káꞌ nuꞌuꞌ chi ntu̱ví nxítánáꞌá ni̱ꞌ ña jín se̱ꞌya yɨ́ɨ́ ni̱ꞌ, Sela”, nkachiꞌ re̱ꞌ.
Jee ni ɨɨn ichi ka̱ꞌ ntu̱ví nkíxíꞌ re̱ꞌ jín ña.
27Jee tiempúꞌ káku se̱ꞌya Tamar, jee ñúꞌún kuatíꞌ iniꞌ ña. 28Jee maa hora káku se̱ꞌya ña, jee ɨɨn rá nchíkɨ́n vá ntavaꞌ‑a naꞌá‑a. Saájee ñaꞌan ya̱ íxtáꞌvíꞌ‑i se̱ꞌya Tamar vá niꞌniꞌ ña ɨɨn yu̱ꞌve̱ꞌ kuéꞌé su̱ku̱nꞌ naꞌá nchíkɨ́n vá, jee nkachiꞌ ña:
“Nchíkɨ́n yaꞌá xíꞌna‑a ka̱ꞌ nkene”, nkachiꞌ ña.
29Soo nna̱tuviꞌ tuku nchíkɨ́n vá naꞌá‑a, jee xíꞌna ka̱ꞌ ñaniꞌ‑i nkene, saáva ñaꞌan ya̱ íxtáꞌvíꞌ nchíkɨ́n vá nsi̱kúnání ña maa Fares, chi nkachiꞌ ña:
“Na̱kua̱ꞌ nsa̱ꞌá ka̱ꞌ nó jee nkuvi nnine nú jee nkaku nú”, nkachiꞌ ña nu̱u̱nꞌ nchíkɨ́n vá.
30Jee kuíre nkene ñaniꞌ re̱ꞌ, ya̱ núꞌníꞌ yu̱ꞌve̱ꞌ kuéꞌé su̱ku̱nꞌ naꞌá‑a, jee nsi̱kúnání ña maa Zara.
Currently Selected:
Génesis 38: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
