Hechos 24

Náma Pablo maáa nu̱u̱nꞌ te̱e nísotíñú Félix

1Jee u̱ꞌu̱nꞌ ki̱vɨ̱ꞌ ka̱ꞌ, nkenta su̱tu̱ꞌ kúñáꞌnú ka̱ꞌ, naní Ananías, jín sava rá te̱e kúñáꞌnú, jín ɨɨn te̱e naní Tértulo. Tiñu re̱ꞌ ví ya̱ súkuáꞌa re̱ꞌ ley jee káꞌánꞌ re̱ꞌ jie̱ꞌe̱ꞌ inka ñɨvɨ nu̱u̱nꞌ te̱e jiéꞌnéꞌ kua̱chi. Jee nchikua̱chi ráa Pablo nu̱u̱nꞌ te̱e kúñáꞌnú. 2Sáá nkana te̱e nísotíñú vá Pablo, jee Tértulo nka̱jiéꞌé nxi̱kóñáꞌán re̱ꞌ maa, jee nkachiꞌ re̱ꞌ:

―Níꞌínꞌ ránꞌ ya̱ nééꞌ ñunkúún víꞌí ránꞌ jie̱ꞌe̱ꞌ ya̱ váꞌa sáꞌá nú. Jee suni va̱ꞌa ka̱ꞌ násaꞌá va̱ꞌa nú nación, chi níchí tátúníꞌ nú chi tu̱ꞌva víꞌí nú. 3Nɨꞌɨ nu̱u̱nꞌ, kúsɨ́ɨꞌ iniꞌ ránꞌ néꞌyá ránꞌ nɨꞌɨ ya̱ nsa̱ꞌá nú, jee nkútaꞌviꞌ víꞌí ránꞌ nu̱u̱nꞌ nú. Félix kúñáꞌnú ka̱ꞌ. 4Ntu kuíni ni̱ꞌ ixtá víꞌí ni̱ꞌ tiempúꞌ nú. Jee jíkánꞌ táꞌvíꞌ ni̱ꞌ nu̱u̱nꞌ nú ya̱ kuva̱ꞌa iniꞌ nú teso̱ꞌo nú ya̱ kaꞌanꞌ ni̱ꞌ yakuꞌ ni.

5’Jíníꞌ ránꞌ ya̱ xéénꞌ víꞌí sáꞌá te̱e yaꞌá. Chi sáꞌá re̱ꞌ ti̱xi̱nꞌ nteñu rá ñɨvɨ Israel, ya̱ nééꞌ nɨꞌɨ ñɨ̱vɨ́. Kúvi re̱ꞌ ɨɨn rá te̱e yósóꞌ nu̱u̱nꞌ rá ñɨvɨ níkɨ́nꞌ ichi túꞌún Jesús te̱e ñuunꞌ Nazaret. 6Jee suvire̱ꞌ suni nnu̱kú re̱ꞌ stívɨ́ re̱ꞌ veñu̱ꞌun káꞌnú, jee ntɨɨn ránꞌ maa. [Jee nkuini ránꞌ sanáaꞌ ránꞌ kua̱chi re̱ꞌ sáni káchíꞌ ley ránꞌ. 7Soo nki̱ní general Lisias maáréꞌ nteñu ránꞌ, jee ni̱ꞌin víꞌí ni̱xtá re̱ꞌ maa xi̱ntíín ránꞌ. 8Jee nta̱túníꞌ re̱ꞌ ya̱ kɨ̱ꞌɨ̱nꞌ ránꞌ xi̱kóñáꞌán ránꞌ maa nu̱u̱nꞌ nú.] Jee xináꞌmáꞌ nú maa, jee kúvi kukáꞌnú iniꞌ nú ya̱ íyó na̱a̱ꞌ nɨꞌɨ, ya̱ xíkóñáꞌán ránꞌ maa nu̱u̱nꞌ nú ―nkachiꞌ Tértulo.

