1 Corintios 8

Tu̱ꞌun jie̱ꞌe̱ꞌ rá ku̱ñu ya̱ sókóꞌ rá ñɨvɨ nu̱u̱nꞌ rá santúꞌ

1Ntañúꞌún jee káchíꞌ tuku ni̱ꞌ inka ka̱ꞌ tu̱ꞌun jie̱ꞌe̱ꞌ rá sókóꞌ rá ñɨvɨ nu̱u̱nꞌ rá nantíñú ya̱ ntu kúvi Ndiosíꞌ tékúꞌ. Nkachiꞌ ránú ya̱ “jíníꞌ‑ó ya̱ jíníꞌ ntáká‑ó na̱sa íyó tu̱ꞌun jie̱ꞌe̱ꞌ‑e.” Soo sáꞌá víxiꞌ ka̱ꞌá‑ó jie̱ꞌe̱ꞌ ya̱ káchíꞌ‑ó ya̱ jíníꞌ‑ó nɨꞌɨ. Soo jie̱ꞌe̱ꞌ ya̱ ñúnúunꞌ‑ó rá ñanitáꞌán‑ó, jee yaꞌá sáꞌá ya̱ jíjia iniꞌ‑ó íyó kutú‑ó jín tu̱ꞌun I̱toꞌoꞌ‑ó. 2Jee retú néni ɨɨn ñɨvɨ jiáni iniꞌ‑i ya̱ jíníꞌ va̱ꞌa‑a, soo ntu̱ví chi ni ntiáꞌan kuniꞌ va̱ꞌa‑a sáá íyó kuniꞌ va̱ꞌa‑a. 3Soo retú néni ɨɨn ñɨvɨ ya̱ ñúnúunꞌ‑u Ndiosíꞌ, jee jíníꞌ Ndiosíꞌ iniꞌ‑i jee ma̱ni̱ꞌ re̱ꞌ jín‑i.

4Saájee káchíꞌ ni̱ꞌ tu̱ꞌun jie̱ꞌe̱ꞌ rá sókóꞌ rá ñɨvɨ nu̱u̱nꞌ rá santúꞌ ñunéꞌyúꞌ. Jee jíníꞌ‑ó ya̱ ntu̱náꞌ kúvi rá nantíñú nsa̱ꞌá jín naꞌá íyó iniꞌ ñɨ̱vɨ́ yaꞌá ya̱ néñu̱ꞌun ñɨvɨ, chi ntu̱ví íyó inka ka̱ꞌ ndiosíꞌ chi métúꞌún Ndiosíꞌ tékúꞌ ni vá íyó. 5Chi súnika̱ꞌ retú íyó rá káchíꞌ rá ñɨvɨ ya̱ kúvi rává ndiosíꞌ, va̱ni súkún, áxí va̱ni nu̱u̱nꞌ ñu̱ꞌún, jee súnika̱ꞌ sukuán káchíꞌ ráa ya̱ íyó kue̱ꞌe̱ꞌ víꞌí rá ndiosíꞌ jín kue̱ꞌe̱ꞌ víꞌí rá i̱toꞌoꞌ, 6soo nu̱u̱nꞌ maáó, chi métúꞌún ni Ndiosíꞌ íyó ya̱ kúvi Tátáꞌ‑ó. Jee maáréꞌ nsa̱ꞌá ntáká ya̱ íyó, jee suni maáó nsáꞌá re̱ꞌ yó sáva kɨtíñú‑ó nu̱u̱nꞌ re̱ꞌ. Jee suni ɨɨn ni I̱toꞌoꞌ‑ó íyó, ya̱ suvi kúvi Jesús ya̱ kúvi re̱ꞌ Cristo, ya̱ ña̱tíñú Ndiosíꞌ maa sáva nsa̱ꞌá ráa ntáká ya̱ íyó, jee suni nsa̱ꞌá re̱ꞌ yó ranika̱ꞌ.

