1 Juan 5

Ya̱ kúneí‑ó si̱kɨ̱ꞌ ya̱ niva̱ꞌa íyó iniꞌ ñɨ̱vɨ́ yaꞌá

1Nta̱ká ñɨvɨ ya̱ jínúꞌ iniꞌ ya̱ Jesús ví Cristo, ya̱ ñani Ndiosíꞌ sáva tatúníꞌ‑i nu̱u̱nꞌ ñɨ̱vɨ́, jee suviráa sáꞌá Ndiosíꞌ ya̱ nna̱kaku ráa kúvi nijia ráa se̱ꞌya re̱ꞌ. Jee nta̱ká ñɨvɨ ya̱ ñúnúunꞌ ráa maáréꞌ ya̱ kúvi Tátáꞌ ráa, jee suni ñúnúunꞌ ráa rá inka ñɨvɨ ya̱ nsa̱ꞌá re̱ꞌ ya̱ nna̱kaku ráa kúvi ráa se̱ꞌya re̱ꞌ. 2Jee jie̱ꞌe̱ꞌ yaꞌá jíníꞌ‑ó ya̱ ñúnúunꞌ‑ó rá se̱ꞌya Ndiosíꞌ, sáá ñúnúunꞌ‑ó Ndiosíꞌ, jee síkúnkuvi‑ó rá tu̱ꞌun nta̱túníꞌ re̱ꞌ. 3Chi tu̱ꞌun ñúnúunꞌ‑ó Ndiosíꞌ kúvi yaꞌá ya̱ síkúnkuvi‑ó rá tu̱ꞌun nta̱túníꞌ re̱ꞌ. Jee rá tiñu nta̱túníꞌ re̱ꞌ chi nsáꞌ véi ví‑i. 4Chi nta̱ká ñɨvɨ ya̱ nsa̱ꞌá Ndiosíꞌ ya̱ nna̱kaku ráa kúvi nijia ráa se̱ꞌya re̱ꞌ, jee kúneí ráa si̱kɨ̱ꞌ ñujiínꞌ ñɨ̱vɨ́ yaꞌá ya̱ ntu yɨ́ꞌɨ́ vá xi̱ntíín Ndiosíꞌ. Jee tu̱ꞌun kúneí iniꞌ‑ó Jesús vá kúvi fesáꞌ ya̱ kúneí‑ó si̱kɨ̱ꞌ ñujiínꞌ ñɨ̱vɨ́ yaꞌá. 5¿Né ɨɨn ví ya̱ kúneí si̱kɨ̱ꞌ ñujiínꞌ ñɨ̱vɨ́ yaꞌá, ya̱ ntu sáꞌá‑a vá, résa? Suvivá kúvi ñɨvɨ ya̱ jínúꞌ iniꞌ‑i ya̱ Jesús ví máá Se̱ꞌya Ndiosíꞌ.

