2 Corintios 7

1Jee ránoꞌó ñanitáꞌán ya̱ ñúnúunꞌ ni̱ꞌ, nni̱ꞌi̱nꞌ‑ó tu̱ꞌun yaꞌá ya̱ nchi̱sóyuꞌú Ndiosíꞌ saꞌá re̱ꞌ jín‑ó. Jee saáva íyó koo noo ninuꞌun‑ó ya̱ nkɨ́ꞌɨ‑ó nu̱u̱nꞌ nta̱ká ya̱ sátéꞌén yɨkɨkúñu‑ó jín ánímaꞌ‑ó nu̱u̱nꞌ Ndiosíꞌ. Jee íyó kujia iniꞌ‑ó sasɨ́ɨ́n‑ó maáó ya̱ nkɨ́ꞌɨ‑ó nu̱u̱nꞌ ya̱ níváꞌa, chi ñúyúꞌví iniꞌ‑ó Ndiosíꞌ.

Nsama iniꞌ rá ñanitáꞌán ya̱ nééꞌ ñuunꞌ Corinto

2Kune ránú ánímaꞌ rán nu̱u̱nꞌ ránuꞌuꞌ. Chi ntu̱náꞌ njiáꞌa nsa̱ꞌá ráníꞌ nu̱u̱nꞌ ni ɨɨn ñɨvɨ, jee ntu̱náꞌ nsíjíta ránꞌ ni ɨɨn ñɨvɨ, jee ntu̱náꞌ nxínɨ́ꞌɨ ránꞌ ni ɨɨn ñɨvɨ. 3Soo nsáꞌ káchíꞌ ni̱ꞌ yaꞌá sáva tee ni̱ꞌ si̱kɨ̱ꞌ ránoꞌó, chi ya̱ nkachiꞌ ni̱ꞌ xíꞌna, ya̱ ñúnúunꞌ ránꞌ ránoꞌó ñúꞌún iniꞌ ánímaꞌ ráníꞌ ránoꞌó, va̱ni kuviꞌ ránꞌ jín ránoꞌó va̱ni kutekuꞌ ránꞌ jín ránoꞌó. 4Jee káꞌánꞌ neí iniꞌ ni̱ꞌ jín ránoꞌó. Jee káꞌánꞌ téyɨ́ɨ́ ni̱ꞌ jie̱ꞌe̱ꞌ ránoꞌó. Chi núváꞌa iniꞌ ni̱ꞌ jee kúsɨ́ɨꞌ nasɨ́kuitɨꞌ iniꞌ ánímaꞌ ni̱ꞌ sú na̱sa ka̱ꞌ nta̱ká tu̱nóꞌó nóꞌo ráníꞌ. 5Chi máá naáꞌ nijia sáá nkenta ráníꞌ nu̱u̱nꞌ ñuunꞌ Macedonia, jee ntu̱ví nnájiáví ñunéꞌyúꞌ ránꞌ, chisaꞌ ntáká nu̱u̱nꞌ nnoꞌo ránꞌ tu̱nóꞌó, nñuti̱yu̱ꞌ ránꞌ nsa̱ꞌá ñɨvɨ tuntíxín jín ránꞌ, jee nñu̱ꞌun yúꞌví iniꞌ ránꞌ. 6Soo Ndiosíꞌ, ya̱ násaváꞌa re̱ꞌ iniꞌ rá ñɨvɨ ya̱ núkuéká iniꞌ ráa, jee nna̱saváꞌa re̱ꞌ iniꞌ ránꞌ sáá nkiji Tito. 7Jee nsú kua̱chi ya̱ nkiji Tito núváꞌa iniꞌ ránꞌ, chisaꞌ suni nna̱saváꞌa re̱ꞌ iniꞌ ránuꞌuꞌ jie̱ꞌe̱ꞌ ya̱ núváꞌa iniꞌ re̱ꞌ jie̱ꞌe̱ꞌ ránoꞌó. Chi nna̱kani re̱ꞌ nu̱u̱nꞌ ránuꞌuꞌ ya̱ ñúꞌún víꞌí iniꞌ ránú kune̱ꞌyá tuku rán ránuꞌuꞌ, jín ya̱ ñúꞌún kuáchi iniꞌ ránú jie̱ꞌe̱ꞌ ya̱ nsa̱ꞌá ránú, jín jie̱ꞌe̱ꞌ ya̱ nániꞌvɨꞌ iniꞌ rán jie̱ꞌe̱ꞌ ránuꞌuꞌ. Jee saáva kúsɨ́ɨꞌ víꞌí ka̱ꞌ iniꞌ ánímaꞌ ni̱ꞌ.