9Jee suni nchi̱neí rá te̱e Israel tu̱ꞌun nkaꞌanꞌ re̱ꞌ, ya̱ íyó na̱a̱ꞌ sukuán jie̱ꞌe̱ꞌ re̱ꞌ. 10Jee sáá nsa̱ꞌá te̱e nísotíñú seña ya̱ kaꞌanꞌ Pablo, jee nkachiꞌ re̱ꞌ:

―Jíníꞌ ni̱ꞌ ya̱ kue̱ꞌe̱ꞌ kui̱ya̱ꞌ kúvi nú te̱e tátúníꞌ nu̱u̱nꞌ nación yaꞌá. Saáva kúsɨ́ɨꞌ iniꞌ ni̱ꞌ, nama ni̱ꞌ maáníꞌ nu̱u̱nꞌ nú. 11Kuvi nanukú nú jee kukáꞌnú iniꞌ nú, ya̱ ntu íyó ka̱ꞌ u̱xu̱vi̱ꞌ (12) ki̱vɨ̱ꞌ, ya̱ ña̱ꞌa̱nꞌ ni̱ꞌ Jerusalén nneñu̱ꞌun ni̱ꞌ Ndiosíꞌ. 12Soo ntu̱náꞌ nániꞌinꞌ ráa nuꞌuꞌ kántáꞌán túꞌun ni̱ꞌ jín ni ɨɨn ñɨvɨ, ni ntu nsa̱ꞌá ni̱ꞌ ti̱xi̱nꞌ jín rá ñɨvɨ iniꞌ veñu̱ꞌun káꞌnú, ni iniꞌ rá veꞌi sinagoga, ni rá nu̱u̱nꞌ ñuunꞌ káꞌnú Jerusalén. 13Suni ntu kuvi nastúvi ráa ya̱ naáꞌ ya̱ chíkuáchi ráa nuꞌuꞌ. 14Soo nánaꞌmaꞌ ni̱ꞌ tiñu yaꞌá nu̱u̱nꞌ nú. Níkɨ́nꞌ ni̱ꞌ ichi yaꞌá, ya̱ káchíꞌ ráa ichi túꞌún ví‑i. Suꞌva néñu̱ꞌun ni̱ꞌ Ndiosíꞌ ya̱ nneñu̱ꞌun rá tájííꞌ ráníꞌ yanaꞌán. Chi ínúꞌ iniꞌ ni̱ꞌ nɨꞌɨ sáni káchíꞌ tu̱ꞌun ley njia̱ꞌa Ndiosíꞌ nu̱u̱nꞌ Moisés yanaꞌán jín nɨꞌɨ tu̱ꞌun ntee rá te̱e ya̱ njia̱ꞌa Ndiosíꞌ maa nu̱u̱nꞌ ráa. 15Íyó tu̱neí iniꞌ ni̱ꞌ ya̱ saꞌá Ndiosíꞌ, kuéntáꞌ suni nétu ráa ya̱ natekuꞌ i̱i̱ꞌ rá níyɨ, va̱ni ñɨvɨ na̱a̱ꞌ áxí ñɨvɨ kánéꞌén, jee nako̱o rá ñunéꞌyúꞌ ráa. 16Saáva sukuáni núnasɨ́ ni̱ꞌ kunikɨnꞌ ni̱ꞌ ichi váꞌa, sáva kuniꞌ ni̱ꞌ ya̱ ntu níso ni̱ꞌ kua̱chi nu̱u̱nꞌ Ndiosíꞌ jín nu̱u̱nꞌ rá ñɨvɨ.