Tu̱ꞌun jiáꞌa ya̱ naáꞌ jie̱ꞌe̱ꞌ Se̱ꞌya Ndiosíꞌ

6Jee suvire̱ꞌ kúvi Jesús ya̱ nkiji re̱ꞌ jee túvi ya̱ kúvi re̱ꞌ Cristo sáá ña̱nuté re̱ꞌ jín nute, jee ñatɨ ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nu̱u̱nꞌ kurúsiꞌ jie̱ꞌe̱ꞌ‑ó. Jee nsáꞌ kua̱chi kuitɨꞌ ña̱nuté re̱ꞌ jín nute, chisaꞌ suni ñatɨ ni̱ñɨ̱ꞌ re̱ꞌ nu̱u̱nꞌ kurúsiꞌ. Jee máá Ta̱chi̱ꞌ Ííꞌ Ndiosíꞌ ví ya̱ jiáꞌa ya̱ naáꞌ jie̱ꞌe̱ꞌ yaꞌá, chi mánitu̱ꞌun íyó na̱a̱ꞌ ñúꞌún iniꞌ re̱ꞌ. 7Chi [ne̱ antivɨ́ nu̱u̱nꞌ nééꞌ Ndiosíꞌ] íyó u̱ni̱ꞌ ya̱ jiáꞌa ráa ya̱ naáꞌ jie̱ꞌe̱ꞌ tu̱ꞌun yaꞌá: [máá Tátáꞌ‑ó Ndiosíꞌ, jín máá Jesús, ya̱ naní tu̱ꞌun vá, jín Ta̱chi̱ꞌ Ííꞌ re̱ꞌ. Jee ni núníꞌ ráa yaꞌá ɨɨn nuún ni jiáꞌa ráa ya̱ naáꞌ.] #5:7 Yatin nɨꞌɨ ñɨvɨ ínúꞌ iniꞌ ya̱ ntu ntee Juan sava versículo 7. Chi rá tutuꞌ yanaꞌán víꞌí ka̱ꞌ, ntu níso ráa rá tu̱ꞌun yaꞌá. 8Jee íyó u̱ni̱ꞌ iniꞌ ñɨ̱vɨ́ yaꞌá ya̱ jiáꞌa ráa ya̱ naáꞌ ya̱ máá Se̱ꞌya Ndiosíꞌ ví Jesús: máá Ta̱chi̱ꞌ Ííꞌ Ndiosíꞌ, jín nute ya̱ ña̱nuté Jesús, jín ni̱ñɨ̱ꞌ re̱ꞌ ya̱ ñatɨ‑ɨ. Jee ni núníꞌ ráa yaꞌá ɨɨn nuún ni jiáꞌa ráa ya̱ naáꞌ. 9Jee nu̱u̱nꞌ ya̱ tɨ́ɨn kuéntáꞌ‑ó tu̱ꞌun jiáꞌa rá ñɨvɨ ya̱ naáꞌ, soo ya̱ ñáꞌnú ka̱ꞌ ví tu̱ꞌun na̱a̱ꞌ jiáꞌa Ndiosíꞌ, chi tu̱ꞌun na̱a̱ꞌ Ndiosíꞌ ví yaꞌá, chi njia̱ꞌa re̱ꞌ ya̱ naáꞌ jie̱ꞌe̱ꞌ Se̱ꞌya re̱ꞌ. 10Jee ñɨvɨ ya̱ kúneí iniꞌ ráa Se̱ꞌya Ndiosíꞌ, jee ñúꞌún ya̱ naáꞌ jiáꞌa Ndiosíꞌ iniꞌ ánímaꞌ ñɨvɨ vá. Jee ñɨvɨ ya̱ ntu jínúꞌ iniꞌ ráa Ndiosíꞌ, jee nátatúꞌún ñɨvɨ vá re̱ꞌ chi ntu ínúꞌ iniꞌ ráa tu̱ꞌun na̱a̱ꞌ ya̱ njiáꞌa re̱ꞌ jie̱ꞌe̱ꞌ Se̱ꞌya re̱ꞌ. 11Jee tu̱ꞌun na̱a̱ꞌ jiáꞌa re̱ꞌ ví yaꞌá: ya̱ ntaji Ndiosíꞌ ya̱ kutekuꞌ‑ó nɨ́ɨ́nkání jín re̱ꞌ. Jee níꞌínꞌ ñɨvɨ kutekuꞌ ráa jín re̱ꞌ jie̱ꞌe̱ꞌ yɨ́ꞌɨ́ ráa naꞌá Se̱ꞌya re̱ꞌ. 12Jee ñɨvɨ ya̱ íyó jín Se̱ꞌya Ndiosíꞌ jee tékúꞌ‑u jín re̱ꞌ. Jee ñɨvɨ ya̱ ntu̱ví íyó jín Se̱ꞌya re̱ꞌ jee ntu tékúꞌ‑u jín re̱ꞌ.

Nákutíñú Juan ntíꞌ ka̱ꞌ jee nɨꞌɨ re̱ꞌ

13Rá tu̱ꞌun yaꞌá ntee ni̱ꞌ nu̱u̱nꞌ ránoꞌó ya̱ kúneí iniꞌ rán Se̱ꞌya Ndiosíꞌ sáva kukáꞌnú na̱a̱ꞌ iniꞌ rán ya̱ ya tékúꞌ rán nɨ́ɨ́nkání jín re̱ꞌ. 14Jee kúneí iniꞌ‑ó Ndiosíꞌ ya̱ retú jíkánꞌ‑ó na̱ni kúvi nu̱u̱nꞌ re̱ꞌ, ya̱ kúvi sánikua̱ꞌ kuíni re̱ꞌ, jee tésóꞌo ñáꞌnú re̱ꞌ maa. 15Jee retú jíníꞌ‑ó ya̱ tésóꞌo ñáꞌnú re̱ꞌ na̱ni jíkánꞌ‑ó nu̱u̱nꞌ re̱ꞌ jee jíníꞌ‑ó ya̱ ya nni̱ꞌi̱nꞌ‑ó ya̱ níkanꞌ‑ó nu̱u̱nꞌ re̱ꞌ.