7Soo nsú nɨꞌɨ rá ñɨvɨ jíníꞌ ráa yaꞌá, jee sava ráa nka̱an ráa néñu̱ꞌun ráa rá nantíñú nsa̱ꞌá jín naꞌá ne̱ ntiáꞌan ji̱nu̱ꞌ iniꞌ ráa Cristo, jee ne̱ vitan jiáni iniꞌ ráa ya̱ néñu̱ꞌun ñɨvɨ rá nantíñú nsa̱ꞌá jín naꞌá sáá yájíꞌ ñɨvɨ neyu ya̱ sókóꞌ rá ñɨvɨ nu̱u̱nꞌ‑u. Jee táyáꞌ iniꞌ ráa chi ntiáꞌan kujia iniꞌ ráa jín Tu̱ꞌun Ndiosíꞌ, jee retú yájíꞌ ráa maa jee ñúkuáchi iniꞌ ráa chi káꞌvi iniꞌ ráa sáꞌá ráa kua̱chi. 8Soo nsú jie̱ꞌe̱ꞌ ya̱ yájíꞌ‑ó nastúꞌva‑a yó nu̱u̱nꞌ Ndiosíꞌ. Ni retú ntu yájíꞌ‑ó maa nsáꞌ kene niváꞌa ka̱ꞌ jín‑ó ichinúúnꞌ Ndiosíꞌ, ni retú yájíꞌ‑ó nsáꞌ kene va̱ꞌa ka̱ꞌ jín‑ó ichinúúnꞌ re̱ꞌ.

9Soo sú íyó núne yájíꞌ rán ku̱ñu vá, kumí rán maárán sáva nsáꞌ kenta sikíninkava ya̱ yájíꞌ rán maa rá ñanitáꞌán rán ya̱ táyáꞌ iniꞌ ráa ntiáꞌan kujia va̱ꞌa iniꞌ ráa nu̱u̱nꞌ Tu̱ꞌun Ndiosíꞌ. 10Chi maánú ya̱ jíníꞌ nú ya̱ nsú kua̱chi kúvi ya̱ kajiꞌ ku̱ñu vá, soo retú yájíꞌ nú ku̱ñu iniꞌ veꞌi nu̱u̱nꞌ néñu̱ꞌun ráa rá santúꞌ ñunéꞌyúꞌ, jee ɨɨn rá ñanitáꞌán nú ya̱ táyáꞌ iniꞌ ráa tu̱ꞌun jiáni iniꞌ ráa jie̱ꞌe̱ꞌ ya̱ ntiáꞌan kujia iniꞌ‑i nu̱u̱nꞌ Tu̱ꞌun Ndiosíꞌ, jee retú kuniꞌ‑i noꞌó nééꞌ nú yájíꞌ nú yukuán, jee, ¿á nsáꞌ sikúvi nú iniꞌ‑i kajiꞌ‑i ku̱ñu ya̱ nsókoꞌ nu̱u̱nꞌ rá nantíñú vá ya̱ ntu kúvi Ndiosíꞌ, súka̱ꞌ jiáni iniꞌ‑i ya̱ kua̱chi kúvi‑i rúja? 11Jee sukuán sijíta nú ñanitáꞌán nú ya̱ táyáꞌ iniꞌ‑i jie̱ꞌe̱ꞌ ya̱ sáꞌá nú tiñu ya̱ jíníꞌ nú ya̱ íyó núne saꞌá nú maa. Jee kúvi‑i ñanitáꞌán‑ó jie̱ꞌe̱ꞌ ni̱ꞌi̱ꞌ Cristo. 12Jee sáá sukuán sáꞌá rán kua̱chi nu̱u̱nꞌ rá ñanitáꞌán rán, chi sáꞌá rán ya̱ ñúꞌún kuáchi iniꞌ ráa chi káꞌvi iniꞌ ráa ya̱ sáꞌá ráa kua̱chi jie̱ꞌe̱ꞌ táyáꞌ iniꞌ ráa ya̱ ntiáꞌan kujia va̱ꞌa iniꞌ ráa jín Tu̱ꞌun Ndiosíꞌ, jee suni sukuán sáꞌá rán kua̱chi nu̱u̱nꞌ Cristo. 13Jee saáva, retú jie̱ꞌe̱ꞌ yájíꞌ ni̱ꞌ ku̱ñu jee sukuán sikíninkava ni̱ꞌ ñanitáꞌán‑ó nu̱u̱nꞌ kua̱chi jee ni nsáꞌ kajiꞌ kuitɨꞌ ni̱ꞌ ka̱ꞌ ku̱ñu ni tékúꞌ ni̱ꞌ, sáva ntu̱ví saꞌá ni̱ꞌ ya̱ kininkava ñanitáꞌán‑ó nu̱u̱nꞌ kua̱chi.

Currently Selected:

1 Corintios 8: meh

Highlight

Copy

Compare