17’Sáá njia̱ꞌa víꞌí kui̱ya̱ꞌ ni̱kúténúún ni̱ꞌ rá inka ñuunꞌ, jee nnenta ni̱ꞌ ñuunꞌ ni̱ꞌ Israel, sáva naku̱ꞌva ni̱ꞌ caridad nu̱u̱nꞌ rá láꞌvíꞌ yaꞌá, jee suni so̱ko̱ꞌ ni̱ꞌ nu̱u̱nꞌ Ndiosíꞌ. 18Jee nna̱niꞌinꞌ ráa nuꞌuꞌ sáá sáꞌá ni̱ꞌ sukuán, chi ya̱ nsa̱ꞌá ninuꞌun ni̱ꞌ maáníꞌ nu̱u̱nꞌ Ndiosíꞌ. Soo ntu níyo kue̱ꞌe̱ꞌ ñɨvɨ jín ni̱ꞌ, ni ntu sáꞌá ni̱ꞌ ti̱xi̱nꞌ. 19Soo rá ñɨvɨ Israel váji ñuunꞌ Asia, jee íyó kuiñɨ ráa ichinúúnꞌ nú, jee xi̱kóñáꞌán ráa nuꞌuꞌ nu̱u̱nꞌ nú, retú íyó ya̱ kuvi chíkuáchi ráa nuꞌuꞌ. 20Áxí rá ñɨvɨ íñɨ́ yaꞌá, kachiꞌ ráa na̱ kua̱chi nsa̱ꞌá ni̱ꞌ ya̱ nku̱káꞌnú iniꞌ ráa, sáá ni̱ñɨ ni̱ꞌ nu̱u̱nꞌ Justicia Ñáꞌnú Israel. 21Kua̱chi ɨɨn tu̱ꞌun ni nka̱najíín ni̱ꞌ ichinúúnꞌ ráa: “Vitan chíkuáchi rán nuꞌuꞌ ichinúúnꞌ rán, ya̱ káchíꞌ ni̱ꞌ ya̱ natekuꞌ i̱i̱ꞌ rá níꞌiꞌ” ―nkachiꞌ Pablo.

22Nkuꞌɨɨn iniꞌ Félix sanáaꞌ re̱ꞌ kua̱chi Pablo. Chi jíníꞌ va̱ꞌa re̱ꞌ jie̱ꞌe̱ꞌ ñujiínꞌ vá. Jee nkachiꞌ re̱ꞌ:

―Sáá kiaaꞌ general Lisias jee sanáaꞌ ni̱ꞌ tiñu nú.

23Jee nta̱túníꞌ re̱ꞌ nu̱u̱nꞌ capitán ya̱ kúmí‑i Pablo. Soo ku̱ꞌva‑a kuiñɨ núne Pablo iniꞌ veka̱a. Jee koto kúsáꞌán ni ɨɨn rán chineí rá táꞌán Pablo maáréꞌ.

24Yakuꞌ ki̱vɨ̱ꞌ njia̱ꞌa, nkenta Félix jín ñasɨ́ꞌɨ́ re̱ꞌ, naní Drusila, ya̱ kúvi ñaꞌan ñuunꞌ Israel. Jee nta̱jí re̱ꞌ ña̱keꞌen ráa Pablo. Jee nteso̱ꞌo re̱ꞌ tu̱ꞌun, ya̱ nkaꞌanꞌ‑a na̱sa kuneí iniꞌ ñɨvɨ Cristo Jesús, ya̱ ñani Ndiosíꞌ tatúníꞌ ñɨ̱vɨ́. 25Jee sáá nákani Pablo jie̱ꞌe̱ꞌ ya̱ íyó kino̱o na̱a̱ꞌ ñɨvɨ nu̱u̱nꞌ Ndiosíꞌ, jín jie̱ꞌe̱ꞌ ya̱ íyó nakeꞌen‑ó maáó, jín jie̱ꞌe̱ꞌ ya̱ koo ɨɨn ki̱vɨ̱ꞌ sanáaꞌ Ndiosíꞌ jie̱ꞌe̱ꞌ rá kua̱chi nɨꞌɨ rá ñɨvɨ, jee nyu̱ꞌví Félix, jee nkachiꞌ re̱ꞌ nu̱u̱nꞌ‑u:

―Kuáꞌán ntañúꞌún. Jee sáá íyó tiempúꞌ ni̱ꞌ, jee kana ni̱ꞌ nó.

26Jee suni ñúꞌún iniꞌ re̱ꞌ ya̱ ku̱ꞌva Pablo xu̱ꞌún nu̱u̱nꞌ re̱ꞌ sáva siaáꞌ re̱ꞌ maa. Saáva nku̱kéꞌín nkana re̱ꞌ maa nku̱kuéntú re̱ꞌ jín‑i.

27Sáá njia̱ꞌa u̱vi̱ꞌ kui̱ya̱ꞌ, jee nna̱kuiñɨꞌ inka te̱e naní Porcio Festo nu̱u̱nꞌ tiñu nniso Félix. Soo nkuini Félix ya̱ kino̱o va̱ꞌa jín rá ñɨvɨ Israel, saáva nxi̱nóo re̱ꞌ Pablo veka̱a.

Currently Selected:

Hechos 24: meh

Highlight

Copy

Compare