16Retú néni ɨɨn rán néꞌyá‑a ya̱ sáꞌá ɨɨn ñanitáꞌán‑a kua̱chi, ya̱ nsáꞌ sáꞌá kua̱chi vá ya̱ koo kuéntáꞌ kuviꞌ ñanitáꞌán vá nu̱u̱nꞌ Ndiosíꞌ, jee ka̱ka̱nꞌ táꞌvíꞌ‑i nu̱u̱nꞌ Ndiosíꞌ jie̱ꞌe̱ꞌ ñanitáꞌán vá. Jee Ndiosíꞌ saꞌá ya̱ koo kuéntáꞌ natekuꞌ ñanitáꞌán vá nu̱u̱nꞌ re̱ꞌ, retú ntu kúvi kua̱chi ya̱ ni̱ꞌi̱nꞌ ñanitáꞌán vá ya̱ kuviꞌ‑i nu̱u̱nꞌ re̱ꞌ. Chi íyó kua̱chi ya̱ jíꞌíꞌ ñɨvɨ nu̱u̱nꞌ Ndiosíꞌ. Jee nsáꞌ káchíꞌ ni̱ꞌ ya̱ ka̱ka̱nꞌ táꞌvíꞌ rán jie̱ꞌe̱ꞌ rá ñɨvɨ ya̱ sáꞌá kua̱chi yaꞌá. #5:16 Áxí kúvi kachiꞌ‑ó: retú néni ɨɨn rán jíníꞌ‑i ya̱ sáꞌá ɨɨn ñanitáꞌán‑a kua̱chi, ya̱ nsú kua̱chi ya̱ sáꞌá‑a ya̱ kuviꞌ ñanitáꞌán vá ví‑i, jee ka̱ka̱nꞌ táꞌvíꞌ‑i nu̱u̱nꞌ Ndiosíꞌ jie̱ꞌe̱ꞌ ñɨvɨ sáꞌá kua̱chi vá. Jee Ndiosíꞌ saꞌá ya̱ kutekuꞌ ñanitáꞌán vá. Sáꞌá‑ó suꞌva jie̱ꞌe̱ꞌ ñɨvɨ ya̱ sáꞌá kua̱chi ya̱ nsáꞌ sáꞌá‑a kuviꞌ ráa. Chi íyó kua̱chi ya̱ sáꞌá‑a ya̱ kuviꞌ ñɨvɨ. Jee jie̱ꞌe̱ꞌ kua̱chi yaꞌá jee nsáꞌ káchíꞌ ni̱ꞌ ya̱ ka̱ka̱nꞌ táꞌvíꞌ rán jie̱ꞌe̱ꞌ rá ñɨvɨ ya̱ sáꞌá maa. 17Nta̱ká tiñu niva̱ꞌa kúvi‑i kua̱chi. Soo íyó kua̱chi ya̱ nsáꞌ sáꞌá‑a ya̱ kuviꞌ ráa.

18Jee jíníꞌ‑ó ya̱ nta̱ká rá ñɨvɨ ya̱ nsa̱ꞌá Ndiosíꞌ ya̱ nna̱kaku ráa kúvi ráa se̱ꞌya re̱ꞌ, ntu̱ví jíka ráa jín kua̱chi. Jee Jesús ya̱ nkaku re̱ꞌ va̱ji re̱ꞌ ne̱ nu̱u̱nꞌ Ndiosíꞌ jee kúvi re̱ꞌ máá Se̱ꞌya Ndiosíꞌ, jee suvire̱ꞌ chi náma re̱ꞌ ráa, jee ntu kúvi tɨɨn niva̱ꞌa kui̱ꞌna̱ꞌ kúñáꞌnú ráa. 19Jee jíníꞌ‑ó ya̱ kúvi‑ó ñɨvɨ Ndiosíꞌ, jín ya̱ kua̱íyó kuitɨꞌ rá inka ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa nu̱u̱nꞌ re̱ꞌ, yɨ́ꞌɨ́ ráa chi̱ji xi̱ntíín kui̱ꞌna̱ꞌ kúñáꞌnú. 20Soo jíníꞌ‑ó ya̱ nkiji Se̱ꞌya Ndiosíꞌ, jee nsa̱ꞌá re̱ꞌ ya̱ ki̱ku̱ꞌun iniꞌ‑ó sáva kuniꞌ‑ó maáréꞌ ya̱ kúvi nijia re̱ꞌ Ndiosíꞌ. Jee yɨ́ꞌɨ́‑ó iniꞌ naꞌá maáréꞌ ya̱ kúvi nijia Ndiosíꞌ. Yɨ́ꞌɨ́‑ó naꞌá Se̱ꞌya re̱ꞌ, Jesús ya̱ kúvi Cristo. Suvivá kúvi nijia‑a Ndiosíꞌ, jee maáa ví ya̱ sáꞌá‑a ya̱ kutekuꞌ‑ó nɨ́ɨ́nkání jín Ndiosíꞌ.

21Ránoꞌó ya̱ kúvi kuéntáꞌ rá se̱ꞌya ni̱ꞌ, kumí rán maárán ya̱ chusává rán maárán nu̱u̱nꞌ rá nantíñú ya̱ nsú Ndiosíꞌ tékúꞌ ví ráa, ya̱ néñu̱ꞌun rá ñɨvɨ ñɨ̱vɨ́. Suꞌva koo. Amén.

Currently Selected:

1 Juan 5: meh

Highlight

Copy

Compare