8Jee tutuꞌ ya̱ ntaji ni̱ꞌ nu̱u̱nꞌ ránoꞌó, jee súka̱ꞌ nsa̱ꞌá‑a ya̱ nnu̱kuéká iniꞌ ránú, soo ntu ñúkuáchi iniꞌ ni̱ꞌ. Súka̱ꞌ nñukua̱chi iniꞌ ni̱ꞌ, nékúvi, chi jíníꞌ ni̱ꞌ ya̱ nnu̱kuéká iniꞌ rán ɨnúún ni. 9Soo vitan jee kúsɨ́ɨꞌ iniꞌ ni̱ꞌ, soo nsú jie̱ꞌe̱ꞌ ya̱ nku̱kuéká iniꞌ rán, chisaꞌ jie̱ꞌe̱ꞌ ya̱ nku̱kuéká iniꞌ rán vá nsa̱ꞌá‑a ya̱ nna̱kani iniꞌ rán. Jee sukuán nku̱kuéká iniꞌ rán sáni kuíni Ndiosíꞌ. Saáva ntu̱náꞌ nsúkuíta rán nu̱u̱nꞌ Ndiosíꞌ jie̱ꞌe̱ꞌ ya̱ nsa̱ꞌá ráníꞌ. 10Chi tu̱nkuéká íyó iniꞌ ñɨvɨ sáni kuíni Ndiosíꞌ, jee yukuán sáꞌá‑a ya̱ nakani iniꞌ ráa ya̱ kenta sikáku Ndiosíꞌ ráa jie̱ꞌe̱ꞌ kua̱chi ráa, jee ntu ñúkuáchi iniꞌ ráa jie̱ꞌe̱ꞌ vá. Soo tu̱nkuéká íyó iniꞌ rá ñɨvɨ ñɨ̱vɨ́, ya̱ ntu yɨ́ꞌɨ́ ráa xi̱ntíín Ndiosíꞌ, jee yukuán sáꞌá‑a ya̱ kuéntáꞌ kuviꞌ ráa nu̱u̱nꞌ Ndiosíꞌ. 11Chi tu̱nkuéká ni̱yo iniꞌ rán sáni kuíni Ndiosíꞌ, jee tɨɨn kuéntáꞌ ránú ná kúvi ya̱ nsa̱ꞌá‑a iniꞌ ánímaꞌ rán:

¡Na̱ ka̱ꞌ ntɨɨn ñáꞌnú rán tiñu yaꞌá!

¡Na̱ ka̱ꞌ nnakui̱ñɨ̱ꞌ rán jín ránuꞌuꞌ!

¡Na̱ ka̱ꞌ nki̱tɨ̱ꞌ iniꞌ maárán jie̱ꞌe̱ꞌ ya̱ nsa̱ꞌá rán!

¡Na̱ ka̱ꞌ nñu̱yúꞌví iniꞌ rán Ndiosíꞌ!

¡Na̱ ka̱ꞌ nñu̱ꞌun káñá iniꞌ rán kune̱ꞌyá tuku rán ránuꞌuꞌ!

¡Na̱ ka̱ꞌ nániꞌvɨꞌ iniꞌ rán jie̱ꞌe̱ꞌ ránuꞌuꞌ!

¡Na̱ ka̱ꞌ viiꞌ nsa̱náaꞌ rán si̱kɨ̱ꞌ ñɨvɨ vá ya̱ nsa̱ꞌá‑a kua̱chi yaꞌá!

Jee ntáká nu̱u̱nꞌ nstúvi rán ya̱ íyó noo ninuꞌun rán jie̱ꞌe̱ꞌ tiñu níváꞌa yaꞌá. 12Saájee ntee ni̱ꞌ tutuꞌ vá nu̱u̱nꞌ rán, soo nsú kua̱chi jie̱ꞌe̱ꞌ ñɨvɨ vá ya̱ nsa̱ꞌá kua̱chi vá, jee ni nsú jie̱ꞌe̱ꞌ ñɨvɨ ya̱ nníꞌinꞌ‑i nnoꞌo‑o ya̱ níváꞌa vá. Chisaꞌ ntee ni̱ꞌ sáva ichinúúnꞌ Ndiosíꞌ túvi nu̱u̱nꞌ maárán ya̱ ñúꞌún káñá iniꞌ rán jie̱ꞌe̱ꞌ ránuꞌuꞌ. 13Saáva núváꞌa iniꞌ ráníꞌ.

Núváꞌa iniꞌ ráníꞌ, soo saꞌ víꞌí káꞌ kúsɨ́ɨꞌ nasɨ́kuitɨꞌ iniꞌ ránꞌ ya̱ kúsɨ́ɨꞌ iniꞌ Tito, chi va̱ne̱ꞌ va̱ꞌa kúvi iniꞌ ánímaꞌ re̱ꞌ jie̱ꞌe̱ꞌ nta̱ká ránoꞌó. 14Chi sú sukuán nkaꞌanꞌ téyɨ́ɨ́ ni̱ꞌ nu̱u̱nꞌ re̱ꞌ jie̱ꞌe̱ꞌ ránoꞌó, ntu níyo tu̱nkánuun ni̱ꞌ. Chi sáni ntáká tu̱ꞌun ya̱ nkachiꞌ ráníꞌ nu̱u̱nꞌ ránoꞌó kúvi ya̱ naáꞌ, jee suni sukuán tu̱ꞌun ya̱ nna̱kani téyɨ́ɨ́ ráníꞌ nu̱u̱nꞌ Tito nkene na̱a̱ꞌ‑a. 15Jee saꞌ víꞌí káꞌ ñúꞌún ñunkúún nasɨ́kuitɨꞌ iniꞌ ánímaꞌ Tito néꞌyá re̱ꞌ ránoꞌó, sáá nákúꞌun iniꞌ re̱ꞌ ya̱ nka̱níjiá ntáká ránú tu̱ꞌun re̱ꞌ, jín ya̱ nna̱kuatáꞌví rán re̱ꞌ, ne̱ nñu̱yúꞌví iniꞌ rán jín ne̱ nkisɨ iniꞌ rán. 16Jee kúsɨ́ɨꞌ iniꞌ ni̱ꞌ ya̱ ntáká tiñu ne̱ yuchí kúneí iniꞌ ni̱ꞌ ránoꞌó.

Currently Selected:

2 Corintios 7: meh

Highlight

Copy

Compare